1 Pea ʻe toki fakahoko ʻa ia kuo tohí: Hiva, ʻE fefine paʻa, ʻa koe naʻe ʻikai te ke fanaú; ke ke ^ahiva, pea kalanga leʻo-lahi, ʻa koe naʻe ʻikai te ke langā ʻi ha tamasiʻí; he ʻoku tokolahi hake ʻa e fānau ʻa e liʻekiná ʻi he fānau ʻa e fefine malí, ʻoku folofola ʻe he ʻEikí.

2 Fakalahi ʻa e potu ʻo ho fale fehikitakí, pea tuku ke nau toʻo ʻa e puipui ʻo ho ngaahi nofoʻangá; fakaʻaongaʻi ʻa e potu kotoa pē, fakalōloa hoʻo ngaahi afó, pea tukituki ke maʻu hoʻo ngaahi ^aʻakau tuki poupoú;

3 He te ke maumauʻi hono ngaahi tapa kotoa pē, pea ʻe maʻu ʻe ho hakó ʻa honau fonuá mei he kau ^aSenitailé, ʻo fakakakai ʻa e ngaahi kolo naʻe lalá.

4 ʻOua ʻe manavahē, koeʻuhi ʻe ʻikai te ke mā; pea ʻoua naʻá ke puputuʻu, koeʻuhi ʻe ʻikai ^afakamaaʻi koe; he te ke fakangaloʻi ʻa e mā ʻo hoʻo kei siʻí, pea ʻe ʻikai te ke toe manatu ki he valoki ʻo hoʻo kei siʻí, pea ʻe ʻikai te ke manatuʻi hono fakamā ʻo hoʻo nofo uitoú.

5 He ko ho tupuʻangá, ʻa ho maluʻí, ko e ʻEiki ʻo e Ngaahi Kau Taú ʻa hono huafá; mo ho Huhuʻi, ko e Tokotaha Māʻoniʻoni ʻo ʻIsilelí—ʻe ui ia ko e ʻOtua ʻo e māmaní kotoa pē.

6 He kuo ui koe ʻe he ʻEikí ʻo hangē ko e fefine liʻekina pea mamahiʻia ʻi hono laumālié, pea hangē ko e uaifi ʻi heʻene kei talavoú, ʻi he ʻaho naʻe liʻaki ai koé, ʻoku folofola ʻa ho ʻOtuá.

7 ʻI he kiʻi taimi siʻi kuó u liʻaki koe, ka ʻi he ngaahi ʻaloʻofa lahi te u tānaki koe.

8 ʻI he ʻita siʻi naʻá ku fufū hoku fofongá meiate koe ʻi ha kiʻi taimi siʻi, ka ʻi he ʻofa taʻengata te u ^aʻaloʻofa kiate koe, ʻoku folofola ʻe he ʻEiki ko ho Huhuʻí.

9 He ʻoku tatau ʻa ^aʻeni, mo e ngaahi ^bvai ʻi he taimi ʻo Noá kiate au, he ʻoku hangē ko ʻeku fuakava ʻe ʻikai toe lōmakiʻi ʻe he ngaahi vai ʻo Noá ʻa e māmaní, ʻoku pehē ʻeku fuakava ʻe ʻikai te u ʻita kiate koé.

10 Koeʻuhi ʻe mole ʻa e ngaahi ^amoʻungá pea hiki mo e ngaahi tafungofungá, ka ko ʻeku ʻofá ʻe ʻikai ^bmahuʻi meiate koe, pea ʻe ʻikai hiki ʻa e fuakava ʻo ʻeku melinó, ʻoku folofola ʻe he ʻEikí ʻa ia ʻoku ʻaloʻofa kiate koé.

11 ʻA koe ko e mamahiʻia, pea vilingia ʻi he afaá, pea taʻefiemālié! Vakai, te u langa hake koe ʻaki ʻa e ngaahi ^amaka siueli fakaʻofoʻofa, pea ngaohi ʻaki ʻa e ngaahi maka sāfaiá ho ngaahi tuʻungá.

12 Pea te u ngaohi ho ngaahi matapā sioʻatá ʻaki ʻa e ngaahi maka ʻaketí, pea mo ho ngaahi matapaá ʻaki ʻa e ngaahi lupi, pea mo ho ngaahi ngataʻangá ʻaki ʻa e ngaahi maka fakaʻofoʻofa.

13 Pea ʻe akonekina hoʻo fānau ^akotoa pē ʻe he ʻEikí; pea ʻe lahi ʻa e melino ʻe maʻu ʻe hoʻo fānaú.

14 ʻE puleʻi koe ʻi he ^amāʻoniʻoni; te ke mamaʻo mei he ngaohikoviʻí koeʻuhi ʻe ʻikai te ke manavahē, pea mei he ilifiá koeʻuhi ʻe ʻikai ofi mai ia kiate koe.

15 Vakai, te nau tānaki fakataha moʻoni ke tauʻi koe, kae ʻikai ʻiate au; ko ia ia kotoa pē ʻe fakataha ke tauʻi koé te ne tō koeʻuhi ko koe.

16 Vakai, kuó u fakatupu ʻa e tufunga ukamea ʻa ia ʻokú ne tapili ʻa e malala ʻi he afí, pea ʻokú ne faʻu ʻa e meʻa fakatufunga mei heʻene ngāué; pea kuó u fakatupu ʻa e meʻangāue ke fai fakaʻauhá.

17 ʻE ʻikai ha mahafu tau kuo ngaohi ke tauʻi koe ʻe tuʻumālie; pea koe ʻelelo kotoa pē ʻe lea kovi kiate koe ʻi he fakamāú te ke fakahalaiaʻi. Ko e tofiʻa ʻeni ʻo e kau tamaioʻeiki ʻa e ʻEikí, pea ʻoku meiate au ʻa ʻenau māʻoniʻoní, ʻoku folofola ʻe he ʻEikí.