“3 Nīfai 18:15–39; 19:19–29: ‘Lotu Maʻu Ai Pē,’” Tohi ʻa Molomoná – Tohi Lēsoni ʻa e Faiakó (2024)
“3 Nīfai 18:15–39; 19:19–29,” Tohi ʻa Molomoná – Tohi Lēsoni ʻa e Faiakó
3 Nīfai 18:15–39; 19:19–29
“Lotu Maʻu Ai Pē”
ʻOku tokolahi ha kakai ʻoku nau lotu ʻi he ʻaho kotoa pē. ʻE lava ke mahuʻingamālie ange ha ngaahi lotu ʻe niʻihi ʻi ha ngaahi lotu ʻe niʻihi. Naʻe ʻikai ngata pē ʻi hono akoʻi ʻe Sīsū Kalaisi ʻEne kau muimuí ke nau “lotu maʻu ai pē ki he Tamaí” (3 Nīfai 18:19), ka naʻá Ne fakahā foki kiate kinautolu ʻa e founga ʻo e lotú. ʻE lava ke tokoniʻi koe ʻe he lēsoni ko ʻení ke ke muimui ki he ngaahi akonaki mo e sīpinga ʻa Sīsū Kalaisí ke ke lotu maʻu pē mo fakahoko ha ngaahi lotu ʻoku mahuʻingamālie angé.
Lotua maʻu pē hoʻo kau akó. ʻOku ʻafioʻi ʻe he Tamai Hēvaní hoʻo kau akó takitaha. ʻI hoʻo lotu kiate Ia fekauʻaki mo hoʻo kau akó, te Ne lava ʻo tokoniʻi koe ke ke ʻiloʻi ʻa e ngaahi fiemaʻu ʻa e kau akó mo ueʻi koe ʻaki ha ngaahi founga ke feau ʻaki ʻenau ngaahi fiemaʻú. Fakafanongo ki he ngaahi ueʻi te ke ala maʻu ʻi hoʻo teuteu ke faiakó pe lolotonga ʻa e lēsoní.
Teuteu ʻa e tokotaha akó: Fakaafeʻi ʻa e kau akó ke lau pe fanongo ki he lea ʻa Palesiteni M. Lāsolo Pālati “Ko Ia Mou Leʻo, pea Lotu Maʻu Ai Pē” (Ensign pe Liahona, Nōvema 2020, 77–79), ʻo kumi ha ngaahi moʻoni ʻe lava ʻo tokoni kiate kinautolu ʻi heʻenau lotu fakatāutahá.
Ngaahi ʻEkitivitī Ako ʻOku Ala Fakahokó
Ngaahi Sīpingá
Hiki ʻi he palakipoé ʻa e sētesi ʻi laló fakataha mo e ngaahi konga ʻoku fakaʻatā atú, pea tuku ki ha kau ako ʻe niʻihi ke vahevahe ʻa e founga te nau fakafonu ai ʻa e ngaahi konga ʻoku ʻataá.
Fakakaukau ki ha talēniti, taukei, pe ʻulungaanga te ke saiʻia ke fakatupulaki. Fakakaukau ki he kakai ʻokú ke ʻilo ʻoku nau maʻu ʻa e talēniti, taukei, pe ʻulungaanga ko iá. ʻI hono fakaʻaongaʻi ʻo e ngaahi fakakaukau ko ʻení, fakafonu ʻa e ngaahi konga ko ʻeni ʻoku fakaʻatā atú ʻi ha ngaahi founga kehekehe:
-
Kapau naʻá ku fie ako fekauʻaki mo e , te u muimui ʻi he sīpinga ʻa koeʻuhí .
Toe fai pē ʻa e ngāué ʻaki hano fakafonu ʻa e ʻuluaki konga ‘atā ʻo e sētesi ko ʻení ʻaki ha meʻa ʻokú ke fie ako mei he Fakamoʻuí pea tali ʻa e ʻuhingá ʻi he konga ʻatā fakaʻosí.
-
Kapau naʻá ku fie ako fekauʻaki mo e , te u muimui ʻi he sīpinga ʻa Sīsū Kalaisí koeʻuhí .
Lolotonga ʻa e ngāue fakafaifekau ʻa e Fakamoʻuí ʻi he ongo ʻAmeliká, naʻá Ne akoʻi ʻa e kakaí ʻi he lea mo e tā sīpinga.
Lau ʻa e 3 Nīfai 18:16, 24, ʻo kumi ki ha tā sīpinga ʻa Sīsū.
-
Ko e hā naʻe finangalo ʻa e Fakamoʻuí ke ako ʻe he kakaí mei Heʻene tā sīpingá?
ʻE lava ke vakaiʻi ʻe he kau akó ʻa e ngaahi lotu ʻoku nau lotu lolotonga fakahokó ʻo fakaʻaongaʻi ʻa e meʻafua ko ʻení. ʻE lava ke hoko ʻa hono fai iá ke fakaafeʻi ai ʻa e Laumālie Māʻoniʻoní ke tokoni ke nau ʻiloʻi ʻa e founga ʻe lava ke tokoniʻi ai kinautolu ʻe he ngaahi akonaki mo e sīpinga ʻa e Fakamoʻuí ke fakatupulaki ʻenau ngaahi lotu fakatāutahá.
Fakamaaka ʻa e ngaahi meʻa ko ʻení ʻi ha meʻafua mei he 1 ki he 5, pea ko e māʻolunga tahá ʻa e 5:
-
ʻOku ou lotu ʻi he ʻaho kotoa pē.
-
ʻOku ou fetuʻutaki mo ongoʻi ofi ki he Tamai Hēvaní ʻi he taimi ʻoku ou lotu aí.
-
ʻOku ou ongoʻi ha loto-holi ke fakaleleiʻi ʻeku ngaahi lotu fakatāutahá.
Fakaafeʻi ʻa e kau akó ke aleaʻi ʻa e ngaahi faingataʻa angamaheni ki he lotu ʻoku ʻuhingamālié—hangē ko ʻení, tuku ha taimi ke lotú, ʻiloʻi ʻa e meʻa ke lea ʻakí, maʻu ʻa e ngaahi talí, pe ngaahi faingataʻa kehe. ʻE lava leva ke kumi ʻe he kau akó ha ngaahi founga ke fakaleleiʻi ʻaki ʻi heʻenau ako ʻa e folofolá.
ʻI he hokohoko atu hoʻo ako ʻa e 3 Nīfai 18, fekumi ki he ueʻi ʻa e Laumālie Māʻoniʻoní ke tokoniʻi koe ke ke ʻilo ʻa e meʻa te ke lava ʻo fai ke fakaleleiʻi ai hoʻo ngaahi lotu fakatāutahá. Muimui ʻi he ngaahi akonaki mo e sīpinga ʻa Sīsū Kalaisí ʻi hoʻo feinga ke fakalakalaká.
Ko e ngaahi akonaki ʻa e Fakamoʻuí fekauʻaki mo e lotú
Lau ʻa e 3 Nīfai 18:15, 18–23, ʻo kumi ʻa e meʻa ne akoʻi ʻe he Fakamoʻuí fekauʻaki mo e lotú. Te ke lava foki ʻo lau ʻa e fakahinohino ʻa e Fakamoʻuí fekauʻaki mo e lotú mei Heʻene malanga ʻi he temipalé ʻi he 3 Nīfai 13:5–13.
ʻE lava ke fakakakato ʻe he kau akó ʻa e sētesi ko ʻení ʻi he palakipoé:
-
Te u lava ʻo muimui ki he ngaahi akonaki ʻa e Fakamoʻuí fekauʻaki mo e lotú ʻaki …
Tuku ha taimi feʻunga ke aleaʻi ai ʻa e ngaahi akonaki ʻa e Fakamoʻuí. Loto-fiemālie ke tukuange ʻa e fealēleaʻakí ke aʻu ki he meʻa ʻoku ongoʻi ʻe he kau akó ʻoku nau fiemaʻú. Hangē ko ʻení, mahalo ʻe fakaʻaongaʻi ʻe he kalasí ha taimi ke talanoa ki he founga ʻoku tokoniʻi ai kitautolu ʻe he lotú ke tau matuʻuaki ʻa e ʻahiʻahí, founga ʻoku tāpuekina ai ʻe he lotú ʻa e ngaahi fāmilí, pe ko e founga te tau lava ai ʻo kole ha ngaahi tāpuaki ʻi he lotú. Te ke lava ʻo ako lahi ange ki he ngaahi akonaki ʻa e Fakamoʻuí fekauʻaki mo e lotú ʻi he Luke 11:1–13.
Te ke lava foki ʻo fakaʻaongaʻi ha niʻihi ʻo e ngaahi fakamatala ʻi he konga “Fakamatala Fakamahinó mo e Puipuituʻá” ko ha konga ʻo e fealēleaʻakí.
-
Ko e fē ʻi he ngaahi akonaki ʻa Sīsū fekauʻaki mo e lotú ʻokú ke pehē ʻe tokoni lahi taha kiate koé? Ko e hā hono ʻuhingá?
Ko e sīpinga lotu ʻa e Fakamoʻuí
Fakakaukauloto pe ‘e fēfē haʻo fanongo ʻoku lotua koe ʻe Sīsū Kalaisi. ʻOkú ke pehē ko e hā ha meʻa te Ne lotua maʻaú? Fakakaukau ki he ngaahi ongo te ke ala maʻú pea mo e founga te nau liliu ai hoʻo ngaahi lotú.
Te ke lava ʻo vahevahe ʻa e kalasí ki ha fanga kiʻi kulupu iiki pea vahe ki he kulupu takitaha ha taha ʻo e ngaahi veesi ko ʻení ke lau mo lipooti.
Tokoni ke ʻilo ʻe he kau akó pe ko hai naʻe lotu ki ai ʻa Sīsuú, ko hai naʻá Ne lotuá, ko e hā ʻa e meʻa naʻá Ne lotuá, ʻuhinga naʻá Ne lotu aí, ko Hono ʻulungaanga ʻi he lotú, mo ha ngaahi meʻa lahi ange. Ko e founga ʻe taha ke fakahoko ai ʻení ko hono ʻai ke tali ʻe he kau akó ʻa e “Ko Hai?” “Ko e hā?” “Ko e hā hono ʻuhingá?” mo e “ʻE founga fēfē?”
ʻI hono aleaʻi ʻa e ʻuhinga naʻe lotu ai ʻa Sīsuú, te ke lava ʻo tokoni ki he kau akó ke nau ʻilo ko e taha ʻo e ngaahi ʻuhinga naʻe lotu ai ʻa Sīsuú ke fefolofolai mo ʻEne Tamaí, ʻa ia naʻá Ne ʻofa aí.
Te ke lava ʻo huluʻi e foʻi vitiō “ʻOku Ngāue Fakaetauhi ʻa e Kau Ākongá pea Lotua ʻe Sīsū Kalaisi ʻa e Kakaí” mei he taimi 3:05 ki he 7:18, ʻoku maʻu ʻi he ChurchofJesusChrist.org, pea fakaafeʻi ʻa e kau akó ke muimui ki ai mo e ngaahi veesi ʻi he 3 Nīfai 19.
Fakaafeʻi ʻa e kau akó ke fakakakato ʻa e sētesi ko ‘ení ʻi he palakipoé:
-
Te u lava ʻo muimui ki he sīpinga ʻa e Fakamoʻuí ʻi he lotú ʻaki …
-
Ko e hā naʻá ke ako fekauʻaki mo e ongo ʻa e Fakamoʻuí kiate koé?
-
‘Okú ke pehē ʻe liliu fēfē ʻe he muimui ʻi Heʻene sīpingá ʻa hoʻo ngaahi lotú?
Ko ʻetau ngaahi lotu fakatāutahá
Tokoni ki he kau akó ke fakakaukau ki ha ngaahi aʻusia mahuʻingamālie kuo nau maʻu ʻi he lotú. ʻE lava ke fakakaukau ʻa e kau akó ki ha taimi naʻa nau lotu ai ke tekeʻi ʻa e ʻahiʻahí pe lotua ha tokoni ʻi ha faingataʻa. Te nau lava ʻo fakakaukau ki ha taimi kuo tāpuekina ai honau fāmilí ʻi he lotú, ko ha taimi kuo nau lotua ai ha taha kehe, pe ko ha taimi naʻa nau kolea ai ha ngaahi tāpuaki. Fakaafeʻi ʻa e kau akó ke vahevahe ʻa e founga kuo tāpuekina ai kinautolu ʻe he lotú. Fakamanatu ki he kau akó ke ʻoua naʻa nau vahevahe ha ngaahi aʻusia ʻoku fuʻu toputapu pe fakataautaha.
Vahevahe mo e kau akó ʻa e founga kuo tāpuekina ai koe ʻi hoʻo muimui ki he sīpinga ʻa e Fakamoʻuí mo ʻEne ngaahi akonaki fekauʻaki mo e lotú. Vakai ki he ngaahi fakamatala kuo fakakakato ʻi he palakipoé, pea aleaʻi ʻa e founga ʻe lava ke tokoni ai ʻa e ngaahi akonaki mo e sīpinga ʻa e Fakamoʻuí ki he ngaahi faingataʻa ʻo e lotú naʻe lave ki ai ʻanenaí.
Fili ha taha ʻo e ngaahi akonaki ʻa e Fakamoʻuí pe ko ha meʻa naʻá Ne fakafōtunga ʻi he lotú te ke lava ʻo fakahoko ʻi hoʻo ngaahi lotu fakatāutahá. Faʻu ha fakamanatu pea kamata ngāueʻi ia he ʻahó ni. ʻI hoʻo fai iá, fakatokangaʻi ʻa e founga ʻoku tokoni ai ke toe mahuʻingamālie ange hoʻo ngaahi lotú mo e founga ʻokú ne tākiekina ai ho vā fetuʻutaki mo e Tamai Hēvaní.
Mahalo te ke fie tānaki atu ha niʻihi ʻo e ngaahi meʻa naʻá ke ako he ʻaho ní ki hoʻo tohinoa “Ako kau kia Sīsū Kalaisi ʻi he 3 Nīfaí.”
Mahalo te ke fie fakaafeʻi ʻa e kau akó ke tānaki atu ki heʻenau tohinoa “Ako kau kia Sīsū Kalaisi ʻi he 3 Nīfaí.”