“ʻOku Vahevahe ʻe Samuela Sāmita ʻa e Tohi ʻa Molomoná,” Ngaahi Talanoa ʻo e Tokāteline mo e Ngaahi Fuakavá (2024)
“ʻOku Vahevahe ʻe Samuela Sāmita ʻa e Tohi ʻa Molomoná,” Ngaahi Talanoa ʻo e Tokāteline mo e Ngaahi Fuakavá
1830–1832
ʻOku Vahevahe ʻe Samuela Sāmita ʻa e Tohi ʻa Molomoná
ʻOku faitāpuekina ʻe ha tohi ʻe taha ha moʻui ʻa ha tokolahi
Naʻe ui ʻe he ʻEikí ʻa Samuela Sāmita, ko e tehina ʻo Siosefá, ʻi ha misiona ke vahevahe ʻa e ongoongoleleí. Naʻe fetaulaki ʻa Samuela mo Sione mo Lota Kulini peá ne fakamatala ange fekauʻaki mo e Tohi ʻa Molomoná. Ko ha tangata malanga ʻa Sione ʻi ha siasi ʻe taha. Naʻá ne pehē te ne toʻo ha tatau ʻo e tohí ʻo vakai pe ʻe fie lau ia ʻe ha taha ʻi hono siasí.
Kau Māʻoniʻoní, 1:99
Hili ha ngaahi māhina siʻi, naʻe foki mai ʻa Samuela. Naʻe pehē ʻe Lota naʻe ʻikai maʻu ʻe hono husepānití ha taha naʻá ne fie lau ʻa e Tohi ʻa Molomoná. Naʻá ne fakafoki ia kia Samuela.
Kau Māʻoniʻoní, 1:99
Naʻe loto-mamahi ʻa Samuela. Naʻá ne tafoki ke ʻalu, ka naʻe taʻofi ia ʻe Lota. Naʻá ne pehē kuó ne lau ʻa e Tohi ʻa Molomoná, pea naʻá ne saiʻia ai.
Kau Māʻoniʻoní, 1:99
Naʻe fakahā ʻe he Laumālie Māʻoniʻoní kia Samuela ke fakafoki ʻa e tohí kia Lota. Naʻe talaange ʻe Samuale kiate ia, “Kole ki he ʻOtuá ha fakamoʻoni.” Naʻá ne akoʻi ʻa Lota fekauʻaki mo e Laumālie Māʻoniʻoní mo e founga ke ne ʻiloʻi ai pe ʻoku moʻoni ʻa e Tohi ʻa Molomoná.
Molonai 10:3–5; Kau Māʻoniʻoní, 1:99–100
Naʻe foki ʻa Samuela ki ʻapi mei heʻene ngāue fakafaifekaú. Naʻe teʻeki ai ke ne papitaiso ha taha, pea ko ha niʻihi tokosiʻi pē naʻa nau fie ʻilo ki he Tohi ʻa Molomoná.
Naʻe lotu ʻa Lota mo Sione pea naʻe talaange ʻe he Laumālie Māʻoniʻoní kiate kinaua ʻoku moʻoni ʻa e Tohi ʻa Molomoná. Naʻe vahevahe leva ʻe Lota ʻa e tohí mo hono tuongaʻane ko Pilikihami ʻIongí.
Kau Māʻoniʻoní, 1:100
Naʻe fekumi ʻa Pilikihami mo hono kaungāmeʻa ko Hiipa Kimipoló ki he Siasi moʻoni ʻo Sīsuú. Naʻá na lau ʻa e Tohi ʻa Molomoná. Naʻá na ako mo lotua ʻa e ongoongolelei ʻa Sīsū Kalaisí ʻi ha meimei taʻu ʻe ua.
Lolotonga ʻa e taimi ko ʻení, naʻe ʻalu ʻa Pilikihami mo Hiipa ki he ngaahi fakataha ʻa e Siasí mo hona ongo fāmilí. ʻI ha taha ʻo e ngaahi fakatahaʻanga ko ʻení, naʻe fanongo ai ʻa Pilikihami ki hano vahevahe ʻe ha faifekau ʻene fakamoʻoní. Naʻe ʻikai ko ha tokotaha lea lelei ʻa e faifekaú, ka naʻe ongoʻi ʻe Pilikihami ʻa e Laumālie Māʻoniʻoní ʻi heʻene leá. Naʻe ʻiloʻi ʻe Pilikihami naʻá ne tala ʻa e moʻoní.
Naʻe papitaiso ʻa Pilikihami, Hiipa, mo hona ongo uaifí ko Meliame mo Vilaté. Naʻá na ʻofa ʻi he Fakamoʻuí mo ʻEne ongoongoleleí. Hili ha ngaahi taʻu mei ai, naʻe ui ʻe he ʻEikí ʻa Pilikihami mo Hiipa ke na hoko ko ʻEne Ongo ʻAposetolo pea ke na ngāue fakafaifekau. Naʻe tokolahi ha kakai naʻa nau kau mai ki he Siasi ʻo e Fakamoʻuí koeʻuhí he naʻe vahevahe ʻe Samuela ʻa e Tohi ʻa Molomoná.
Tokāteline mo e Ngaahi Fuakava 124:127–29; 126; Kau Māʻoniʻoní, 1:215–16