“Septyembre 20–26. Doktrina ug mga Pakigsaad 106–108: ‘Aron Maabli ang Kalangitan,’” Dali, Sunod Kanako—Alang sa Primary: Doktrina ug mga Pakigsaad 2021 (2020)
“Septyembre 20–26. Doktrina ug mga Pakigsaad 106–108,” Dali, Sunod Kanako—Alang sa Primary: 2021
Septyembre 20–26
Doktrina ug mga Pakigsaad 106–108
“Aron Maabli ang Kalangitan”
Pamalandunga kon unsay imong nahibaloan mahitungod sa mga bata nga imong tudloan. Unsa nga matang sa mga kalihokan ang mas makapaduol kanila sa Manluluwas? Hinumdumi nga ang mga kalihokan alang sa mas gagmay nga mga bata niini nga outline mahimo usab nga mapahiangay alang sa mas dagko nga mga bata ug vice versa.
Irekord ang Imong mga Impresyon
Dapita ang Pagpaambit
Pakit-a ang mga bata og mga litrato sa mga lider sa Simbahan, sama sa propeta, mga Apostoles, Kinatibuk-ang Kapangulohan sa Primary, ug uban pang mga General Authority ug mga Opisyales. Dapita ang mga bata sa paghisgot kon unsay gibuhat niining mga lider ug nganong mapasalamaton sila kanila.
Itudlo ang Doktrina: Mas Gagmay nga mga Bata
Doktrina ug mga Pakigsaad 107:18–20, 42–56
Napanalanginan ko tungod sa pagkapari.
Ang tanang anak sa Langitnong Amahan makadawat sa mga panalangin nga moabut tungod sa pagkapari. Ikonsiderar ang mga paagi nga matabangan nimo ang mga bata nga imong gitudloan nga mobati og pasalamat alang niadtong mga panalangin.
Posible nga mga Kalihokan
-
Pagdrowing diha sa pisara og usa ka hulagway nga nagrepresentar “[sa naabli nga kalangitan ngari kanato]” (Doktrina ug mga Pakigsaad 107:19) tungod sa pagkapari (sama sa mga silaw sa kahayag nga nagdan-ag agi sa panganod). Hatagi ang mga bata og mga hulagway nga nagrepresentar sa mga panalangin nga moabut tungod sa pagkapari, sama sa bunyag, sa sakramento, ug sa templo. Dapita sila sa pagpaambit kon nganong mapasalamaton sila sa panalangin diha sa ilang hulagway, ug ipabutang ang ilang hulagway sa mga silaw sa kahayag diha sa pisara. Hatag og pagpamatuod nga makabaton kita niining mga panalangin tungod kay ang Langitnong Amahan mipahiuli sa pagkapari.
-
Paghimo og dalan diha sa salog, ug hatagi ang mga bata og mga hulagway sa mga ordinansa sa pagkapari nga kinahanglan nila aron makasubay sila sa dalan pabalik ngadto sa Langitnong Amahan (tan-awa sa Libro sa mga Hulagway sa Ebanghelyo, nu. 103–8, 119–20). Tabangi ang mga bata sa pagbutang sa mga ordinansa nga han-ay diha sa dalan.
-
Ipakita ang usa ka hulagway nila ni Adan ug Eva uban sa ilang pamilya (tan-awa sa pahina sa kalihokan niining semanaha o sa Libro sa mga Hulagway sa Ebanghelyo, nu. 5). Samtang nagtan-aw ang mga bata sa hulagway, pangutan-a sila kon unsa kaha ang gibati nila ni Adan ug Eva mahitungod sa ilang pamilya. Gamita ang Doktrina ug mga Pakigsaad 107:53–56 aron ipaambit ngadto sa mga bata kon unsay gibuhat ni Adan sa pagpakita nga iyang gihigugma ang iyang pamilya. Hatag sa imong pagpamatuod kon sa unsang paagi nga ang pagkapari nahimong usa ka panalangin nganha kanimo ug sa imong pamilya.
-
Hinganli ang mga sakop sa pamilya nga gi-orden ni Adan sa pagkapari, sumala sa Doktrina ug mga Pakigsaad 107:42–50, ug hangyoa ang mga bata sa pag-ihap kon unsa kadaghan ang mga tawo nga iyang na-orden. Tabangi sila nga makasabut nganong gusto ni Adan nga ang tanang sakop sa iyang pamilya makabaton sa pagkapari. Dapita ang mga bata sa paghisgot mahitungod sa mga higayon sa dihang sila o ang ilang mga pamilya nakadawat og mga panalangin pinaagi sa pagkapari.
Doktrina ug mga Pakigsaad 108:7
Makapalig-on ako sa uban.
Bisan ang gagmay nga mga bata makasunod sa tambag sa paglig-on sa uban “diha sa inyong tanan nga panagsultihanay, diha sa inyong tanan nga mga pag-ampo, … ug sa inyong tanan nga mga buhat.”
Posible nga mga Kalihokan
-
Pagdrowing og tawo diha sa pisara, ug hangyoa ang mga bata sa paghingalan og pipila ka butang nga mabuhat sa tawo aron mas mokusgan pa sa pisikal nga paagi. (Mahimo kang magdrowing og mas dagko nga mga kaunoran [muscles] diha sa tawo samtang naghingalan ang mga bata og mga butang). Basaha ang Doktrina ug mga Pakigsaad 108:7, ug hangyoa ang mga bata sa pagpaminaw alang sa mga paagi nga atong “[malig-on] ang [atong] mga kaigsoonan [nga lalaki ug babaye].” Ipasabut ang bisan unsang mga pulong nga tingali lisud.
-
Tabangi ang mga bata sa paghunahuna og mga tawo nga ilang kaila nga tingali nagkinahanglan og paglig-on. Unsay atong masulti ngadto kanila o mabuhat ngadto kanila? Magtambayayong sa paghimo og mga kard alang niini nga mga tawo, o awhaga ang mga bata sa paghinumdom kanila diha sa ilang personal ug pamilya nga mga pag-ampo.
Itudlo ang Doktrina: Mas Dagko nga mga Bata
Doktrina ug mga Pakigsaad 107:1–8, 13–14, 18–20
Ang pagkapari makatabang kanako nga makabalik ngadto sa Langitnong Amahan.
Ang Melchizedek ug Aaronic nga mga Pagkapari gipahiuli aron pagtabang og pagpabalik sa mga anak sa Dios ngadto Kaniya. Tabangi ang mga bata nga imong gitudloan nga makasabut kon unsa ang nagkalain-laing mga katungdanan sa pagkapari ug sa unsang paagi kini makatabang kanato sa pagbalik ngadto sa Dios.
Posible nga mga Kalihokan
-
Dapita ang mga bata sa pagsiksik sa Doktrina ug mga Pakigsaad 107:1–8, 13–14, 18–20 alang sa importante nga mga pulong ug mga hugpong sa mga pulong nga nagtudlo kanila mahitungod sa pagkapari. Unsa nga mga responsibilidad ang anaa sa mga naghupot sa pagkapari? Sa unsang paagi nga ang pagkapari makatabang kanato nga makabalik ngadto sa Dios?
-
Pagsulat og mga pangutana nga matubag diha sa Doktrina ug mga Pakigsaad 107:1–8, 13–14, 18–20, sama sa “Unsay laing ngalan sa Melchizedek nga Pagkapari?” Hatagi ang mga bata og pipila ka minuto sa pagpangita sa mga tubag diha sa mga bersikulo ngadto sa daghang mga pangutana kutob sa ilang mahimo. Ipaambit ngadto sa mga bata ang mga panalangin nga imong nadawat pinaagi sa pagkapari.
-
Basaha uban sa mga bata ang mahitungod kang Melchizedek diha sa Giya ngadto sa mga Kasulatan (scriptures.ChurchofJesusChrist.org). Unsa ang atong makat-unan gikan sa iyang kinabuhi kon unsay gipasabut sa paggamit sa awtoridad sa pagkapari?
Doktrina ug mga Pakigsaad 107:21–26, 33–35, 65–66
Ang pinili nga mga sulugoon sa Ginoo naggiya sa Iyang Simbahan.
Unsa nga mga kasinatian ang nakapalig-on sa imong pagtuo sa mga lider sa Simbahan? Unsaon nimo pagtabang ang mga bata nga makaugmad sa ilang kaugalingong mga pagpagmatuod?
Nagtudlo kanato ang propeta kon unsa ang gusto sa Dios nga atong mahibaloan.
Posible nga mga Kalihokan
-
Ipakita diha sa pisara ang usa ka litrato sa mga General Authority ug mga Opisyales gikan sa pinakabag-o nga edisyon sa Liahona. Samtang nagbasa ang mga bata sa Doktrina ug mga Pakigsaad 107:21–26, 33–35, 65–66, dapita sila sa pagsulat diha sa pisara sa unsay ilang nakat-unan mahitungod sa mga responsibilidad sa pipila niining mga lider. Nganong mapasalamaton man kita alang sa ilang giya? Ipaambit sa usag usa kon giunsa nimo pagbaton og pagpamatuod bahin sa mga propeta ug mga apostoles.
-
Isulat ang mga pulong nga pagsalig, hugot nga pagtuo, ug pag-ampo diha sa pisara. Pangutan-a ang mga bata kon unsaon nato sa pagpaluyo sa Unang Kapangulohan sa Simbahan uban sa pagsalig, hugot nga pagtuo, ug pag-ampo (tan-awa sa Doktrina ug mga Pakigsaad 107:22). Nganong importante man ang pagpaluyo sa pinili nga mga sulugoon sa Ginoo?
Doktrina ug mga Pakigsaad 108:3
Ang mabinantayong pagtuman sa akong mga pakigsaad makahatag og mga panalangin.
Pamalandungi kon unsaon nimo pagtabang ang mga bata nga imong gitudloan nga “[m]agmabinantayon … sa pagsunod sa [ilang] mga panumpa,” o mga pakigsaad. Sa unsang paagi nga ang pagbuhat niini makapanalangin kanila karon ug sa umaabut?
Posible nga mga Kalihokan
-
Dapita ang mga bata sa pagbuhat og butang nga nagkinahanglan og mabinantayong pagtagad aron magmalampuson, sama sa pagsulay og puno sa usa ka tasa og tubig nga dili mausik. Unsa ang mahitabo kon kita dili magmabinantayon? Dapita sila sa pagbasa sa Doktrina ug mga Pakigsaad 108:3 ug sa pagdiskubre kon unsay gipangayo kang Lyman Sherman nga buhaton niya sa mabinantayong paagi. Paglista uban sa mga bata sa mga saad nga ilang gihimo ngadto sa Langitnong Amahan sa dihang sila gibunyagan ug moambit sa sakramento. Tabangi sila sa paghunahuna og mga paagi nga mahimo silang mabinantayon sa pagtuman niining mga saad.
-
Kantaha ang usa ka awit uban sa mga bata mahitungod sa pagtuman sa mga pakigsaad, sama sa “Magmaisugon Ko” (Songbook sa mga Bata, 85). Tabangi sila sa paghimo og karatula nga adunay usa ka hugpong sa mga pulong nga magpahinumdom kanila sa pagtuman sa ilang mga pakigsaad, ug awhaga sila sa pagplastar sa ilang karatula diha sa panimalay.
-
Hatagi ang mga bata og mga porsyon sa pakigpulong ni Sister Becky Craven “Mabinantayon batok Dili Kaayo Magtagad” (Liahona, Mayo 2019, 9–11), ug hangyoa sila sa pagpaambit og butang nga makapadasig kanila aron mahimong mas mabinantayon mahitungod sa ilang mga pakigsaad.
Awhaga ang Pagkat-on diha sa Panimalay
Kontaka matag karon ug unya ang mga ginikanan sa mga bata nga imong gitudloan aron maawhag sila sa ilang mga paningkamot sa pagtudlo sa ebanghelyo diha sa panimalay. Mahimo nimo silang sultihan mahitungod sa usa ka butang nga gipaambit sa ilang mga anak diha sa Primary nga ilang nakat-unan sa panimalay.
Pagpalambo sa Atong Pagtudlo
Ipahiangay ang mga kalihokan aron matubag ang mga panginahanglan. Ayaw og hunahunaa kini nga mga outline isip mga instruksyon nga kinahanglan gayud nimong sundon. Hinoon, gamita kini isip tinubdan sa mga ideya aron sa pagdasig sa imong kaugalingong inspirasyon samtang mamalandong ka sa mga panginahanglan sa mga bata nga imong gitudloan. Sa ubang mga sitwasyon, tingali madasig ka sa pagpahiangay sa usa ka kalihokan o hilisgutan alang sa mas gagmay nga mga bata aron sa pagtudlo sa mas dagko nga mga bata, o vice versa.