Mga Kapanguhaan sa Pagpanambag

Daghang mga miyembro nag-atubang og lain-laing mga hagit. Isip lider, tigpangalagad nga brother o sister, o mapinanggaon nga sakop sa pamilya o higala, ikaw adunay oportunidad sa paghatag og tabang. Samtang ikaw mangalagad sa panginahanglan sa uban, imo silang matabangan sa pagsinati og hingpit nga kalipay ug katumanan samtang makasabot sila ug modawat sa responsibilidad diha sa ilang kaugalingon ug sa ilang mga pamilya. Samtang ikaw magserbisyo, ikaw makigtambayayong niadtong kinsa nagtinguha og giya ug kinsa adunay lisod nga personal nga mga problema. Samtang ikaw mangalagad, sa kanunay tinguhaa ang paglihok sa pamaagi nga nahiuyon sa plano sa Dios alang sa maong tawo ug sa imong kaugalingon.

Samtang ang mga indibidwal magtinguha og mga solusyon sa ilang personal nga mga problema, makakita sila og tabang ug pagkaayo pinaagi kang Jesukristo ug sa Iyang matubsanong gahum. Samtang sila mougmad sa hugot nga pagtuo Kaniya, Siya molig-on kanila diha sa ilang mga panahon sa panginahanglan. Dugang pa, ang Iyang gahum magdala og paglaum diha sa ilang kinabuhi samtang makasabot sila nga Siya andam nga motabang ug moluwas.

Sa daghang sitwasyon, ang mga indibidwal makasulbad sa ilang mga problema pinaagi sa personal nga pagtinguha og tabang sa Ginoo ug paggamit sa ilang kaugalingon nga mga kapanguhaan. Awhaga sila sa pagpamalandong ug pag-ampo mahitungod sa ilang mga problema. Tabangi sila nga makakita og tambag diha sa mga kasulatan ug diha sa mga pulong sa buhi nga mga propeta. Awhaga sila sa pagdangop ngadto sa mga sakop sa pamilya ug mga higala alang sa mga tubag ug suporta. Dapita sila sa pagpangita og mga kapanguhaan diha sa ilang mga komunidad nga makatabang kanila sa ilang piho nga mga hagit.

Gawas sa tabang nga imong ikahatag, daghan pa nga laing mga kagamitan [tools] ug mga kapanguhaan ang makatabang sa mga indibidwal sa pagkahimong labaw nga makabarog pinaagi sa kinaugalingong paningkamot sa espiritwal, emosyonal, ug temporal nga paagi. Sa mga sitwasyon diin sila mobati nga ang ilang mga hagit bug-at ra, sa mainampoong paagi pakigtambayayong ubos sa direksyon sa bishop, sa presidente sa Relief Society, o sa presidente sa korum sa mga elder sa pagtabang kanila. Ang mga panalangin nga may kalabotan sa inyong indibidwal nga mga calling ug interes makatabang kanimo sa pagtabang sa uban diha sa ilang mga paningkamot sa pagdawat og personal nga pagpadayag sa pagtubag sa mga hagit sa ilang kinabuhi.

Ang mga hilisgotan nga ania niini nga website gihimo aron sa pag-abag kanimo sa pagtabang sa mga indibidwal nga tun-an ang ilang mga problema diha sa ilang mga hunahuna (tan-awa sa Doktrina ug mga Pakigsaad 9:8). Kini nga mga kapanguhaan naghatag og access ngadto sa mga pagtulon-an sa ebanghelyo, sa tambag sa mga lider sa Simbahan, sa mga kasulatan, sa mga kagamitan sa pagtimbangtimbang [assessment tools], ug sa ubang mga kapanguhaan sa Simbahan.

Samtang magtabang ka sa bisan asa niining sensitibo o lisod nga mga sitwasyon, ikonsiderar ang mosunod nga giya nga mga baruganan:

Mag-una ang gugma. Ang tanang mga anak sa Dios takos alang sa gugma ug kamabination. Tingali dili kita makasabot sa indibidwal nga mga kasinatian sa usa ka tawo, apan sa kanunay makapakita kita og gugma.

Paminawa ug sabta. Matnguni ang dili paghimo og mga pagpangagpas mahitungod sa mga pagbati o kinaiya. Pangutana ug paminaw, dayon tubag dala ang interes ug empatiya. Samtang maminaw ka, makapalambo ka og pagsalig ug makabaton og panabot kon unsaon sa pagpangalagad.

Itudlo ang kamatuoran. Ang tinuod nga mga baruganan maghatag og pundasyon alang sa matinud-anong mga pagpili. Samtang gigiyahan sa Espiritu, sa mapinanggaong paagi itudlo kana nga mga kamatuoran nga makatabang sa maong tawo sa pagpabilin diha sa dalan padulong sa walay kataposang kalipay.

Alimaha ang pagtuo. Ang pagtuo manukad sa pagsalig gikan sa usa ka mapinanggaong Langitnong Amahan, sa usa ka panabot sa Pag-ula ni Jesukristo, sa pagsalig sa giya sa Espiritu Santo, ug sa kasiguroan nga ang Dios adunay plano alang sa mahangturon nga pag-uswag sa matag tawo. Awhaga ang mga indibidwal sa pag-alima sa ilang personal nga pagtuo pinaagi sa inadlaw-adlaw nga pag-ampo ug pagtuon sa kasulatan.

Pangalagad. Ang paglihok pinaagi sa gugma, pagpaminaw aron makasabut, ug pagtinguha og direksyon gikan sa Espiritu makahatag og mas lawom nga panabut sa pinakamaayong paagi aron mapangalagad sa mapinanggaong paagi sa mga panginahanglan sa indibidwal.

I-download ang mga Video alang sa Pagbansay

Ang mga kapanguhaan anaa alang sa mosunod nga mga hilisgutan: