Kapitulli 30
Alma Këshillon Bijtë e Tij
Alma i tha Helamanit, birit të tij më të madh, të besonte te Perëndia. Ai i tregoi atij rreth engjëllit që Perëndia kishte dërguar t’i thoshte Almës që të mos e shkatërronte më Kishën.
Për tri ditë Alma kishte vuajtur për shkak të fajeve të tij. Pastaj ai kujtoi mësimet e atit të tij rreth Jezusit dhe e dinte se mëkatet e tij mund të faleshin.
Alma u lut për falje dhe gëzimi zëvendësoi dhembjet e shpirtit të tij. Ai mori falje për arsye se pati besim në Jezu Krisht dhe u pendua.
Që atëherë, Alma u mësoi të tjerëve ungjillin kështu që ata të mund të ndjenin të njëjtin gëzim që kishte ndjerë ai. Perëndia e kishte bekuar Almën për shkak të mirëbesimit të tij te Perëndia.
Alma ia dha Helamanit analet e shenjta dhe i tha atij të vazhdonte të shkruante historinë e popullit të tyre.
Alma i tha atij që, nëse ai i mbante urdhërimet, Perëndia do ta bekonte dhe do ta ndihmonte atë t’i ruante analet.
Alma i tha gjithashtu Helamanit të lutej çdo mëngjes e mbrëmje dhe të bisedonte me Perëndinë rreth çdo gjëje që po bënte, me qëllim që Perëndia të mund ta ndihmonte për ta udhërrëfyer atë.
Alma ishte i kënaqur nga djali i tij, Shibloni, i cili kishte qenë një misionar i guximshëm te zoramitët. Shibloni kishte mbetur besnik madje edhe kur ata e kishin goditur me gurë.
Alma i kujtoi Shiblonit që e vetmja mënyrë për t’u shpëtuar është nëpërmjet Jezu Krishtit. Alma pastaj e nxiti birin e tij të vazhdonte të jepte mësim për ungjillin.
I biri i Almës, Koriantoni, nuk i kishte mbajtur urdhërimet. Ai nuk kishte qenë një misionar besnik ndërsa mësonte zoramitët.
Për shkak të gjërave që kishte bërë Koriantoni, zoramitët nuk donin t’i besonin mësimet e Almës.
Alma i tha Koriantonit se njerëzit nuk mund t’i fshehin mëkatet e tyre nga Perëndia dhe se Koriantoni kishte nevojë të pendohej.
Alma i mësoi birit të tij që çdo njeri do të ringjallet, por vetëm të drejtët do të jetojnë me Perëndinë.
Kjo jetë është koha që njerëzit të pendohen dhe t’i shërbejnë Perëndisë, tha Alma.
Duke i kujtuar Koriantonit se ishte thirrur të ishte misionar, Alma i tha të kthehej te zoramitët dhe t’i mësonte popullit të pendohej.
Alma dhe bijtë e tij vazhduan ta jepnin mësim ungjillin. Ata jepnin mësim me anë të fuqisë së priftërisë.