“13–19 Setema. Mataupu Faavae ma Feagaiga 102–105: ‘A Mavae Puapuaga e Tele … Ona Oo Mai lea o le Faamanuiaga,’” Sau, Mulimuli Mai ia te A’u—Mo le Peraimeri: Mataupu Faavae ma Feagaiga 2021 (2020)
“13–19 Setema. Mataupu Faavae ma Feagaiga 102–105,” Sau, Mulimuli Mai ia te A’u—Mo le Peraimeri: 2021
C. C. A. Christensen (1831–1912), Tolauapiga a Siona, c. 1878, tempera on muslin, 78 × 114 inisi. Falemataaga o Faatufugaga a le Iunivesite a Polika Iaga, meaalofa a le fanau a fanau a C. C. A. Christensen, 1970
13–19 Setema
Mataupu Faavae ma Feagaiga 102–105
“A Mavae Puapuaga e Tele … Ona Oo Mai lea o le Faamanuiaga”
O lau suesuega o le Mataupu Faavae ma Feagaiga 102–5 o se vaega taua o lau tapenapenaga e aoao atu. Faalogo mo uunaiga faaleagaga e uiga i le auala e fesoasoani ai i tamaiti ina ia malamalama atili i tusitusiga paia.
Tusi Faamaumau Ou Lagona Uunai
Valaaulia le Fefaasoaai
Fesoasoani i tamaiti e piki se pese e usu e faamanatu ai ia i latou se mea na latou aoaoina i le fale po o le lotu.
Aoao atu le Aoaoga Faavae: Tamaiti Laiti
Mataupu Faavae ma Feagaiga 103:9
E mafai ona ou avea ma “se malamalama i le lalolagi.”
E faʻapefea ona e fesoasoani i tamaiti o loʻo e aoaoina ia faasoa atu le malamalama o le talalelei ma i latou o siomia i latou?
Gaoioiga e Mafai Ona Fai
-
Faitau le Mataupu Faavae ma Feagaiga 103:9 i tamaiti, ma valaaulia i latou e uu ni ata o se matauila, moligao, poo se isi punavai o le malamalama. Fai atu ia i latou e faaali atu a latou ata i se isi tagata o le vasega. Ta’u atu i tamaiti le auala e pei ai i latou o se malamalama i isi pe a latou mulimuli ia Iesu Keriso.
-
Usu faatasi ma tamaiti se pese e faatatau i le avea ai ma se faataitaiga, e pei o le “E Manao Iesu Ia Ou Fai ma Sulu” po o le “E Pei Au o se Fetu” (Tusipese a Tamaiti, 38, 84). Fesoasoani i tamaiti e mafaufau i ni taga e ogatasi ma upu. E mafai faapefea ona avea i tatou ma malamalama, se faataitaiga lelei, i tagata o loo siomia i tatou?
Atamoligao o loo mumuE mafai ona ou avea ma se malamalama i le lalolagi.
Mataupu Faavae ma Feagaiga 104:42
O le a faamanuiaina au e le Alii pe a ou tausia Ana poloaiga.
Na taua soo i le vaega e 104, ua folafola mai e le Alii “faamanuiaga e tele” ia i latou e tausia ma le faatuatua Ana poloaiga. E faʻapefea ona e fesoasoani i tamaiti ia lagona e finagalo o Ia e matua faamanuia mai ia i tatou?
Gaoioiga e Mafai Ona Fai
-
Valaaulia tamaiti e fai se gaoioiga, e pei o le faaminoinoi o latou tamai lima, i soo se taimi latou te faalogo ai i le upu “faamanuiaga” ao e faitauina le Mataupu Faavae ma Feagaiga 104:42. Faamatala atu i tamaiti le auala ua faamanuiaina ai oe e le Tama Faalelagi mo le tausia o Ana poloaiga. Fai atu i tamaiti e faasoa mai pe faapefea ona Ia faamanuiaina i latou. Valaaulia tamaiti taitoatasi e faasoa mai se poloaiga e mafai ona latou usitaia.
-
Ina ia fesoasoani i tamaiti ia malamalama i le uiga o le “tele”, tusi se li’o i luga o le laupapa po o se fasi pepa. Fai atu i tamaiti e fesoasoani ia te oe e faatele le aofai o li’o—i le tusiina o le lua, ona sosoo ai lea ma le fa, valu, sefuluono, ma luga atu—seiiloga ua tumu le laupapa po o le pepa i li’o. Soo se taimi lava e te faaopoopo ai ni li’o, fesoasoani i tamaiti e mafaufau i se faamanuiaga ua tuuina atu e le Tama Faalelagi ia i latou. Faamalamalama atu o “faamanuiaga e tele” o lona uiga o le a faatumuina e le Alii o tatou olaga i faamanuiaga pe a tatou usitaia Ana poloaiga.
Mataupu Faavae ma Feagaiga 105:38–40
E mafai ona avea au o se faatupu filemu.
E tele ni lesona e mafai ona tatou aoaoina mai aafiaga a le Tolauapiga a Siona. O se tasi aafiaga atonu e taua i tamaiti o le finauga ma le vevesi e mafua ai faafitauli, ae o le lotogatasi ma le filemu e maua ai faamanuiaga.
Gaoioiga e Mafai Ona Fai
-
I au oe lava upu, faamatala atu i tamaiti le tala o le Tolauapiga a Siona (tagai i le faatomuaga i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga; Au Paia, 1:194–206; po o le “The Acceptable Offering of Zion’s Camp” [Revelations in Context, 213–18]). Taofi i lea taimi ma lea taimi e faailoa atu ai lesona e mafai ona tatou aoaoina mai le Tolauapiga a Siona—mo se faataitaiga, e finagalo le Alii ia tatou filemu ma galulue faatasi ae le o le fefinauai ma tauaimisa.
-
Faitau le Mataupu Faavae ma Feagaiga 105:38–40, ma fai atu i tamaiti e tutu i luga pe a latou faalogo i le upu “filemu.” Faamalamalama atu na finagalo le Alii i le Au Paia ina ia faatupuina le filemu ma tagata sa agaleaga ia i latou. Fesoasoani i tamaiti e mafaufau i mea e mafai ona latou faia e avea ai ma faatupu filemu, ma valaaulia i latou e faatino nisi o nei tulaga.
-
Faasoa atu se tala e uiga i se tamaitiiti sa faatupuina le filemu mai lou lava olaga pe mai le Uo po o le Liahona. Usu se pese e faatatau i le alofa i isi, e pei o le “Fetalai Mai Iesu e Alofa i Tagata Uma” (Tusipese a Tamaiti,39), pe faauma le itulau o gaoioiga o lenei vaiaso.
Aoao atu le Aoaoga Faavae: Tamaiti Matutua
Mataupu Faavae ma Feagaiga 104:13–18
E finagalo le Alii ia ou faasoa atu mea ua ou maua ma i latou e le tagolima.
Mafaufau pe o le a faapefea ona e fesoasoani i tamaiti ia malamalama i le ala a le Alii o le tuuina atu [o mea e manaomia] mo Ona tagata pe a latou manaomia le fesoasoani.
Gaoioiga e Mafai Ona Fai
-
Tuu atu i tamaiti ni nai minute e fai ai se lisi o faamanuiaga ua tuuina atu e le Atua ia i latou. Fautuaina i latou e lisi ni mea se tele latou te mafaia. Ona faitau faatasi lea o le Mataupu Faavae ma Feagaiga 104:13–18, saili mo tali i fesili e pei o nei: O ai moni lava e onaina mea uma? Aisea ua Ia tuuina mai ai ia i tatou? O le a le mea ua finagalo o Ia tatou te faia i nei mea? Fesoasoani i tamaiti e mafaufau i ni auala e mafai ai ona latou faasoa atu o latou faamanuiaga i isi.
-
Faasoa se aafiaga ina ua tuuina atu e se tasi ia te oe se mea na e manaʻomia, ma fai atu i tamaiti e faasoa mai ni mea tali tutusa. Pe faaali foi le vitio e faatatau i le auauna atu i isi, e pei o le “The Coat” (ChurchofJesusChrist.org). O le a se mea tatou te aʻoaʻoina mai nei aafiaga e uiga i le auauna atu i isi? Valaaulia tamaiti ia nofouta ia i latou o loo manaomia le fesoasoani ma saili se tasi e auauna atu i ai i lenei vaiaso, e pei o se tasi i le aoga pe faapitoa lava i se tasi i lo latou aiga.
-
Valaaulia tamaiti e saili i le Tusipese a Tamaiti po o le Viiga mo ni pese e faatatau i le auauna atu po o le fesoasoani i isi (tagai i le anotusi). Usu faatasi se pese e tasi pe lua, ma talanoa po o a ni mea o aoao mai e nei pese ia i tatou.
Mataupu Faavae ma Feagaiga 105:9–19
E mafai ona ou usitai i poloaiga a le Alii e tusa lava pe ou te le malamalama i mafuaaga o na poloaiga.
O le aafiaga o le Tolauapiga a Siona e mafai ona avea o se auala mamana e faamalamalama ai faamanuiaga e oo mai i le saili e mulimuli i le finagalo o le Alii.
Gaoioiga e Mafai Ona Fai
-
Faaali atu le ata mai le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, ma valaaulia tamaiti e faasoa mai mea ua latou iloa e uiga i le Tolauapiga a Siona. Pe a latou manaomia le fesoasoani, faaaoga le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga; Au Paia, 1:194–206; po o le “The Acceptable Offering of Zion’s Camp” (Revelations in Context, 213–18). Valaaulia tamaiti e faafoliga o i latou o ni tagata o le Tolauapiga a Siona, o faamatala atu ia latou fanau e uiga i o latou aafiaga. O le a se mea latou te mananao ia latou fanau e aoao mai na aafiaga?
-
Faitau faatasi le Mataupu Faavae ma Feagaiga 105:13–14, ma faamatala atu ina ua taunuu le Tolauapiga a Siona i Misuri, na taʻu atu e le Alii ia i latou e aua nei toe taumafai e toe aumai le fanua o le Au Paia. O nisi tagata o le tolauapiga sa le fiafia ma mafaufau pe aisea na poloaiina ai i latou e o atu iina. O le a le mea e tatau ona tatou faia pe a tatou le malamalama i mafuaaga mo se poloaiga? Faasoa atu ni tala mai le “O Leo o le Toefuataiga: Tolauapiga a Siona” (i le Sau, Mulimuli Mai ia te A’u—Mo Tagata Taitoatasi ma Aiga) e fesoasoani ai i tamaiti ia iloa e oo mai faamanuiaga pe a tatou usiusitai i poloaiga a le Atua ua tuuina mai e ala i Ana perofeta, e tusa lava pe tatou te le malamalama i mafuaaga uma.
Uunaia le Aoaoina i le Aiga
Uunaia tamaiti e faasoa atu aafiaga a le Tolauapiga a Siona i se tasi i le latou fale, faatasi ai ma se lesona na latou aoaoina mai i na aafiaga. Pe valaaulia foi i latou e mafaufau i se mea ua faamanuiaina ai i latou e le Atua e mafai ona latou faasoa atu i se tasi o loo manaomia le fesoasoani.
Faaleleia o Lo Tatou Aoao Atu
Taulima faalavefau i le alofa. “O isi taimi e amio ai se tamaitiiti i ni auala e faalavelave ai i le aotauina o isi i le vasega. A tupu lenei mea, ia onosai, alofa, ma malamalama e uiga i luitau o loo feagai ma lea tamaitiiti. … Afai o le tamaitiiti o loo faalavelave e i ai ni manaoga faapitoa, talanoa i se tagata tomai faapitoa o aafiaga tumau pe asiasi i le [disabilities.ChurchofJesusChrist.org] ina ia e iloa ai pe faapefea ona sili atu ona taulimaina na manaoga” (Aoao Atu i le Ala a le Faaola,26).