li Jesus narileb’ li chahim

“Lix b’e wan chi junelik” (Habakuk 3:6). Sa’ xtiklajik ak wan chaq li Aatin, xb’aan li xEva Timothy

28 noviembre–4 diciembre

Nahum; Habakuk; Sofonias

“Lix b’e wan chi junelik”

Lix wankil laa rahom choq’ reheb’ li loq’laj hu naru naxtenq’aheb’ li kok’al. K’eheb’ chireek’a laa b’antioxihom xb’aan li raatin li Dios.

Tz’iib’a li nakak’oxla

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xaqliiq sa’ junjunqal ut te’xk’oxla naq a’aneb’ jun profeet re li Najter Chaq’rab’ xaqxo sa’ jun “na’ajej re k’aak’alenk” jo’ laj Habakuk (Habakuk 2:1). Patz’ reheb’ li te’xaqliiq naq te’xwotz junaq na’leb’ yookeb’ chixtzolb’al chirix li Jesukristo ut lix evangelio.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Habakuk 2:3

Li Qaawa’ junelik naxb’aanu li k’a’ru naxyeechi’i.

Li profeet aj Habakuk nayot’e’ chaq xch’ool xb’aan li maa’usilal naril sa’ xyanqeb’ li tenamit Juda (chi’ilmanq Habakuk 1:2–4). Li Qaawa’ kixye re naq sa’ xhoonal a’an taatz’aqloq ru li k’a’ru kixyeechi’i (chi’ilmanq Habakuk 2:3).

Kok’ k’anjel naru chi b’aanumank

• Wotz junjunq reetalil li k’a’aq re ru chaab’il neke’qak’ul chirix naq noko’oyb’enink, jo’ jun ru li che’ li tento toj taaq’ano’q malaj li q’em li toj tento taachaq’aq sa’ li k’atleb’aal. K’a’ raj ru taak’ulmanq wi ta taqayal xk’uxb’al li ru che’ malaj li q’em chi rax? Aatinan chirix li profeet aj Habakuk, li kiraj xnawb’al jo’q’e li Qaawa’ tixraq li maa’usilal naril sa’ xsutam. Yaab’asi reheb’ li k’ok’al lix sumehom li Qaawa’, li natawman sa’ Habakuk 2:3. Jultika naq laj Habakuk tento kiroyb’eni naq lix yeechi’ihom li Qaawa’ taatz’aqloq ru, jo’ ajwi’ tento taqab’aanu laa’o. Aatinan chirix junaq hoonal b’ar wi’ tento kawoyb’eni junaq aawosob’tesinkil.

• Tenq’aheb’ li kok’al chixk’oxlankileb’ lix yeechi’ihom li Dios—maare naq li Jesukristo taasutq’iiq chaq sa’ li ruchich’och’ malaj naq tooruuq chi wank wi’chik rik’in li Dios. Rik’in li junjunq chi eetalil, patz’ reheb’ naq te’xka’suti li ch’ol aatin “oyb’eni laa’at; xb’aan naq relik chi yaal naq taatz’aqloq ru chixjunil.”

Habakuk 2:14

Naru nintenq’an chixnujob’resinkil li ruchich’och’ rik’in li nawom chirix li Jesukristo.

Laj Habakuk kixye profeetil aatin chirix li kutan naq chixjunil li ruchich’och’ tixnaw chirix li Jesukristo. Li profeetil aatin a’an yoo chi tz’aqlok ru sa’eb’ li qakutankil. K’oxla chan ru taatenq’aheb’ li kok’al chi tz’aqonk sa’ li k’anjel a’an.

Kok’ k’anjel naru chi b’aanumank

• K’e chi kutankil jun sek’ chi yamyo ut k’e reheb’ li kok’al junjunq k’a’aq re ru kok’. Patz’ reheb’ naq te’xwotz junaq na’leb’ kixb’aanu malaj kixk’ut li Jesus, ut chirix a’an te’xk’e li k’a’aq re ru sa’ li sek’. Yaab’asi Habakuk 2:14 ut ch’olob’ naq jo’ naq eb’ a’an xe’xnujob’resi li sek’ rik’ineb’ lix nawom chirix li Qaawa’, naru ajwi’ naqanujob’resi li ruchich’och’ rik’in li nawom chirix a’an.

• K’ut chiruheb’ li kok’al jun reetalil ch’och’ (chi’ilmanq Eb’ li reetalil ch’och’ chirix li resilal li Iglees, 7 “Reetalil li ruchich’och’ ”). Tenq’aheb’ li kok’al chixtawb’al li na’ajej wankeb’ wi’ li rochoch ut li na’ajej b’ar wi’ xe’wan chaq sa’ mision junjunq komon neke’xnaw ru. Ch’olob’ xyaalal naq li qaChoxahil Yuwa’ naraj naq chixjunileb’ li kristiaan sa’ li ruchich’och’ te’xnaw chirix li Jesukristo. Chan ru naru nokotenq’an chi k’utuk chirix li Jesukristo chiruheb’ li qas qiitz’in? Aatinan rik’ineb’ li kok’al chirix k’a’aq re ru neke’xb’aanu a’an li nakate’xtzol chirix li Jesukristo. Tenq’aheb’ chixk’oxlankil k’a’ chik ru naru neke’xb’aanu.

• B’ichahomaq jun li b’ich na’aatinak chirix xwotzb’al li evangelio, maare “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90). K’a’ru naru naqak’ut chirix li Jesukristo chiruheb’ li qas qiitz’in? Re xtawb’al eena’leb’, chi’ilmanq eb’ lix Raqalil li Paab’aal.

Sofonias 2:3

“Sik’omaq li Qaawa’.”

Laj Sofonias kixk’ut naq tento taqasik’ li Qaawa’ sa’eb’ li hoonal re maa’usilal, jo’ roso’jikeb’ li kutan a’in. K’oxlan chan ru taawaklesi xch’ooleb’ li kok’al chixsik’b’al a’an.

Kok’ k’anjel naru chi b’aanumank

• K’ut jun xjalam-uuch li Kolonel ut yaab’asi Sofonias 2:3 reheb’ li kok’al. Patz’ reheb’ naq te’xmoch’ob’ li ruq’ sa’ li ruheb’ chanchan li lem ut te’ril li jalam-uuch rajlal sut naq taayaab’asi li aatin “sik’omaq.” Ch’olob’ naq li profeet aj Sofonias kiraj naq eb’ li kristiaan te’xsik’ li Qaawa’. Chan ru naqasik’ li Qaawa’? B’ar naru naqataw?

• Oksi li perel re kok’ k’anjel re li xamaan a’in malaj k’oxla junaq chik b’atz’unk li tixwaklesi xch’ooleb’ li kok’al chixsik’b’al li Qaawa’. Ab’ihomaq malaj b’ichahomaq junaq li b’ich li naxk’am rib’ rik’in li na’leb’ a’in, maare “Tinsik’ li Qaawa’ sa’ lin ka’ch’inal” (B’ichleb’aal choq’ reheb’ li Kok’al, 67). Aatinanqex chirix li naxk’ut li b’ich chirix xtawb’al li Jesukristo sa’ qayu’am.

reetalil li k’utuk

Xk’utb’al li tzol’leb’: Kok’al ak ninqeb’

Nahum 1:7

“Li Qaawa’ a’an q’axal chaab’il, a’an li kawilal sa’ xhoonalil li rahil ch’oolej.”

Chiqajunilo naqanumsi “xhoonalil li rahil ch’oolej.” Chan ru taatenq’aheb’ li kok’al chixsutq’isinkil rib’ rik’in li Qaawa’, chixk’ojob’ankil xch’ooleb’ rik’in a’an, ut chixtawb’al xkawilaleb’ sa’ musiq’ej sa’ xhoonalil li rahil ch’oolej?

Kok’ k’anjel naru chi b’aanumank

• K’ut chiruheb’ li kok’al xjalam-uuch jun kawil na’ajej. K’a’ut naq junaq kristiaan traj raj ru junaq kawil na’ajej? Patz’ reheb’ li kok’al naq te’ril Nahum 1:7 re te’xsik’ k’a’ru kixye li profeet aj Nahum naq a’an jun kawil na’ajej choq’ qe. K’a’ru naru naxkol wi’ qix li Kolonel?

• Patz’ reheb’ li kok’al naq te’xyiib’ xjalam-uucheb’ a’an ut lix junkab’aleb’ sa’ jun kawil na’ajej. Patz’ reheb’ naq te’xtz’iib’a chirix li kawil na’ajej junjunq reheb’ li maak sa’ li ruchich’och’. Patz’ reheb’ naq te’xtz’iib’a aatin chi sa’ li kawil na’ajej li tixch’olob’ li Jesukristo. K’a’ru naxpatz’ qe naq taqab’aanu re xk’ulb’al lix kawilal ut lix kolom? (chi’ilmanq Tzol’leb’ ut Sumwank 35:24).

  jun kawil na’ajej yiib’anb’il rik’in pek

  “Li Qaawa’ a’an q’axal chaab’il, a’an li kawilal sa’ xhoonalil li rahil ch’oolej” (Nahum 1:7).

Habakuk 3:17–19

Naru nintaw xsahil inch’ool rik’in li Jesukristo, us ta ink’a’ jwal us wanko.

Laj Habakuk kixch’olob’ junjunq li yale’k li naru naxk’ul lix tenamit, ut ajwi’ li che’ malaj li viin li ink’a’ raj taa’uuchinq. Chirix a’an kixye naq wi nak’ulman a’an, “laa’in taasaho’q lin ch’ool rik’in li Qaawa’.”

Kok’ k’anjel naru chi b’aanumank

• Patz’ reheb’ li kok’al naq te’ril Habakuk 3:17 ut te’xtaw li yale’k ch’olob’anb’ileb’ sa’ li raqal a’an. K’a’ raj ru taareek’a junaq kristiaan wi taak’ulmanq li k’a’aq re ru a’an? Tenq’aheb’ li kok’al chixk’oxlankil k’a’ raj ru li yale’k li maare te’xk’ul. Chirix a’an ilomaqeb’ li raqal 18–19 re teesik’ k’a’ru kixye laj Habakuk naq taareek’a raj wi ta taak’ulmanq li k’a’aq re ru a’an.

• Tenq’aheb’ li kok’al chixtawb’aleb’ seraq’ jo’ a’an chirixeb’ kristiaan sa’eb’ li loq’laj hu b’ar wi’ ke’saho’ xch’ool rik’in li Qaawa’ us ta ch’a’aj li kutankil. Naru neke’xtaw eetalil sa’ Hechos 16:19–25; Mosiah 24:10–15 ut li raatin li Awa’b’ej Dieter F. Uchtdorf, “Agradecidos en cualquier circunstancia” (Liahona, mayo 2014, 70–77), a’ li raqal “Ser agradecidos en nuestras circunstancias.” K’a’ut naq eb’ li kristiaan a’an ke’reek’a sahil ch’oolejil sa’eb’ li kutankil ch’a’aj? Chan ru naru taqataaqe li ke’xb’aanu a’an?

Sofonias 3:14–20

Li neke’taaqenk re li Jesukristo neke’xtaw xtuqtuukilal ut xsahileb’ xch’ool.

Sa’ Sofonias 3:14–20 nach’olob’aman li sahil kutan naq li Jesukristo, lix “awa’b’ej aj Israel,” taa’awa’b’ejinq sa’ lix tenamit ut “taab’ichanq xb’aan xsahil xch’ool” (raqal 15, 17).

Kok’ k’anjel naru chi b’aanumank

• Ilomaq Sofonias 3:14 sa’ komonil. Chirix a’an patz’ reheb’ li kok’al naq te’xsik’ jun reheb’ li raqal re Sofonias 3:15–20 ut te’xtzol re xsik’b’al junaq na’leb’ li tooxtenq’a “chi saho’k chi anchal qach’ool.” Patz’ reheb’ naq te’xwotz k’a’ru neke’xtaw.

• Tenq’aheb’ li kok’al chixtawb’aleb’ b’ich reheb’ li kok’al li taatenq’anq reheb’ “chi saho’k chi anchaleb’ xch’ool” (Sofonias 3:14). B’ichahomaq junjunqeb’ li b’ich ut waklesi xch’ooleb’ li kok’al chi aatinak chirix li sahil ch’oolejil neke’xtaw sa’ lix evangelio li Jesukristo.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xtz’iib’a junaq raqal li neke’raj xwotzb’al rik’ineb’ lix junkab’al (malaj tz’iib’a laa’at).

Xkawresinkil qib’ jo’ aj k’utunel

Tenq’aheb’ li kok’al chixk’eeb’al reetal li Musiq’ej. K’e reetaleb’ li hoonal b’ar wi’ eb’ li kok’al maare neke’reek’a lix wankil li Musiq’ej. Naq taak’ulmanq a’an, tenq’aheb’ chixtawb’al ru naq li eek’ahom a’an nachal chaq rik’in li Santil Musiq’ej.

perel re kok’ k’anjel: Sik’omaq li Qaawa’