Templo sa Kirtland

Templo sa Kirtland, ni Jon McNaughton

Septyembre 27–Oktubre 3

Doktrina ug mga Pakigsaad 109–110

“Kini Mao Ang Imong Balay, usa ka Dapit sa Imong Pagkabalaan”

Aron makabaton og espiritwal nga mga kasinatian samtang magtuon sa Doktrina ug mga Pakigsaad 109–10 uban sa mga bata sa imong klase, unaha pagtinguha nga makabaton og espiritwal nga mga kasinatian nga magtuon niining mga kasulatan nga ikaw ra.

Irekord ang Imong mga Impresyon

pagpaambit nga icon

Dapita ang Pagpaambit

Ipakita ang mga hulagway nga makatabang sa mga bata nga makahinumdom ug makapaambit og butang nga ilang nakat-unan mahitungod sa mga baruganan o mga panghitabo diha sa Doktrina ug mga Pakigsaad 109–10. Sama pananglit, mahimo nimong ipakita ang hulagway gikan sa outline niining semanaha sa Dali, Sunod Kanako—Alang sa mga Indibidwal ug mga Pamilya.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 109:12–13; 110:1–7

Ang templo mao ang balay sa Ginoo.

Pamalandungi kon unsaon nimo pagtabang ang mga bata nga mobati og balaang pagtahud alang sa balay sa Ginoo ug magpaabut sa adlaw nga makasulod sila sa “dapit sa [Iyang] pagkabalaan” (Doktrina ug mga Pakigsaad 109:13).

Posible nga mga Kalihokan

• Hangyoa ang mga bata sa pagsulti nimo og butang nga ilang ganahan mahitungod sa ilang mga panimalay. Ipakita sa mga bata ang usa ka hulagway sa Templo sa Kirtland, ug gamita ang Doktrina ug mga Pakigsaad 109:12–13; 110:1–7 sa pagsulti kanila mahitungod sa adlaw nga gipahinungod ang templo ug nahimong balay sa Ginoo (tan-awa usab sa “Kapitulo 39: Ang Templo sa Kirtland Gipahinungod,” Mga Istorya sa Doktrina ug mga Pakigsaad, 154). Aron mapakita nga ang templo mao ang balay sa Ginoo, basaha ang mosunod gikan sa pag-ampo sa pagpahinungod nga gihatag ni Joseph Smith: “Kini mao ang imong balay, usa ka dapit sa imong pagkabalaan” (Doktrina ug mga Pakigsaad 109:13). Hangyoa ang mga bata sa pagpaambit og butang nga ilang ganahan mahitungod sa templo.

• Hatagi ang matag bata og usa ka hulagway sa templo, o dapita sila sa pagdrowing og usa. Manganta og dungan sa usa ka awit mahitungod sa mga templo, sama sa “Gusto Ko nga Makita ang Templo” (Songbook sa mga Bata, 99). Dapita ang mga bata sa pag-isa sa ilang mga hulagway sa matag higayon nga mokanta sila sa pulong nga “templo.” Ipasabut og maayo ngadto nila ang ubang mga pulong diha sa kanta nga nagtudlo kanato og butang nga importante mahitungod sa templo. Sultihi ang mga bata kon unsa ang imong gibati mahitungod sa templo ug giunsa nimo pagkasayud nga balay kini sa Ginoo.

Doktrina ug mga Pakigsaad 110

Ang mga yawe sa pagkapari nga gikinahanglan aron pagtuman sa buhat sa Dios anaa sa Simbahan karon.

Ang Templo sa Kirtland importante sa kasaysayan sa Simbahan. Si Jesukristo mipakita didto, uban ang karaang mga propeta. Kining mga propeta mitugyan sa mga yawe sa pagkapari ngadto kang Joseph Smith nga gikinahanglan sa paghimo sa buhat sa Dios sa ulahing mga adlaw.

Posible nga mga Kalihokan

• Gamita ang pahina sa kalihokan niining semanaha o ang “Kapitulo 40: Mga Panan-awon Sulod sa Templo sa Kirtland” (Mga Istorya sa Doktrina ug mga Pakigsaad, 155–57) aron sultihan ang mga bata mahitungod sa langitnong mga binuhat nga mibisita sa templo. Ipaambit ang mga hugpong sa mga pulong gikan sa Doktrina ug mga Pakigsaad 110 nga makatabang nimo ug sa mga bata aron masabtan ang kasagrado niining mga panghitabo.

• Ipakita sa mga bata ang pipila ka yawe, ug hisguti kon unsa ang gamit sa mga yawe. Papuli-puliha ang mga bata sa paggunit sa mga yawe ug magpakaaron-ingnon nga moabli og gitrangkahan nga pultahan. Sa pagbuhat nila sa ingon, ipasabut nga si Joseph Smith nakadawat og mga yawe sa pagkapari didto sa Templo sa Kirtland. Kining mga yawe moabli sa gahum ug mga panalangin aron makahimo kita sa buhat sa Dios sa Iyang Simbahan, sama sa pagpaambit sa ebanghelyo ug paghimo sa buhat sa templo.

• Aron matabangan ang mga bata nga makasabut sa mga yawe nga gitugyan ni Elijah ngadto ni Joseph Smith, manganta og dungan sa usa ka awit mahitungod ni Elijah o sa family history, sama sa “Truth from Elijah” (Children’s Songbook, 90–91). Isulti ang mahitungod sa usa ka kasinatian nga nakatabang nimo sa pagpabalik sa imong kasingkasing ngadto sa imong mga katigulangan. Hangyoa ang mga bata sa pagpaambit og butang nga ilang nahibaloan mahitungod sa usa ka apohan o laing katigulangan.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 109; 110:1–10

Ang templo mao ang balay sa Ginoo.

Unsaon nimo pagpaambit ngadto sa mga bata ang imong gugma alang sa balay sa Ginoo? Ikonsiderar kon unsaon nimo sila pagdasig nga modawat sa hagit ni Elder Quentin L. Cook “nga ang matag usa kanato, bisan asa kita nagpuyo, nga hunahunaon ang atong kaugalingon nga anaa sa templo.” (“Hunahunaa ang Inyong Kaugalingon nga anaa sa Templo,” Liahona, Mayo 2016, 98).

Posible nga mga Kalihokan

• Pagpili og mga bersikulo gikan sa seksyon 109 o 110 nga imong gibati nga naghatag og gibug-aton sa mga panalangin sa templo (ang uban gisugyot sa outline niining semanaha diha sa Dali, Sunod Kanako—Alang sa mga Indibidwal ug mga Pamilya). Ilista kining mga panalangin diha sa pisara, ug dapita ang mga bata sa pagsiksik sa mga bersikulo nga imong gipili aron makita kadtong mga panalangin. Unsaon man nato pagpasabut ngadto sa usa ka tawo nganong ang templo importante ngari nato?

• Hangyoa ang mga bata nga mobasa sa hilum sa Doktrina ug mga Pakigsaad 110:1–10, ug dapita sila sa pagpaambit og butang nga ilang nahibaloan mahitungod ni Jesukristo o sa templo gikan niining mga bersikulo. Dapita ang mga bata sa pagdrowing og hulagway sa ilang kaugalingon ug sa Manluluwas diha sa templo.

• Hangyoa ang mga bata sa paghunahuna nga usa ka higala misulay sa pagpangita sa ilang balay. Unsaon nato pagtabang sa atong higala nga masayud kon hain ang atong balay? Unsaon nato pagkasayud nga ang templo mao ang balay sa Ginoo? Basaha ang Doktrina ug mga Pakigsaad 109:12–13 uban sa mga bata, ug sultihi sila kon giunsa nimo pagkasayud nga ang templo mao ang balay sa Ginoo. Ipakita ang mga hulagway sa mga templo, ug tuguti ang mga bata nga mopaambit sa ilang mga pagbati mahitungod sa balay sa Ginoo.

• Kantaha uban sa mga bata ang “Ang Espiritu sa Dios” (Mga Himno, no. 2), ug sultihi sila nga gikanta kini atol sa pagpahinungod sa Templo sa Kirtland—ug sa mga pagpahinungod sa mga templo karon. Nganong maayo man kini nga awit alang sa pagpahinungod sa Templo sa Kirtland?

  sulod sa Templo sa Kirtland

  Matag tumoy sa Templo sa Kirtland adunay mga pulpito alang sa mga lider sa pagkapari.

Doktrina ug mga Pakigsaad 110:11–16

Ang mga yawe sa pagkapari nga gikinahanglan aron pagtuman sa buhat sa Dios anaa sa Simbahan karon.

Si Elder Gary E. Stevenson miingon, “Ang tanang anak sa Langitnong Amahan dili makagamit sa makaluwas nga mga ordinansa sa ebanghelyo ni Jesukristo—hangtud ang usa ka balaanong pagpahiuli gipahigayon [nila ni Moises, Elias, ug Elijah]” (“Asa ang mga Yawe ug Awtoridad sa Priesthood?” Liahona, Mayo 2016, 30).

Posible nga mga Kalihokan

• Dapita ang mga bata sa pagsiksik sa Doktrina ug mga Pakigsaad 110:11–16 aron makit-an ang mga ngalan sa tulo ka karaang mga propeta nga mipakita didto sa Templo sa Kirtland. Dayon tabangi sila nga makakita sa mga pulong diha niining mga bersikulo nga naghulagway kon unsay “gitugyan,” o gihatag sa matag propeta, ngadto nila ni Joseph Smith ug Oliver Cowdery. Makit-an nimo ang makatabang nga paghulagway diha sa “Kapitulo 40: Mga Panan-awon Sulod sa Templo sa Kirtland” (Mga Istorya sa Doktrina ug mga Pakigsaad, 156–57).

• Ipaambit kining paghulagway sa mga yawe sa pagkapari pinaagi ni Presidente Russell M. Nelson: “Sa inyong mga bulsa tingali adunay usa ka yawe sa inyong balay o sakyanan. Ang mga yawe sa pagkapari, sa laing bahin, dili mahikap ug dili makita. Kini ang ‘nagpalihok’ sa awtoridad sa pagkapari” (“Personal nga Responsibilidad sa Priesthood,” Liahona, Nob. 2003, 45–46). Sa paghulagway sa kaimportante sa mga yawe sa pagkapari, hisguti uban sa mga bata ang mga problema kon mawad-an og yawe sa balay o yawe sa sakyanan. Sa unsang paagi nga susama kini sa mga problema kon mawala ang mga yawe sa pagkapari? Tabangi ang mga bata nga makasabut kon kinsa ang naghupot sa mga yawe sa pagkapari karon ug giunsa paggamit kining mga yawe sa pag-abli sa mga panalangin alang sa tanang anak sa Dios (tan-awa sa “Mga Yawe sa Priesthood,” Matinud-anon sa Tinuhoan, 204–205).

• Aron mas mapasabut pa ang mga yawe nga gipahiuli didto sa Templo sa Kirtland, ipasalida ang video nga “By the Hand of Elijah the Prophet” (ChurchofJesusChrist.org). Hisguti kon unsa ang atong mahimo aron makaapil sa buhat nga nahimong posible tungod sa mga yawe ni Elijah. O ipasalida ang video nga “Gatherers in the Kingdom” (ChurchofJesusChrist.org) ug hisguti kon sa unsang paagi kita makatabang sa pagpundok sa mga anak sa Langitnong Amahan pabalik ngadto Kaniya.

pagkat-on nga icon

Awhaga ang Pagkat-on diha sa Panimalay

Dapita ang mga bata nga gamiton ang pahina sa kalihokan niining semanaha o usa ka hulagway nga ilang gidrowing panahon sa klase aron sa pagtudlo sa ilang mga pamilya og butang nga ilang nakat-unan karon mahitungod sa mga templo o mga yawe sa pagkapari.

Pagpalambo sa Atong Pagtudlo

Pagmugna og palibut nga adunay gugma, balaang pagtahud. “Ang imong ehemplo adunay dakong impluwensya ngadto sa mga kinaiya sa [mga bata]. … Pinaagi sa imong mga pulong ug mga lihok, ipakita kanila nga gihigugma nimo ang ebanghelyo ug nga ikaw naghunahuna sa ilang espirituhanong kalamboan” (Pagtudlo sumala sa Pamaagi sa Manluluwas, 15).

pahina sa kalihokan: mga yawe sa pagkapari gipahiuli didto sa Templo sa Kirtland