Nauvoo

Nauvoo ang Matahum, ni Larry Winborg

Oktubre 25–31

Doktrina ug mga Pakigsaad 124–125

“Usa ka Balay ngadto sa Akong Ngalan”

Unsa nga mga leksyon gikan sa Doktrina ug mga Pakigsaad 124–25 ang kinahanglang makat-unan sa mga bata? Pamalandungi kini nga pangutana samtang magtuon ka karong semanaha.

Irekord ang Imong mga Impresyon

pagpaambit nga icon

Dapita ang Pagpaambit

Iplastar ang litrato sa templo nga labing duol nimo. Pangutan-a ang mga bata kon unsa ang ilang nahibaloan mahitungod sa mga templo. Tuguti sila nga mopaambit sa ilang mga pagbati mahitungod sa pag-adto sa templo sa umaabut nga adlaw.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 124:15, 20

Malipay si Jesus kon maningkamot ko sa pagbuhat og maayo.

Diha sa pagpadayag nga narekord sa seksyon 124, ang Ginoo mipahayag sa Iyang pag-aprubar kang Hyrum Smith ug George Miller tungod kay naningkamot sila nga mosunod Kaniya. Unsaon nimo pagtabang ang mga bata nga makahibalo nga ang Ginoo mahimuot kon maningkamot sila sa pagbuhat og maayo?

Posible nga mga Kalihokan

• Tabangi ang mga bata sa paghunahuna og mga butang nga ilang mabuhat nga maayo. Pagpakita og mga hulagway aron mahatagan sila og mga ideya (mahimo kang makakita og pipila diha sa Libro sa mga Hulagway sa Ebanghelyo o sa mga magasin sa Simbahan). Hangyoa ang mga bata nga ipunting ang ilang tudlo ngadto niining maayo nga mga butang. Basaha ang Doktrina ug mga Pakigsaad 124:15 ngadto sa mga bata, ug hangyoa sila sa pagpaminaw kon unsay gibati sa Ginoo sa dihang gipili ni Hyrum Smith nga mobuhat og maayo. Unsay bation ni Jesus kon maningkamot kita sa pagbuhat og maayong mga butang?

• Hatagi ang mga bata og mga kasingkasing nga hinimo sa papel, ug hangyoa sila sa pagdrowing og mga hulagway sa ilang kaugalingon nga nagbuhat og maayong mga butang. Dapita sila sa pagpaambit sa unsay ilang gidrowing ngadto sa klase. Unsay atong bation kon makabuhat kita og butang nga maayo? Ipamatuod nga si Jesus malipay kon maningkamot kita nga mobuhat sa husto nga butang.

• Kantaha ang usa ka awit mahitungod sa pagbuhat og mga butang nga gusto ni Jesus nga atong buhaton, sama sa “Si Jesus Buot nga Ako Mahimong Bidlisiw” (Songbook sa mga Bata, 38–39).

Doktrina ug mga Pakigsaad 124:28–29, 39

Si Jesus nagsugo sa Iyang katawhan sa pagtukod og mga templo.

Ang mga templo kanunay nang kabahin sa plano sa Langitnong Amahan alang sa Iyang mga anak. Ang pagsabut niini makatabang sa mga bata nga imong gitudloan nga mobati og dugang nga balaang pagtahud alang sa templo.

Posible nga mga Kalihokan

• Tabangi ang mga bata nga makasabut nga sa dihang nakakita ang mga Santos og bag-ong kapuy-an didto sa Nauvoo, gisultihan sila sa Ginoo sa pagtukod og templo (tan-awa sa “Kapitulo 49: Ang Mga Santos sa Nauvoo” Mga Istorya sa Doktrina ug mga Pakigsaad, 183–84, o sa motukma nga video diha sa ChurchofJesusChrist.org). Dapita ang mga bata nga magpakaaron-ingnon nga nagtukod sila og templo.

• Basaha uban sa mga bata kining hugpong sa mga pulong: “Akong balaan nga balay, diin ang akong mga katawhan gisugo sa kanunay sa pagtukod ngadto sa akong balaan nga ngalan” (Doktrina ug mga Pakigsaad 124:39). Pakupta ang mga bata og hulagway sa usa ka karaang templo (tan-awa sa Libro sa mga Hulagway sa Ebanghelyo, nu. 52 o pahina sa kalihokan niining semanaha) ug usa ka hulagway sa templo sa inyong dapit. Ipasabut nga ang Langitnong Amahan ug si Jesukristo kanunay nga misugo sa Ilang katawhan nga magtukod og mga templo—sa karaang mga panahon ug sa atong panahon. Ipaambit ang mga pulong ug mga hugpong sa mga pulong gikan sa Doktrina ug mga Pakigsaad 124:28–29 aron matabangan ang mga bata nga makasabut nganong gusto sa Ginoo nga magtukod kita og mga templo.

• Dapita ang mga bata sa pagkompleto sa pahina sa kalihokan niining semanaha aron sa pagtabang kanila nga makasabut nga katawhan kita sa Dios ug nga ang katawhan sa Dios kanunay nga gisugo nga magtukod og mga templo.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 124:12–21

Ang Ginoo mahimuot kon matinud-anon ako.

Sa seksyon 124, gidayeg sa Ginoo ang pipila ka mga Santos tungod sa ilang pagkamatinud-anon. Ang Iyang mga pulong makatabang sa mga bata sa pag-ila sa mga hiyas nga kinahanglan nilang palambuon.

Posible nga mga Kalihokan

• Pagpili og pipila ka maayong mga hiyas nga gihisgutan diha sa Doktrina ug mga Pakigsaad 124:12–21, ug isulat kini diha sa pisara palibut sa hulagway sa Manluluwas. Hangyoa ang mga bata sa pagsiksik sa mga bersikulo 12–21, nga mangita niining mga pulong. Tabangi sila nga makasabut sa mga pulong nga tingali dili sila pamilyar. Sumala niining mga bersikulo, unsay gibati sa Ginoo mahitungod sa mga tawo nga mipalambo niining mga hiyas?

• Isulat ang pulong nga kaligdong diha sa pisara. Dapita ang mga bata sa pagkat-on sa unsay gisulti sa Ginoo mahitungod sa kaligdong diha sa Doktrina ug mga Pakigsaad 124:15, 20. Aron matabangan ang mga bata nga makasabut kon unsa ang kaligdong, basaha kini nga pamahayag: “Ang kaligdong nagpasabut sa paghunahuna ug pagbuhat sa unsay matarung sa tanang panahon, bisan unsa pa ang mga sangputanan” (Alang sa Kalig-on sa mga Kabatan-onan, 19). Makapaambit usab ikaw og mga ehemplo sa usa ka bata nga nagpakita og kaligdong gikan sa kaugalingon nimong kasinatian o gikan sa Liahona nga mga magasin. Hagita ang mga bata sa paghimo og tumong nga molihok uban sa dugang nga kaligdong karong semanaha.

Doktrina ug mga Pakigsaad 124:28–30, 38–41

Si Jesus nagsugo sa Iyang katawhan sa pagtukod og mga templo.

Ang mga bata nga imong gitudloan sa dili madugay maanaa na sa eksaktong pangidaron aron mosulod sa templo ug moapil sa mga ordinansa sa templo. Unsa ang imong mahimo aron matabangan sila sa pag-andam?

Posible nga mga Kalihokan

• Tabuni ang usa ka hulagway o drowing sa templo. Dapita ang mga bata sa pagbasa sa Doktrina ug mga Pakigsaad 124:38–41 alang sa mga ilhanan [clue] kon mahitungod sa unsa ang anaa sa hulagway. Ipakuha sa mga bata ang gitabon sa hulagway ug hisguti kon unsay gitudlo niining mga bersikulo kon nganong gusto sa Ginoo nga magtukod kita og mga templo.

• Dapita ang mga bata sa pagbasa sa Doktrina ug mga Pakigsaad 124:28–30 aron sa pagpangita sa mga rason nga gihatag sa Ginoo kang Joseph Smith sa pagtukod sa Templo sa Nauvoo. Ipaambit ang imong mga pagbati mahitungod sa templo ug sa bisan unsang mga kasinatian nimo sa pagbuhat sa mga bunyag alang sa mga patay. Tabangi ang mga bata sa pagtino kon unsa kadugay aron maanaa na sila sa eksaktong pangidaron sa pagbuhat sa mga bunyag alang sa mga patay didto sa templo.

• Kon ikaw adunay rekomend sa templo, ipakita kini ngadto sa mga bata, o dapita ang usa ka batan-on diha sa ward aron ipakita ngadto sa mga bata ang iyang rekomend. Sultihi ang mga bata nganong importante ang rekomend sa templo ug unsay kinahanglan natong buhaton aron makabaton niini. Awhaga sila sa pagsugod sa pagpangandam karon sa pagbaton sa ilang kaugalingong rekomend.

  Si Joseph Smith uban sa kalalakin-an nga nagtukod sa Templo sa Nauvoo

  Si Joseph Smith diha sa Templo sa Nauvoo, ni Gary E. Smith

Doktrina ug mga Pakigsaad 124:91–92

Ang patriyarkal nga panalangin makahatag kanako og dinasig nga giya.

Kon nakadawat na ka og patriyarkal nga panalangin, ribyuha kini sa dili pa motudlo sa mga bata mahitungod niining mga panalangin. Nganong mapasalamaton man ka sa imong patriyarkal nga panalangin? Unsaon man nimo pagdasig ang mga bata sa pagpangandam sa pagdawat sa ilang patriyarkal nga panalangin?

Posible nga mga Kalihokan

• Dapita ang mga bata sa pagbasa sa Doktrina ug mga Pakigsaad 124:91–92, ug dapita ang klase sa pagpaminaw sa unsay gipabuhat sa Ginoo kang Hyrum Smith. Unsay nahibaloan sa mga bata mahitungod sa patriyarkal nga panalangin? Kon nakadawat na ka og patriyarkal nga panalangin, ipakita ngadto sa mga bata kon unsa kini. (Hinumdumi nga ang piho nga sulod sa imong patriyarkal nga panalangin sagrado.) Ipasabut nga ang patriyarkal nga mga panalangin espesyal nga mga panalangin nga atong makuha gikan sa mga patriyarka. Kini nga mga panalangin makatabang kanato nga mas mahibalo mahitungod sa atong kaugalingon ug unsay gusto sa atong Langitnong Amahan nga ipabuhat kanato.

• Ikonsiderar ang pagdapit sa usa ka ginikanan o igsoon sa usa sa mga bata nga imong gitudloan sa pagpaambit ngadto sa klase nganong mapasalamaton sila sa ilang patriyarkal nga panalangin. Hangyoa sila sa pagpaambit kon sa unsang paagi sila nakahukom nga gusto nilang mokuha sa ilang panalangin. Hatag sa imong pamatuod bahin sa patriyarkal nga mga panalangin.

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagpaambit ngadto sa usa ka sakop sa pamilya sa usa ka butang nga ilang nakat-unan mahitungod sa mga templo ug nganong gusto nilang moadto sa templo sa umaabut nga adlaw.

Pagpalambo sa Atong Pagtudlo

Ang mga bata makaila sa impluwensya sa Espiritu. Tudloi ang mga bata nga ang mga pagbati sa kalinaw, gugma, ug kainit nga anaa kanila kon mohisgot o mokanta sila mahitungod ni Jesukristo ug sa Iyang ebanghelyo nagagikan sa Espiritu Santo. Kini nga mga pagbati makalig-on sa ilang mga pagpamatuod.

pahina sa kalihokan: si Jesus nagsugo sa Iyang katawhan sa pagtukod og mga templo