Sukda ang Imong Nakat-onan 10

Ang Basahon ni Mormon; 1 Nephi–Moroni

tawo nga nagbasa sa Basahon ni Mormon

Ang pagpamalandong ug pagsukod sa imong espirituhanong pagkat-on makatabang kanimo nga mas maduol ngadto sa Manluluwas ug makapalig-on sa imong pagkakabig. Kini nga leksiyon gituyo aron sa pagtabang kanimo sa pagsukod sa pag-uswag ug pagtubo nga imong nasinati atol sa imong pagtuon sa Basahon ni Mormon karong tuiga.

Ang imong pagtuon sa Basahon ni Mormon

Sa miaging tuig sa seminary, natun-an nimo ang Basahon ni Mormon: Lain nga Tugon ni Jesukristo.

Niini nga leksiyon, makabaton ka og kahigayonan sa pagpasabot sa pipila sa imong nakat-onan ug gibati ug sa pagsukod kon sa unsang paagi ang Basahon ni Mormon nakatabang kanimo nga mahimong mas makabig ngadto ni Jesukristo.

Unsa man ang imong gibati kabahin sa Basahon ni Mormon?

Si Presidente Russell M. Nelson midapit kanato sa paghunahuna mahitungod sa tulo ka mga pangutana nga may kalabotan sa Basahon ni Mormon:

Presidente Russell M. Nelson

Una, unsa kaha ang inyong kinabuhi kon wala ang Basahon ni Mormon? Ikaduha, unsa kaha unta ang wala ninyo mahibaloi? Ug ikatulo, unsa kaha unta ang wala ninyo maangkon? (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 61-62)

icon, rekord

icon, rekord

1. Tubaga ang mosunod nga mga pangutana:

   • Unsaon nimo sa pagtubag ang matag pangutana ni Presidente Nelson?

   • Sa unsang paagi naapektohan ang imong mga pagbati mahitungod sa Basahon ni Mormon samtang nagtuon ka niini karong tuiga?

Unsa ang imong nasabtan mahitungod sa Langitnong Amahan ug ni Jesukristo?

Si Presidente Russell M. Nelson mihulagway sa usa sa mahinungdanon nga tahas sa Basahon ni Mormon:

Presidente Russell M. Nelson

Adunay impluwensyal kaayong panghitabo kon ang usa ka anak sa Dios magtinguha og dugang nga kahibalo bahin Kaniya ug sa Iyang Pinalangga nga Anak. Walay laing dapit diin kana nga mga kamatuoran mas tin-aw nga gitudlo ug sa impluwensyal nga paagi kay diha sa Basahon ni Mormon. (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 61)

Paggahin og panahon sa pagpamalandong sa unsay imong nakat-onan mahitungod sa Langitnong Amahan ug ni Jesukristo samtang imong gitun-an ang Basahon ni Mormon karong tuiga. Mahimo nimong irebyo ang imong mga kasulatan ug journal sa pagtuon alang sa mga kamatuoran mahitungod sa Langitnong Amahan ug ni Jesukristo nga tingali imong gimarkahan o gihimoan og mubo nga mga sulat sa tibuok tuig. Paglista og tulo o upat ka mga kamatuoran nga hilabihang kamakahuluganon kanimo diha sa imong journal sa pagtuon.

Pangita og bisan usa ka tudling sa kasulatan nga nagsuporta sa matag kamatuoran nga imong gilista diha sa imong journal sa pagtuon. Isulat ang pakisayran sa kasulatan tapad sa matag kamatuoran, ug ipasabot kon unsaon nimo paggamit ang tudling sa kasulatan sa pagtudlo niana nga kamatuoran.

Kon gikinahanglan, mahimo nimong irebyo ang pipila sa mosunod nga mga tudling sa kasulatan:

• 2 Nephi 9:19–23

• Alma 5:33–34

• Alma 12:32–34

• Alma 34:8–10

• 3 Nephi 11:9–15

• Mormon 9:9–13

icon, rekord

2. Tubaga ang mosunod nga mga pangutana:

   • Unsa ang labing menos duha ka kamatuoran nga imong nakat-onan mahitungod sa Langitnong Amahan o ni Jesukristo gikan sa imong pagtuon sa Basahon ni Mormon?

   • Ngano sa imong hunahuna nga importante nga masabtan kini nga mga kamatuoran?

Sa unsang paagi nga ang Basahon ni Mormon nakaimpluwensiya sa paagi sa imong pagpakabuhi?

Basaha ang mosunod nga pamahayag ni Propeta Joseph Smith (1805–44), mangita kon unsay iyang gitudlo mahitungod sa gahom sa Basahon ni Mormon:

ang Propeta Joseph Smith

© 2024 David Lindsley

Gisultihan nako ang mga kaigsoonan nga ang Basahon ni Mormon mao ang labing tukma sa bisan unsang basahon dinhi sa kalibotan, ug ang sukaranang bato sa atong relihiyon, ug ang usa ka tawo mas maduol ngadto sa Dios pinaagi sa pagsunod sa mga lagda niini, kay sa bisan unsa nga basahon. (Pasiuna sa Basahon ni Mormon; tan-awa usab sa History of the Church, 4:461)

Ang “pagsunod sa mga lagda niini” nagpasabot sa pagsunod sa mga baroganan ug mga pagtulun-an nga anaa sa Basahon ni Mormon. Pamalandongi sa makadiyot kon sa unsang paagi ang imong mga hunahuna, mga kinaiya, o mga binuhatan naimpluwensiyahan tungod sa imong nakat-onan gikan sa Basahon ni Mormon.

3. Tubaga ang bisan usa lamang sa mosunod nga mga pangutana:

   • Sa unsang paagi ang imong pagtuon sa Basahon ni Mormon nakatabang kanimo nga mobati nga mas duol sa Langitnong Amahan ug ni Jesukristo?

   • Unsa ang pipila ka piho nga mga pagtulun-an nga imong nagamit gikan sa imong pagtuon sa Basahon ni Mormon?

   • Unsa nga mga panalangin ang imong nasinati samtang ikaw kanunay nga nagtuon sa Basahon ni Mormon?