Sānuali–Siulai 1837

Kole Fakamolemole ʻa Paʻalé

ʻOku langaki ʻe he fakamoʻoni ʻa ha kaungāmeʻa ʻene tuí

ʻI he hokosia e taimi ke fanauʻi ai ʻe Fakafetaʻi mo Paʻale Pālati ʻena pēpeé, naʻá na foki mai ki ʻapi mei heʻena ngāue fakafaifekau ʻi Kānatá. Naʻá na maʻu ha kiʻi pēpē tangata moʻui lelei ʻo hangē pē ko ia naʻe talaʻofa ʻe he ʻEikí te na maʻú.

Kau Māʻoniʻoní, 1:295

Ko e meʻa fakamamahí, he naʻe mālōlō ʻa Fakafetaʻi ʻi he hili pē ha ngaahi houa siʻi mei hono fanauʻi ʻo e pēpeé. Naʻe ʻiloʻi ʻe Paʻale he ʻikai ke ne lava ʻo tokangaʻi e pēpeé taʻe kau ai ʻa Fakafetaʻi. Naʻá ne kole ki ha fefine ʻi Ketilani ke ne tokangaʻi e pēpeé kae foki ki Kānata ke fakaʻosi ʻene ngāue fakafaifekaú.

Kau Māʻoniʻoní, 1:295

ʻI Ketilaní, naʻe kamataʻi ʻe Siosefa Sāmita ha pangikē ke tānaki ha paʻanga ki he ngāue ʻa e ʻOtuá. Naʻá ne kole ki he kakaí ke tuku ke fakaʻaongaʻi ʻe he pangikeé ʻenau paʻangá kae lava ke nō ia ʻe he niʻihi kehé. Ka naʻe lahi e ngaahi ʻuhinga naʻe ʻikai maʻu ai ʻe he pangikeé ha paʻanga feʻunga pea naʻe pau ai ke tāpuni. Naʻe tōlalo foki mo ha ngaahi pangikē kehe ʻi he ʻIunaiteti Siteití.

Kau Māʻoniʻoní, 1:284–85, 289–93

Naʻe fakaʻau ke faingataʻa e moʻuí ki he Kāingalotú. Naʻe mole ʻa e ngāue ha niʻihi pea ʻikai ke nau maʻu ha paʻanga feʻunga ke fakatau ʻaki ha meʻakai pe vala. Naʻe ʻita ha kakai ʻe niʻihi kia Siosefa, ʻo aʻu pē ki ha niʻihi ʻo hono ngaahi kaungāmeʻa ofí. Naʻa nau pehē naʻe ʻikai ko ha palōfita moʻoni ʻa Siosefa koeʻuhí he naʻe mole ʻa e pangikeé.

Kau Māʻoniʻoní, 1:289–93, 297–300

Lolotonga e hoko ʻa e meʻá ni, naʻe foki mai ʻa Paʻale ki ʻapi mei heʻene ngāue fakafaifekaú. Naʻe hoko ʻa e ngaahi palopalema mo e pangikeé ke faingataʻa foki ai ʻa e moʻui ʻa Paʻalé. He ʻikai ke ne maʻu ha paʻanga feʻunga ke totongi ʻaki hono falé, pea ʻikai ha feituʻu ke ne nofo ai.

Kau Māʻoniʻoní, 1:295–96

Naʻe ʻita foki mo Paʻale kia Siosefa. Naʻá ne fai ha tohi kia Siosefa. Naʻá ne talaange kia Siosefa ʻokú ne kei tui pē ki he Tohi ʻa Molomoná. Ka naʻá ne toe lea ʻaki foki ha ngaahi meʻa taʻeʻofa fekauʻaki mo e Palōfitá. Naʻá ne talaange kia Siosefa naʻe hala ʻene fokotuʻu ʻa e pangikeé.

Kau Māʻoniʻoní, 1:296

Kimui ange aí, naʻe haʻu ha niʻihi ʻo e ngaahi kaungāmeʻa ʻo Paʻalé mei Kānata ki Ketilani. Naʻe akoʻi ange ʻe Paʻale ʻa e ongoongoleleí kiate kinautolu, pea naʻa nau fiefia ke toe feʻiloaki mo ia.

Kau Māʻoniʻoní, 1:305–06

Ka naʻa nau ʻohovale foki ʻi he mole ʻa e tui ʻa Paʻale mo ha niʻihi tokolahi, ko Siosefa Sāmitá ko ha palōfita ia.

Kau Māʻoniʻoní, 1:305–06

Ko e taha ʻo e ngaahi kaungāmeʻa ʻo Paʻale mei Kānatá, ko Sione Teila. ʻI he taimi naʻe mamata ai ʻa Paʻale kiate iá, naʻá ne talaange kia Sione ʻa ʻene ʻita ʻia Siosefa Sāmitá. Naʻá ne talaange kia Sione ke ʻoua te ne toe muimui kia Siosefa.

Kau Māʻoniʻoní, 1:306

Naʻe fakamanatu ʻe Sione kia Paʻale ko e taimi naʻá na ʻi Kānata aí, naʻe vahevahe ʻe Paʻale ʻene fakamoʻoni ko Siosefa Sāmitá ko ha palōfita moʻoni ia. Naʻe pehē ʻe Sione, “ʻOku ou maʻu ʻa e fakamoʻoni tatau ʻi he taimí ni. Kapau naʻe moʻoni ʻa e ngāué ʻi he māhina ʻe ono kuo ʻosí, ʻoku moʻoni ia ʻi he ʻahó ni. Kapau naʻe palōfita ʻa Siosefa Sāmita kimuʻa, ko ha palōfita ia ʻi he taimí ni.”

Kau Māʻoniʻoní, 1:306

Naʻe ʻiloʻi ʻe Paʻale naʻe moʻoni hono kaungāmeʻa ko Sioné. Naʻá ne ongoʻi fakatomala ʻi heʻene tohi ʻita kia Siosefá. Naʻá ne ʻiloʻi naʻe fai ʻe Siosefa hono lelei tahá ke fakahoko e ngāue ʻa e ʻEikí. Naʻe ʻikai ʻuhinga ʻa e ngaahi palopalema ʻi he pangikeé naʻe ʻikai ko ha palōfita moʻoni ʻa Siosefa ʻo Sīsū Kalaisi.

Kau Māʻoniʻoní, 1:309

Naʻe ʻalu ʻa Paʻale ki he ʻapi ʻo Siosefá. Naʻá ne kole fakamolemole kia Siosefa koeʻuhí ko e ngaahi meʻa taʻeʻofa naʻá ne lea ʻakí. Naʻe fakamolemoleʻi ʻe Siosefa ʻa Paʻale, lotua ia, mo tāpuakiʻi ia. Naʻe fakahoko ʻe Paʻale ha ngāue fakafaifekau lahi ange peá ne tala ki he kakai ʻi he funga ʻo e māmaní, ko Siosefa Sāmitá ko e palōfita ia ʻa e ʻEikí.

Tokāteline mo e Ngaahi Fuakava 64:7–11; Kau Māʻoniʻoní, 1:309