babaye nga nagpahiyom

Pasiuna sa Manwal sa Magtutudlo sa Seminary sa Basahon ni Mormon

Ang katuyoan sa Seminaries and Institutes of Religion mao ang pagtabang sa kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo, mahimong sarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit.

Ang mga leksiyon ug uban pang kapanguhaan niini nga manwal gidisenyo aron makatabang kanimo nga makab-ot kini nga katuyoan. Kini makatabang kanimo nga makatutok sa Langitnong Amahan ug ni Jesukristo ug mogamit og mga baroganan sa Kristohanong pagtudlo.

Mga Himan nga Makatabang Kanimo sa Pagpangandam sa Pagtudlo

Ang mga Kasulatan

Ang mga leksiyon nga nalangkob niini nga manwal nagkinahanglan og madasigon nga magtutudlo nga kanunayng nagtuon sa mga kasulatan ug nagtinguha sa pagpakig-uban sa Espiritu Santo. Ang pagtuon uban sa Dali, Sunod Kanako nga hut-ong sa kasulatan mao ang usa ka importanteng paagi sa pagpangandam sa pagtudlo sa mga estudyante. Samtang ikaw makanunayong magtuon sa mga kasulatan, mahimo kang masaligon nga ang Langitnong Amahan magdasig kanimo pinaagi sa Iyang Espiritu kon unsaon sa pagpahiangay niini nga mga materyal aron mahatag ang mga panginahanglanon sa imong mga estudyante.

Sinemanang Kinatibuk-an nga Pagpasabot

Kini nga manwal gihan-ay base sa sinemanang mga hut-ong sa kasulatan sa Dali, Sunod Kanako. Alang sa matag sinemanang hut-ong sa kasulatan, kini nga manwal maghatag og usa ka sinemanang kinatibuk-ang pagpasabot nga gisundan sa lima ka leksiyon. Kini nga sinemanang kinatibuk-ang pagpasabot maghatag og piho nga impormasyon sa leksiyon aron motabang kanimo nga maandam sa pagtudlo lakip na ang:

• Mga katuyoan sa leksiyon

• Mga ideya sa pagpangandam sa estudyante

• Usa ka lista sa mga leksiyon nga maggamit og butang, mga handout, mga hulagway, mga bidyo, o uban pang materyal nga mahimong kinahanglanon nga andamon daan

• Mga sugyot sa pagtudlo pinaagi sa videoconference (kon mo-access sa content pinaagi sa Gospel Library nga app o sa Gospel Library online diha sa ChurchofJesusChrist.org)

Ang pagrebyo sa sinemanang kinatibuk-ang pagpasabot sa sinugdanan sa kada semana mahimong makatabang kanimo sa pagdesisyon kon unsa nga mga leksiyon ang itudlo ug kon unsa nga mga materyal ang tigomon o iandam daan.

Pangitaa ang sinemanang kinatibuk-ang pagpasabot alang sa sunod semana nga mga leksiyon nga imong itudlo. Unsa nga mga impormasyon ang imong nakita dinhi nga makatabang kanimo nga makahibalo daan? Sa unsang paagi kaha nimo magamit kini nga impormasyon samtang ikaw mangandam sa pagtudlo?

Mga Tip sa Pagtudlo

Ang mga tip sa pagtudlo nagpasabot sa girekomendang mga pagbansay sa pagtudlo ug mga baroganan nga mahimong makatabang kanimo nga molambo isip usa ka magtutudlo. Ang matag leksiyon naglangkob og usa ka tip sa pagtudlo nga nagsunod dayon sa pasiuna sa leksiyon. Makakita ka og dugang nga mga pagbansay ug mga baroganan sa pagtudlo diha sa librarya sa pagpalambo sa kahanas sa magtutudlo nga anaa sa ChurchofJesusChrist.org. Kon mobati ka og kaandam, sulayi pagpatuman kini nga mga tip kon ikaw magtudlo. Imong mamatikdan ang mga paglambo sa imong abilidad sa pagtudlo.

Irebyo ang tip sa pagtudlo sa usa ka umaabot nga leksiyon nga imong itudlo. Unsaon kaha nimo sa pagbansay kini nga sugyot diha sa leksiyon?

Instruksiyon sa Pagtudlo

Ang mga instruksiyon sa pagtudlo gidisenyo aron tabangan ka sa pagpangandam sa pagtudlo. Kini nga mga instruksiyon makatabang kanimo nga makahibalo kon unsaon sa paggamit ang mga kalihokan sa pagkat-on nga gisugyot diha sa leksiyon. Kini lagmit mopasabot sa mga katuyoan sa mga kalihokan sa leksiyon o magtanyag og mga sugyot kon unsaon sa pagpahiangay ang content sa leksiyon aron mas matubag ang panginahanglanon sa mga estudyante. Kini nga mga sugyot mahimong maglakip og alternatibong mga paagi, mga pangutana, o mga kalihokan nga makatabang kanimo nga mopahiangay sa content ug mga kalihokan kon gikinahanglan.

Irebyo ang pipila sa mga instruksiyon sa pagtudlo sa usa ka leksiyon nga imong itudlo puhon. Unsa nga mga pagpahiangay ang lagmit nimong himoon base sa mga instruksiyon sa pagtudlo nga imong nakita?

Pagpangandam sa Estudyante

Ang matag leksiyon naglakip og sugyot alang sa pagtabang sa mga estudyante nga maandam ang ilang mga hunahuna ug mga kasingkasing alang sa kasinatian sa pagkat-on. Ang matag sinemanang kinatibuk-ang pagpasabot naglista og mga ideya sa pagpangandam sa estudyante alang sa lima ka leksiyon niana nga semana. Mahimo nimong rebyohon kini nga mga ideya sa sinugdanan sa semana ug mainampoong modesisyon unsa ang labing makatabang sa imong mga estudyante. Dili nimo kinahanglan gamiton ang matag sugyot sa pagpangandam sa estudyante. Mahimo nimo kining ipahiangay o pagmugna og imong kaugalingong mga ideya. Daghan niining mga sugyot ang gidisenyo aron ihatag daan sa mga estudyante usa ka adlaw o labaw pa sa dili pa ang kasinatian sa pagkat-on.

Irebyo ang pagpangandam sa estudyante nga bahin sa imong umaabot nga leksiyon, ug ikonsiderar kon imo ba kining gamiton, ipahiangay, o dili gamiton ang gisugyot nga pagpangandam sa estudyante. Kon makadesisyon ka nga dapiton ang imong mga estudyante sa pagpangandam, unsaon man nimo sa pagpakigbahin niini nga pagpangandam nga ideya ngadto kanila? Mahimo nimong ipakigbahin kini pinaagi sa pagsulti o ipakita kini diha sa kataposan sa milabay nga klase o ipadala kini pinaagi sa email o usa ka pangmensahe nga app, kon angay.

Posible nga mga Kalihokan sa Pagkat-on

Kini nga bahin sa leksiyon naglakip og posibleng mga paagi nga imong buhaton ang kasinatian sa pagkat-on. Wala ka kinahanglana nga mogamit sa tanang gisugyot nga kalihokan sa pagkat-on diha sa mga leksiyon nga imong itudlo. Aron ang imong mga estudyante makabaton og labing maayong kasinatian, kinahanglan nimong gamiton ang content niini nga bahin isip usa ka giya kaysa sa usa ka tamdanan [script]. Kon bag-o lang ka nga nagsugod isip magtutudlo sa seminary, mahimong labing maayo nga magsugod pinaagi sa pagsunod sa gisugyot nga mga kalihokan sa pagkat-on. Samtang ikaw mas momaayo isip magtutudlo, imong mapalambo ang imong abilidad sa pagpahaom sa content niini nga manwal aron labing mahatag ang mga panginahanglanon sa imong mga estudyante.

Komentaryo ug Background nga Impormasyon

Kadaghanan sa mga leksiyon naglakip og usa ka “Komentaryo ug Background nga Impormasyon” nga bahin sa kataposan sa leksiyon. Kini nga bahin naglakip og dugang nga kasayoran nga makapalawom sa pagkat-on. Mahimo kang makakaplag og posibleng mga tubag sa mga pangutana sa mga estudyante o makakaplag og mga pamahayag gikan sa mga lider sa Simbahan nga lagmit gusto nimong ilakip diha sa leksiyon. Kini nga bahin anaa lamang kon ikaw nag-access sa manwal sa magtutudlo pinaagi sa Gospel Library nga app o sa Gospel Library online sa ChurchofJesusChrist.org. Kadaghanan sa mga kasayoran niini nga bahin nalakip usab sa kurikulom sa online seminary ug sa manwal sa estudyante (ubos sa ulohan nga “Opsiyonal: Gustong Makakat-on pa og Dugang?”) pinaagi sa Gospel Library nga app o Gospel Library online. Ang “Komentaryo ug Background nga Impormasyon” wala nalakip sa PDF nga bersiyon sa bisan asa sa manwal sa magtutudlo o sa manwal sa estudyante.

Tan-awa kon ang leksiyon nga imong sunod nga itudlo naglakip ba og “Komentaryo ug Background nga Impormasyon.” Aduna bay bisan unsang mga pangutana, mga tubag, o mga pamahayag ang mga lider sa Simbahan nga tingali makaayo nga ipakigbahin ngadto sa imong mga estudyante?

Dugang nga mga Kalihokan sa Pagkat-on

Kini nga bahin, nalakip usab sa kataposan sa leksiyon, adunay dugang nga mga ideya sa pagkab-ot sa kasinatian sa pagkat-on. Ang dugang nga mga kalihokan sa pagkat-on nalakip lamang sa manwal sa magtutudlo kon ikaw nag-access niini pinaagi sa Gospel Library nga app o sa Gospel Library online diha sa ChurchofJesusChrist.org. Kini nga bahin wala nalakip sa PDF nga bersiyon sa manwal sa magtutudlo o sa manwal sa estudyante.

Kon ang imong umaabot nga leksiyon naglakip og usa ka “Dugang nga mga Kalihokan sa Pagkat-on” nga bahin, irebyo kini nga mga kalihokan. Aduna bay bisan unsa sa imong hunahuna nga makaayo nga gamiton sa imong mga estudyante agig dugang o ihulip sa mga kalihokan sa pagkat-on nga nalakip sa nag-unang leksiyon [main lesson]?

Doktrinal nga Kahanas

Usa ka importanteng prayoridad alang kanimo isip usa ka magtutudlo ang tabangan ang mga estudyante nga makab-ot ang mga resulta sa doktrinal nga kahanas. Kini nga mga resulta naglakip sa pagtabang sa mga estudyante nga:

• Makakat-on ug mogamit sa balaanong mga baroganan alang sa pag-angkon og espirituhanong kahibalo.

• Mahanas sa pinili nga mga tudling sa kasulatan ug ang doktrina sa ebanghelyo ni Jesukristo nga gitudlo niini.

Ang mahanas sa pinili nga mga tudling ug sa doktrina sa ebanghelyo ni Jesukristo nga gitudlo niini nga mga tudling nagpasabot nga ang mga estudyante:

• Makahibalo ug makasabot sa doktrina nga gitudlo diha sa mga tudling sa kasulatan sa doktrinal nga kahanas.

• Makapasabot sa doktrina sa tin-aw nga paagi gamit ang may kalabotan nga mga tudling sa kasulatan sa doktrinal nga kahanas.

• Mogamit sa doktrina sa ebanghelyo ni Jesukristo ug sa mga baroganan sa pag-angkon og espirituhanon nga kahibalo sa ilang inadlaw-adlaw nga mga pagpili ug sa ilang mga tubag sa doktrinal, personal, sosyal, ug makasaysayanon nga mga isyu ug mga pangutana.

• Makahinumdom ug makapangita sa mga tudling sa doktrinal nga kahanas ug makamemorya sa importanteng hugpong sa mga pulong sa kasulatan.

Kini mahimong makapabati og kabug-at sa sinugdanan, apan makabaton ka og pagsalig nga kini nga manwal moabag kanimo sa pagtabang sa imong mga estudyante nga makab-ot ang doktrinal nga kahanas. Sa kada hugpong [set] sa lima ka leksiyon niini nga manwal, makita nimo ang usa ka leksiyon nga nagtabang sa mga estudyante nga makab-ot kini nga mga resulta. Kini nga mga leksiyon mao ang mga leksiyon sa tudling sa doktrinal nga kahanas o mga rebyo nga leksiyon sa doktrinal nga kahanas.

Mga Leksiyon sa Tudling sa Doktrinal nga Kahanas

Ang mga leksiyon sa tudling sa doktrinal nga kahanas ug ang kontekstuwal nga leksiyon nga nag-una sa matag usa kinahanglang ikonsiderar nga gikinahanglan. Ang matag leksiyon sa tudling sa doktrinal nga kahanas gikinahanglang itudlo panahon sa school year, lakip ang mga leksiyon nga nalaktawan dihang ang seminary wala nagklase. Kining mga gikinahanglan nga mga leksiyon naglakip sa:

• Pag-angkon og Espirituhanong Kahibalo, Bahin 1, 2, 3, ug 4.

• Ang kontekstuwal nga leksiyon nga nag-una sa matag usa sa 24 ka leksiyon sa doktrinal nga kahanas.

• Ang 24 nga mga tudling sa leksiyon sa doktrinal nga kahanas (pananglitan, “Doktrinal nga Kahanas: 1 Nephi 3:7” o “Doktrinal nga Kahanas: 2 Nephi 2:25”).

Ang mga leksiyon sa tudling sa doktrinal nga kahanas makatabang sa mga estudyante nga:

• Masag-ulo ang pakisayran sa kasulatan ug ang mahinungdanon nga hugpong sa mga pulong sa kasulatan.

• Mapasabot ang doktrina.

• Mabansay ang paggamit sa mga baroganan sa pag-angkon og espirituhanong kahibalo ug ang doktrina nga gitudlo sa tudling.

Pagrebyo sa Mga Leksiyon sa Doktrinal nga Kahanas

Ang mga leksiyon sa tudling sa doktrinal nga kahanas maghatag og mga kahigayonan sa pagrebyo (o sa ubang kahigayonan, mahimong ipaila) sa pipila sa mga tudling sa doktrinal nga kahanas ug sa pagpaningkamot aron makab-ot ang resulta sa doktrinal nga kahanas. Ang pagrebyo sa mga leksiyon sa doktrinal nga kahanas kay opsiyonal. Kon ang mga estudyante mapakyas og tambong sa usa ka leksiyon sa tudling sa doktrinal nga kahanas tungod kay wala nagklase, mahimo nimong itudlo ang nalaktawan nga leksiyon hulip sa usa ka rebyo nga leksiyon sa doktrinal nga kahanas.

Alang sa dugang nga kasayoran mahitungod kon unsaon pagtabang sa mga estudyante sa pagkab-ot sa mga resulta sa doktrinal nga kahanas, tan-awa ang pagbansay sa “Doktrinal nga Kahanas” nga anaa sa ChurchofJesusChrist.org.

Pagtabang sa mga Estudyante nga Masukod ang Ilang Nakat-onan

Ang pagsukod usa ka importanteng bahin sa pagkat-on. Ang mga kahigayonan sa paghunong ug pagpamalandong sa pagkat-on mahimong usa ka positibo nga kasinatian alang sa mga estudyante ug makapaikag kanila sa ilang padayong pagtubo ug paglambo ngadto sa pagkahimong mas susama sa Langitnong Amahan ug ni Jesukristo. Si Elder Jeffrey R. Holland sa Korum sa Napulog Duha ka Apostoles naghatag niining maalamong tambag alang sa mga magtutudlo:

Elder Jeffrey R. Holland

“Hinumdomi nga ang usa ka estudyante dili usa ka sudlanan nga pun-on; ang usa ka estudyante usa ka kalayo nga pasigahon”

(“Angels and Astonishment” [Sibya sa Pagbansay sa Church Educational System, Hunyo 12, 2019] broadcasts.ChurchofJesusChrist.org).

Ang paghatag sa mga estudyante og mga kahigayonan sa pagsukod sa ilang nakat-onan mao ang usa ka paagi sa paggamit sa tambag ni Elder Holland. Pinaagi sa pagsukod sa ilang nakat-onan, ang mga estudyante mahimong aktibong mga sumasalmot sa proseso sa pagkat-on ug mahimong mas responsable sa ilang pagkat-on. Adunay daghang kasinatian sa pagkat-on nga nalakip niini nga kurikulom nga gidisenyo aron maghatag sa mga estudyante og mga kahigayonan sa pagpamalandong kon unsa ang ilang nakat-onan ug giunsa nila pagtubo isip mga disipulo ni Jesukristo.

“Sukda ang Imong Nakat-onan” nga mga Leksiyon

Kini nga manwal naglakip og daghan nga leksiyon sa “Sukda ang imong nakat-onan”. Kini nga mga leksiyon naghatag sa mga estudyante og mga kahigayonan sa pagpasabot sa mahinungdanong doktrina gikan sa Basahon ni Mormon, pagpamalandong sa ilang mga kinaiya ug mga tinguha, ug sa pagpakigbahin sa ilang pag-uswag sa pagpalambo sa mga kinaiya nga nakatabang kanila aron mahimong mas mahalaron nga mga disipulo ni Jesukristo. Kini nga mga leksiyon mahimong makatabang sa mga estudyante nga mobati og kalipay samtang sila nag-ila sa ilang pagtubo ug ilhon ang umaabot nga mga dapit alang sa dugang nga pag-uswag.

Mga Rebyo nga Leksiyon sa Pagsukod sa Nakat-onan

Sa kataposan sa kada katunga sa kurso, imong hatagan ang mga estudyante og usa ka pagsukod sa nakat-onan aron tabangan sila nga matimbang-timbang ang ilang abilidad sa pagkab-ot sa mga resulta sa doktrinal nga kahanas. Ang usa ka rebyo nga leksiyon sa pagsukod sa nakat-onan kinahanglang itudlo sa panahon sa klase sa dili pa ang pagdumala sa pagsukod. Ang mga rebyo nga leksiyon sa pagsukod sa nakat-onan anaa makita sa appendix niini nga manwal. Kini nga mga leksiyon naglakip og rebyo nga mga kalihokan nga makatabang sa mga estudyante sa pagrebyo sa doktrina, mga pakisayran sa kasulatan, ug sa mahinungdanon nga mga hugpong sa mga pulong sa kasulatan sa matag usa sa mga tudling sa doktrinal nga kahanas nga ilang gitun-an sa una o ikaduhang bahin sa kurso. Kini nga mga leksiyon magtabang usab sa mga estudyante sa pagrebyo sa mga baroganan sa pag-angkon og espirituhanon nga kahibalo.

Pagsukod sa Nakat-onan

Ang mga pagsukod sa nakat-onan alang sa una ug ikaduhang bahin sa kurso nagpokus sa doktrinal nga kahanas ug nalakip sa appendix niini nga manwal. Ang mga estudyante mahimong mokuha og pagsukod panahon sa usa ka sesyon sa klase ug dayon korihian kini diha sa klase kauban sa tabang sa ilang magtutudlo ug laing mga klasmeyt. Aron makadawat og kredito alang niini nga kurso sa seminary, ang mga estudyante kinahanglan makakuha og marka nga 75 ka porsiyento o mas taas pa alang sa kada pagsukod sa nakat-onan. Mahimong sublion [retake] sa mga estudyante ang kini nga mga pagsukod sa makadaghang higayon kon gikinahanglan.

Alang sa dugang nga kasayoran kon unsaon sa paggamit kini nga manwal aron sa pagtabang sa pagsukod sa nakat-onan sa estudyante, tan-awa ang “Pagbansay sa Pagsukod” nga anaa sa ChurchofJesusChrist.org.

Mga Magtutudlo sa Online Seminary

Kon ikaw usa ka magtutudlo sa online seminary, tingali makita nimo nga makatabang ang pagkonsulta sa content niini nga manwal samtang nangandam ka sa mga leksiyon. Bisan tuod og ang mga leksiyon niini nga manwal ug kadtong anaa sa kurikulom sa online seminary naglakip og parehong content, ang manwal sa magtutudlo sa seminary naglakip usab og mga instruksiyon sa pagtudlo ug dugang nga mga kalihokan sa pagkat-on. Kini nga mga kapanguhaan mahimong makatabang sa imong pagtubag sa mga pangutana sa mga estudyante, mapahiangay ang content sa online nga kurikulom, ug maandam alang sa face-to-face nga klase (bisan sa personal o sa birtwal [virtual]).

Dugang pa niini nga manwal ug sa kurikulom sa online seminary, adunay dugang nga kapanguhaan nga makatabang kanimo sa pagtudlo sa online seminary. Ang matag semana sa kurikulom sa online nga seminary naglakip og usa ka wala namantala nga pahina alang sa mga magtutudlo nga giulohan og “Mga Sugyot alang sa Online nga mga Magtutudlo.” Kini nga pahina naglakip og lainlaing sugyot aron sa pagtabang kanimo sa paghimo nga mas makahuloganon ang kasinatian sa online nga pagkat-on alang sa imong mga estudyante. Kini nga mga sugyot naglakip sa:

• Mga tip sa online nga pagtudlo

• Mga katuyoan sa leksiyon

• Mga ideya sa pagpangandam sa estudyante

• Mga sugyot sa pagtudlo pinaagi sa videoconference

• Mga sugyot sa pagpahiangay sa online nga content

Ikaw gidasig nga ipahiangay ang kurikulom sa online nga seminary aron matubag ang mga panginahanglan sa imong mga estudyante. Ang matag pahina sa kurikulom sa online nga seminary mahimong i-edit ug usbon. Pipila ka pagpahiangay nga lagmit nimong mahimo sa online nga kurikulom mahimong maglakip sa:

• Pag-usab sa kalihokan sa leksiyon aron mas mahimong may kalabotan ug makapa-interes sa mga estudyante.

• Pagtangtang sa pipila ka content nga lagmit daghan ra kaayo o lisod kaayo nga masabtan alang sa mga estudyante.

• Paghulip sa content og usa ka bidyo nga nagrekord kanimo o sa laing tawo nga nagpamatuod mahitungod sa usa ka baroganan o doktrina sa kasulatan o nagpakigbahin og usa ka personal nga kasinatian.

• Pagpuli sa usa ka kinutlo og usa nga mas bag-ohay lang nga gihatag o nga mas sayon masabtan alang sa mga estudyante.

Ang mga magtutudlo sa online seminary nagkinahanglang mopahiangay sa pagsunod-sunod sa pipila ka leksiyon sa kurikulom sa online seminary aron masunod ang lokal nga mga giya sa gipaspason [pacing guides].

Mga Magtutudlo sa Seminary sa Home-Study

Kon ikaw usa ka magtutudlo sa seminary sa home-study, ang mga estudyante kinahanglang adunay kopya sa manwal sa estudyante sa seminary o makagamit niini diha sa Gospel Library nga app o sa Gospel Library online, sa ChurchofJesusChrist.org. Kinahanglan kang makigsulti sa mga estudyante mahitungod sa unsa nga mga leksiyon ang ilang tun-an sa panimalay ug unsa nga mga leksiyon ang inyong tun-an nga magkauban sa birtwal o sa personal. Ang mga leksiyon diha sa manwal sa estudyante nahiuyon sa parehong mga leksiyon sa manwal sa magtutudlo.

Sa pagdesisyon kon unsa nga mga leksiyon ang itudlo sa face-to-face nga klase, hunahunaa unsa nga mga leksiyon ang labing epektibo sa usa ka grupo nga kahimtang. Mahimo nimong ipaabot ang mga pagdapit ngadto sa mga estudyante nga makatabang kanila sa pagpangandam sa klase. Ang mga sugyot sa pagpangandam sa estudyante nga nalakip sa sinugdanan sa matag leksiyon mahimong makahatag kanimo og pipila ka mga ideya kon unsaon sa pagbuhat niini. Samtang imong planohon ang mga kasinatian sa pagkat-on sa face-to-face nga mga klase, paggahin og pipila ka oras sa klase aron sa pagrebyo sa mga pakisayran ug sa mahinungdanon nga hugpong sa mga pulong sa kasulatan sa mga tudling sa doktrinal nga kahanas nga bag-ohay lang natun-an sa mga estudyante.

Kinahanglang kompletohon sa mga estudyante ang ginumerohang mga buluhaton gikan sa manwal sa estudyante ug ipasa nila kini kanimo sa labing menos kada semana. Mahimong isumiter sa mga estudyante ang ilang gibuhat sa elektronik nga paagi (pinaagi sa email, usa ka pangmensahe nga app, o sa susama) o sa journal sa pagtuon. Kon ang mga estudyante magsumiter sa ilang gibuhat sa usa ka journal sa pagtuon, kinahanglan aduna silay duha ka journal sa pagtuon aron ilang mabilin ang usa diha kanimo kon gikinahanglan ug magpadayon sa pagbuhat sa lain, ipuli ang mga journal sa matag higayon nga magkita kamo.

Samtang imong irebyo ang nabuhat sa mga estudyante, paghatag og piho ug makahuloganong feedback. Pangita og mga paagi sa pagdasig sa mga estudyante ug sa pagtabang kanila nga motubo diha sa ilang pagkat-on. Mahimo ka usab nga makatabang kanila pinaagi sa pagpangita og mga paagi nga makakontak kanila sa tibuok semana. Pananglitan, kon ikaw nagtuon sa mga leksiyon niini nga manwal samtang ang mga estudyante nagkompleto sa parehong mga leksiyon sa balay, tingale madasig ka sa pagpakigbahin og usa ka pangutana, rekomendasyon sa usa ka bidyo, o laing kapanguhaan gikan niini nga manwal uban sa mga estudyante pinaagi sa email, mga group text, o laing mga paagi sa pagkontak. Mahimo ka usab maghatag og mga pahinumdom o mga pagdasig aron matabangan ang pagkahiusa sa klase ug matabangan ang mga estudyante nga mobati nga nahisakop samtang sila nagtuon sa ebanghelyo ug naglambo nga magkauban.