li k’uula’al Jesus b’atb’o sa’ saqi t’ikr ut yokyo sa’ li ichaj

Xb’aan naq yo’lajenaq choq’ qe jun li k’uula’al, xb’aan laj Simon Dewey

19–25 diciembre

Li Ralankil

A’an a’in li xoo’oyb’enink wi’, ut a’an tooxkol

Eb’ li profeet sa’ li Najter Chaq’rab’ ke’royb’eni chi saheb’ xch’ool lix yo’lajik li Mesias (chi’ilmanq Isaias 25:9). Naq nakakawresi aawib’ re k’utuk sa’ li kutankil a’in re Ralankil, k’oxla chan ru taatenq’aheb’ li kok’al chixtawb’al xsahileb’ xch’ool rik’in lix yo’lajik li Kolonel Jesukristo.

Tz’iib’a li nakak’oxla

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xwotz k’a’ru neke’xnaw chirix lix yo’lajik li Jesukristo. Naq te’xye xk’ab’a’ junaq kristiaan malaj k’a’aq re ru sa’ li seraq’, patz’ reheb’ naq te’xyiib’ xjalam-uuch chiru li pizarron. Patz’ reheb’ k’a’ru nawulak chiruheb’ sa’ li seraq’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Li Najter Chaq’rab’ nikinixtzol chirix li Jesus.

Tenq’aheb’ li kok’al chixjayalinkileb’ rib’ rik’in li Kolonel Jesukristo jo’ lix yaalal xninq’ehinkil ru li Ralankil. Naru nakab’aanu a’an rik’in roksinkileb’ raqal re li Najter Chaq’rab’ li neke’jultikan chirix a’an.

Kok’ k’anjel naru chi b’aanumank

• Patz’ reheb’ li kok’al naq sa’ junjunqal te’xye lix k’ab’a’ ut ye reheb’ naq naru nokok’ab’a’iman rik’in jalan chik k’ab’a’ej, jo’ hermana, hermano, malaj amiiw. Patz’ reheb’ naq te’xk’oxla xkomon chik. Yaab’asi Isaias 9:6 reheb’ li kok’al, ut taajultikaheb’ li k’ab’a’ej neke’oksiman rik’in li Jesukristo: “Xnimal ru aj k’ehol na’leb’, li Dios q’axal kaw rib’, Yuwa’b’ej chi junelik, Xnimal ru aj k’ehol tuqtuukil usilal.” Tenq’aheb’ chixtawb’aleb’ ru k’a’ru neke’xye qe li k’ab’a’ej a’an chirix li Jesus.

• Ke’ reheb’ li junjunq chi kok’al jun chahim chiru hu ut patz’ reheb’ naq te’xtaqsi chi kutankil naq taayaab’asi li ch’ol aatin a’in re Numeros 24:17: “jun chahim xwakliik chaq rik’in laj Jakob.” Patz’ reheb’ li kok’al naq te’xwotz chan ru naq li Jesus chanchan chik jun li chahim nalemtz’un choq’ re chixjunil li ruchich’och’. B’ichahomaq jun li b’ich na’aatinak chirix li chahim kik’utun naq kiyo’la li Jesus, maare “Sa’ choxa xlemtz’un taq’a” (B’ichleb’aal choq’ reheb’ li Kok’al, 24) malaj “Naq kiyo’la” (Eb’ li B’ich, 134).

Li Jesukristo a’an lin Kolonel.

Li Ralankil a’an jun kutankil re xninq’ehinkil moko ka’aj ta wi’ lix yo’lajik li Jesus, lix yu’am ut lix k’anjel aj b’an wi’ jo’ aj Kolol re li ruchich’och’. Chan ru taatenq’aheb’ li kok’al chireek’ankil xsahileb’ xch’ool ut xb’antioxihomeb’ chirix lix tojb’al rix li maak xb’aan li Jesukristo?

Kok’ k’anjel naru chi b’aanumank

• Patz’ reheb’ li kok’al naq te’xk’oxla junaq k’a’aq re ru neke’royb’eni chi saheb’ xch’ool. Ch’olob’ naq eb’ li tiikil kristiaan sa’ li Najter Chaq’rab’ ke’royb’eni chi saheb’ xch’ool lix yo’lajik li Jesukristo. Yaab’asi Isaias 25:9 reheb’ li kok’al ut patz’ reheb’ naq te’xka’suti li ch’ol aatin “A’an a’in li Qaawa’ li xoo’oyb’enink wi’, qanimaaq xloq’al ut chisaho’q li qach’ool xb’aan naq a’an xkolok qe.” Wotz rik’ineb’ k’a’ut naq na’ux li saho’k xb’aan xyo’lajik li Kristo. Patz’ reheb’ naq te’xwotz li reek’ahom chirix li Kolonel.

• B’ichahomaq jun li b’ich na’aatinak chirix xyo’lajik li Jesus, maare “Sa’ xwa’leb’aal xul” (B’ichleb’aal choq’ reheb’ li Kok’al, 26–27) malaj “Ab’ihomaq xbʼichebʼ li anjel” (Eb’ li B’ich, 132). Tenq’aheb’ li kok’al chixtawb’aleb’ ch’ol aatin sa’eb’ li b’ich a’an li neke’aatinak chirix li Kolonel ut li osob’tesiik naqak’ul sa’ xk’ab’a’ a’an.

reetalil li k’utuk

Xk’utb’al li tzol’leb’: Kok’al ak ninqeb’

Li Najter Chaq’rab’ nikinixtzol chirix li Jesukristo, li Mesias li yeeb’il resil.

Li Najter Chaq’rab’ moko yal jun ch’uut ta chi seraq’ ch’ina useb’; li rajom, jo’ chixjunileb’ li loq’laj hu, a’an xch’olob’ankil xyaalal li Jesukristo. Tenq’aheb’ li kok’al chixtzolb’al xtawb’al a’an sa’ li Najter Chaq’rab’.

Kok’ k’anjel naru chi b’aanumank

• Patz’ reheb’ li kok’al naq te’xtz’iib’a chixjunileb’ lix k’ab’a’ li Jesukristo li te’xtaw sa’ Moises 7:53; Salmos 23:1; Job 19:25; Isaias 7:14; 9:6; 12:2; Amos 4:13; ut Sakarias 14:16. Wi neke’raj, k’eheb’ chi k’anjelak sa’ ka’kab’il. Patz’ reheb’ naq te’xwotz li xex’tz’iib’a chirib’ileb’ rib’. K’a’ru naqatzol chirix li Kolonel rik’ineb’ li junjunq chi k’ab’a’ej a’in?

• K’ut chiruheb’ li kok’al junjunq li k’a’aq re ru neke’oksiman sa’ Ralankil (malaj xjalam-uucheb’), maare jun chahim, li luz, malaj jun maatan. Patz’ reheb’ chan ru naq li k’a’aq re ru a’an neke’xjultika qe li Kolonel. Ch’olob’ naq sa’eb’ li loq’laj hu neke’oksiman li eetalil re qatzolb’al chirix li Jesukristo. Patz’ reheb’ li kok’al naq te’xsik’ sa’ jun malaj wiib’ oxib’ reheb’ li raqal a’in junaq na’leb’ li nareetali li Jesukristo: Genesis 22:8; Exodo 17:6; Salmos 18:2; 27:1 (chi’ilmanq xkomon chik sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Chan ru naq li Jesus chanchan chik jun li karneer, li ha’, jun li pek, jun kawil na’ajej, malaj li saqen?

• Naq naraqe’ li tzolok sa’ li Najter Chaq’rab’ chiru li chihab’ a’in, patz’ reheb’ li kok’al naq te’xwotz li seraq’ malaj raqal li nawulak chiruheb’ sa’ li Najter Chaq’rab’. K’a’ru neke’xk’ut chiqu li seraq’ malaj li raqal a’an chirix li Jesukristo? K’a’ut naq naqab’antioxi li Najter Chaq’rab’?

Li Jesukristo a’an laj Kolol we ut laj Tojol wix.

Naq naqaninq’ehi lix yo’lajik li Jesukristo, naru ajwi’ nasaho’ qach’ool chirix lix yu’am ut lix mayej re xtojb’al qix. Chan ru taawoksiheb’ li raqal re li Najter Chaq’rab’ re xtenq’ankileb’ li kok’al chixk’ojob’ankil lix paab’aaleb’ chirix lix Kolonel ut laj Tojol rixeb’?

Kok’ k’anjel naru chi b’aanumank

• Ilomaq Isaias 7:14 ut patz’ reheb’ li kok’al naq te’xwotz k’a’ru neke’xnaw chirix lix yo’lajik li Kristo. Malaj ut k’ut li video “La Natividad” (ChurchofJesusChrist.org), ut patz’ reheb’ li kok’al naq te’xsik’ ru jun li kristiaan sa’ li video ut te’xwotz k’a’ ta wi’ ru kireek’a li kristiaan a’an naq neke’xk’oxla. Wotz lix nawom aach’ool chirix li Kolonel ut patz’ reheb’ li kok’al naq te’xwotz ajwi’ li reheb’.

• Re xtenq’ankileb’ li kok’al chixtawb’al ru chi us lix k’anjel li Jesukristo jo’ li qaKolonel, patz’ reheb’ naq te’ril Isaias 25:8–9; 53:3–5; ut Oseas 13:14. K’a’ru neke’xk’ut chiqu li raqal a’in chirix li qakolb’al xb’aan li Kolonel? Chan ru “naq taasaho’q qach’ool xb’aan naq a’an xkolok qe”? (Isaias 25:9).

• B’ichahomaq jun li b’ich na’aatinak chirix lix rahom li Jesukristo choq’ qe, maare “Sa’ xwa’leb’aal xul” (B’ichleb’aal choq’ reheb’ li Kok’al, 26–27) malaj “Sachso ninkana” (Eb’ li B’ich, 118). Patz’ reheb’ li kok’al naq te’xwotz ch’ol aatin li natenq’ank reheb’ chireek’ankil xrahomeb’ choq’ re li Kolonel.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al malaj rik’in jun ramiiweb’ junaq na’leb’ xe’xtzol chirix li Jesukristo sa’ li Najter Chaq’rab’. Waklesi xch’ooleb’ chixtzolb’al li Ak’ Chaq’rab’ chiru li xamaan a’in.

Xkawresinkil qib’ jo’ aj k’utunel

Kawresi jun na’ajej b’ar wi’ taa’eek’amanq li Musiq’ej. Wan naab’al na’leb’ chan ru naru nakab’oq li Musiq’ej sa’ li tzoleb’aal. Li b’ich sa’ xtiklajik naru naxb’oq li oxloq’ink. Li aatin re rahok ut xnawom ch’oolej naru neke’xkawresi jun q’ixil ut musiq’ejil sutam. K’oxla rik’in tijok k’a’ru taab’aanu re xyoob’ankil jun na’ajej choq’ re li Musiq’ej sa’ laa tzoleb’aal. (Chi’ilmanq Li k’utuk jo’ li Kolonel, 15.)

perel re kok’ k’anjel: Li Najter Chaq’rab’ nikinixtzol chirix li Jesus