Nakabati na ba ka nga giliyokan sa negatibo nga mga impluwensiya o sa mga tintasyon sa yawa? Gipahisama ni propeta Helaman ang mga pag-atake ni Satanas ngadto sa usa ka unos nga adunay mapintas nga mga hangin ug ulan nga yelo nga mihapak kanato. Mipahayag usab siya nga kadtong nagtukod sa tukoranan sa ilang mga kinabuhi “diha sa lig-on nga sukaranan sa atong Manunubos” (Helaman 5:12) makabaton og gahom sa pagsukol sa daotan ug magpabiling matinud-anon. Kini nga leksiyon makatabang kanimo sa pagsugakod sa yawa ug sa pagtukod sa imong tukoranan diha kang Jesukristo.
Tabangi ang mga tigkat-on nga molalom ang ilang pagpasalamat ug gugma alang kang Jesukristo. Samtang magkat-on ang mga estudyante mahitungod ni Jesukristo, tabangi sila nga mas molapas pa ang ilang pagkat-on sa kon unsay Iyang gisulti ug gibuhat ngadto sa pagkat-on kon si kinsa Siya. Usa ka paagi sa pagbuhat niini mao ang pagtutok sa Iyang mga hiyas ug mga kinaiya. Dasiga ang mga estudyante sa pagpamalandong kon sa unsang paagi ang Manluluwas mipahamtang sa Iyang gahom diha sa ilang mga kinabuhi.
Pagpangandam sa estudyante: Dapita ang mga estudyante sa pagbasa sa Helaman 5:12 ug sa pagmarka sa mga pulong o mga hugpong sa mga pulong nga makahuloganon diha kanila. Ikonsiderar usab ang pagdapit sa mga estudyante sa pagsugod sa pagsag-ulo sa tibuok tudling.
Mga Posibleng Kalihokan sa Pagkat-on
Ang imong espirituhanong tukoranan [foundation]
Diha sa pisara, ilista ang mga tubag sa estudyante sa mosunod nga pangutana.
Unsa ang pipila ka mga hagit o mga isyu nga makapahuyang sa hugot nga pagtuo o espirituhanong tukoranan [foundation] sa usa ka tawo? Ikonsiderar ang paglista niini diha sa imong journal sa pagtuon.
Ikonsiderar ang pagpakita og hulagway sa Salt Lake Temple.
Imahe
ang Salt Lake Temple
Atol sa Oktubre 2021 nga kinatibuk-ang komperensiya, gihisgotan ni Presidente Russell M. Nelson ang panginahanglan sa pagpalig-on sa orihinal nga pundasyon sa Salt Lake Temple. Gidapit dayon niya ang mga miyembro sa Simbahan sa pagkonsiderar sa ilang kaugalingong mga espirituhanong pundasyon. Basaha ang mosunod nga pamahayag ug pamatikdi kon giunsa pagtandi ni Presidente Nelson ang pagpalig-on sa templo ngadto sa atong kaugalingon nga mga kinabuhi.
Imahe
Presidente Russell M. Nelson
Sa samang paagi, panahon na karon nga kita moimplementar sa dili ordinaryo nga mga paagi—tingali mga paagi nga wala nato mahimo kaniadto—sa pagpalig-on sa atong personal nga espirituwal nga mga pundasyon. Ang dili ordinaryo nga mga panahon nagkinahanglan og dili ordinaryo nga mga paagi.
Minahal nako nga mga kaigsoonan, kini mao ang ulahing mga adlaw. Aron kamo ug ako makasugakod sa umaabot nga mga katalagman ug mga kalisod, kinahanglan nga kita adunay lig-on nga espirituwal nga pundasyon nga natukod diha sa lig-on nga sukaranan sa atong Manunubos, nga si Jesukristo.
Mao nga ako mangutana sa matag usa kaninyo, unsa kalig-on ang inyong tukoranan? Ug unsa nga mga pagpalig-on sa inyong pagpamatuod ug pagsabot sa ebanghelyo ang gikinahanglan? (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93-94)
Unsa ang mipatigbabaw diha kanimo sa pamahayag ni Presidente Nelson?
Ikonsiderar ang pagpakita o pagsulat sa mga pangutana ni Presidente Nelson diha sa pisara samtang ang mga estudyante namalandong ug nagsulat.
Pamalandongi kon unsaon nimo pagtubag ang mga pangutana ni Presidente Nelson mahitungod sa imong espirituwal nga pundasyon. Tinguhaa ang impluwensiya sa Espiritu Santo, ug isulat ang imong mga tubag.
Si Helaman midasig sa iyang anak nga mga lalaki sa paghinumdom
Atol sa ika-54 nga tuig sa pagmando sa mga maghuhukom, daghan sa mga Nephite nahimong dunot ug mipili sa daotan kay sa maayo. Isip resulta, si Nephi mikanaog isip labaw nga maghuhukom ug miduyog sa iyang igsoon nga si Lehi sa pagsangyaw sa pulong sa Dios ngadto sa mga katawhan (tan-awa sa Helaman 5:1–4), sama sa gibuhat sa iyang apohan sa tuhod, si Alma nga batan-on, mga 60 ka mga tuig na ang nakalabay (Alma 4:15–20). Si Lehi ug Nephi nagpabilin nga matinuod-anon, sa usa ka bahin tungod kay sila nahinumdom sa mga panudlo sa ilang amahan, nga si Helaman.
Ikonsiderar ang pagsulat sa mga pulong nga Hinumdomi, Hinumdomi diha sa pisara isip ulohan. Dapita ang mga estudyante sa pagbasa sa Helaman 5:5–11 ug dayon sa pagduol diha sa pisara ug sa pagsulat og usa ka butang nga gisultihan sila si Nephi ug Lehi sa paghinumdom. Kon adunay usa ka butang nga gusto isulat sa usa ka estudyante nga anaa na diha sa pisara, mahimong butangan sa estudyante og marka nga tsek ang tupad niini. Kon wala makahimo sa pagsulat ang mga estudyante diha sa pisara, mahimo silang makapili og usa ka butang gikan sa listahan ug ipakigbahin kon sa unsang paagi ang paghinumdom nianang butanga makatabang kanila sa paglig-on sa ilang espirituhanong mga tukoranan [foundation].
Atong tinuod nga tukoranan
Basaha ang Helaman 5:12, mangita og dugang nga mga kamatuoran nga gusto ni Helaman nga mahinumdoman sa iyang mga anak nga lalaki.
Ang Helaman 5:12 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Kon ang mga estudyante miapil sa pagpangandam sa estudyante, susiha ang ilang pag-uswag sa pagsag-ulo sa Helaman 5:12. Ikonsiderar ang pagdapit kanila sa pagpakigbahin og mga pulong ug mga hugpong sa mga pulong nga makahuloganon ngadto kanila.
Unsa ang pipila ka mga kamatuoran nga imong nakaplagan sa Helaman 5:12?
Duha ka importante nga mga kamatuoran nga anaa sa Helaman 5:12 mao ang si Jesukristo mao ang atong tinuod nga tukoranan ug kon atong tukuron ang atong tukoranan diha kang Jesukristo, ang yawa walay gahom ibabaw kanato.
Sa unsang paagi nga si Jesukristo sama sa usa ka lig-on nga sukaranan ug usa ka tinuod nga tukoranan sa atong mga kinabuhi?
Sa unsang paagi nga ang mga pag-atake sa yawa sa imong hugot nga pagtuo mabati nga sama sa usa ka unos o alimpulos?
Mahimo nimong hisgotan ang nagkalainlaing mga paagi nga giatake sa yawa ang katilingban, mga pamilya, ang Simbahan, ug mga indibidwal. Mahimo nimong hisgotan kon sa unsang paagi nga ang mga hagit ug mga isyu nga gilista diha sa pisara sa sinugdanan sa leksiyon nahisama sa mga unos ug mga alimpulos. Dapita ang mga estudyante sa pagpamalandong sa bisan unsang personal nga mga unos o mga alimpulos nga ilang giatubang.
Kon anaa, tan-awa ang bidyo nga “Espirituhanong mga Alimpulos” (2:24) anaa sa ChurchofJesusChrist.org aron makat-on gikan ni Elder Neil L. Andersen sa Korum sa Napulog Duha ka Apostoles kon unsaon pagbuntog ang mga alimpulos sa yawa.
Ikonsiderar ang pagsulat sa si Jesukristo mao ang atong tinuod nga tukoranan diha sa pisara. Dapita ang mga estudyante sa pagsulat duol sa pamahayag sa ilang mga tubag sa unang pangutana sa ubos. Pangandam sa pagpakigbahin og pipila ka mga paagi nga ang mga estudyante makatukod sa ilang mga tukoranan diha kang Kristo ug sa pagdasig og daghang mga tubag. Ang ubang mga paagi mahimong maglakip sa pagsunod sa Iyang ehemplo kon giunsa Niya pag-ampo ngadto sa Iyang Amahan, paghigugma sa Iyang mga kaaway, o paggahin og panahon sa pagtuon sa mga kasulatan aron masulat kini diha sa Iyang kasingkasing. Human malista sa mga estudyante ang ilang mga tubag, hangyoa sila sa pagpili og pipila aron analisahon. Hisgoti ang piho nga mga buhat nga ilang mahimo nianang dapita.
Unsa ang pipila ka mga paagi nga kita makatukod sa atong espirituhanong mga tukoranan diha sa “lig-on nga sukaranan sa atong Manunubos”?
Unsa ang pipila ka mga babag sa pagtukod sa atong tukoranan diha sa Manluluwas niini nga mga paagi?
Sa unsa kaha nga paagi nga ang pagbuhat niining mga butanga makapugong sa yawa nga makabaton og gahom ibabaw kanato?
Personal nga paggamit
Hunahunaa ang mga personal nga mga unos o mga hagit nga kasamtangan nimong giatubang o tingale atubangon sa umaabot. Ikonsiderar sa mainampoong paagi kon sa unsang paagi ang pagtukod o ang pagpalig-on sa imong tukoranan diha ni Jesukristo makatabang kanimo nga makasugakod niini nga mga hagit.
Pagdrowing og hulagway nga nagrepresentar kanimo nga nagbarog sa lig-on nga tukoranan. Sulatiang tukoranan og “Jesukristo.” Pagdrowing og pipila ka nagdilaab nga pana (sama sa usa ka gaan nga bangkaw) o usa ka alimpulos ug sulati ang mga pana o alimpulos sa piho nga mga tintasyon o mga hagit nga imong giatubang.
Diha o duol sa tukoranan, pagsulat og piho nga butang nga imong gibuhat o mahimo nimong sugdan sa pagbuhat aron matukod ang imong tukoranan diha ni Jesukristo.
Pananglitan, mahimong usa kini ka personal nga tumong sa paggahin og panahon sa pagbuhat sa kasaysayan sa pamilya o sa pagtambong sa templo. Mahimong ang pagtuon kini sa ebanghelyo sa Manluluwas kada adlaw diha sa mga kasulatan o mas sinsero nga personal nga pag-ampo. Ang pagtuon sa doktrinal nga kahanas makatabang usab kanimo sa pagpalig-on sa imong tukoranan.
Hunahunaa ang bisan unsang mga babag nga tingali gikinahanglan nimong mabuntog, ug isulat kon unsa ang imong buhaton aron mabuntog kini.
Kon mahimo, pagbutang og pahinumdom diha sa imong telepono aron sa pagtabang kanimo sa pagpadayon sa pagsunod sa mga pasalig nga imong gihimo atol niini nga leksiyon. Ikonsiderar ang pagpakigbahin sa imong mga pasalig ngadto sa kasaligan nga sakop sa pamilya, lider sa Simbahan, o higala ug sa pagpangayo og tabang kanila aron matuman nimo kini.
Kon mahimo, hatagi ang mga estudyante og oras diha sa klase aron masugdan kon unsa ilang gipasalig nga buhaton. Dasiga ang mga estudyante sa pagpadayon niini sa balay. Ikonsiderar ang pagpamatuod mahitungod sa Manluluwas isip atong sigurado nga tukoranan ug sa pagdapit sa mga estudyante sa pagbuhat sa ingon.
