Moroni 10:26–34

“Duol ngadto kang Kristo”

ang Manluluwas nga gituy-od ang mga bukton

Gipadala kita sa kalibotan aron makakat-on ug molambo aron kita makaangkon og kinabuhing dayon. Aron sa pagtabang kanato, ang Langitnong Amahan mipadala sa Iyang Anak, si Jesukristo. Mitawag usab siya og mga propeta sa pagtudlo ug sa pagpamatuod kang Jesukristo. Sa kataposang mga bersikulo sa Basahon ni Mormon, gidapit ni Moroni ang tanan sa pagsunod sa Manluluwas. Kini nga leksiyon makatabang kanimo sa “pagduol ngadto kang Kristo, ug paghingpit diha kaniya” (Moroni 10:32).

Mga katuyoan sa Basahon ni Mormon

Nakahunahuna na ba kamo sukad kon nganong ang Dios mihatag kanato sa Basahon ni Mormon?

Karon imong tun-an ang kataposang mga bersikulo sa Basahon ni Mormon. Samtang magtuon ka, hunahunaa ang mga katuyoan ug mga panalangin sa Basahon ni Mormon.

Diha sa ulohan nga pahina sa Basahon ni Mormon, si Moroni mipahayag nga ang Basahon ni Mormon gisulat aron sa pagkombinser kanato nga “si Jesus mao ang Kristo.” Ang termino nga “Kristo” mao ang “katumbas sa pinulongan nga Gresyanhon sa Mesiyas. Kini nagpasabot nga ang dinihugan nga Propeta, Pari, Hari, ug Tigluwas” (Giya ngadto sa mga Kasulatan, “Mesiyas,” scriptures.ChurchofJesusChrist.org).

• Sa unsang paagi nga ang pagtuon sa Basahon ni Mormon nakapalig-on sa imong pagtuo kang Jesukristo?

• Sa unsang paagi nga ang pagtuon sa Basahon ni Mormon nakatabang kanimo sa pagsunod ni Jesukristo?

• Paminaw nimo kumusta man ka karon sa imong mga paningkamot sa pagsunod Kaniya?

Ang kataposang mga pagdapit ni Moroni

Human sa pagtudlo mahitungod sa mga gasa sa espiritu ug sa pagpasidaan mahitungod sa mga sangpotanan sa pagkawalay pagtuo, si Moroni namulong mahitungod sa Basahon ni Mormon.

Basaha ang Moroni 10:27–29, mangita sa unsay gipanagna ni Moroni nga mahitabo.

• Unsa ang imong hunahuna mahitungod sa pagpakigkita ni Moroni diha sa hukmanan?

Si Moroni mihatag dayon sa iyang kataposang mga pag-awhag, o mga pagdapit.

Basaha ang Moroni 10:30–34, mangita sa unsay gidapit ni Moroni nga atong buhaton ug sa gisaad nga mga panalangin nga iyang gipakigbahin

Pagtuon og bisan duha ka mga pagdapit ug duha ka saad gikan sa Moroni 10:30–34. Ang mosunod nga tsart makatabang. Mahimong makatabang ang paglista og dugang nga mga kasulatan ug mga tabang sa pagtuon diha sa imong mga kasulatan tapadsa piho nga mga hugpong sa mga pulong gikan sa Moroni 10:30–34. Mahimo usab nimong tun-an ang ubang mga pagdapit o mga saad nga imong makita sa Moroni 10:30–34 nga wala malista sa tsart.

Unsa ang kinahanglan natong buhaton (mga pagdapit ni Moroni)

Unsa ang gisaad sa Langitnong Amahan

Unsa ang kinahanglan natong buhaton (mga pagdapit ni Moroni) Mohupot diha sa matag maayo nga gasa. (Tan-awa sa Moroni 7:19; Doktrina ug mga Pakigsaad 6:7.) Likayi ang daotan nga mga gasa ug mahugaw nga mga butang. (Tan-awa sa 2 Nephi 4:27–28; Mormon 9:28.) Isalikway ang atong kaugalingon sa tanang pagkadili diosnon. (Tan-awa sa Hubad ni Joseph Smith, Mateo 16:25–29; Mosiah 3:19.) Higugmaa ang Dios sa tibuok natong gahom, hunahuna, ug kusog. (Tan-awa sa Mateo 22:36–38; Omni 1:26.)

Unsa ang gisaad sa Langitnong Amahan Ang Iyang grasya paigo ug makahimo kanato nga hingpit. (Tan-awa sa 2 Nephi 10:24; 25:23; Ether 12:27; Giya ngadto sa mga Kasulatan, “Grasya,” scriptures.ChurchofJesusChrist.org.) Kita pagabalaanon ug makadawat sa kapasayloan sa atong mga sala. (Tan-awa sa 3 Nephi 27:20; Doktrina ug mga Pakigsaad 76:41; Giya ngadto sa mga Kasulatan, “Pagbalaan,” scriptures.ChurchofJesusChrist.org.) Kita mahimong balaan nga walay buling. (Tan-awa sa Levitico 19:2; Doktrina ug mga Pakigsaad 87:8; Giya ngadto sa mga Kasulatan, “Balaan,” scriptures.ChurchofJesusChrist.org.)

icon, rekord

1. Tubaga ang mosunod nga mga pangutana:

   • Hain nga mga pagdapit o mga saad ang labing makahuloganon diha kanimo ug ngano?

   • Sa unsang paagi nga ang pagbuhat niini nga mga pagdapit makatabang kanimo sa pagduol ngadto ni Jesukristo?

   • Unsa nga mga baroganan ang atong makat-onan sa Moroni 10:30–34?

Usa ka baroganan nga atong makat-onan mao nga samtang kita moduol ngadto kang Jesukristo, kita mahimong hingpit diha Kaniya.

“Duol ngadto kang Kristo, ug paghingpit diha kaniya”

Mahimo nimong tan-awon ang bidyo nga “Come unto Christ: 2014 Theme Song” (4:48), anaa sa ChurchofJesusChrist.org. Pamalandongi kon sa unsang paagi ang grasya sa Manluluwas nakatabang kanimo sa panahon sa imong panginahanglan.

2. Tubaga ang bisan usa lamang sa mosunod nga mga pangutana:

   • Unsa ang gibuhat ni Jesukristo aron kita makadawat sa mga saad diha sa Moroni 10:30–34 ug mahingpit diha Kaniya?

   • Sa unsang paagi nimo nakita ang grasya (balaang tabang o kalig-on) sa Langitnong Amahan ug ni Jesukristo nga naglihok sa imong kinabuhi?

Paghunahuna og usa ka butang nga imong mahimo aron maduol ngadto kang Kristo ug mahingpit diha Kaniya. Kon dili ka segurado unsay buhaton, ang pagpamalandong sa mosunod nga mga pangutana mahimong makatabang. Kon adunay usa ka butang nga imong gibati nga mahimo nimo karon, buhata kini. Usa sa imong mga tumong sa pagpalambo sa kabatan-onan tingali nagtabang na kanimo sa pagduol ngadto kang Kristo. Mahimo nimong ipadayon ang pagtrabaho sa kana nga katuyoan.

• Aduna bay bisan unsa nga dili diosnon sa akong kinabuhi nga kinahanglan nakong ihikaw sa akong kaugalingon (pananglitan, mga impluwensiya sa media o dili maayo nga mga pamatasan)?

• Unsaon nako sa paghigugma sa Dios sa tibuok nakong gahom, hunahuna, ug kusog?

• Sa unsang paagi nga ang pagbuhat niini nga mga butang makatabang kanako nga mahimong mahisama ni Jesukristo?

Opsiyonal: Gustong Makakat-on Pa og Dugang?

Sa unsang paagi ako mapanalanginan samtang akong dawaton ang pagdapit sa pagduol ngadto kang Kristo?

Si Elder Gerrit W. Gong sa Korum sa Napulog Duha ka Apostoles mipakigbahin:

Elder Gerrit W. Gong

Ang pagdapit sa Dios napuno sa gugma ug posibilidad tungod kay si Jesukristo mao “ang dalan, kamatuoran, ug ang kinabuhi” [Juan 14:6]. Alang niadtong mibati nga nabug-atan, Siya miawhag, “Umari kanako,” ug niadtong miduol Kaniya, Siya misaad, “papahulayon ko kamo” [Mateo 11:28]. “Duol ngadto kang Kristo, ug paghingpit diha kaniya, … mohigugma sa Dios uban sa tibuok ninyo nga gahom, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo” [Moroni 10:32].

Niini nga pasalig “pinaagi sa iyang grasya kamo mahimo nga hingpit diha kang Kristo” mao usab ang kahupayan, kalinaw, ug panaad nga kita makapadayon uban sa hugot nga pagtuo ug pagsalig diha sa Ginoo bisan kon ang mga butang dili mahiuyon sa atong gilaoman, gipaabot, o gani sa unsay angayan, pinaagi sa dili nato sala, bisan human nato gibuhat ang labing maayo. (Gerrit W. Gong, “Ang Atong Campfire sa Hugot nga Pagtuo,” Liahona, Nob. 2018, 42)

Si Elder Jeffrey R. Holland sa Korum sa Napulog Duha ka Apostoles mitudlo:

Elder Jeffrey R. Holland

“Oo, duol ngadto kang Kristo, ug paghingpit diha kaniya … ,” mihangyo si Moroni. “Mohigugma sa Dios uban sa tibuok ninyo nga gahom, hunahuna ug kusog, niana … pinaagi sa iyang grasya kamo mahimo nga hingpit diha kang Kristo” [Moroni 10:32]. Ang atong bugtong paglaom alang sa tinuod nga kahingpitan mao ang pagdawat niini isip gasa gikan sa langit—dili nato kini “mapaningkamotan.” Busa, ang grasya ni Kristo nagtanyag kanato dili lamang sa kaluwasan gikan sa kasubo ug sala ug kamatayon apan sa kaluwasan usab gikan sa atong kaugalingong makanunayon nga pagpanaway sa kaugalingon. (Jeffrey R. Holland, “Busa, Kamo Kinahanglan Magmahingpit—sa Kataposan,” Liahona, Nob. 2017, 41)

Si Elder D. Todd Christofferson sa Korum sa Napulog Duha ka Apostoles mitudlo:

Elder D. Todd Christofferson

Hinumdomi, ang maulaong gahom o grasya ni Kristo dili lang mowagtang sa pagbati nga sad-an ug nasayop, apan mobalaan kini kanato, aron makapuyo sa presensiya sa Dios. (D. Todd Christofferson, “Pagpili ug Pasalig,” [tibuok kalibotan nga debosyonal alang sa mga young adult, Enero 12, 2020], broadcasts.ChurchofJesusChrist.org)

Moroni 10:34. Sama sa unsa kaha ang Kataposang Paghukom?

Si Presidente Dieter F. Uchtdorf, kanhi sa Unang Kapangulohan, mitudlo:

Presidente Dieter F. Uchtdorf

Kanang Adlaw sa Paghukom mahimong usa ka adlaw sa kaluoy ug gugma—usa ka adlaw diin ang masub-anong mga kasingkasing mahupay, diin ang mga luha sa kasubo mailisan og mga luha sa pasalamat, diin ang tanan mahimong husto.

Oo, dunay hilabihan nga kasubo tungod sa sala. Oo, magmahay kita ug gani masubo tungod sa atong mga sayop, sa atong mga kabuang, ug sa atong kagahi og ulo nga maoy hinungdan nga mawad-an kita sa mga oportunidad alang sa mas nindot nga kaugmaon.

Apan masaligon ko nga dili lang kita matagbaw sa paghukom sa Dios; matingala usab kita ug mapuno sa Iyang walay kinutuban nga grasya, kaluoy, kamanggihatagon, ug gugma alang kanato, nga Iyang mga anak. Kon ang atong mga tinguha ug mga binuhatan maayo, kon kita dunay pagtuo sa usa ka buhi nga Dios, nan makapaabot kita sa unsay gitawag ni Moroni nga “malipayon nga hukmanan sa halangdon nga Jehova, ang Maghuhukom sa Kahangturan” [Moroni 10:34]. (Dieter F. Uchtdorf, “O Unsa Kamahinungdanon sa Laraw sa Atong Dios!,” Liahona, Nob. 2016, 21)