Toe Vakaiʻi Hono 20 ʻo e Fakataukei Fakatokāteliné

Ako Ma‘uloto

ko ha finemui ʻokú ne ako e folofolá

ʻE ʻoatu ʻe he lēsoni ko ʻení ha faingamālie ke ke ako maʻuloto ai ʻa e ngaahi potufolofola fakataukei fakatokāteliné mo honau ngaahi kupuʻi lea folofola mahuʻingá kae pehē foki ki he ako maʻuloto ʻo e ngaahi potufolofolá kakato.

Tokoni ke mahino ki he kau akó ʻa e mahuʻinga ʻo e ako maʻulotó. Fekumi ki ha ngaahi faingamālie ke fakalotoa ʻa e kau akó ke ako maʻuloto ʻa e folofolá. Tokoniʻi ke nau sio ki he founga ʻe lava ke fakamālohia ai kinautolu ʻi hono ako maʻuloto ʻo e folofolá ke nau matuʻuaki ʻa e ʻahiʻahí pea fakamālohia honau vā fetuʻutaki mo e Tamai Hēvaní mo Sīsū Kalaisí.

Teuteu ʻa e tokotaha akó: Fakaafeʻi ʻa e kau akó ke toe vakaiʻi ʻa e potufolofola fakataukei fakatokāteline fakaʻosi ʻe 12 ʻo e Tohi ʻa Molomoná pea fili ha potufolofola ʻe taha (pe ko ha ngaahi kupuʻi folofola mahuʻinga) ʻoku nau ongoʻi ʻe tokoni ke nau ako maʻulotó. Kole ange ke nau omi mateuteu ke vahevahe ha ngaahi tūkunga ʻe ala tokoniʻi ai kinautolu ʻi hono ako maʻuloto ʻo e potufolofola ko ʻení (pe ngaahi kupuʻi lea ko ʻení) pea mo hono ʻuhingá.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni potufolofola fakataukei fakatokāteline ʻo fetongi ʻaki ʻa e lēsoni toe vakaiʻi ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakavāhengá pe vahefonuá pe kouʻōtineitá ke fakapapauʻi ʻe akoʻi ʻa e lēsoni kotoa pē ʻo e fakataukei fakatokāteline ki he potufolofolá lolotonga e lele ʻa e seminelí.

ʻE lava ke tau muimui he sīpinga ʻa e Fakamoʻuí ʻaki hono ako maʻuloto ʻo e ngaahi folofolá

ʻOku fakataumuʻa ʻeni ke tokoni ki he kau akó ke nau muimui ki he sīpinga ʻa Sīsū Kalaisí mo maʻu ha loto-vēkeveke ke ako maʻuloto ʻa e folofolá. Te ke lava ʻo fakaʻaliʻali ha fakatātā ʻo e Fakamoʻuí lolotonga hoʻomou aleaʻi ʻEne sīpingá.

ko e Fakamoʻuí

• Ko e hā ha ngaahi founga te tau lava ai ʻo muimui ki he sīpinga ʻa Sīsū Kalaisí?

Ko e founga ʻe taha ʻe lava ke tau muimui ai ki he sīpinga ʻa Sīsū Kalaisí ko hono ako maʻuloto ʻa e folofolá. Naʻe fakaʻaongaʻi ʻe he Fakamoʻuí ha ngaahi potufolofola maʻuloto ke ikunaʻi ʻaki ʻa e ʻahiʻahí (vakai, Mātiu 4:1–11) pea mo akoʻi ʻa e niʻihi kehé (vakai, Luke 24:27; 3 Nīfai 22).

• Ko e hā ha ngaahi tūkunga ʻe ala ʻaonga ai hono maʻuloto ʻo e folofolá?

ʻI hoʻo ako maʻuloto ʻa e ngaahi potufolofola fakataukei fakatokāteliné pe ngaahi kupuʻi lea folofola mahuʻingá, manatuʻi ʻokú ke muimui ki he sīpinga ʻa Sīsū Kalaisí.

Fakataukei Fakatokāteline ʻo e Tohi ʻa Molomoná: ʻAlamā–Molonai

Tohi ʻa Molomoná – Tohi Lēsoni ʻa e Faiakó (2024)

Potufolofolá	Kupuʻi Lea Folofola Mahuʻinga
Potufolofolá ʻAlamā 7:11–13	Kupuʻi Lea Folofola Mahuʻinga “Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē.”
Potufolofolá ʻAlamā 34:9–10	Kupuʻi Lea Folofola Mahuʻinga “Kuo pau ke fai ha fakalelei, … ko ha feilaulau taʻe-fakangatangata mo taʻengata.”
Potufolofolá ʻAlamā 39:9	Kupuʻi Lea Folofola Mahuʻinga “ʻIkai toe muimui ʻi he ngaahi holi ʻa ho matá.”
Potufolofolá ʻAlamā 41:10	Kupuʻi Lea Folofola Mahuʻinga “Kuo teʻeki ai hoko ʻa e faiangahalá ko e fiefia.”
Potufolofolá Hilamani 5:12	Kupuʻi Lea Folofola Mahuʻinga “ʻOku makatuʻunga ʻi he maka ʻo hotau Huhuʻí … kuo pau ke mo langa ai homo makatuʻungá.”
Potufolofolá 3 Nīfai 11:10–11	Kupuʻi Lea Folofola Mahuʻinga “Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.”
Potufolofolá 3 Nīfai 12:48	Kupuʻi Lea Folofola Mahuʻinga “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí.”
Potufolofolá 3 Nīfai 27:20	Kupuʻi Lea Folofola Mahuʻinga “Haʻu kiate au ʻo papitaiso … koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”
Potufolofolá ʻEta 12:6	Kupuʻi Lea Folofola Mahuʻinga “ʻOku ʻikai te mou maʻu ha fakamoʻoni kae ʻoua kuo hili hono ʻahiʻahiʻi ʻo hoʻomou tuí.”
Potufolofolá ʻEta 12:27	Kupuʻi Lea Folofola Mahuʻinga “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”
Potufolofolá Molonai 7:45–48	Kupuʻi Lea Folofola Mahuʻinga “Ko e manavaʻofá ʻa e ʻofa haohaoa ʻa Kalaisí.”
Potufolofolá Molonai 10:4–5	Kupuʻi Lea Folofola Mahuʻinga “Mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi … [pea] ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”

© 2023 by Intellectual Reserve, Inc. All rights reserved.

Fakakaukau ke vahevahe ʻa e kau akó ki ha fanga kiʻi kulupu iiki pea fakaafeʻi kinautolu ke fili ha potufolofola fakataukei fakatokāteline ʻe taha mei he sātí te nau fie ako maʻuloto. Poupouʻi ʻa e kulupu takitaha ke nau ako fakalongolongo ʻa e potufolofola kuo filí ʻi ha ngaahi miniti siʻi. ʻE lava ke ngāue ʻa e kau akó mo ʻenau kulupú ke ako maʻuloto ʻa e potufolofolá ʻo fakaʻaongaʻi ʻa e ʻekitivitī kupuʻi lea ʻoku fakamatalaʻi atu ʻi laló, ngaahi founga kehe kuo nau akoako fakahoko kimuʻá, pe ko e ngaahi polokalama ako maʻuloto ʻi he app Fakataukei Fakatokāteliné.

Ko ha founga ʻe taha ko hono ʻoange ki he kulupu takitaha ha laʻipepa ʻoku teʻeki tohi ai ha meʻa. ʻE kamata ʻaki ʻe ha tokotaha ako ʻe taha hono hiki ʻa e potufolofolá ʻi he laʻipepá. Pea ʻoange leva ia ʻe he tokotaha akó ki he tokotaha ako hokó, ʻa ia te ne hiki ʻa e ʻuluaki foʻi lea ʻo e potufolofolá. ʻE paasi takai ʻa e laʻipepá, pea hiki ʻe he tokotaha ako takitaha ha foʻi lea ʻe taha kae ʻoua kuo kakato ʻa e potufolofolá kotoa. Ko ha founga ʻe taha ko hono ʻoange ki he tokotaha ako takitaha ha sekoni ʻe 10 ke tohi ki he lahi taha te ne lavá kimuʻa pea ʻoange ʻa e laʻipepá ki he tokotaha ako hokó. ʻE lava ke fakahoko tuʻo lahi ʻeni ʻe he ngaahi kulupú, ʻo feinga ke vave ange hono fakakakato iá ʻi he taimi kotoa pē.

Fakamanatú

Fakakaukau ke ʻai ke nau fai ha tohi kiate kinautolu pē ʻi he kahaʻú, kae ʻoua te nau tohi atu kiate koé. Ko ha fili ʻe taha ko hono ʻai ʻo e kau akó ke aleaʻi tauhoa pe ʻi ha ngaahi kulupu iiki ʻa e ngaahi fehuʻi ko ʻení.

Fai ha kiʻi tohi nounou ki hoʻo faiakó. Fakakau ʻi ai ʻa e meʻa ko ʻení:

• Ko e potufolofola pe ngaahi kupuʻi lea folofola mahuʻinga naʻá ke ngāue ki hono ako maʻulotó mo e ngaahi founga ako maʻuloto naʻá ke fakaʻaongaʻí

• Ko e ngaahi tūkunga ʻokú ke fehangahangai mo ia he taimí ni pe te ke fehangahangai mo ia ʻi he kahaʻú ʻa ia ʻe ʻaonga lahi ai hono maʻuloto ʻo e potufolofola pe kupuʻi lea mahuʻinga ko ʻení

• Ko hoʻo ngaahi fakakaukau ki he founga ʻe lava ke tokoniʻi ai koe ʻe hono ako maʻuloto ʻo e folofolá ke ke muimui ki he sīpinga ʻa Sīsū Kalaisí

Kumi ha ngaahi faingamālie ke toutou lau maʻuloto ʻa e potufolofolá mo e vēsí (pe ngaahi kupuʻi lea mahuʻingá).