“ʻOku Maʻu ʻe Siosefa mo ʻŌliva ʻa e Ngaahi Kī ʻo e Lakanga Fakataulaʻeikí,” Ngaahi Talanoa ʻo e Tokāteline mo e Ngaahi Fuakavá (2024)
“ʻOku Maʻu ʻe Siosefa mo ʻŌliva ʻa e Ngaahi Kī ʻo e Lakanga Fakataulaʻeikí,” Ngaahi Talanoa ʻo e Tokāteline mo e Ngaahi Fuakavá
ʻEpeleli 1836
ʻOku Maʻu ʻe Siosefa mo ʻŌliva ʻa e Ngaahi Kī ʻo e Lakanga Fakataulaʻeikí
Ko e ʻaʻahi ʻa Sīsū Kalaisi mo e kau ʻāngeló ki he Temipale Ketilaní
Hili ha uike ʻe taha mei hono fakatapui ʻo e Temipale Ketilaní, naʻe fakataha ha Kāingalotu ʻe toko tahaafe ʻi he temipalé ke moihū ki he Fakamoʻuí. Ko e Sāpate Toetuʻú ia. Naʻe ʻoatu ʻe Siosefa Sāmita, ʻŌliva Kautele, mo e Kau ʻAposetolo ʻe Toko Hongofulu Mā Uá ʻa e sākalamēnití ki he Kāingalotú.
Tokāteline mo e Ngaahi Fuakava 110, ʻuluʻi vahé; Kau Māʻoniʻoní, 1:262
Hili e sākalamēnití, naʻe maʻu ʻe Siosefa mo ʻŌliva ha feituʻu lōngonoa ʻi he temipalé, ʻi mui ʻi he puipuí, ke lotu.
Tokāteline mo e Ngaahi Fuakava 110, ʻuluʻi vahé; Kau Māʻoniʻoní, 1:262
ʻI he ʻosi ʻena lotú, naʻá na hanga hake. Naʻe tuʻu ʻa Sīsū Kalaisi ʻi hona ʻaó! Naʻá Ne ʻafioʻi ne ngāue mālohi ʻa e Kāingalotú ke langa ʻa e temipalé. Naʻá Ne folofola, “Kuó U tali ʻa e falé ni.” Naʻe fakahā ʻe Sīsū kia Siosefa mo ʻŌliva ʻe ʻomi ʻe he ngaahi tāpuaki ʻo e temipalé ha fiefia lahi ki he kakai tokolahi.
Tokāteline mo e Ngaahi Fuakava 110:1–10
Hili e mavahe ʻa Sīsuú, naʻe hā ʻa e palōfita ʻo e Fuakava Motuʻá, Mōsese, kia Siosefa mo ʻŌliva. Naʻá ne foaki kiate kinaua ʻa e ngaahi kī ʻo e lakanga fakataulaʻeikí ki hono tānaki ʻo ʻIsilelí. Naʻe ʻuhinga ʻeni te na lava ʻo tataki ʻa e ngāue ki hono vahevahe ʻo e ongoongoleleí. Te nau lava ʻo fekauʻi atu ha kau faifekau ʻi he funga ʻo e māmaní ke ʻomi e kakaí ki he Siasi ʻo e Fakamoʻuí.
Tokāteline mo e Ngaahi Fuakava 110:11
Hokó, naʻe hā mai ʻa e palōfita ko ʻIlaiasé. Naʻá ne foaki kia Siosefa mo ʻŌliva ʻa e ngaahi kī ke toe fakafoki mai ʻa e fuakava faka-ʻĒpalahamé. Naʻe ʻuhinga ʻeni ʻe lava ke maʻu ʻe he Kāingalotú mei he ʻEikí ʻa e fuakava tatau naʻe maʻu ʻe ʻĒpalahamé. Te nau maʻu ʻa e mālohi ke ʻomi ʻa e ongoongoleleí mo e ngaahi tāpuaki ʻa e ʻOtuá ki he kakai ʻi he feituʻu kotoa pē ʻi he ngaahi taʻu lahi ka hoko maí.
Tokāteline mo e Ngaahi Fuakava 110:12
Fakaʻosí, naʻe hā mai ʻa e palōfita ko ʻIlaisiaá. Naʻá ne foaki kia Siosefa mo ʻŌliva ʻa e ngaahi kī ʻo e lakanga fakataulaʻeikí ke silaʻi, pe fakatahaʻi, ʻa e ngaahi fāmilí ki ʻitāniti. ʻE tali ʻi he langí ʻa e ngāue naʻe fai ʻe he Kāingalotú ʻi he ngaahi temipalé. Kuo maʻu ʻeni ʻe he Siasí ʻa e mālohi ke fakahoko e ngāue ʻa e Fakamoʻuí mo teuteu ki Heʻene toe hāʻele mai ki he māmaní.