Talateu

Fekauʻaki mo e Tokāteline mo e Ngaahi Fuakavá

ʻOku toe folofola mai ʻa e ʻEikí

ʻOku ʻofa ʻa e Tamai Hēvaní ʻiate kitautolu. ʻOkú Ne finangalo ke tau fai ha ngaahi fuakava, pe ngaahi palōmesi mo Ia kae lava ke Ne tāpuakiʻi kitautolu. Naʻá Ne fekauʻi mai Hono ʻAlo ko Sīsū Kalaisí, ke hoko ko hotau Fakamoʻui mo tokoniʻi kitautolu ke tau toe foki hake kiate Ia.

ʻOku fekauʻi mai foki ʻe he ʻOtuá ha kau palōfita ke akoʻi kitautolu fekauʻaki mo Sīsū Kalaisi mo ʻEne ngaahi fekaú. ʻOku tauhi ʻa e kau palōfitá kia Sīsū Kalaisi mo tokoni ke tataki Hono Siasí.

ʻOku fakahā ʻe Sīsū ki he kau palōfitá ʻa e meʻa ke akoʻi mai kiate kitautolú. ʻOku hiki ʻa e ngaahi lea ʻa e kau palōfita mei he kuonga muʻá ʻi he ngaahi folofola hangē ko e Tohi Tapú mo e Tohi ʻa Molomoná.

Hili ha ngaahi taʻu lahi mei he ʻi māmani ʻa Sīsuú, naʻe ʻikai ke ʻi ai ha kau palōfita. Naʻe ʻikai ke fakahoko mo tauhi ʻe he kakaí ʻa e ngaahi fuakava mo e ʻOtuá. Naʻe ʻikai ke ʻi māmani ʻa e Siasi ʻo Sīsū Kalaisí.

Ka naʻe ui leva ʻe he ʻOtuá ʻa Siosefa Sāmita ke hoko ko ha palōfita. Naʻe kei talavou pē ʻa Siosefa, ka naʻe ʻi ai ha meʻa mahuʻinga ʻa e ʻOtuá ke ne fakahoko.

Naʻe akonaki ʻa Siosefa Sāmita fekauʻaki mo Sīsū. Naʻá ne tokoni ke fokotuʻu ʻa e Siasi ʻo Sīsuú. Naʻe akoʻi ʻe Sīsū ʻa ʻEne ongoongoleleí kia Siosefa Sāmita mo e founga ke tataki ʻaki Hono Siasí.

ʻOku tohi ʻi he Tokāteline mo e Ngaahi Fuakavá ha ngaahi meʻa lahi naʻe fakahā ʻe Sīsū kia Siosefa Sāmita. Ko e Tokāteline mo e Ngaahi Fuakavá ko ha tohi folofola ia hangē ko e Tohi Tapú mo e Tohi ʻa Molomoná.

ʻOku fakamatala ʻa e Ngaahi Talanoa ʻo e Tokāteline mo e Ngaahi Fuakavá ki he founga naʻe toe ʻomai pe fakafoki mai ai ʻe Sīsū ʻa Hono Siasí, ʻi he tokoni mei he Palōfita ko Siosefa Sāmitá pea mo ha niʻihi kehe. ʻOku ui ʻa e kāingalotu ʻo e Siasí ko e Kau Māʻoniʻoni. ʻOku fakahaaʻi ʻe he ngaahi talanoá ni ʻoku ʻofa ʻa e ʻOtuá ʻi Heʻene fānau ʻi he funga kotoa ʻo e māmaní. ʻOkú Ne finangalo ke tāpuakiʻi kitautolu ʻi heʻetau fakahoko ʻa e ngaahi fuakava mo Iá.