Far West

Far West, ni Al Rounds

Oktubre 11–17

Doktrina ug mga Pakigsaad 115–120

“Ang Iyang Pagsakripisyo Mahimo nga Labaw Pa nga Sagrado ngari Kanako Kay Sa Iyang Paglambo”

Tuguti ang Espiritu nga mogiya kanimo ngadto sa mga baruganan nga gikinahanglan kaayo sa mga bata. Mahimong makakita ka og makatabang nga mga ideya diha sa mga kalihokan alang sa mas gagmay nga mga bata o alang sa mas dagko nga mga bata.

Irekord ang Imong mga Impresyon

pagpaambit nga icon

Dapita ang Pagpaambit

Usahay, tingali maayo nga makig-istorya daan sa mga ginikanan sa usa sa mga bata ug isugyot nga ang bata moadto sa klase nga andam nga mopaambit og usa ka butang nga iyang nakat-unan sa panimalay. Ang bata mahimong malingaw sa paggiya sa klase sa usa ka kalihokan nga iyang gibuhat uban sa mga sakop sa pamilya.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 115:4–5

Sakop ko sa Ang Simbahan ni Jesukristo sa mga Santos sa Ulahing mga Adlaw.

Unsaon man nimo pagtabang ang mga bata nga makaila sa mga panalangin nga mahimong kabahin sa Simbahan ni Jesukristo?

Posible nga mga Kalihokan

• Pangutan-a ang mga bata kon aduna ba kanila ang makasulti sa tibuok ngalan sa Simbahan. Ipakita kanila ang logo sa Simbahan (diha sa usa ka publikasyon sa Simbahan o sa name tag sa misyonaryo), isulat ang ngalan diha sa pisara, o basaha kini ngadto nila gikan sa Doktrina ug mga Pakigsaad 115:4. Hangyoa ang mga bata sa pagsulti sa ngalan uban nimo samtang imong itudlo ang matag pulong. Ipasabut og maayo ang mahinungdanong mga pulong diha sa ngalan, ug tabangi ang mga bata nga makasabut nganong importante kining mga pulong (tan-awa sa “Kapitulo 43: Si Jesukristo Naghingalan sa Iyang Simbahan,” Mga Istorya sa Doktrina ug mga Pakigsaad, 164).

• Kantaha og dungan ang “Ang Simbahan ni Jesukristo” (Songbook sa mga Bata, 48), ug ipaambit ngadto sa mga bata kon unsay imong gibati sa imong pagkamiyembro sa Simbahan ni Jesukristo. Tuguti sila nga mopaambit kon unsay ilang gibati mahitungod sa Simbahan.

• Dapita ang mga bata nga mobarug kon basahon nimo ang pulong nga “tindog” diha sa Doktrina ug mga Pakigsaad 115:5. Dapita sila sa pagtuyhad sa ilang mga tudlo sama sa mga silaw sa adlaw kon basahon nimo ang “pakita.” Kantaha og dungan ang usa ka awit mahitungod sa pagkahimong kahayag ngadto sa uban, sama sa “Sama Ko sa usa ka Bitoon” (Songbook sa mga Bata, 84). Pahinumdumi ang mga bata nga ang atong kahayag nagagikan kang Jesukristo, ug tabangi sila sa paghunahuna og mga paagi nga mahimo silang “magpakita.”

Doktrina ug mga Pakigsaad 117:6

Si Jesukristo milalang niini nga yuta ug sa tanan nga anaa niini.

Aron maawhag sila si William Marks ug Newel K. Whitney sa pagsakripisyo sa ilang kabtangan ug mobalhin ngadto sa Missouri, gipahinumduman sila sa Ginoo nga Siya ang milalang sa tanang butang dinhi sa yuta. Sa unsa kaha nga paagi nga mapanalanginan ang mga bata pinaagi sa pagkasayud niini nga kamatuoran?

Posible nga mga Kalihokan

• Pagdala o pagdrowing og mga hulagway bahin sa mga gilalang diha sa Doktrina ug mga Pakigsaad 117:6 nga gisulti sa Ginoo nga Iyang gilalang (o dapita ang mga bata sa pagdrowing sa kaugalingon nilang mga hulagway). Dapita ang mga bata sa pag-isa o pagtudlo ngadto sa mga hulagway samtang magbasa ka sa bersikulo. Sultihi ang mga bata nganong importante nganha nimo nga masayud nga si Jesukristo ang milalang niining mga butanga.

• Kantaha og dungan ang usa ka awit mahitungod sa mga gilalang sa Ginoo, sama sa “Gihigugma Ako sa Langitnong Amahan” (Songbook sa mga Bata, 16–17). Tuguti ang mga bata nga maghisgot sa pipila ka butang nga gilalang sa Dios nga makatabang kanila nga mobati sa Iyang gugma.

Doktrina ug mga Pakigsaad 119–20

Ang ikapulo makatabang sa Simbahan nga mahimo ang buhat sa Dios.

Daghan sa mga bata nga imong gitudloan tingali bata pa kaayo nga makakwarta ug mobayad sa ikapulo, apan makaayo alang nila nga masabtan kon sa unsang paagi nga ang ikapulo nakatampo sa mahinungdanong buhat nga gihimo sa Simbahan sa tibuok kalibutan.

Posible nga mga Kalihokan

• Ipasabut kon unsaon nato pagbayad og ikapulo ug unsay gamitan niini (tan-awa sa “Kapitulo 44: Ang Ikapulo,” Mga Istorya sa Doktrina ug mga Pakigsaad, 165–66, o sa motukma nga video diha sa ChurchofJesusChrist.org). Pagdrowing og 10 ka sinsilyo diha sa pisara, ug hangyoa ang mga bata sa pagtabang kanimo sa pag-ihap niini. Itino kon pila ang ihatag ngadto sa Ginoo alang sa ikapulo.

• Manganta og dungan sa usa ka awit mahitungod sa ikapulo, sama sa “I Want to Give the Lord My Tenth” (Children’s Songbook, 150), ug sultihi ang mga bata nganong pilion nimo nga mobayad sa ikapulo. Kon mahimo, ipaambit ang usa ka personal nga istorya.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 115:4–6

Ang akong ehemplo makatabang sa uban nga moduol kang Kristo ug makakita og kahilwasan [safety].

Ang mga bata nga imong gitudloan siguro nakaila og mga tawo nga naapektuhan sa mga unos sa kinabuhi ug nagkinahanglan sa “kadangpan” (bersikulo 6) nga gihatag sa Simbahan. Ikonsiderar kon unsaon nimo pagdasig ang mga bata nga “[mo]tindog ug [mo]pakita” (bersikulo 5) ug mopaambit sa ilang kahayag ngadto niini nga mga tawo.

Posible nga mga Kalihokan

• Ipasa-pasa ang usa ka ispat, usa ka hulagway sa adlaw, o laing butang nga magrepresentar sa kahayag sa ebanghelyo sa Manluluwas. Kon sila na ang magkupot sa suga, dapita ang mga bata nga mobasa sa Doktrina ug mga Pakigsaad 115:4–5 ug hinganlan ang butang nga ilang mahimo aron “[mo]pakita” sama sa usa ka kahayag alang sa uban (tan-awa sa 3 Nephi 18:24).

• Dapita ang mga bata sa pagdrowing og hulagway nga magpakita sa Doktrina ug mga Pakigsaad 115:6. Sama pananglit, mahimo silang magdrowing og unos, nga ang mga tawo midangup sa usa ka gambalay [building] sa Simbahan. Unsa ang pipila ka butang nga tingali irepresentar sa unos? Giunsa sa Simbahan pagsangkap og kadangpan gikan niining mga butanga?

Doktrina ug mga Pakigsaad 117

Ang akong mga sakripisyo sagrado ngadto sa Ginoo.

Diha sa seksyon 117, ang Ginoo mitambag nila ni William Marks ug Newel K. Whitney sa pagsakripisyo sa ilang mga kabtangan didto sa Kirtland alang sa mas dagkong mga panalangin didto sa Missouri. Gipasidunggan usab Niya si Oliver Granger tungod sa mga sakripisyo nga iyang gihimo. Unsay imong gibati nga makat-unan sa mga bata gikan sa ilang mga ehemplo?

Posible nga mga Kalihokan

• Dapita ang mga bata sa paghunahuna nga usa sila ka malampusong tag-iya og tindahan didto sa Kirtland, sama ni Newel K. Whitney. Unsay ilang bation kon mohangyo ang Ginoo nga ilang biyaan ang ilang tindahan ug mamalhin ngadto sa bag-ong dapit? Basaha ngadto sa mga bata ang Doktrina ug mga Pakigsaad 117:1–11, ug hangyoa ang mga bata sa paghunong kon makadungog sila og butang nga makatabang nila nga makabaton og hugot nga pagtuo sa paghimo og mga sakripisyo ug sa pagsunod sa Ginoo. Unsay atong gisakripisyo karon aron sa pagsunod sa Ginoo?

• Sultihi sa daklit ang mga bata nganong kinahanglang mobiya ang mga Santos sa Kirtland, o ipahimo kini sa usa sa mga bata (tan-awa sa “Kapitulo 41: Kasamok sa Kirtland,” Mga Istorya sa Doktrina ug mga Pakigsaad, 158–60). Ipasabut nga gihangyo sa Ginoo si Oliver Granger nga magpabilin sa Kirtland ug mobayad sa mga utang sa Simbahan. Nganong lisud man kana nga trabaho? Unsay gisulti sa Ginoo diha sa Doktrina ug mga Pakigsaad 117:13 nga makatabang ni Oliver—o bisan kinsa kanato—sa paghimo og mga sakripisyo aron sa pagsunod sa Ginoo?

Doktrina ug mga Pakigsaad 119–20

Ang ikapulo makatabang sa Simbahan nga mahimo ang buhat sa Dios.

Pamalandungi kon unsaon nimo pagtabang ang mga bata nga makasabut kon sa unsang paagi nga ang ikapulo—bisan sa gagmay nga mga kantidad nga mahimo nilang ibayad—makatampo sa pagtukod sa gingharian sa Ginoo (tan-awa sa Matinud-anon sa Tinuhoan, 54–56).

Posible nga mga Kalihokan

• Dapita ang mga bata sa paghunahuna nga ang usa ka higala nakakita og gambalay [building] sa Simbahan ug mangutana, “Giunsa sa inyong Simbahan pagbayad alang niana nga building?” Unsaon man nato pagpasabut sa ikapulo ngadto niini nga higala? Isugyot nga mo-refer ang mga bata sa Doktrina ug mga Pakigsaad 119:4; 120:1 samtang magkonsiderar sila niini nga pangutana.

• Tabangi ang mga bata sa paghunahuna og mga butang nga nahimo sa Simbahan tungod sa ikapulo. Sa unsang paagi nga kining mga butanga nakapanalangin sa atong kinabuhi? Ipaambit ang imong mga gibati mahitungod sa balaod sa ikapulo ug sa unsang paagi kini nakapanalangin kanimo.

  batan-on nga lalaki nga nagbayad og ikapulo

  Pinaagi sa pagbayad og ikapulo, mapakita nato ang atong gugma alang sa Dios ug makatabang sa Iyang buhat.

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagbantay kon unsa ang ilang gibati sa ilang kasingkasing o misantup nga mga hunahuna panahon sa Primary karong adlawa. Awhaga sila sa pagpaambit niadtong mga pagbati ug mga hunahuna ngadto sa ilang mga pamilya.

Pagpalambo sa Atong Pagtudlo

Suportahi ang mga ginikanan. Pangita og mga paagi nga makapaambit ngadto sa mga ginikanan kon unsay nakat-unan sa ilang mga anak diha sa Primary, ug pangutan-a sila kon sa unsang paagi ka makasuporta sa ilang mga paningkamot isip mga ginikanan (tan-awa sa Pagtudlo Sumala sa Pamaagi sa Manluluwas, 25).

pahina sa kalihokan: ang ikapulo makatabang sa Simbahan nga mahimo ang buhat sa Dios