Handurawa nga maghimo og usa ka sulat aron sa pagtabang sa mga tawo kinsa mabuhi gatosan ka mga tuig sa umaabot. Ang propeta nga si Mormon mao gayod kana ang gibuhat. Samtang iyang gipamubo ang kasaysayan sa mga Nephite ug gikulit kini sa bulawan nga mga palid, usahay iyang gitudlo ang importante nga mga kamatuoran gamit ang mga pamahayag sama sa “sa ingon kita makakita.” Ang mga kamatuoran nga iyang gipatugbaw [highlighted] makatabang kanato sa mga hagit nga atong giatubang karon. Kini nga leksiyon makatabang kanimo sa pag-ila sa mga kamatuoran gikan sa mga kasulatan ug sa pag-analisar kon sa unsang paagi kana nga mga kamatuoran makaapekto sa imong kinabuhi.
Tabangi ang mga estudyante nga makakat-on gikan sa mahinungdanon nga mga pulong ug sa mga hugpong sa mga pulong. Adunay piho nga mga pulong o mga hugpong sa mga pulong diha sa mga kasulatan ang makahatag og pangkonteksto nga mga panultol [clues] alang sa mga magbabasa. Tabangi ang mga estudyante sa pag-ila sa mga pulong nga nagpunting sa mahinungdanon nga doktrina ug mga baroganan nga angay karong panahona.
Pagpangandam sa estudyante: Dapita ang mga estudyante sa pagpangita og usa o duha ka importante nga mga kamatuoran atol sa ilang personal o pamilya nga pagtuon sa kasulatan. Hangyoa sila nga mangandam sa pagpasabot kon sa unsang paagi sila nakakaplag og makahuloganong kamatuoran diha sa mga kasulatan.
Mga Posibleng Kalihokan sa Pagkat-on
Usa ka giya sa pagpakabuhi
Sugdi ang leksiyon pinaagi sa usa ka kalihokan nga makatabang sa mga estudyante sa paghunahuna kon sa unsang paagi ang mga kasulatan mapuslanon sa ilang mga kinabuhi. Makatabang kini kanila nga magtinguha sa mas makugihong pagpangita sa doktrina ug mga baroganan diha sa mga kasulatan. Ang mosunod mao ang usa ka paagi aron sa pagbuhat niini.
Kon hangyoon ka nga magsulat og usa ka giya sa pagpakabuhi sa eskwelahan [school survival guide] alang sa mga nagpangedaron og 12- ug 13-anyos, unsa ang imong ilakip?
Basaha kon unsa ang gisulti ni Presidente Russell M. Nelson mahitungod sa usa ka giya sa pagpakabuhi alang sa imong kinabuhi:
Imahe
Presidente Russell M. Nelson
Ang mga propeta sa [Basahon ni Mormon], nga nadasig sa Ginoo, nakakita sa atong panahon ug mipili sa doktrina ug mga kamatuoran nga labing makatabang nato. Ang Basahon ni Mormon mao ang atong ulahing adlaw nga giya sa pagpakabuhi. (Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 75)
Sa unsang paagi ang doktrina ug mga kamatuoran nga imong nakaplagan diha sa mga kasulatan nakatabang kanimo nga mabuhi sa espirituhanong paagi? Makahunahuna ka ba ug bisan unsang bag-ohay lang nga mga pananglitan?
Samtang magtuon ka sa Helaman 3 ug sa Helaman 6, makabaton ka og kahigayonan sa pagbansay sa pag-ila sa doktrina ug mga baroganan gikan sa mga kasulatan. Makatabang kini kanimo nga makabaton og mas makahuloganon nga pagtuon sa kasulatan ug magdala kanimo ug sa imong pamilya nga mas maduol ngadto kang Kristo.
“Sa ingon kita makakita …”
Taliwala sa tanan nga panagbingkil nga narekord sa Helaman 1–6, adunay temporaryo nga mga gutlo sa kalinaw. Diha sa Helaman 3, daghang liboan ang nabunyagan ngadto sa Simbahan, ug ang Simbahan miuswag. Diha sa Helaman 6, human sa pagkakabig sa daghang mga Lamanite, ang mga Nephite ug ang mga Lamanite nagpuyo nga nagkahiusa samtang ang duha ka mga grupo mibalik ngadto sa Ginoo. Sa duha niini nga mga kapitulo, si Mormon mihunong sa iyang pagsaysay sa kasaysayan sa mga Nephite aron ipatugbaw [highlight] ang mahinungdanon nga doktrina ug mga baroganan sa kamatuoran. Gihimo niya kini pinaagi sa paggamit sa pamahayag nga “sa ingon kita makakita.”
Ang mosunod nga kalihokan gituyo aron sa pagbansay sa mga estudyante sa pagpangita sa mga pulong o mga hugpong sa mga pulong nga makatabang kanila sa pag-ila sa doktrina o mga baroganan ug sa pagsusi kon sa unsang paagi kana nga mga kamatuoran makaapekto sa ilang mga kinabuhi.
Ikonsiderar ang pagbutang sa mga estudyante sa gagmay nga mga grupo o sa mga pares ug ipakita ang mga instruksiyon nga ilang sundon.
Basaha ang Helaman 3:27–30; 6:34–36 aron sa pag-ila sa mga pamahayag sa kamatuoran nga “sa ingon kita makakita”. Ikonsiderar ang pagmarka niadtong mga kamatuoran diha sa imong mga kasulatan ug irekord kini sa imong kaugalingong mga pulong diha sa imong journal sa pagtuon.
Bisan og mogamit ang mga estudyante og nagkalainlaing mga pulong, tingali sila makaila sa mga baroganan nga susama sa mosunod:
Ang Ginoo maluluy-on ngadto sa tanan kinsa motawag nganha Kaniya uban sa katim-os sa mga kasingkasing (tan-awa sa Helaman 3:27).
Ang ganghaan sa langit bukas alang sa tanan kinsa motuo kang Jesukristo (tan-awa sa Helaman 3:28).
Bisan kinsa nga magtinguha mahimong magkat-on sa pulong sa Dios, nga modala kanila ngadto sa gingharian sa Dios (tan-awa sa Helaman 3:29–30).
Kon mas mailhan nato ang Dios, mas lagmit nga makahimo kita sa pagtuman sa Iyang mga sugo (tan-awa sa Helaman 6:34).
Kon kita daotan ug mopatig-a sa atong mga kasingkasing, niana ang Espiritu sa Ginoo mopahilayo kanato (tan-awa sa Helaman 6:35).
Kon kita mopili sa atong kabubut-on nga motuo sa mga pulong sa Ginoo, diha Iyang ibubo ang Espiritu ngari kanato (tan-awa sa Helaman 6:36).
Kon ang mga estudyante makabenepisyo gikan sa pagtuon sa usa o labaw pa niini nga mga baroganan sa kahiladman, tan-awa ngadto sa mga seksiyon sa “Komentaryo ug Background nga Impormasyon” ug “Dugang nga mga Kalihokan sa Pagkat-on” alang sa mga ideya nga makita diha sa Gospel Library nga App o sa Gospel Library Online.
Laing kapilian mao ang paghatag og dugang panahon sa mga estudyante sa pagbansay sa pag-ila sa mga kamatuoran. Ikonsiderar ang paghangyo kanila sa pagsulat sa uban pang mga pamahayag sa “sa ingon kita makakita” gikan sa usa ka bersikulo sa doktrinal nga kahanas, sa bag-o lang nilang gitun-an sa balay, o sa laing paborito nga bersikulo nga ilang gipili.
Sunod, pagpili og usa sa mga kamatuoran nga imong nakaplagan, ug ilista ang pipila sa espirituhanong mga kapeligro, mga hagit, o mga pag-atake sa hugot nga pagtuo nga kini nga kamatuoran makatabang kanimo sa pagpakabuhi. Pananglitan, kon imong gamiton ang kamatuoran nga kon kita mopili sa atong kabubut-on nga motuo sa mga pulong sa Ginoo, diha Iyang ibubo ang Espiritu ngari kanato (tan-awa sa Helaman 6:36), mahimo nimong ilista ang mga kapeligro sama sa panginahanglan og pamatuod sa siyensiya sa dili pa kita motuo sa mga kasulatan, motuo sa mga eksperto sa kalibotan labaw pa kay sa pagtuo sa mga propeta, o mosalig sa lohika [logic] labaw pa kaysa espirituhanong mga impresyon.
Hinumdomi ang pamahayag ni Presidente Nelson gikan sa sinugdanan niini nga leksiyon mahitungod sa Basahon ni Mormon isip atong giya sa pagpakabuhi sa ulahing mga adlaw.
Kon anaa, hatagi og mga krayola, mga lapis nga de kolor, o mga pangmarka ang mga estudyante aron makahimo og usa ka panid sa “giya sa pagpakabuhi.” Sila mahimong mobuhat sa mosunod nga mag tinagsa o isip mga grupo.
Sa usa ka piraso sa papel isulat ang “Unsaon sa pagpakabuhi …” ug taposa ang pamahayag gamit ang usa sa mga kapeligro, mga hagit, o mga pag-atake nga imong gilista. Sama pananglit, kon gigamit nimo ang kaganenang naila nga kamatuoran, mahimo nimong isulat, “Unsaon sa pagpakabuhi sa pag-atake sa espirituhanong impresyon.” Gamita ang kamatuoran nga imong gipili aron sa paghimo og usa ka panid nga giya sa pagpakabuhi. Ipasabot diha sa mga drowing o sa mga pulong kon sa unsang paagi kini nga kamatuoran makatabang sa usa ka tin-edyer nga mabuhi sa espirituhanong paagi. Ilakip ang labing menos duha sa mosunod nga mga ideya diha sa imong giya sa pagpakabuhi:
Ngano nga kini nga kamatuoran makatabang sa usa ka tawo nga mabuhi sa espirituhanong paagi sa kalisdanan nga imong gilista
Ubang mga kasulatan nga may kalabotan niini nga kamatuoran o makatabang sa kalisod nga imong gilista
Sa unsang paagi nga kining kamatuoran magdala kanimo o sa uban ngadto kang Jesukristo o makatabang kanimo nga makadawat sa Iyang kusog
Unsa ang mahitabo sa mga tawo kon kini nga kamatuoran dili masayran o dili masunod
Sa unsang paagi mausab ang kalibotan kon ang tanan mopili sa pagpuyo niini nga kamatuoran
Dapita ang mga estudyante sa pagpakigbahin sa ilang giya sa pagpakabuhi ngadto sa ubang mga grupo o sa tibuok klase. Sa ilang pagbuhat niini, ikonsiderar ang pagdapit kanila sa pagpakigbahin og personal nga mga kasinatian nga aduna sila nga may kalabotan sa mga kamatuoran nga ilang gipatugbaw [highlighted]. Pananglitan, kong gigamit sa mga estudyante ang kamatuoran nga kon kita mopili sa atong kabubut-on nga motuo sa mga pulong sa Ginoo, Iyang ibubo ang Espiritu ngari kanato (tan-awa sa Helaman 6:36) mahimo kang mangutana kon sa unsang paagi nila gibati ang Iyang Espiritu samtang nagtuon ug naggamit sa Iyang mga pulong gikan sa Basahon ni Mormon.
Dasiga ang mga estudyante sa pagpangita sa mahinungdanon nga doktrina ug mga kamatuoran samtang sila nagtuon sa mga kasulatan. Pagpamatuod sa gahom sa pulong sa Dios.