Sepitema 1830

Hailame Peisi mo e Fakahaá

ʻOku ako ʻa e Kāingalotú ki he founga ʻoku tataki ai ʻe he ʻOtuá Hono Siasí

Ko Hailame Peisí ko ha kaungāmeʻa ia ʻo Siosefa Sāmita mo ʻŌliva Kautele. Naʻá ne hoko foki ko e taha ʻo e kau fakamoʻoni ʻe toko valu ʻo e ʻū lauʻi peleti koulá. Naʻe maʻu ʻe Hailame ha foʻi maka, pea naʻá ne tui naʻe fakaʻaongaʻi ia ʻe he ʻOtuá ke ʻoange kiate ia ha ngaahi pōpoaki, pe ngaahi fakahā, maʻá e Siasí. Naʻe tui ʻa ʻŌliva mo e Kāingalotu kehé naʻe haʻu ʻa e ngaahi fakahā ʻa Hailamé mei he ʻOtuá.

Tokāteline mo e Ngaahi Fuakava 28, ʻuluʻi vahé; Kau Māʻoniʻoní, 1:97

Naʻe ongo ʻa e ngaahi fakahā ʻa Hailamé ʻo hangē ko e folofolá. Ka naʻe kehe ia mei he meʻa ʻoku akoʻi ʻe he Tohi Tapú. Naʻa nau kehe foki mei he meʻa naʻe folofola ʻaki ʻe he ʻEikí ki he Palōfita ko Siosefá. Naʻe ʻikai fakapapauʻi ʻe Siosefa pe ko e hā ʻa e meʻa ke faí.

Kau Māʻoniʻoní, 1:97

Naʻe ʻā ʻa Siosefa ʻi he meimei poó kakato ʻo kole tokoni ki he ʻOtuá. Naʻá ne hohaʻa naʻá ne fai ha meʻa ʻoku hala mo ʻai ke loto-mamahi hono ngaahi kaungāmeʻá.

Kau Māʻoniʻoní, 1:97

Naʻe fiemaʻu ʻe Siosefa ʻa e kakaí ke nau fekumi ki ha fakahā ki heʻenau moʻuí. Ka ʻe fakatupu puputuʻu kapau ʻe feinga ʻa e tokotaha kotoa pē ke maʻu ha fakahā maʻá e Siasí fakakātoa.

Kau Māʻoniʻoní, 1:97

Ne faifai pea foaki ʻe he ʻEikí ha fakahā kia Siosefa ke vahevahe mo ʻŌliva. Naʻe folofola ʻa e ʻEikí ko e palōfitá pē te ne lava ʻo maʻu ʻa e fakahā mo e ngaahi fekau maʻá e Siasí fakakātoa. Naʻá Ne folofola ʻoku totonu ke akoʻi ʻeni ʻe ʻŌliva kia Hailame.

Tokāteline mo e Ngaahi Fuakava 28:2, 6–13

Naʻe finangalo e ʻEikí ke mahino kia Hailame te ne lava ʻo maʻu ha fakahā ki heʻene moʻuí. Ka ko e fakahā maʻá e Siasí, ʻe haʻu ia ki he palōfita ʻa e ʻEikí. Naʻe fakafanongo ʻa Hailame kia ʻŌliva peá ne fakatomala. Naʻe mahino lelei ange ki he Kāingalotú ʻi he taimí ni ʻa e founga ʻoku tataki ai ʻe he ʻEikí Hono Siasí.

Kau Māʻoniʻoní, 1:98