Li Najter Chaq’rab’ 2022
Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak

“Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak,” Kim, Taaqehin—Choq’ re li Tzoleb’aal reheb’ li Kok’al: Li Najter Chaq’rab’ 2022 (2021)

“Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak,” Kim, Taaqehin—Choq’ re li Tzoleb’aal reheb’ li Kok’al: 2022

Jalam-uuch
kok’aleb’ neke’reek’asi rib’ naq yookeb’ chi b’ichank sa’ li kapiiy

Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak

Ex awa’b’ejil reheb’ li Tzoleb’aal reheb’ li Kok’al ut aj b’eresinel b’ich,

Eb’ li b’ich reheb’ li kok’al numtajenaq xwankileb’ re xtenq’ankileb’ li kok’al chi tzolok chirix lix k’uub’anb’il na’leb’ li qaChoxahil Yuwa’ re sahil ch’oolejil ut chirixeb’ li yaalil na’leb’ re lix evangelio li Jesukristo. Naq eb’ li kok’al neke’b’ichan chirixeb’ li na’leb’ re li evangelio, li Santil Musiq’ej naxch’olob’ xyaalalileb’ li na’leb’ a’an. Eb’ li aatin ut li son te’kanaaq sa’ xk’a’uxleb’ ut raameb’ li kok’al chiru chixjunil lix yu’ameb’.

Sik’omaq xtenq’ li Musiq’ej naq nekekawresi eerib’ chixk’utb’al li evangelio rik’in li b’ichank. Wotzomaq lix nawom eech’ool chirixeb’ li yaal nekeb’icha. Tenq’ahomaqeb’ li kok’al chixk’eeb’al reetal chan ru naq li b’ichank naxk’am rib’ rik’in li yookeb’ chixtzolb’al ut chixnumsinkil sa’ rochocheb’ ut sa’ li Tzoleb’aal reheb’ li Kok’al. Eb’ li kok’al ut lix junkab’aleb’ te’osob’tesiiq xb’aan lix yalb’al eeq’e.

Nekexqara ut naqab’antioxi eere lee k’anjel nekeb’aanu chi k’eek’o eech’ool re xkawob’resinkileb’ ut xkolb’aleb’ li qachaq’al ru kok’al.

Li Jolomil Awa’b’ejil re li Tzoleb’aal reheb’ li Kok’al

Xch’olob’ankil li hoonal re b’ichank

Oob’ k’asal (awa’b’ejil re li Tzoleb’aal reheb’ li Kok’al): Li tijok sa’ xtiklajik, jun raqal sa’eb’ li loq’laj hu malaj eb’ lix raqalil li paab’aal, ut jun yaab’asinb’il aatin

Jun may k’asal (aj b’eresinel b’ich): Hoonal re b’ichank

Li awa’b’ejil re li Tzoleb’aal reheb’ li Kok’al ut aj b’eresinel b’ich neke’xsik’eb’ ru li b’ich rajlal po re xka’jultikankileb’ li na’leb’ yookeb’ chixtzolb’aleb’ li kok’al sa’ xtzoleb’aaleb’ ut sa’ rochocheb’. Jun xtusulaleb’ li b’ich li neke’xka’jultikaheb’ li na’leb’ a’in naru neke’tawman sa’ li hu a’in. Eb’ li b’ich a’an neke’tawman ajwi’ sa’eb’ li tusleb’ aatin re Kim, Taaqehin—Choq’ re li Tzoleb’aal reheb’ li Kok’al ut Kim, Taaqehin—Choq’ reheb’ li komon ut li junkab’al.

Naq nakak’uteb’ li b’ich chiruheb’ li kok’al, kanab’eb’ chixwotzb’al li ak xe’xtzol chirixeb’ li seraq’ ut li tzol’leb’ li k’utb’ileb’ sa’eb’ li b’ich. Maare taawaj xtz’ilb’al rixeb’ li tusleb’ aatin re Kim, Taaqehin—Choq’ re li Tzoleb’aal reheb’ li Kok’al yookeb’ chixtzolb’aleb’ li kok’al sa’ xtzoleb’aaleb’. A’in tatxtenq’a chixk’eeb’al reetaleb’ li seraq’ ut li tzol’leb’ yookeb’ chixtzolb’al re naq naru tatk’oxlaq chirix chan ru taatenq’aheb’ chixtzolb’al xkomon xna’leb’eb’ rik’in li b’ichank.

Sa’ li hoonal re b’ichank, naru ajwi’ taawoksiheb’ li b’ich ak xe’xtzol li kok’al ut eb’ li b’ich neke’wulak chiruheb’. Naq yookat chixtz’ilb’al rix jun b’ich, kanab’eb’ li kok’al chixwotzb’al li neke’xk’oxla ut neke’reek’a chirixeb’ li yaalil na’leb’ sa’eb’ li b’ich.

Li B’ichleb’aal choq’ reheb’ li Kok’al a’an li tz’aqal k’anjeleb’aal choq’ re li b’ichank sa’ li Tzoleb’aal reheb’ li Kok’al. Us ajwi’ roksinkileb’ li b’ich sa’ li b’ichleb’aal Eb’ li B’ich ut sa’ Amigos malaj li Liahona. Wan naq, eb’ li kok’al maare neke’raj xb’ichankileb’ li b’ich re li tenamit wankex wi’ malaj li b’ich re li Ralankil malaj Paswa li us xb’ichankileb’ sa’ domingo ut choq’ reheb’ li kok’al. Yalaq paay chik chi b’ich li taa’oksimanq sa’ li Tzoleb’aal reheb’ li Kok’al, tento naq k’ulub’anb’il xb’aan li obispil (chi’ilmanq Manual General: Servir en La Iglesia de Jesucristo de los Santos de los Últimos Días, 12.3.4, ChurchofJesusChrist.org).

Chan ru taawanq li Tzoleb’aal reheb’ li Kok’al

Rajlal xamaan, nab’aanuman a’in sa’ li Tzoleb’aal reheb’ li Kok’al:

Hoonal re b’ichank:25 k’asal

Xjalb’al li k’anjel:5 k’asal

Eb’ li tzoleb’aal:20 k’asal

Eb’ li neke’jolomink re jun li Tzoleb’aal reheb’ li Kok’al wankeb’ wi’ naab’al li kok’al neke’ru chixk’eeb’aleb’ li kok’al sa’ wiib’ ch’uut re naq jun ch’uut wan sa’eb’ li tzoleb’aal naq li ch’uut jun chik wan sa’ li hoonal re b’ichank. Chirix a’an, li wiib’ ch’uut neke’xjal xna’ajeb’. Wi nab’aanuman a’an, eb’ laj jolominel maare tento te’xjal b’ayaq xhoonalil li junjunq k’anjel tz’iib’anb’il arin a’ yaal li na’ajman ru choq’ reheb’.

Eb’ li b’ich choq’ re li hoonal re b’ichank

Enero

Febrero

Marzo

Abril

Mayo

Junio

Julio

Agosto

Septiembre

Octubre

Noviembre

Diciembre

Jalam-uuch
oxib’eb’ li kok’al neke’xchap xjalam-uuch li Jesus chire jun tzoleb’aal sa’ li kapiiy

Roksinkileb’ li b’ich re xk’utb’al li tzol’leb’

Li rajom li hoonal re b’ichank a’an xtenq’ankileb’ li kok’al chireek’ankil li Santil Musiq’ej naq yooqeb’ chixtzolb’al li evangelio. Eb’ li na’leb’ a’in naru tatxmusiq’a naq nakak’uub’ chan ru xk’utb’aleb’ li na’leb’ re li evangelio li wankeb’ sa’eb’ li b’ich sa’ li b’ichleb’aal ut sa’eb’ li b’ich choq’ reheb’ li kok’al.

Rilb’aleb’ ru li raqal reheb’ li loq’laj hu. Sa’ li Bichleb’aal choq’ reheb’ li Kok’al ut sa’ Eb’ li B’ich, wankeb’ li raqal reheb’ li loq’laj hu. Tenq’aheb’ li kok’al chirilb’aleb’ junjunq reheb’ li raqal a’an, ut teeye chan ru naq eb’ li raqal reheb’ li loq’laj hu neke’xk’am rib’ rik’in li b’ich. Taaruuq ajwi’ taatz’iib’a xtusulal junjunq reheb’ li raqal reheb’ li loq’laj hu sa’ li pizarron ut taakanab’eb’ li kok’al chixjuntaq’eetankil li junjunq raqal rik’in jun li b’ich malaj rik’in jun raqal re jun li b’ich.

Xnujob’resinkil li yamyo. Tz’iib’a raatinul jun raqal re li b’ich sa’ li pizarron chixkanab’ankil xtz’iib’ankil junjunq reheb’ li aatin mas aajeleb’ ru sa’ li b’ich a’an. Chirix a’an, patz’ reheb’ li kok’al naq te’xb’icha li b’ich, ut naq te’rab’iheb’ li aatin li neke’xnujob’resiheb’ li yamyo. Naq neke’xnujob’resi li junjunq yamyo, aatinanqex chirixeb’ li na’leb’ re li evangelio neke’xtzol rik’ineb’ li aatin li yookeb’ chixnujob’resinkil.

Oksi li i raatineb’ laj jolominel re li Iglees. Kanab’eb’ li kok’al chirab’inkil li raatin jun aj jolominel re li Iglees li naxk’ut li na’leb’ re li evangelio li juntaq’eet rik’in li na’leb’ k’utb’il sa’ li b’ich. Kanab’eb’ chixtaqsinkileb’ li ruq’ naq neke’rab’i k’a’ruhaq naxtenq’aheb’ chixtawb’al li yaalil na’leb’ yookeb’ chixb’ichankil. Kanab’eb’ chixwotzb’al li k’a’ru xe’rab’i.

Xwotzb’al jun xnawom ch’oolej. Wotz sa’ junpaat lix nawom aach’ool chiruheb’ li kok’al chirixeb’ li yaalil na’leb’ re li evangelio li neke’tawman sa’ li b’ich. Tenq’aheb’ li kok’al chixtawb’al ru naq rik’in li b’ichank, naru neke’xwotz lix nawom xch’ooleb’ ut neke’reek’a li Musiq’ej.

Xaqliik jo’ aj yehol nawom. Kanab’eb’ li kok’al chixk’eeb’aleb’ xhoonal re xaqliik ut xwotzb’al li neke’xtzol sa’ li b’ich li yookeb’ chixb’ichankil malaj li neke’reek’a chirixeb’ li yaalil na’leb’ k’utb’il sa’ li b’ich. Patz’ reheb’ li neke’reek’a naq yookeb’ chi b’ichank, ut tenq’aheb’ chixk’eeb’al reetal lix wankil li Santil Musiq’ej.

Roksinkileb’ li jalam-uuch. Patz’ reheb’ li kok’al naq tate’xtenq’a chixtawb’al malaj chixyiib’ankileb’ jalam-uuch li neke’xk’ul rib’ rik’in li aajel ruhil aatin malaj ch’ol aatin sa’ li b’ich. Kanab’eb’ chixwotzb’al chan ru naq eb’ li jalam-uuch neke’xk’ul rib’ rik’in li b’ich ut li k’a’ru k’utb’il sa’ li b’ich. Qayehaq, wi yookat chixk’utb’al li b’ich “Naq taak’ulunq li Kolonel” (B’ichleb’aal choq’ reheb’ li Kok’al, 46–47), taaruuq taak’eheb’ li jalam-uuch sa’ li tzoleb’aal li neke’xk’ut li aajel ruhil aatin sa’ li b’ich (jo’ anjel, saqb’ach, ut chahim). Kanab’eb’ li kok’al chixxokb’aleb’ li jalam-uuch ut chixtaqsinkileb’ sa’ iq’ sa’ tz’aqal xtusulaleb’ ru naq nekeb’icha li b’ich sa’ komonil.

Roksinkil jun ch’ina k’anjeleb’aal. Taaruuq taawoksi k’a’ruhaq li tixmusiq’a li aatinak chirix jun li b’ich. Qayehaq, li b’ich “Tinsik’ li Qaawa’ sa’ lin ka’ch’inal” (Bichleb’aal choq’ reheb’ li Kok’al, 67) na’aatinak chirix xsik’b’al li Qaawa’. Maare taamuq jun xjalam-uuch li Kolonel sa’ li tzoleb’aal ut taapatz’ re jun ch’ina al naq tixsik’. Naq li ch’ina al tixtaw li jalam-uuch, aatinanqex chirix k’a’ru xb’aanu re xtawb’al. A’in naru nekex’xk’am chi aatinak chirixeb’ li k’a’aq re ru naxye li b’ich naq naru naqab’aanu re xsik’b’al li Qaawa’.

Xkanab’ankileb’ chixwotzb’al lix numsihomeb’ a’an. Tenq’aheb’ li kok’al chixk’eeb’al reetal chan ru naq laq’lookeb’ li na’leb’ k’utb’il sa’ li b’ich rik’in li neke’xnumsi rik’ineb’ li na’leb’ a’an sa’ xyu’ameb’. Qayehaq, rub’elaj naq teeb’icha “Sa’ li santil ochoch” (B’ichleb’aal choq’ reheb’ li Kok’al, 99), taaruuq taakanab’eb’ li kok’al chixtaqsinkileb’ li ruq’ wi jun sutaq rilomeb’ jun li santil ochoch. K’e xb’oqb’aleb’ chi k’oxlak chirix li neke’reek’a naq neke’ril jun li santil ochoch naq yookeb’ chi b’ichank.

Roksinkileb’ li patz’om. Wan naab’al paay chi patz’om naru taawoksi naq yookex chi b’ichank. Qayehaq, taaruuq taapatz’ reheb’ li kok’al li k’a’ru xe’xtzol sa’ li junjunq raqal re li b’ich. Taaruuq ajwi’ taapatz’ reheb’ naq te’xk’oxlaheb’ li patz’om li neke’sumeek xb’aan li b’ich. A’in naru texxk’am sa’ jun aatinak chirixeb’ li yaalil na’leb’ k’utb’il sa’ li b’ich.

Rab’inkil lix sumenkileb’ li patz’om. Patz’ reheb’ li kok’al naq te’rab’i b’ar wan xsumenkileb’ li patz’om. Qayehaq, wankeb’ li patz’om ut lix sumenkileb’ sa’ li b’ich “Kixtaqla li Ralal” (B’ichleb’aal choq’ reheb’ li Kok’al, 20–21). Naru taapatz’ reheb’ li kok’al naq te’rab’i k’a’ru lix sumenkileb’ li patz’om naq yookeb’ chi b’ichank.

Xtenq’ankileb’ li kok’al chixtzolb’aleb’ ut chixjultikankileb’ li b’ich re li Tzoleb’aal reheb’ li Kok’al ut sa’ Eb’ li B’ich

Eb’ li kok’al neke’xtzol jun b’ich naq neke’rab’i ut neke’xb’icha k’iila sut. Rajlal sut naq eb’ li kok’al te’xtzol jun ak’ b’ich, b’ichaheb’ li raatinul li b’ich choq’ reheb’—ink’a’ yal taawileb’ ru malaj taayaab’asiheb’. A’in naxtenq’aheb’ li kok’al chixtzolb’al lix yaab’ li b’ich chi junajinb’il rik’in li raatinul. Chirix naq ak xtzolman jun li b’ich, b’icha wi’chik k’iila sut chiru li chihab’. Tz’iib’anb’il arin junjunq na’leb’ re xtenq’ankileb’ li kok’al chixtzolb’al ut chixtz’ilb’al rixeb’ li b’ich.

Xyiib’ankileb’ li ninqi hu. K’utb’esi li ninqi hu tz’iib’anb’ileb’ wi’ li raatinul li junjunq raqal re li b’ich malaj wankeb’ wi’ li jalam-uuch li neke’reetaliheb’ li aatin. Naq yookeb’ chi b’ichank li kok’al, muq junjunq reheb’ li aatin malaj jalam-uuch toj reetal naq neke’ru chixb’ichankil chixjunil li b’ich chi maak’a’ xtenq’eb’ li ninqi hu. Taaruuq ajwi’ taakanab’eb’ li kok’al chatenq’ankil sa’ xyiib’ankileb’ li ninqi hu.

Xk’utb’al chan ru nab’ichaman li b’ich. Re xtenq’ankileb’ li kok’al chixtzolb’al xja’ajil li b’ich, ye’ laa wuq’ chawu, ut naq yookex chi b’ichank, taqsi laa wuq’ malaj kub’si laa wuq’ a’ yaal jo’ chanru xja’ajil li b’ich.

Xka’sutinkileb’ li aatin. Kanab’eb’ li kok’al chixka’sutinkileb’ li aatin yookat chixb’ichankil laa’at. B’icha jun ch’ol aatin malaj jun tzol re li b’ich choq’ reheb’ li kok’al, ut kanab’eb’ chixka’sutinkileb’ li aatin a’an chi b’ichanb’il.

Xjalb’al chan ru nab’ichaman li b’ich. B’ichaheb’ li b’ich chi k’iila paay chan ru, jo’ chi hasb’anb’il, chi tz’uyinb’il, xpoq’onkil xsa’ aawuq’ rik’in li b’ich, xjalb’al ma junpaat ma timil naq yookat chi b’ichank, malaj b’ichank chi chunchu malaj chi xaxqo. Taaruuq ajwi’ taayiib’ jun kaaxukuut rik’in hu ut taatz’iib’a jalan jalanq paay chan ru xb’ichankil li b’ich sa’ li junjunq pak’al. Kanab’ jun reheb’ li kok’al naq tixtolk’osi li kaaxukuut re xsik’b’al chan ru te’b’ichanq li kok’al.

B’ichank sa’ kok’ ch’uut. K’e re li junjunq tzoleb’aal malaj al jun ch’ol aatin re xb’ichankil chi xaxqo, toja’ naq te’xjal li ch’ol aatin rik’ineb’ lix komon toj reetal naq li junjunq tzoleb’aal malaj al xwan xhoonal chixb’ichankil li junjunq ch’ol aatin.

Roksinkileb’ li uq’ej. Kanab’eb’ li kok’al chixk’oxlankil chan ru reek’asinkileb’ li ruq’ re xtenq’ankileb’ chixjultikankil li raatinul jun li b’ich. Qayehaq, naq teeb’icha “Tuqtuuko, ch’anch’ooko” (B’ichleb’aal choq’ reheb’ li Kok’al, 11), naru taapatz’ reheb’ li kok’al naq te’xq’aluheb’ li ruq’, te’xxulub’eb’ lix jolom, ut te’xch’e’ lix ch’ooleb’ naq yookeb’ chi b’ichank.

Neke’b’ichan li xqa’al, neke’b’ichan li teelom. Yiib’ xjalam-uuch jun al teelom ut xjalam-uuch jun xqa’al, ut latz malaj oksi li cinta re xk’eeb’aleb’ li jalam-uuch sa’ kok’ che’. Naq nekeb’icha jun li b’ich, taqsi jun reheb’ li jalam-uuch re xk’utb’esinkil ani te’b’ichanq.

Kutuk chi sa’ li chakach. K’eheb’ junjunq li chakach malaj sek’ li wan rajleb’ sa’ li tzoleb’aal—li rajlankileb’ li chakach juntaq’eet rik’in jarub’ li raqal wankeb’ sa’ li b’ich. Kanab’ naq jun reheb’ li kok’al tixkut k’a’ruhaq chi sa’ malaj nach’ rik’in jun reheb’ li chakach malaj sek’. Kanab’eb’ li kok’al chixb’ichankil li raqal li juntaq’eet rajlil rik’in li rajlil li chakach malaj sek’.

Xjuntaq’eetankil li jalam-uuch rik’in li ch’ol aatin. Tz’iib’a li junjunq tzol re jun li b’ich sa’ kok’ hu, ut taweb’ li jalam-uuch li neke’reetali li junjunq tzol. K’eheb’ li jalam-uuch sa’ jun xpak’al li tzoleb’aal ut li kok’ hu sa’ li junpak’al chik. B’ichahomaq li b’ich, ut kanab’eb’ li kok’al chixjuntaq’eetankileb’ li jalam-uuch rik’ineb’ li aatin.

Jalam-uuch
wiib’eb’ li kok’al neke’b’ichan sa’ li kapiiy

Li tenq’anel na’leb’ chirix li k’anjel reheb’ li kok’al sa’ li ch’utam re li loq’laj wa’ak

Rub’el xb’eresihom li obiisp, li k’anjel reheb’ li kok’al sa’ li ch’utam re li loq’laj wa’ak nak’ulman chi kok’ aj xsa’ sa’ jun reheb’ li po sa’ xraqik li chihab’. Jo’ awa’b’ejil re li Tzoleb’aal reheb’ li Kok’al ut aj b’eresinel b’ich, ch’utub’omaq eerib’ sa’ xtiklajik li chihab’ rik’in lix tenq’ aj k’ehol na’leb’ li obiisp li naxjolomi li Tzoleb’aal reheb’ li Kok’al re k’uub’ank na’leb’ chirix li taab’aanumanq sa’ li k’anjel. Naq ak xek’uub’ eena’leb’, sik’ xliceens re xb’aanunkil.

Tento naq li k’anjel tixk’e xhoonaleb’ li kok’al chixyeeb’al resil li k’a’ru xe’xtzol a’an ut lix junkab’aleb’ sa’ ochoch ut sa’ li Tzoleb’aal reheb’ li Kok’al chirix li Najter Chaq’rab’, jo’eb’ ajwi’ li b’ich li xe’xb’icha chiru li chihab’. K’oxlahomaq rik’in tijok b’arwan reheb’ li na’leb’ re li evangelio ut li b’ich li naxtenq’aheb’ li k’a’ru xe’tzolman. Chiru li chihab’, tz’iib’ahomaq junjunqeb’ li raatin ut lix numsihomeb’ li kok’al re naq maare naru te’roksi sa’ li k’anjel. Kanab’omaqeb’ li kok’al chixwotzb’aleb’ raqal sa’eb’ li loq’laj hu, li seraq’, ut lix nawomeb’ xch’ool sa’ li k’anjel. Naq nekek’uub’ li k’anjel a’in, k’oxlahomaq chan ru tixtenq’aheb’ li komon chixjayalinkileb’ rib’ rik’in li qaChoxahil Yuwa’, rik’in li Kolonel ut eb’ lix k’utum.

Wi ka’ajwi’ junjunqeb’ li kok’al wan sa’ li teep malaj uq’ej, k’oxlahomaq chan ru lix junkab’aleb’ taaruuq te’tz’aqonq sa’ li k’anjel rochb’eeneb’ lix kok’al. Jun komon sa’ li obispil naru taa’aatinaq re xraqb’al li ch’utam.

Naq nekek’uub’ li k’anjel, chijultiko’q eere li na’leb’ a’in:

  • Ink’a’ us xb’aanunkil li practica choq’ re li k’anjel li tixmaq’ raj naab’al hoonal reheb’ li tzoleb’aal sa’ li Tzoleb’aal reheb’ li Kok’al malaj li junkab’al.

  • Ink’a’ us roksinkileb’ li jalam-uuch, li disfraz, ut li video sa’ li ch’utam re li loq’laj wa’ak.

Chi’ilmanq Manual General: Servir en La Iglesia de Jesucristo de los Santos de los Últimos Días, 12.2.1.2, ChurchofJesusChrist.org.