3 Nīfai 17

“ʻOku ou ʻOfa Mamahi kiate Kimoutolu”

ko hono fakamoʻui ʻe Kalaisi ha fefine

Kuo māʻuloloa ʻa e ʻahó ki he kakai Nīfaí ʻi he taimi naʻe fakahā ai ʻe he Fakamoʻuí kuo taimi ke Ne mavahé. Ka neongo ia, naʻe ongo ki Hono lotó ʻa e loʻimata mo e fakaʻamu ʻa e kakaí ke Ne toe kiʻi nofo ke fuofuoloa angé. ʻI ha fakahaaʻi fakaofo ʻo e manavaʻofá, naʻá Ne fakamoʻui kinautolu, lotu fakataha mo kinautolu, mo tāpuakiʻi taha taha ʻenau fānaú. ʻE lava ke tokoniʻi koe ʻe he lēsoni ko ʻení ke ke ongoʻi ʻa e ʻofa ʻoku maʻu ʻe Sīsū Kalaisi maʻaú.

Ko hono fakaʻaongaʻi ʻo e ngaahi vitiō ʻo e Tohi ʻa Molomoná. ʻOku fakataumuʻa ʻa e ngaahi vitiō ʻo e Tohi ʻa Molomoná ke tokoni ki he kau akó ke nau maʻu ha ngaahi aʻusia mahuʻingamālie ʻi hono ngaahi leá. ʻOku ʻikai fakataumuʻa ʻa e ngaahi vitiō ko ʻení ke ne fetongi ʻa e lau folofolá. Fakapapauʻi fakapotopoto ʻa e taimi mo e founga ke fakaʻaongaʻi ai ʻa e ngaahi vitioó ke fakatupulaki ʻa e ngaahi aʻusia ʻa e kau akó mo e folofolá.

Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi taimi ne nau ongoʻi ai ha ʻaloʻofa, manavaʻofa, pe ʻofa mei he ʻOtuá. ʻE lava ke teuteu ʻa e kau akó ke vahevahe ʻa e founga naʻe liliu ai ʻe he ngaahi aʻusia ko ʻení honau vā fetuʻutaki mo Iá.

Ngaahi ʻEkitivitī Ako ʻOku Ala Fakahokó

Ko e ongo ʻa e Fakamoʻuí

Fakakaukau kuó ke feohi ʻi ha ʻaho mo e Fakamoʻuí pea kuó Ne fakahā atu kuo taimi ke Ne mavahe.

Ke tokoni ki he kau akó ke fakakaukauloto ki he meʻa ko ʻeni naʻe hokó, te ke lava ʻo huluʻi ʻa e vitiō “ʻOku Ngāue Tokoni ʻa Sīsū Kalaisi mo e Kau ʻĀngeló ʻi he Manavaʻofa” (11:59), ʻoku maʻu ʻi he ChurchofJesusChrist.org, mei he taimi 0:12 ki he 1:30.

• Te ke ongoʻi fēfē nai ʻi he tūkunga ko ʻení?

Tokoni ki he kau akó ke fakamanatu ʻa e meʻa ne nau ako fekauʻaki mo e Fakamoʻuí mei he 3 Nīfai 11–16. ʻE lava ke nau toe vakaiʻi ʻa e meʻa ne nau hiki ʻi heʻenau tohinoá ʻi he “Ako kau kia Sīsū Kalaisi ʻi he 3 Nīfaí.”

Kimuʻa pea nau tali ʻa e fehuʻi ko ʻení, mahalo ʻe ala tokoni ke kole ki he kau akó ke nau hiki ʻi he palakipoé ha ngaahi foʻi veape ʻokú ne fakamatalaʻi ʻa e meʻa naʻe fai ʻe he Fakamoʻuí.

• Naʻe fakahaaʻi fēfē ʻe he ngaahi ngāue ʻa e Fakamoʻuí ‘Ene ‘ofa ki he kakai Nīfaí?

Te ke laukonga lahi ange he ʻahó ni fekauʻaki mo e founga naʻe fakahaaʻi ai ʻe he Fakamoʻuí ʻEne manavaʻofá ʻi he lotolotonga ʻo e kau Nīfaí. ʻI hoʻo akó, fakakaukau ki he meʻa ʻoku akoʻi ʻe Heʻene ngaahi tōʻongá fekauʻaki mo Hono ʻulungāngá. Tokanga ki he ongo ʻokú ke maʻu kiate Iá.

Mahalo ʻe tokoni ke ʻiloʻi naʻe hoko ʻa e ngaahi meʻa kotoa ʻoku lekooti ʻi he 3 Nīfai 11–17 ʻi ha ʻaho pē ʻe taha.

Lau ʻa e 3 Nīfai 17:1–6, ʻo kumi ʻa e meʻa te ke lava ʻo ako fekauʻaki mo Sīsū Kalaisi mei Heʻene ngaahi folofolá mo e ngāué.

• Ko e hā naʻá ke maʻu ʻi he ngaahi veesi ko ʻení?

ʻE lava ke ʻilo ʻe he kau akó ha tefitoʻi moʻoni hangē ko ʻení: ʻI heʻetau fakalaulauloto mo lotu ki he Tamaí, ʻoku tau teuteuʻi ai hotau ʻatamaí ke maʻu ha mahino lahi ange.

Kapau ʻokú ke fie fai ha meʻa lahi ange ʻi he tefitoʻi moʻoni ko ʻení, vakai ki he konga “Ngaahi ʻEkitivitī Fakalahi ki he Akó.”

Mahalo kuó ke ʻiloʻi ha moʻoni hangē ko ʻení: ʻOku fonu ʻa e loto ʻo Sīsū Kalaisí ʻi he ʻofa mamahi kiate au. Fakakaukau ke lekooti ʻa e moʻoni ko ʻení ʻi he tafaʻaki ʻo e veesi 6.

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Ulisses Soares

ʻOku ʻuhingamālie ke vakai ko e ngaahi tōʻonga ʻofa mamahi ʻa Sīsuú naʻe ʻikai ko ha meʻa ia ne tātātaha mo fakakounaʻi ʻo fakatefito ʻi ha lisi ʻo ha ngaahi ngāue ke fakakakato, ka ko hano fakahaaʻi ia he ʻaho kotoa pē ʻa e moʻoni ʻo ʻEne ʻofa haohaoa ki he ʻOtuá mo ʻEne fānaú pea mo ʻEne loto-holi ʻi he faʻa kātaki ke tokoniʻi kinautolú. (Ulisses Soares, “Ko e Manavaʻofa Tuʻuloa ʻa e Fakamoʻuí,” Liahona, Nōvema 2021, 14)

• ʻI he lea pē ʻaʻau, ko e hā ʻa e akonaki ʻa ʻEletā Soālesi fekauʻaki mo e manavaʻofa ʻa e Fakamoʻuí?

Ko e manavaʻofa ʻa e Fakamoʻuí

ʻOku fakahaaʻi ʻe he toenga ʻo e 3 Nīfai 17 ʻa e natula manavaʻofa ʻa e Fakamoʻuí. Manatuʻi ko e meʻa naʻe fakahoko ʻe Sīsū Kalaisi ʻi he 3 Nīfai 17 naʻe hoko ia koeʻuhí he naʻá Ne ʻafioʻi ʻa e ngaahi holi māʻoniʻoni ʻa e kau Nīfaí pea naʻá Ne finangalo moʻoni ke Ne ʻiate kinautolu mo tāpuakiʻi kinautolu.

Ko e taumuʻa ʻo e ʻekitivitī ko ʻení ke tokoni ki he kau akó ke fakatupulaki ha ʻofa lahi ange ki he Fakamoʻuí ʻi heʻenau fakakaukauloto ki Hono natula manavaʻofá. Mahalo ne ʻosi akoako fakahoko ʻe he kau akó ʻa e taukei ko ʻení lolotonga ʻenau ako ʻa e 3 Nīfai 11. ʻE lava ke tokoni hono toutou fakahoko ʻa e taukeí ke fakatupulaki ʻe he kau akó ʻenau malava ke fakaʻaongaʻi iá.

Fakaʻaliʻali ʻa e ngaahi fehuʻi mo e potufolofola ko ʻení. Fakaafeʻi e kau akó ke fili ʻa e potufolofola te nau fie akó, pea kole ange ke nau fakakaukau ki he ngaahi fehuʻí lolotonga ʻenau akó. ʻE lava ke tali ʻe he kau akó ʻa e ngaahi fehuʻi ko ʻení ʻi heʻenau tohinoa akó ʻi he “Ako kau kia Sīsū Kalaisi ʻi he 3 Nīfaí.”

Fakakaukau ke tuku ki he kau akó ke nau fili ke ako toko taha pe fakalongolongo mo ha hoa.

• Ko e momeniti fē naʻe mei makehe lahi taha kiate koé? Ko e hā hono ʻuhingá?

• Ko e hā ha meʻa naʻe makehe kiate koe fekauʻaki mo e founga ngāue tokoni ʻa Sīsuú?

• ʻOku tākiekina fēfē ʻe Heʻene ngaahi folofolá mo e tōʻongá ʻa e ongo ʻokú ke maʻu kiate Iá?

• 3 Nīfai 17:7–10: Fakamoʻui honau kau mahakí mo e faingataʻaʻiá

• 3 Nīfai 17:13–20: Lotu fakataha mo kinautolu pea maʻanautolu

• 3 Nīfai 17:11–12, 21–25: Tāpuakiʻi ʻo e fānaú

Fakakaukau ke fakaʻaliʻali ʻa e ngaahi fehuʻi ko ʻení pea ʻoange ha taimi maʻá e kau akó ke fakalaulauloto ki ai kimuʻa pea nau talí.

• Kapau naʻá ke ʻi ai, ʻe liliu fēfē ʻe he aʻusia ko ʻení hoʻo vā fetuʻutaki mo hoʻo Fakamoʻui ko Sīsū Kalaisí?

• ʻOkú ke pehē ʻoku fakahaaʻi fēfē ʻe Sīsū Kalaisi ʻa e manavaʻofá kiate kitautolu he ʻaho ní?

• Ko e hā ʻokú ke ongoʻi ʻoku ueʻi koe ke ke fakahoko ke ke fakahaaʻi ai hoʻo ʻofa kia Sīsū Kalaisí?

Ka kei taimi pē, fakakaukau ke hivaʻi ha himi fekauʻaki mo e ʻofa mo e manavaʻofa ʻa e Fakamoʻuí. ʻE lava ke kau ai ʻa e “Sīsū, ko Hoku Maluʻi” (Ngaahi Himí, fika 71), “ʻOku Māʻongoʻonga ē Hoʻo ʻOfá” (Ngaahi Himí, fika 50), mo e “Ko e ʻOfa ʻa e Fakamoʻuí” (Ngaahi Himí, fika 56).

Kapau ʻe feʻunga, fakaafeʻi ʻa e kau akó ke vahevahe ʻa e meʻa ne nau ongoʻi lolotonga e lēsoni ʻo e ʻaho ní. Poupouʻi kinautolu ke hokohoko atu ʻenau fekumi ki ha fakamoʻoni ʻo e manavaʻofa ʻa e Fakamoʻuí ʻi heʻenau moʻuí.

Fakamatala Fakamahinó mo e Puipuituʻá

Ko e hā ʻa e faʻahinga faingataʻaʻia naʻe fakamoʻui ʻe Sīsū ʻa e kakaí mei aí?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Palesiteni Dallin H. Oaks

ʻI he taimi naʻe hā ai ʻa e Fakamoʻuí ki he kau angatonu ʻi he Maama Foʻoú, naʻá Ne ui ʻa e kakai naʻe ketu pe kui pe fokoutua ʻi ha ngaahi mahaki fakaesino kehé ke nau omi. Naʻá Ne fai ʻa e fakaafe tatau kiate kinautolu naʻe “puke ‘i ha mahaki ʻe taha” (3 Nīfai 17:7). Naʻá Ne folofola ʻo pehē, “ʻOmi ʻa kinautolu ki heni pea te u fakamoʻui ʻa kinautolu” (veesi 7). ʻOku talanoa ʻa e Tohi ʻa Molomoná fekauʻaki mo e ōmai ʻa e fuʻu kakaí mo “kinautolu kotoa pē naʻa nau puke ʻi ha faʻahinga mahakí” (veesi 9). ʻOku pau pē naʻe kau heni ʻa e kakai naʻe fekuki mo ha faʻahinga mahaki fakaesino pe fakaeloto pe fakaeʻatamai kehekehe, pea ʻoku fakamoʻoni ʻa e folofolá na‘e “fakamoʻui [ʻe Sīsū] ‘a kinautolu kotoa pē” (veesi 9). (Dallin H. Oaks, “He Heals the Heavy Laden,” Ensign pe Liahona, Nov. 2006, 6)

Naʻe akoʻi foki ʻe Sisitā Poni H. Kōtoni, Palesiteni Lahi ʻo e Kau Finemuí ʻi he vitiō ko ʻení fekauʻaki mo e malava mo e hōifua ʻa e Fakamoʻuí ke Ne fakahoko ʻa e ngāue faifakamoʻuí.

Te u tupulaki fēfē ʻi he manavaʻofa faka-Kalaisí?

Naʻe vahevahe ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Ulisses Soares

ʻOku fakatefito e ʻulungaanga ʻofa ʻa Sīsuú ʻi he manavaʻofá, ʻa ʻEne ʻofa haohaoá, ʻa ia ko e uho ʻo ʻEne feilaulau fakaleleí. Ko e manavaʻofá ko ha tefitoʻi ʻulungaanga ia ʻo kinautolu ʻoku faifeinga ke fakamāʻoniʻoniʻi kinautolú pea ʻoku tuifio e ʻulungaanga fakalangi ko ʻení mo ha ngaahi ʻulungaanga kehe faka-Kalisitiane hangē ko e tangi fakataha mo kinautolu ʻoku tangí pea mo hono maʻu ha kaungāongoʻi, ʻaloʻofa mo e angaʻofá. Ko hono moʻoní, ko hono fakahaaʻi ko ia ʻa e manavaʻofá ki he niʻihi kehé, ko e uho ia ʻo e ongoongolelei ʻo Sīsū Kalaisí pea mo ha fakamoʻoni mahino ia ʻo ʻetau ofi fakalaumālie mo fakaeloto ki he Fakamoʻuí. ʻIkai ke ngata aí, ʻokú ne fakahaaʻi ʻa e tūkunga ʻo e ivi tākiekina ʻokú Ne maʻu ʻi heʻetau tōʻonga moʻuí mo fakahaaʻi ʻa e ivi malava ʻoku maʻu ʻe hotau laumālié. (Ulisses Soares, “Ko e Manavaʻofa Tuʻuloa ʻa e Fakamoʻuí,” Liahona, Nōvema 2021, 13-14)

Ngaahi ʻEkitivitī Fakalahi ki he Akó

3 Nīfai 17:1–3. “Fakalaulauloto ki he ngaahi meʻa ʻa ia kuó u leʻa ʻakí”

ʻE lava ke tokoni ʻeni ke teuteuʻi ʻa e kau akó ke fakalaulauloto ki he folofolá.

Naʻe akoʻi ‘e Palesiteni Henelī B. ‘Aealingi ‘o e Kau Palesitenisī ‘Uluakí “ʻoku ʻikai faitatau e laukongá, akó mo e fakalaulaulotó. Te tau lau pē e ngaahi foʻi leá ʻo maʻu ai ha ngaahi fakakaukau. Te tau ako ʻo maʻu ha ngaahi sīpinga pe fakafehokotaki ʻi he folofolá. Ka ʻi heʻetau fakalaulaulotó, ʻoku tau fakaafeʻi mai ai e fakahā ʻa e Laumālié. Ko e fakalaulaulotó kiate au, ko e fakakaukau mo e lotu ia hili ʻeku lau mo ako fakalelei e folofolá” (Henry B. Eyring, “Ngāue ʻi he Laumālié,” Ensign pe Liahona, Nōvema 2010, 60).

Te ke lava ʻo fakaafeʻi ʻa e kau akó ke ako ʻa e 3 Nīfai 17:1–3, ʻo kumi ʻa e ngaahi fakahinohino ne fai ʻe he ʻEikí ki he kau Nīfaí ke nau lava ʻo “teuteu [honau] ʻatamaí ki he ʻapongipongí.” Te nau lava leva ʻo ʻiloʻi ha foʻi moʻoni hangē ko e ʻi heʻetau fakalaulauloto mo lotu ki he Tamaí, ʻoku tau teuteuʻi ai hotau ʻatamaí ke maʻu ha mahino lahi ange.

Vahevahe ʻa e lea ʻa Palesiteni ʻAealingí, pea fakaafeʻi ʻa e kau akó ke aleaʻi ʻa e founga ʻe lava ke ngāue fakataha ai ʻa e akó, lotú, mo e fakalaulaulotó ke teuteuʻi hotau ʻatamaí ke maʻu ha mahino lahi ange. ʻE lava leva ke fakaʻaongaʻi ʻe he kau akó ʻa e meʻa ne nau ako fekauʻaki mo e fakalaulaulotó ʻi heʻenau ako ʻa e toenga ʻo e 3 Nīfai 17. Hangē ko ʻení, te nau lava ʻo fakakaukauloto ki he ngaahi meʻa naʻe hoko ʻi he folofolá pe fakakaukau ki he meʻa naʻe mei fakahoko ʻe he Fakamoʻuí kiate kinautolú. Hili iá, aleaʻi ʻa e founga ʻoku fakaloloto ai ʻe heʻenau fakalaulaulotó ʻa ʻenau mahino ki he folofolá mo e ʻofa ki he ʻEikí.

3 Nīfai 17:5. “Naʻe toe ʻafio holo hono fofongá”

Ko e taha ʻo e ngaahi ʻulungaanga faka-ʻOtua ʻo e Fakamoʻuí ko ʻEne malava ko ia ke fakatokangaʻi pe ʻiloʻi ʻa e ngaahi fiemaʻu ʻa e niʻihi kehé pea tokangaʻi leva ʻa e ngaahi fiemaʻu ko iá ʻi he ʻofa mo e angaʻofa.

Fakaafeʻi ʻa e kau akó ke ako ʻa e 3 Nīfai 17:5, ʻo kumi ʻa e founga naʻe fakahaaʻi ai ʻe Sīsū Kalaisi ʻEne malava ke ʻiloʻi ʻa e ngaahi fiemaʻu ʻa e niʻihi kehé. Fakakaukau ke huluʻi e vitiō ʻo Palesiteni Poni H. Kōtoni ʻi he konga “Fakamatala Fakamahinó mo e Puipuituʻá.” Lolotonga ʻa e mamata ʻa e kau akó, fakaafeʻi ke nau fakakaukau ki he founga te nau lava ai ʻo fakatupulaki ʻenau malava ke ʻiloʻi ʻa e ngaahi fiemaʻu ʻa e niʻihi kehé pea tokoniʻi kinautolu ʻo hangē ko ia naʻe mei fai ʻe he Fakamoʻuí.

Fakakaukau ke hivaʻi pe lau ʻa e fakalea ʻo e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40).

Aleaʻi ʻa e founga te tau lava ai ʻo muimui ki he sīpinga ʻa e Fakamoʻuí ʻaki hono fakatokangaʻi ʻa e ngaahi fiemaʻu ʻa e niʻihi kehé pea tokoniʻi kinautolu.

3 Nīfai 17:12. “Naʻe tuʻu ʻa Sīsū ʻi honau lotolotongá”

Ke tokoni ki he kau akó ke nau ongoʻi ʻoku ofi ʻa e Fakamoʻuí kiate kinautolú, fakaafeʻi ke nau ako ʻa e 3 Nīfai 11:8; 3 Nīfai 20:22; 3 Nīfai 27:2; Tokāteline mo e Ngaahi Fuakava 38:7; 88:13; mo e ʻĒpalahame 3:22–23, ʻo kumi ʻa e founga ʻoku faitatau ai e ngaahi veesi ko iá mo e 3 Nīfai 17:12. ʻE lava ke fakafehokotaki ʻe he kau akó ʻa e ngaahi veesi ko ʻení. Hili iá pea aleaʻi leva ʻa e meʻa naʻe ʻilo ʻe he kau akó fekauʻaki mo e Fakamoʻuí pea mo Hono vā fetuʻutaki mo kitautolú.