C. C. A. Christensen (1831–1912), Saints Driven from Jackson County Missouri, c. 1878, tempera on muslin, 77¼ x 113 inisi. Falemataaga o Faatufugaga a le Iunivesite a Polika Iaga, meaalofa a le fanau a fanau a C. C. A. Christensen, 1970

6–12 Setema

Mataupu Faavae ma Feagaiga 98–101

“Ia Filemu ma Iloa o A’u o le Atua”

O a savali e moomia ona faalogo i ai tamaiti o lau vasega i lenei vaiaso? E mafai faapefea e mataupu faavae o loo i le Mataupu Faavae ma Feagaiga 98-101 ona fesoasoani ia i latou ia avea atili ma soo o Iesu Keriso?

Tusi Faamaumau Ou Lagona Uunai

Valaaulia le Fefaasoaai

Uunaia tamaiti e faasoa se mea na latou aoaoina mai le Mataupu Faavae ma Feagaiga i le fale po o i le Peraimeri. Fesili atu ia i latou po o le a le mea na sili ona latou fiafia i ai i le aoao mai le Mataupu Faavae ma Feagaiga.

Aoao atu le Aoaoga Faavae: Tamaiti Laiti

Mataupu Faavae ma Feagaiga 98:39–40

E mafai ona ou faamagalo ia i latou o e agaleaga mai ia te au.

Na fetalai atu le Alii i le Au Paia o e na sauaina i le Itumalo o Siakisone, Misuri, e faamagalo atu ia i latou na faaoolima ia i latou. Ao e aoaoina tamaiti e uiga i le taua o le faamagalo atu, ia mautinoa ua latou malamalama foi pe afai e faatiga se tasi ia i latou, e tatau ona latou ta’uina i se tagata matua latou te talitonuina.

Gaoioiga e Mafai Ona Fai

• Ina ia fesoasoani i tamaiti ia malamalama i luitau na feagai ma le Au Paia i Siona, faasoa atu ma i latou le “Mataupu 34: Ua Lapataia e le Atua Tagata o Siona” (Tala o le Mataupu Faavae ma Feagaiga, 128-31, po o le vitio talafeagai i luga o le ChurchofJesusChrist.org). Faitau le Mataupu Faavae ma Feagaiga 98:39–40, ma fai atu i tamaiti e faalogologo mo le vaega na fetalai atu ai le Alii i le Au Paia e fai pe a talosaga atu o latou fili mo le faamagaloga. Aisea e finagalo ai le Alii ia tatou faamagalo i tagata, e oo foi ia i latou e le lelei mai ia i tatou?

• Tuu se ata o se foliga fiafia i se tasi puipui ma se ata o se foliga faanoanoa i le isi puipui. Faasoa atu i tamaiti ni tulaga eseese lea e agaleaga ai se tasi ia te oe (atonu e te mauaina ni nai tala i le Uo po o le Liahona). Fautua atu ni auala e mafai ai ona tatou tali atu i faatinoga agaleaga, ma fesoasoani i tamaiti e filifili pe latou te maua ai le fiafia po o le faanoanoa i na auala. Valaaulia tamaiti e faasino i le foliga talafeagai o loo i luga o puipui.

Mataupu Faavae ma Feagaiga 101:16

E mafai e Iesu Keriso ona aumaia ia te au le filemu.

Ina ua feagai le Au Paia ma sauaga, na faamafanafanaina i latou e le Alii i le faapea atu, “Ia filemu ma iloa o Aʼu o le Atua.” Mafaufau pe mafai faapefea e lenei fautuaga ona fesoasoani i tamaiti o loo e aoaoina.

Gaoioiga e Mafai Ona Fai

• Valaaulia tamaiti e minoinoi i o latou nofoa. Ona fai atu lea ia i latou e aua le minoi pe a e uuina i luga se ata o le Faaola ma fai atu le fuaitau “Ia filemu ma iloa o A’u o le Atua” (Mataupu Faavae ma Feagaiga 101:16). Toe fai le gaoioiga lenei mo ni nai taimi. Faamalamalama atu ina ua faigata le olaga mo le Au Paia i le taimi o Iosefa Samita, na finagalo Iesu mo i latou e fifilemu ma talitonu atu ia te Ia nai lo o le popole. E mafai faapefea ona fesoasoani Iesu ia i tatou pe a tatou feagai ai ma se taimi faigata?

• Usu faatasi se pese e faatatau i le migao, e pei o le “Ia Migao, Filemu” po o le “To Think about Jesus” (Tusipese a Tamaiti, 11, 71). Fesoasoani i tamaiti ia iloa lagona o le filemu e oo mai pe a tatou fifilemu ma mafaufau ia Iesu—mo se faataitaiga, pe a tatou tatalo pe taulimaina le faamanatuga.

• Fesoasoani i tamaiti e galulue i le itulau o gaoioiga o lenei vaiaso. Ao latou valivali, tau atu ia i latou e uiga i le ala na fesoasoani ai le mafaufau ia Iesu Keriso e te lagona ai le filemu, e oo lava i taimi faigata.

  

  Faamatalaga mai le O Keriso ma le Taulealea Mauoa, saunia e Heinrich Hofmann

Aoao atu le Aoaoga Faavae: Tamaiti Matutua

Mataupu Faavae ma Feagaiga 98:1–3, 11–14; 101:16

E mafai ona fesoasoani o’u lu’itau ia te a’u ia avea atili ai faapei o Iesu Keriso.

Ao feagai ai tamaiti ma luitau i o latou olaga, o le a latou manaomia le faatuatua e faapea e mafai e le Faaola ona fesoasoani ia i latou i taimi o latou luitau ma o na luitau e mafai ona “galulue faatasi mo lo [latou] lelei” (Mataupu Faavae ma Feagaiga 98:3).

Gaoioiga e Mafai Ona Fai

• Fai atu i tamaiti e fesoasoani ia te oe e fai se lisi i luga o le laupapa o ni luitau atonu e feagai ma se tamaitiiti o le latou tupulaga. Tau atu i tamaiti e uiga i nisi o luitau a le Au Paia na nonofo i le Itumalo o Siakisone, Misuri, i le 1833 (tagai mataupu 34 ma le 35 i totonu o le Tala o le Mataupu Faavae ma Feagaiga, 128–34). O le a se fautuaga latou te tuuina atu i se tamaitiiti o loo feagai ma nei luitau? Fai atu i se tamaitiiti e faitau le Mataupu Faavae ma Feagaiga 98:1–3, 11–14, vaavaai mo le taitaiga na tuuina mai e le Alii. E mafai faapefea ona latou mulimuli i lenei fautuaga ao latou feagai ma luitau e pei o luitau o loo lisiina i le laupapa?

• Valaaulia tamaiti e fifilemu ma nofo sao mo ni nai minute ao tagai atu i se ata o le Faaola pe faalogologo i se pese e faatatau ia te Ia. Ona valaaulia lea o i latou e faasoa mai mea na latou lagonaina ma aoaoina i le taimi na latou fifilemu ai. Faitau le Mataupu Faavae ma Feagaiga 101:16. E faapefea ona fesoasoani le fifilemu ma le mafaufau ia Iesu ia i tatou? Fesoasoani i tamaiti ia malamalama i le sootaga i le va o le migao filemu ma le tatou mafai ai ona lagona le Agaga ma mafaufau ia Iesu.

Mataupu Faavae ma Feagaiga 98:23, 39–40

E finagalo Iesu ou te faamagalo ia i latou o e agaleaga mai ia te au.

Ua poloaiina i tatou e alofa le tasi i le isi, e faamagalo atu i isi “faafitugafulu i le fitu,” ma ia liliu atu le isi alafau (tagai Mataio 5:39, 43–44; 18:21–22). E mafai faʻapefea ona e faʻaaogaina nei fuaiupu e aoao atu ai i tamaiti nei upumoni?

Gaoioiga e Mafai Ona Fai

• Ta’u atu i tamaiti e uiga i sauaga na tutupu i le Itumalo o Siakisone, Misuri, i le 1833 (tagai mataupu 34 ma le35 i totonu o le Tala o le Mataupu Faavae ma Feagaiga, 128–34). Fesili atu i tamaiti pe o le a so latou lagona pe ana o i latou o tagata o le Ekalesia i lena taimi. Valaaulia i latou e faitau le Mataupu Faavae ma Feagaiga 98:23, 39–40 e saili ai po o le a le mea na finagalo le Alii e faia e le Au Paia. Aisea e mafai ai ona faigata ona faamagalo atu i latou o e faatiga ia i tatou? E faapefea ona faamanuiaina i tatou pe a tatou faia?

• Fesili atu i tamaiti pe mafai ona latou mafaufau i se taimi na faia ai e Iesu Keriso po o se tasi i tusitusiga paia le mea o loo aoaoina i le Mataupu Faavae ma Feagaiga 98:23 . Ina ia tuu atu se faataitaiga se tasi, faaali se ata o le Faasatauroina o Iesu (e pei o le Tusiata o le Talalelei, nu. 57). Tuu atu i tamaiti e faasoa mai mea latou te iloa e uiga i le Faasatauroina o le Faaola (tagai Luka 23). Valaaulia i latou e faitau le Luka 23:34. E faapefea ona tatou mulimuli i le faataitaiga a Iesu Keriso?

Mataupu Faavae ma Feagaiga 101:23–32, 36, 38

E ala ia Iesu Keriso, e mafai ona ou maua ai le olioli.

O le olaga e le faapea e saoloto mai faigata, ae e mafai ona e fesoasoani i tamaiti ia iloa e mafai pea ona latou maua le olioli atoatoa e ala ia Iesu Keriso.

Gaoioiga e Mafai Ona Fai

• Tuu se vai i totonu o se ipu. Fai atu i tamaiti e tolaulau mai mea na faia e le Faaola mo i tatou ina ia mafai ona tatou maua le olioli, ma valaaulia i latou e faapau se tama’imaa i totonu o se ipu mo mea uma latou te faalauina sei iloga e tumu le ipu. Faitau ma tamaiti le Mataupu Faavae ma Feagaiga 101:36, ma fai atu ia i latou e vaai mo le auala e mafai ai ona tatou maua le olioli atoatoa. O a nisi o mea e mafai ona tatou faia e “saili … le Alii” (fuaiupu 38) ina ia tatou maua le olioli o loo manao o Ia e tuu mai ia i tatou?

• Faamalamalama atu e faapea, ua aoao mai le Mataupu Faavae ma Feagaiga 101:23-32 e faatatau i le tulaga o le a i ai le olaga pe a toe afio mai Iesu Keriso. A o tou faitauina faatasi nei fuaiupu, talanoa e uiga i mea e maua e tamaiti o le a aumaia ia i tatou le olioli pe a afio mai o Ia. Aisea e taua ai le iloa e uiga i nei mea pe a tatou feagai ai ma se taimi faigata?

Uunaia le Aoaoina i le Aiga

Fesoasoani i tamaiti e piki se fuaiupu mai le Mataupu Faavae ma Feagaiga 98-101 latou te mananao e faasoa atu i o latou aiga. Fesoasoani ia i latou e fuafua pe faapefea ona latou faasoa atu mea latou te fiafia ai i lena fuaiupu.

Faaleleia o Lo Tatou Aoao Atu

Alualu i Luma o se Faiaoga e Faapei o Keriso. Manatuatu i auala e mafai ona avea atili ai ma se faiaoga faapei o Keriso. Mafaufau e faaaoga fesili o le iloiloga faaletagata lava ia o loo i le itulau 37 o le Aoao Atu i le Ala a le Faaola e fesoasoani ai ia e alualu i luma.