mga lalaki nga adunay mga karwahe

C. C. A. Christensen (1831–1912), Kampo sa Zion, c. 1878, tempera diha sa muslin nga panapton, 78 × 114 ka pulgada. Brigham Young University Museum of Art, gasa sa mga apo ni C. C. A. Christensen, 1970

Septyembre 13–19

Doktrina ug mga Pakigsaad 102–105

“Human sa Dako nga Kalisdanan … Moabut ang Panalangin”

Ang imong pagtuon sa Doktrina ug mga Pakigsaad 102–5 usa ka importante nga bahin sa imong pagpangandam sa pagtudlo. Paminaw sa espiritwal nga mga impresyon kon unsaon pagtabang sa mga bata nga mas makasabut sa mga kasulatan.

Irekord ang Imong mga Impresyon

pagpaambit nga icon

Dapita ang Pagpaambit

Tabangi ang mga bata sa pagpili og usa ka kanta nga kantahon nga magpahinumdom kanila og butang nga ilang nakat-unan sa panimalay o sa simbahan.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 103:9

Mahimo ko nga “usa ka kahayag ngadto sa kalibutan.”

Unsaon nimo pag-awhag ang mga bata nga imong gitudloan sa pagpaambit sa kahayag sa ebanghelyo ngadto niadtong anaa sa ilang palibut?

Posible nga mga Kalihokan

• Basaha ang Doktrina ug mga Pakigsaad 103:9 ngadto sa mga bata, ug dapita sila sa pagkupot og mga hulagway sa usa ka bombilya, kandila, o uban pang tinubdan sa kahayag. Hangyoa sila nga ipakita ang ilang hulagway ngadto sa laing tawo diha sa klase. Sultihi ang mga bata kon sa unsang paagi sila nahimong susama sa usa ka kahayag ngadto sa uban kon mosunod sila ni Jesukristo.

• Kantaha ang usa ka awit uban sa mga bata mahitungod sa pagkahimong usa ka ehemplo, sama sa “Si Jesus Buot nga Ako Mahimong Bidlisiw” o “Sama Ko sa Usa ka Bitoon” (Songbook sa mga Bata, 38–39, 84). Tabangi sila sa paghunahuna og mga aksyon nga motukma sa mga pulong. Sa unsang paagi nga kita mahimong kahayag, o maayong ehemplo, ngadto sa mga tawo nga anaa sa atong palibut?

  kandila nga nagsiga

  Mahimo akong kahayag ngadto sa kalibutan.

Doktrina ug mga Pakigsaad 104:42

Ang Ginoo mopanalangin kanako kon ako motuman sa Iyang mga sugo.

Pipila ka higayon diha sa seksyon 104, ang Ginoo misaad og “pinilo-pilo nga mga panalangin” ngadto niadtong kinsa matinud-anong motuman sa Iyang mga sugo. Unsaon nimo pagtabang ang mga bata nga mobati nga gusto Niya nga mopanalangin kanato sa abunda nga paagi?

Posible nga mga Kalihokan

• Dapita ang mga bata sa paghimo sa aksyon, sama sa paspas nga paglihok-lihok sa ilang mga tudlo, matag higayon nga ilang madungog ang pulong nga “mga panalangin” samtang magbasa ka sa Doktrina ug mga Pakigsaad 104:42. Sultihi ang mga bata kon giunsa pagpanalangin sa Langitnong Amahan kanimo tungod sa pagsunod sa Iyang mga sugo. Hangyoa ang mga bata sa pagpaambit kon giunsa Niya sila pagpanalangin. Dapita ang matag bata sa pagpaambit og usa ka sugo nga ilang matuman.

• Aron matabangan ang mga bata nga makasabut kon unsay gipasabut sa “pinilo-pilo,” pagdrowing og usa ka lingin diha sa pisara o sa piraso nga papel. Hangyoa ang mga bata sa pagtabang kanimo sa pagpilo-pilo sa gidaghanon sa mga lingin—magdrowing og duha, dayon upat, dayon walo, dayon disesais, ug padayon pa—hangtud nga ang tibuok pisara o papel mapuno sa mga lingin. Matag higayon nga magdugang ka og mga lingin, tabangi ang mga bata sa paghunahuna og usa ka panalangin nga gihatag sa Langitnong Amahan ngadto kanila. Ipasabut nga ang “pinilo-pilo nga mga panalangin” nagpasabut nga pun-on sa Ginoo ang atong kinabuhi kon motuman kita sa Iyang mga sugo.

Doktrina ug mga Pakigsaad 105:38–40

Mamahimo ko nga tigpasiugda og kalinaw.

Adunay daghang leksyon nga atong makat-unan gikan sa mga kasinatian sa Kampo sa Zion. Usa nga tingali importante sa mga bata mao nga ang panagbingkil ug ang panag-away magdala og kalisdanan, samtang ang panaghiusa ug kalinaw magdala og mga panalangin.

Posible nga mga Kalihokan

• Sa kaugalingon nimong mga pulong, sultihi ang mga bata sa istorya bahin sa Kampo sa Zion (tan-awa sa pasiuna sa outline niining semanaha diha sa Dali, Sunod Kanako—Alang sa mga Indibidwal ug mga Pamilya; Mga Santos, 1:194–206; o “The Acceptable Offering of Zion’s Camp” [Revelations in Context, 213–18]). Hunong matag karon ug unya aron ipasabut og maayo ang mga leksyon nga atong makat-unan gikan sa Kampo sa Zion—sama pananglit, nga ang Ginoo gusto nga magmalinawon kita ug magtambayayong imbis nga maglalis ug mag-away.

• Basaha ang Doktrina ug mga Pakigsaad 105:38–40, ug hangyoa ang mga bata sa pagbarug kon sila makadungog sa pulong nga “kalinaw.” Ipasabut nga ang Ginoo gusto nga ang mga Santos makigsabut sa mga tawo kinsa dili mabination. Tabangi ang mga bata sa paghunahuna og mga butang nga ilang mabuhat aron mahimo silang mga tigpasiugda sa kalinaw, ug dapita sila sa pagdrama-drama sa pipila niini nga mga sitwasyon.

• Pagpaambit og istorya bahin sa usa ka bata nga tigpasiugda og kalinaw gikan sa kaugalingon nimong kinabuhi o gikan sa Liahona. Kantaha ang usa ka awit mahitungod sa paghigugma sa uban, sama sa “Si Jesus Miingon Higugmaa ang Tanan” (Songbook sa mga Bata, 39), o kompletuha ang pahina sa kalihokan niining semanaha.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 104:13–18

Ang Ginoo gusto nga ipaambit nako kon unsay anaa nako ngadto sa nanginahanglan.

Ikonsiderar kon unsaon nimo pagtabang ang mga bata nga makasabut sa pamaagi sa Ginoo sa pagsangkap alang sa Iyang katawhan kon sila manginahanglan.

Posible nga mga Kalihokan

• Hatagi ang mga bata og pipila ka minuto aron sa paghimo og lista sa mga panalangin nga gihatag sa Dios kanila. Awhaga sila sa paglista og daghan kutob sa ilang mahimo. Dayon basaha pagdungan ang Doktrina ug mga Pakigsaad 104:13–18, nga mangita sa mga tubag sa mga pangutana sama niini: Kinsa ang tinuod nga tag-iya sa tanang butang? Nganong gihatag man Niya kini ngari kanato? Unsay Iyang gustong ipabuhat kanato niining mga butanga? Tabangi ang mga bata sa paghunahuna og mga paagi nga ilang mapaambit ang ilang mga panalangin ngadto sa uban.

• Pagpaambit og kasinatian diin gihatagan ka og butang nga imong gikinahanglan, ug hangyoa ang mga bata sa pagpaambit og susama nga mga kasinatian. O ipasalida ang usa ka video mahitungod sa pagserbisyo sa uban, sama sa “The Coat” (ChurchofJesusChrist.org). Unsa ang atong makat-unan gikan niining mga kasinatian mahitungod sa pagserbisyo sa uban? Dapita ang mga bata nga magpakisayud bahin niadtong nanginahanglan ug mangita og tawo nga maserbisyuhan karong semanaha, sama sa usa ka tawo diha sa eskwelahan o ilabi na sa usa ka tawo diha sa ilang pamilya.

• Dapita ang mga bata sa pagsiksik sa Songbook sa mga Bata o Mga Himno alang sa mga awit nga adunay kalabutan sa pagserbisyo o pagtabang sa uban (tan-awa ang mga indeks sa mga hilisgutan). Dungan nga manganta og usa o duha ka awit, ug hisguti kon unsay gitudlo niining mga awit ngari kanato.

Doktrina ug mga Pakigsaad 105:9–19

Makatuman ko sa mga sugo sa Ginoo bisan kon wala ko makasabut sa mga rason alang niini.

Ang kasinatian sa Kampo sa Zion mahimong usa ka gamhanang paagi sa pagpakita sa mga panalangin nga moabut gikan sa pagtinguha nga mosunod sa kabubut-on sa Ginoo.

Posible nga mga Kalihokan

• Ipakita ang hulagway diha sa outline niining semanaha sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagpaambit sa unsay ilang nahibaloan mahitungod sa Kampo sa Zion. Kon magkinahanglan sila og tabang, gamita ang pasiuna sa outline niining semanaha sa Dali, Sunod Kanako—Alang sa mga Indibidwal ug mga Pamilya; Mga Santos, 1:194–206; o “The Acceptable Offering of Zion’s Camp” (Revelations in Context, 213–18). Dapita ang mga bata sa pagpakaaron-ingnon nga mga sakop sila sa Kampo sa Zion, nga magsulti sa ilang mga anak mahitungod sa ilang mga kasinatian. Unsa ang gusto nilang makat-unan sa ilang mga anak gikan niadtong mga kasinatian?

• Basaha og dungan ang Doktrina ug mga Pakigsaad 105:13–14, ug ipasabut nga sa dihang miabut na ang Kampo sa Zion didto sa Missouri, gisultihan sila sa Ginoo nga dili mosulay pagkuha og balik sa yuta sa mga Santos. Ang ubang mga sakop sa kampo nasagmuyo ug natingala nganong gimanduan sila nga moadto didto. Unsay angayan natong buhaton kon dili kita makasabut sa mga rason alang sa usa ka sugo? Ipaambit ang pipila ka asoy gikan sa “Mga Tingog sa Pagpahiuli: Kampo sa Zion” (sa Dali, Sunod Kanako—Alang sa mga Indibidwal ug mga Pamilya) aron pagtabang sa mga bata nga makakita sa mga panalangin nga moabut kon motuman kita sa mga sugo nga gihatag sa Dios kanato pinaagi sa Iyang mga propeta, bisan kon wala kita makasabut sa tanang rason.

pagkat-on nga icon

Awhaga ang Pagkat-on diha sa Panimalay

Awhaga ang mga bata sa pagpaambit sa mga kasinatian sa Kampo sa Zion ngadto sa usa ka tawo diha sa ilang panimalay, kauban ang usa ka leksyon nga ilang nakat-unan gikan niadtong mga kasinatian. O dapita sila sa paghunahuna og usa ka butang nga gipanalangin sa Dios kanila nga ilang mapaambit sa usa ka tawo nga nanginahanglan.

Pagpalambo sa Atong Pagtudlo

Idumala ang mga kasamok uban sa gugma. “Usahay ang usa ka bata molihok sa mga paagi nga makasamok sa pagkat-on sa uban diha sa klase. Kon mahitabo kini, pagmapailubon, mahigugmaon, ug masinabtanon kabahin sa mga hagit nga tingali giatubang sa bata. … Kon ang bata nga maoy hinungdan sa kasamok adunay espesyal nga mga panginahanglan, pakigsulti sa ward o stake disability specialist o bisitaha ang [disabilities.ChurchofJesusChrist.org] aron masayran kon unsaon nga mas maayong matubag kadto nga mga panginahanglan” (Pagtudlo sumala sa Pamaagi sa Manluluwas, 26).

pahina sa kalihokan: mahimo akong usa ka tigpasiugda sa kalinaw