Pasiuna

Ang Pagtubag sa Akong mga Pangutana sa Ebanghelyo (Relihiyon 280) gidesinyo sa paghatag sa mga estudyante og oportunidad sa pagbaton og may kalabotan, bukas, matinuoron, ug makapalig-on nga mga diskusyon kabahin sa hilisgotan kalabot sa ebanghelyo nga ilang gipili. Sama sa tanang kurso sa institute, ang atong nagpaluyo nga katuyoan mao ang “pagtabang sa kabatan-onan ug mga young adult nga makasabot ug makasalig sa mga pagtulun-an ug Pag-ula ni Jesukristo, makasarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit.” (Pagtudlo ug Pagkat-on sa Ebanghelyo: Usa ka Handbook alang sa mga Magtutudlo ug sa mga Lider sa Seminaries and Institutes of Religion [2012], 1).

Sa pagtabang sa mga magtutudlo ug sa mga estudyante sa pagpresentar sa mga konsepto alang sa mga diskusyon diha sa klase sa usa ka paagi nga makapadugang sa hugot nga pagtuo diha ni Jesukristo ug sa Iyang gipahiuli nga Simbahan, ang kurikulum gihan-ay sama sa mosunod:

• Seksiyon 1: Pagkat-on pinaagi sa Hugot nga Pagtuo. Ang Ginoo nagsugo kanato nga “pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Ang Leksiyon 1–3 maghatag sa mga magtutudlo ug mga estudyante og oportunidad sa pag-ila ug paghisgot og mga baroganan nga mahinungdanon sa pagkat-on pinaagi sa pagtuon ug sa hugot nga pagtuo.

• Seksiyon 2: Paggamit sa mga Tinubdan Nga Mopahimutang sa Pagkat-on nga Dinasig sa Hugot nga Pagtuo ug Paglig-on sa mga Panaghisgotan. Ang Leksiyon 4–6 maghatag og usa ka sundanan kon unsaon sa pagbaton og nakasentro ni Kristo, may kalabotan, bukas, matinuoron, ug makapalig-on nga mga panaghisgotan uban sa mga sakop sa klase ug sa uban.

• Seksiyon 3: Panaghisgot sa mga Pinili nga mga Hilisgotan sa Estudyante. Ang mga Leksiyon 7–14 nagtugot sa mga estudyante sa pagpili sa mga hilisgotan nga ilang gusto nga hisgotan. Ang mga baroganan ug sundanan nga gipasiugdahan diha sa mga leksiyon 1–6 naggiya sa klase sa pagkat-on og mga kasinatian alang sa mga leksiyon 7–14.

Kini nga kurso makahatag sa mga estudyante og usa ka oportunidad sa paggamit og daghang kapanguhaan nga makit-an diha sa Gospel Library (diha sa app o sa internet) ug sa Newsroom sa Simbahan aron sa pagtubag sa ilang mga pangutana. (Pahinumdom: Ang Simbahan nagpadayon sa paghapsay sa mga kapanguhaan, pagpalambo sa kagamitan [functionality], ug paghubad og dugang nga sulod alang sa Gospel Library. Ipailin-ilin ang imong paggamit sa pagtudlo sa materyal aron makita kining mga kausaban.) Usahay ang usa ka kapanguhaan tingali limitado lang og mga pakisayran sa mga kasulatan o sa mga pulong sa mga apostol ug mga propeta. Sa ingon nga mga kahimtang, ang mga magtutudlo ug mga estudyante mahimong mobuhat sa ilang kaugalingong pagsiksik sa pagpangita sa mga kasulatan nga may kalabotan ug mga pamahayag gikan sa mga lider sa Simbahan.

Kini nga kurikulum naglakip og siyam ka mubo nga mga pagbansay [microtrainings] aron matabangan ang mga estudyante sa pagpalambo sa ilang abilidad sa pagkat-on ug paghisgot kabahin sa mga hilisgotan nga may kalabotan sa ebanghelyo (tan-awa sa apendiks A). Ang mga magtutudlo makapili kon hain sa mga mubo nga mga pagbansay ang gamiton atol sa kurso ug kon kanus-a kini gamiton. Ang kada pagbansay giplano nga mokabat og mga 15 minutos.

Kon ang panaghisgotan sa klase mahimo nang pagpangagpas o mabingkilon, giyahi ang mga estudyante sa pagbalik ngadto sa solidong pundasyon ug sa Kristohanong pamatasan gamit ang mga baroganan ug mga sundanan nga nakat-onan diha sa mga leksiyon 1–6. Hinumdumi sa pagkatinuod nga ang atong tumong mao ang pagpalig-on sa hugot nga pagtuo diha ni Jesukristo ug ang pagdawat og mga panalangin sa Iyang ebanghelyo (tan-awa sa Gospel Teaching and Learning, 1).

Gumikan kay kining kurso nag-agad sa mga tinubdan sa Simbahan nga ma-access pinaagi sa internet, hunahunaa kon unsa ang imong mahimo aron masiguro ang usa ka masaligan nga koneksiyon sa internet. Usab hunahunaa kon unsa ang imong mabuhat aron matabangan ang mga estudyante nga walay gamit [device] aron maka-access sa internet nga makabaton og makahuluganon nga kasinatian sa pagkat-on atol niining kurso.

Mga Kredito nga Gikinahanglan

Sa pagdawat og kredito ngadto sa paggradwar sa institute alang niining kurso, ang mga estudyante gikinahanglan nga makatambong og 75 porsiyento sa gipahigayon nga klase. Sila kinahanglan usab mokompleto og tininuod ug makahuluganon nga kalihokan sa pagkat-on nga makapakita sa unsay ilang gusto nga mabatonan gikan niining kurso. Ang mga estudyante ug mga magtutudlo kinahanglang magtinambagay ug maghisgot og mosalir nga mga opsiyon. Sa pagtabang nga makapagawas og mga ideya, mahimo ka nga mopaambit sa pipila ka mosunod nga mga ehemplo:

• Pagkompleto sa mga pangutana sa kinatibuk-ang kurso nga gipili diha sa Kasinatian sa Pagpalambo sa Pagkat-on sa Institute.

• Pagtipig og usa ka journal sa tun-anan nga kurso.

• Tinoa ang piho nga pangutana o problema nga may kalabotan sa Simbahan, ug dayon gamita ang mga baroganan ug mga kahanas nga nakat-onan diha niining kurso aron sa pagtubag niini.

• Hisgoti unsa ang imong makat-onan sa labing minos kada semana uban sa usa ka tawo nga dili diha sa klase.

• Bisitaha ang Newsroom sa labing ubos kada semana aron matabangan ka nga masayod sa labing bag-ong mga panghitabo sa Simbahan.

• Pilia ang usa ka hilisgotan diha sa Tabang sa Kinabuhi [Life Help] o Mga Hilisgotan nga importante diha nimo, ug tun-i ang tanang materyal ug ang gi-link nga mga tinubdan.

Kinahanglang irekord sa mga estudyante ang unsay ilang buhaton ug ipaambit ang ilang mga plano ngadto sa ilang magtutudlo. Sa pagtapos sa semester, ang mga estudyante kinahanglang mohatag og usa ka yano nga report, sinulat o sa sulti [verbal], nga nagpamatuod kon sila nakakompleto sa (mga) gikinahanglan nga ilang gitakda. Ang mga magtutudlo kinahanglan nga motanyag og tukma nga mga pagdawat alang sa mga estudyante nga adunay mga kakulangan (tan-awa sa “Pag-atiman sa mga Estudyante nga may mga Kakulangan [Making Accommodations for Students with Disabilities],” https://www.churchofjesuschrist.org/study/manual/seminary-learning-assessments/introduction/making-accommodations-for-students-with-disabilities?lang=ceb).