Doktrinal nga Kahanas: Helaman 5:12

“Kini diha sa Lig-on nga Sukaranan sa Atong Manunubos … Nga Kamo Kinahanglan Gayod Motukod sa Inyong Tukoranan”

pamilya nga nalingaw sa pagtuon sa kasulatan nga magkauban

Sa imong pagtuon sa Helaman 5:1–13, imong nakat-onan kon sa unsang paagi ang pagtukod sa imong tukoranan diha kang Jesukristo makatabang kanimo sa pagsagubang sa mapintas nga mga unos sa yawa (tan-awa sa Helaman 5:12). Kini nga leksiyon makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa doktrinal nga kahanas sa Helaman 5:12, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Tabangi ang mga estudyante nga makasabot nga ang pag-angkon og espirituhanong kahibalo usa ka indibidwal nga proseso. Ang mga baroganan sa pag-angkon og espirituhanong kahibalo mahimong magamit sa nagkalainlaing mga paagi. Mahimong magsugod ang mga estudyante sa baroganan nga labing makatabang sa ilang mga pangutana ug dayon mangita og mga pamaagi aron magamit ang uban. Dapita ang mga estudyante sa pagsunod sa mga pag-aghat sa Espiritu samtang naningkamot sila sa pag-angkon og espirituhanong kahibalo.

Pagpangandam sa estudyante: Dapita ang mga estudyante sa pagpadayon sa pagpaningkamot sa pagsag-ulo sa tibuok tudling sa Helaman 5:12.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Helaman 5:1–13,” nga mao ang pangkonteksto nga leksiyon alang sa tudling sa doktrinal nga kahanas sa Alma 34:9–10. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Sa miaging leksiyon, imong nakat-onan ang mosunod nga mga kamatuoran: Si Jesukristo mao ang atong tinuod nga tukoranan ug kon atong tukuron ang atong tukoranan diha kang Jesukristo, ang yawa walay gahom ibabaw kanato. Ang mahinungdanon nga hugpong sa mga pulong sa kasulatan sa doktrinal nga kahanas alang sa Helaman 5:12 mao ang “Diha sa lig-on nga sukaranan sa atong Manunubos … nga kamo kinahanglan gayod motukod sa inyong tukoranan.”

Gamita ang imong kaugalingong pamaagi sa pagsag-ulo o usa sa mosunod nga mga ideya aron sa pagtabang kanimo sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan.

Kon mopili ka sa paggamit sa mosunod nga ideya, pag-andam og igo nga mga bato ug mga ginunting nga papel alang sa matag estudyante nga mahatagan og usa sa matag usa niini. Mahimong mogamit ang mga estudyante og mga pangmarka [markers], tape, papilit [glue], o usa ka lastiko kon anaa.

Pangita og gamay nga bato nga adunay igong luna aron isulat ang “Helaman 5:12” diha niini. Paggunting og usa ka piraso sa papel ug isulat ang mahinungdanon nga hugpong sa mga pulong sa kasulatan alang sa Helaman 5:12, “Diha sa lig-on nga sukaranan sa atong Manunubos … nga kamo kinahanglan gayod motukod sa inyong tukoranan.” Ibutang ang ginunting nga piraso sa papel ngadto sa bato gamit ang tape, papilit [glue], o usa ka lastiko. Isaysay ang pakisayran sa kasulatan ug ang mahinungdanon nga hugpong sa mga pulong sa kasulatan og pipila ka higayon hangtod nga masag-ulo nimo kini.

batan-ong babaye nga nagbarog sa bato ug naghangad

Alang sa laing paagi sa pagtabang kanimo sa pagsag-ulo, pagdrowing og usa ka hulagway sa usa ka bato nga adunay usa ka tawo nga nagbarog sa ibabaw niini. Sa sulod sa bato, isulat ang Helaman 5:12, ug sa ilalom isulat ang mahinungdanon nga hugpong sa mga pulong sa kasulatan sa makadaghan nga higayon hangtod nga masag-ulo nimo kini.

Alang sa mosunod nga kalihokan, aron sa pagrepresentar sa ilang gihanduraw nga pagsumiter ngadto sa usa ka magasin sa Simbahan, mahimong magdrowing ang mga estudyante og dako nga bula nga kinutlo [bubble quote] sa usa ka piraso nga papel. Sa sulod sa bula, mahimo nilang isulat kon unsa ang ilang isulti. Sa ubos niini, mahimo nilang isulat ang ilang ngalan ug kon diin sila natawo. Ikonsiderar ang pagbitay niini sa tibuok kwarto [room] ug dasiga ang mga estudyante sa pagtuyok palibot ug pagbasa sa pipila ka mga tubag sa ilang mga klasmeyt.

Handurawa nga ang magasin sa Simbahan nga Alang sa Kalig-on sa mga Kabatan-onan nangayo og mga ideya gikan sa kabatan-onan sa tibuok kalibotan mahitungod sa doktrina nga gitudlo sa Helaman 5:12. Sa tulo ngadto sa upat ka mga kapahayag, paghimo og usa ka pagsumiter nga nagpasabot sa mosunod:

• Sa unsang paagi si Jesukristo sama sa usa ka “tinuod nga tukoranan”

• Sa unsang paagi ang pagtukod sa atong espirituhanong tukoranan diha sa “lig-on nga sukaranan sa atong Manunubos” makapanalipod kanato gikan sa “mapintas nga mga hangin” ug “ulan nga yelo” sa yawa

Pagbansay sa paggamit

Rebyoha ang mga baroganan sa pag-angkon og espirituhanong kahibalo pinaagi sa pagdapit sa mga estudyante sa pagtinabangay diha sa mga grupo nga adunay tinagtulo ka miyembro, nga ang matag tawo mosiksik sa usa sa mga baroganan. Mahimo dayon nga ipasabot sa mga estudyante ang baroganan sa ilang kaugalingon nga mga pulong ngadto sa nahabilin sa ilang grupo.

Dayon ipakigbahin ang mosunod nga senaryo ngadto sa mga estudyante.

Ang imong higala nga si Matilda bag-o lang mibati nga nabug-atan sa negatibong impormasyon nga iyang nadungog mahitungod sa Simbahan. Ang usa ka higala gikan sa kanhi nga kasilinganan ni Matilda nagpadala kaniya og pipila ka mga materyal nga nag-atake sa doktrina sa Simbahan ug nagsaway sa propeta. Ang iyang uyoan bag-o lang mibiya sa Simbahan tungod kay wala siya mouyon sa pipila ka mga palisiya sa Simbahan. Gusto ni Matilda nga magpabilin nga matinud-anon apan nagsugod na sa pagduhaduha kon aduna ba siyay kalig-on. Usa ka adlaw samtang naglakaw pauli gikan sa eskwelahan, gipakigbahin ni Matilda ang iyang mga gibati diha kanimo ug nangayo og tambag.

Gamita ang mga baroganan sa pag-angkon og espirituhanong kahibalo ug ang doktrina nga gitudlo sa Helaman 5:12 aron matabangan si Matilda nga magpabilin nga matinud-anon sa iyang pagpamatuod.

Pagdesisyon kon unsaon pagtabang sa mga estudyante nga makahuloganon nga mogamit sa mga baroganan sa pag-angkon og espirituhanong kahibalo. Pananglitan, mahimong mapuslanon ang pagdapit sa mga estudyante sa pagkompleto sa “Lihokon inubanan sa hugot nga pagtuo” nga bahin sa leksiyon sa hilom diha una sa ilang kaugalingon. Dayon mahimo silang dapiton sa pagduol ngadto sa laing estudyante ug sa pagpakigbahin sa usa sa ilang mga ideya. Mahimong adunay mas maayong kasinatian ang mga estudyante kon makompleto nila ang “Mahangtorong panglantaw” nga bahin sa leksiyon diha sa gagmayng mga grupo. Ikonsiderar ang pagkompleto sa seksiyon nga “Balaanong gitudlo nga mga tinubdan” isip usa ka klase.

Lihokon inubanan sa hugot nga pagtuo

• Unsa ang duha o tulo ka matarong nga mga lihok nga mahimo ni Matilda aron mosalig sa Manluluwas ug mapalig-on ang iyang espirituhanong pundasyon niining malisod nga panahon? Unsa nga kalainan ang mahimo niini nga mga lihok ngadto kaniya?

• Unsa nga mga leksiyon ang imong nakat-onan kaniadto mahitungod sa paggamit og hugot nga pagtuo diha ni Jesukristo nga makatabang kang Matilda?

Mahangtorong panglantaw

Ikonsiderar ang pagbahin sa mga estudyante sa gagmay nga mga grupo ug sa pag-assign sa matag estudyante sa labing menos usa sa mosunod nga mga tudling sa kasulatan aron tun-an. Human matun-an ug marekord sa mga estudyante ang ilang mga tubag, dapita sila nga magpuli-puli sa pagpakigbahin ngadto sa ilang mga grupo sa unsay ilang nakat-onan mahitungod sa mahangtorong panglantaw.

Tabangi si Matilda sa pagkonsiderar sa iyang hagit sa mahangtorong panglantaw pinaagi sa pagsusi sa mga pagtulun-an sa Manluluwas.

• Unsa ang pipila sa mga pagtulun-an sa Manluluwas nga mahimo nimong ipakigbahin kang Matilda aron matabangan siya sa pagtan-aw sa iyang mga kabalaka gikan sa mahangtorong panglantaw? (Ikonsiderar ang mga tudling sa kasulatan sama sa mosunod: Juan 6:66–69; Mga Hebreohanon 10:32–36; 2 Nephi 31:20; Doktrina ug mga Pakigsaad 58:2–4.)

• Sa unsang paagi kini nga mga pagtulun-an makatabang kang Matilda sa pagtan-aw sa iyang mga kabalaka gikan sa mahangtorong panglantaw?

• Sa unsa nga paagi nga ang doktrina nga gitudlo sa Helaman 5:12 makatabang ni Matilda sa pagtan-aw sa iyang mga kabalaka gikan sa mahangtorong panglantaw?

Pagsulat og usa ka mubo nga mensahe ngadto kang Matilda ingon nga ikaw nagpadala kaniya og usa ka text. Ilakip ang mga panabot nga nakuha gikan sa imong pagtuon ug pamalandong, ug dasiga siya nga matinud-anon nga magpadayon.

Balaanong gitudlo nga mga tinubdan

Gipangutana ka ni Matilda kon unsay iyang mahimong buhaton sa dihang gipresentar kaniya ang mga pangutana mahitungod sa Simbahan diin wala siya masayod sa mga tubag. Pamalandongi kon unsay imong ipakigbahin kaniya gikan sa pagsunod sa mga pagtulun-an ni Presidente Russell M. Nelson.

Presidente Russell M. Nelson

Pilia nga motuo kang Jesukristo. Kon kamo adunay pagduhaduha mahitungod sa Dios nga Amahan ug sa Iyang Hinigugmang Anak, o sa kabalido sa Pagpahiuli o sa katinuod sa balaang tawag ni Joseph Smith isip propeta, pilia nga motuo (tan-awa sa 2 Nephi 33:10–11) ug pagpabiling matinud-anon. Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga imong makit-an ang sipyat sa kinabuhi sa propeta o sayop sa mga kasulatan. Hunonga ang pagdugang sa inyong mga pagduhaduha pinaagi sa paghisgot niini ngadto sa ubang mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad. (Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103)

• Sa unsang paagi sa imong hunahuna ang tambag ni Presidente Nelson makatabang ni Matilda?

• Unsa ang ubang matinud-anong mga tinubdan nga madangpan ni Matilda alang sa mga tubag?

Dapita ang mga estudyante sa pagpangita og nagkalainlaing kasaligang mga tinubdan nga ilang marekomendar ngadto kang Matilda. Ang mga ehemplo naglakip sa Church Newsroom, Gospel Topics, Gospel Library, o ubang mga tinubdan.

Human sa inyong mga pipila ka mga panaghisgotan uban ni Matilda mahitungod sa iyang hugot nga pagtuo ug pagpamatuod, siya mipahayag sa iyang pasalamat diha kanimo sa pagtabang kaniya nga magmakanunayon diha sa hugot nga pagtuo kang Jesukristo.

Ipakigbahin ang imong pagpamatuod nga ang mga baroganan sa pag-angkon og espirituhanong kahibalo makatabang kanato sa atong kaugalingong mga kinabuhi. Hatagi ang mga estudyante og panahon sa paghunahuna mahitungod sa paggamit sa mga baroganan sa pag-angkon og espirituhanong kahibalo ngadto sa ilang kaugalingon nga mga kahimtang. Mahimo nilang gamiton ang ilang mga journal sa pagtuon alang sa mosunod.

Hunahunaa ang imong kaugalingong mga hagit, lakip ang bisan unsa sa mga pagtintal ni Satanas nga mahimong “mohampak diha [kanimo]” (Helaman 5:12). Pagpili og usa nga gusto nimo nga tabangan sa Ginoo, ug isulat kini sa ibabaw nga bahin sa usa ka pahina diha sa imong journal sa pagtuon. Isulat ang tulo ka mga baroganan sa pag-angkon og espirituhanong kahibalo, ug irekord kon unsaon nimo sa paggamit kana nga mga baroganan sa imong kaugalingong sitwasyon.

Rebyo sa doktrinal nga kahanas

Atol sa umaabot nga leksiyon, ipakita sa mga estudyante ang usa ka bato ug dapita sila sa paghinumdom hain nga tudling sa doktrinal nga kahanas ang nag-uban niini. Ikonsiderar ang pagsagol-sagol sa mga pulong sa mahinungdanon nga hugpong sa mga pulong sa kasulatan diha sa pisara ug dapita ang mga estudyante sa pagduol ug sa pagbutang sa hugpong sa mga pulong diha sa eksaktong pagkahan-ay.