estatua re Kristo

12–18 diciembre

Malakias

“Laa’in jwal nekexinra,” chan li Qaawa’ ”

Li Qaawa’ naxraheb’ li kok’al nakatzoleb’. Chan ru taatenq’aheb’ chireek’ankil lix rahom a’an naq yooqat chixk’utb’al li tzol’leb’ natawman sa’ lix hu laj Malakias?

Tz’iib’a li nakak’oxla

reetalil li wotzok

Xkanab’ankileb’ chi wotzok

Yaab’asi li ch’ol aatin a’in sa’ Malakias 1:2: “Laa’in jwal nekexinra, chan li Qaawa’.” Patz’ reheb’ li kok’al naq te’xwotz chan ru neke’xnaw naq raab’ileb’ xb’aan li Qaawa’. Chirix naq li junjunq tixwotz xna’leb’, b’antioxin re ut wotz lix nawom aach’ool chirix lix rahom li Qaawa’ choq’ re li ch’ina al a’an.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Malakias 3:10–12

Lin Choxahil Yuwa’ tinrosob’tesi naq nintoj lin lajetqil.

Us ta eb’ li kok’al toj maji’ neke’trab’ajik re naq te’xk’ul li tumin, naru neke’tzolok chirix li osob’tesiik neke’k’ulman xb’aan xtojb’al li lajetqil.

Kok’ k’anjel naru chi b’aanumank

• Tenq’aheb’ li kok’al chirajlankil lajeeb’ li kok’ k’a’aq re ru, maare li kok’ tumin wankeb’ sa’ li perel re kok’ k’anjel re li xamaan a’in. Patz’ reheb’ naq te’xjach ru jun reheb’ li k’a’aq re ru rik’ineb’ lix komon ut ch’olob’ naq a’an chanchan li lajetqil naqak’e re li Qaawa’. Naqak’e xlajehil raqal li naqak’ul re li Qaawa’. Wotz xnawom aach’ool naq li Qaawa’ nokorosob’tesi naq naqatoj li lajetqil. B’ichahomaq jun li b’ich na’aatinak chirix li lajetqil, maare “Nawaj xk’eeb’al lin lajetqil” (B’ichleb’aal choq’ reheb’ li Kok’al, 143).

• Yiib’ jun ventaan chiru li pizarron ut yaab’asi Malakias 3:10 reheb’ li kok’al. Patz’ reheb’ li kok’al naq te’xk’ut chiruq’ li ventaan naq te’rab’i li ch’ol aatin “tinte li choxa.” Ch’olob’ naq a’an naraj naxye naq li qaChoxahil Yuwa’ naxk’e ninqi osob’tesiik qe naq naqatoj li lajetqil. Naq eb’ li kok’al te’b’onoq sa’ li perel re kok’ k’anjel re li xamaan a’in, aatinan chirix junjunq xyaalal naq naqatoj li lajetqil.

• Wotz junaq seraq’ sa’ li hu Amigos malaj re laa yu’am chirix xtojb’al li lajetqil. Patz’ reheb’ li kok’al naq te’ab’inq chi us re naq te’xk’e reetal k’a’ru li osob’tesiik neke’k’ulman xb’aan xtojb’al li lajetqil.

Malakias 4:5–6

Tz’apb’ilo sa’ junajil jo’ junkab’al sa’ li santil ochoch.

B’antiox re lix laawil li tijonelil re tz’apok sa’ junajil kixk’e laj Elias re laj Jose Smith sa’ li santil ochoch re Kirtland, eb’ li junkab’al naru neke’ch’utub’aak sa’ li junelik q’e kutan. Naq taak’ut li yaal a’an, weent taab’aanu rik’in li reek’ahomeb’ li kok’al li maare maji’ tz’apb’ileb’ sa’ junajil sa’ li santil ochoch.

Kok’ k’anjel naru chi b’aanumank

• Aatinan rik’ineb’ li kok’al chirix laa rahom choq’ re laa junkab’al; k’ut junaq xjalam-uuch, wi naru. Patz’ reheb’ junjunq li kok’al naq te’xwotz k’a’ru neke’reek’a choq’ reheb’ lix junkab’al. B’ichahomaq jun li b’ich na’aatinak chirixeb’ li junkab’al, maare “Taaruuq toowanq aran sa’ choxa” (Eb’ li B’ich, 193), ut ch’olob’ xyaalal naq li qaChoxahil Yuwa’ naraj naq eb’ li junkab’al te’tz’ape’q sa’ junajil ut a’an aj-e naq wankeb’ li santil ochoch. Tenq’aheb’ li kok’al chixtawb’al ru naq sa’ xk’ab’a’ li Jesukristo tooruuq chi tz’ape’k sa’ junajil rik’ineb’ li qajunkab’al ink’a’ xe’ru chi ok sa’ li santil ochoch sa’eb’ lix yu’am. Patz’ reheb’ naq te’xyiib’ jun xjalam-uuch lix junkab’aleb’ chi ch’utch’uukeb’ sa’ choxa.

reetalil li k’utuk

Xk’utb’al li tzol’leb’: Kok’al ak ninqeb’

Malakias 3:8–12

Lin Choxahil Yuwa’ tinrosob’tesi naq nintoj lin lajetqil.

Xtojb’al li lajetqil mas wi’chik rilom rik’in li qapaab’aal chirix li qaChoxahil Yuwa’ ut li Jesukristo ut ink’a’ chirix tumin. K’a’ru neke’xtaw ru li kok’al chirix li lajetqil? Chan ru taatenq’aheb’ chixtawb’al xpaab’aaleb’ re te’xtoj li lajetqil?

Kok’ k’anjel naru chi b’aanumank

• Tz’iib’a chiru li pizarron junjunq patz’om, jo’eb’ a’in: K’a’ru li lajetqil? Chan ru nintoj li lajetqil? K’a’ru aj-e li lajetqil? K’a’ chi osob’tesiik neke’k’ulman xb’aan xtojb’al li lajetqil? Patz’ reheb’ li kok’al naq te’ril Malakias 3:8–12 ut “Lajetqil” sa’ li K’utul Raqal reheb’ li Loq’laj Hu, ut te’xtz’iib’a lix sumenkileb’ li patz’om te’xtaw. Patz’ reheb’ naq te’xwotz chirib’ileb’ rib’ li xe’xtaw. K’a’ chi kristiaanil nokowulak naq naqatoj li lajetqil?

• K’ut li video “Jesus enseña sobre las blancas de la viuda” (ChurchofJesusChrist.org), malaj ut, ilomaq Markos 12:41–44. K’a’ru naxk’ut chiqu li seraq’ a’an chirix li naxk’oxla li Qaawa’ chirixeb’ li qamayej?

• Yiib’ jun ventaan chiru li pizarron ut patz’ reheb’ li kok’al naq te’xtz’iib’a chi sa’ li osob’tesiik naru naxk’ul junaq kristiaan li naxtoj li lajetqil (chi’ilmanq Malakias 3:10–12 re te’xtaw xna’leb’). Waklesi xch’ooleb’ chixwotzb’al junaq seraq’ naq eb’ a’an malaj lix junkab’aleb’ xe’osob’tesiik xb’aan xtojb’al li lajetqil chi tiik. Malaj ut, naru nakawotz aanumsihom laa’at sa’ laa yu’am, chan ru naq xtojb’al li lajetqil naxnimob’resi laa paab’aal chirix li qaChoxahil Yuwa’ ut li Jesukristo.

laj Elias naxk’utb’esi rib’ chiru laj Jose Smith ut laj Oliver Cowdery sa’ li santil ochoch re Kirtland

Xjalam-uuch laj Elias naq kixk’utb’esi rib’ chiru laj Jose Smith ut laj Oliver Cowdery sa’ li santil ochoch re Kirtland, xb’aan laj Robert T. Barrett

Malakias 4:5–6

“Tintaqla laj Elias.”

Li profeetil aatin wan sa’ xhu laj Malakias chirix laj Elias kitz’aqlok ru naq kixk’utb’esi rib’ chiru laj Jose Smith sa’ li santil ochoch re Kirtland ut kixk’e lix laawil li tijonelil re li naru neke’tz’ape’ wi’ li junkab’al sa’ junajil chi junelik. Maare taab’oq junaq komon li nak’anjelak sa’ li k’anjel re li santil ochoch ut resilal li junkab’al (maare jun komon sa’ li awa’b’ejil reheb’ li xb’eenil malaj li awa’b’ejil re li Komonil re Tenq’ank) re tatxtenq’a chixk’utb’al li tzol’leb’ a’in chiruheb’ li kok’al. Jultikaq aawe naq weent taab’aanu rik’in li reek’ahomeb’ li kok’al li maji’ neke’tz’ape’ sa’ junajil rik’ineb’ lix junkab’al.

Kok’ k’anjel naru chi b’aanumank

• Tz’iib’a li junjunq chi ch’ol aatin re Malakias 4:5–6 chiru kok’ hu. K’eheb’ li kok’ hu reheb’ li kok’al ut patz’ reheb’ naq te’xtuseb’ ru. Ilomaqeb’ li raqal ut aatinanqex chirix junjunq patz’om jo’ a’in: Ani kixye li Qaawa’ naq tixtaqla chaq? Jo’q’e taachalq li kristiaan a’an naq kixye? K’a’ru kixye naq tixb’aanu li kristiaan a’an? K’a’ut naq aajel ru naq taachalq li kristiaan a’an? B’ar kitz’aqlok ru li profeetil aatin a’an? (chi’ilmanq Tzol’leb’ ut Sumwank 110:13–16).

• Tz’iib’a chiru li pizarron jun patz’om jo’ K’a’ru naraj naxye naq lix ch’ooleb’ li alalb’ej te’sutq’iiq rik’ineb’ lix na’ xyuwa’? (chi’ilmanq Malakias 4:6). Patz’ reheb’ li kok’al naq te’xtz’il rix li patz’om a’an naq te’ril li video “El corazon de ellos está ligado a ustedes” (ChurchofJesusChrist.org). Chirix a’an patz’ reheb’ naq te’xwotz li reek’ahomeb’ chirix li patz’om wan chiru li pizarron. Tz’ilomaq rix laa numsihom laa’at malaj reheb’ li kok’al naq neke’tzolok chirix li resilal li junkab’al.

• K’ut lix jalam-uuch laj Elias li wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al naq te’xwotz li neke’xnaw chirix li kik’ulman sa’ li jalam-uuch a’an (chi’ilmanq ajwi’ Tzol’leb’ ut Sumwank 110:13–14). Ch’olob’ xyaalal naq li wankilal re tz’ape’k sa’ junajil kixk’ojob’ wi’chik laj Elias naxk’e chi uxmank naq eb’ li junkab’al wanqeb’ chi ch’utch’u sa’ li junelik q’e kutan, ut eb’ ajwi’ li ink’a’ xe’ru chixb’aanunkil a’an sa’ lix yu’ameb’ sa’ ruchich’och’. Wi ak xattz’aqon sa’ junaq tz’apok sa’ junajil, maare laa we laa’at malaj re junaq komon kamenaq, wotz k’a’ru xaweek’a sa’ li k’ojob’anb’il k’anjel a’an. Patz’ reheb’ li kok’al naq te’xwotz k’a’ru neke’reek’a chirix lix junkab’aleb’ ut chirix lix k’uub’anb’il na’leb’ li Dios re xtenq’ankileb’ li junkab’al chi wank chi ch’utch’u chi junelik.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla junaq na’leb’ xe’xtzol anajwan sa’ li tzoleb’aal ut junjunq reheb’ a’an naru te’xwotz. Waklesi xch’ooleb’ li kok’al chixtwotzb’al rik’ineb’ lix junkab’al junaq na’leb’ xe’xtzol chirix lix k’utum laj Malakias.

Xkawresinkil qib’ jo’ aj k’utunel

K’eheb’ li kok’al chi tz’aqonk sa’ li aatinak chirix li evangelio. Maare aajelaq ru naq taak’oxla chan ru naru taak’eheb’ chi tz’aqonk li kok’al toj ka’ch’ineb’ xyu’am sa’ li aatinak chirix li evangelio chi ink’a’ te’titz’q. Maare li kok’al naru neke’xnumsi jun li b’olotz’ chirib’ileb’ rib’ ut li taakanaaq wi’ li b’olotz’ tixsume junaq li patz’om.

perel re kok’ k’anjel: Lin Choxahil Yuwa’ tinrosob’tesi naq nintoj lin lajetqil