batan-ong mga babaye nga nag-istoryahanay

Leksiyon 2

Magkauban nga Magkat-on isip Malinawon nga mga Sumusunod ni Jesukristo

Si Presidente Dallin H. Oaks sa Unang Kapangulohan miingon, “Ang ‘amahan sa panagbingkil’ mao ang yawa; ang Manluluwas mao ang Prinsipe sa Kalinaw” (“Paghigugma sa Uban ug Pagpakabuhi nga may mga Panaglahi,” Liahona, Nob. 2014, 26). Atol niini nga klase, ug sa tibuok nilang kinabuhi, ang mga estudyante makasugat og mga tawo nga adunay lahi nga mga opinyon. Niini nga leksiyon ang mga estudyante mokonsiderar kon sa unsang paagi sila makaapil sa mga panaghisgotan mahitungod sa doktrina, mga pagtulon-an, mga palisiya, ug kasaysayan sa Simbahan diha sa usa ka diwa sa Kristohanon nga gugma, pagtahod, ug kamabination.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Dapita ang mga estudyante sa pagtinguha sa Espiritu. Niini nga kurso ang mga estudyante mosuhid og nagkalainlaing mga tinubdan aron sa pagpangita og mga tubag sa ilang mga pangutana. Pahinumdomi sila nga ang Espiritu Santo mao ang kinatas-ang tinubdan sa kamatuoran ug gikinahanglan sa ilang pagpangita og mga tubag alang sa mga pangutana sa ebanghelyo. Siya nagpamatuod sa Amahan ug sa Anak (tan-awa sa 3 Nephi 28:11), nagpadayag sa kamatuoran sa tanang butang (tan-awa sa Moroni 10:5), ug motabang kanato nga makahibalo kon unsaon sa paggamit sa unsay atong nakat-onan (tan-awa sa Doktrina ug mga Pakigsaad 11:12). Sa kinatibuk-an sa kurso, palig-ona ang mosunod nga kamatuoran nga gitudlo ni Elder David A. Bednar sa Korum sa Napulog Duha ka Apostoles: “Ang pagdapit sa Espiritu Santo aron mao ang magtutudlo mao ang usa sa importante nga katuyoan sa tanan nga mga [sundanan] sa Ginoo sa pagkat-on ug pagtudlo” (“Pagkat-on sumala sa Pamaagi sa Ginoo,” Liahona, Okt. 2018, 52).

“Unsay Bag-o?”

Kini nga mga kalihokan gidesinyo aron sa paghatag sa matag estudyante og oportunidad sa pagpaambit og usa ka butang nga ilang nadiskobrehan sa Newsroom sa Simbahan o sa Church News nga app. Tungod niini nga rason, labing maayo nga magtambayayong ang mga estudyante diha sa gagmay nga grupo (tulo hangtod sa lima ka tawo) alang niini nga kalihokan. Kini nga kalihokan sa pagkat-on usa ka gipasiugdahan sa estudyante nga panaghisgotan nga nag-awhag og pagdiskobre, pagpaambit, ug koneksiyon. Mahimong hatagan nimo ang mga estudyante og pipila ka minuto nga mangandam sa dili pa sila magsugod sa pagpaambit. Kini nga kasinatian mokabat og mga 10 minutos.

Pahinumdomi ang mga estudyante nga agi og pagpangandam sa klase gidapit sila sa pagpangita og istorya sa balita gikan sa Newsroom nga site o sa Church News nga app nga nakapainteres kanila. Kon gikinahanglan, hatagi ang mga estudyante og pipila ka minuto sa pagpangandam. Dayon hangyoa ang mga estudyante sa pagporma og gagmay nga grupo ug sa pagpakigbahin sa unsay ilang nakit-an. Mahimo nimong ipakita o ipaambit ang usa ka kopya sa mosunod nga mga pangutana aron sa pagtabang og pagpahigayon sa panaghisgotan:

• Nganong makapainteresado kini nga istorya nganha kanimo? Unsay inyong nakat-onan?

• Unsay inyong namatikdan mahitungod sa pamaagi nga gigamit niini nga balita o istorya?

• Sa unsang paagi kini nga balita o istorya naggamit sa mga pagtulon-an sa ebanghelyo ni Jesukristo?

• Samtang nagbasa ug naghunahuna kamo mahitungod niini nga istorya, nakadawat ba kamo og bisan unsang mga hunahuna o mga impresyon gikan sa Espiritu Santo? Kon mao, sa unsang paagi kini nakaimpluwensiya kaninyo?

• Kinsa ang inyong nailhan nga mahimong mapanalanginan pinaagi sa impormasyon niini nga balita o istorya? Unsa kaha ang labing maayo nga paagi sa pagpakigbahin niini ngadto kanila?

Pag-ugmad og pagbati nga nahisakop

Ikonsiderar ang pagpresentar sa mosunod nga sitwasyon o sa usa ka sitwayon nga imong gibati nga mas adunay kalabotan ngadto sa imong mga estudyante:

Atol sa usa ka klase sa institute, naghisgot ang magtutudlo sa hilisgotan sa kaminyoon sa managsamang sekso. Usa ka estudyante, si Marcel, mibati dihadiha dayon og kahingawa. Ang iyang igsoon nga lalaki, kinsa miila sa iyang kaugalingon nga usa ka bayot, wala na nagtambong sa simbahan tungod wala siya mouyon sa mga pagtulon-an sa Simbahan bahin niini nga hilisgotan. Gipataas ni Marcel ang iyang kamot ug nangutana, “Tan-aw nimo usbon kaha sa Simbahan ang posisyon niini bahin sa kaminyoon sa managsamang sekso?” Sa wala pa makatubag ang magtutudlo, usa ka sakop sa klase ang kusganong namahayag, “Siyempre dili! Naghunahuna ba gayod ka nga usbon sa Dios ang Iyang mga balaod tungod lang sa mga uso sa katilingban?” Kalit lang, misulti ang laing tawo ug uban sa kasuko mitubag, “Nagtuo ko nga sayop ka! Giunsa nimo pagkahibalo kon unsay buhaton sa Dios sa umaabot? Tingali dili ka kinahanglan nga sirado kaayo og panghunahuna!” Samtang naminaw si Marcel niini nga pagtinubagay, nagmahay siya nga nangutana.

• Unsa nga mga problema ang inyong nakita niini nga panaghisgotan?

• Unsa kaha ang mahitabo sa hugot nga pagtuo ug pagpamatuod ni Marcel kon dili siya mobati nga luwas sa paghisgot sa iyang sinsero nga mga pangutana ngadto sa ubang mga miyembro sa Simbahan?

• Unsa kaha ang bation sa uban nga nagtambong sa klase?

Ipakita ang mosunod nga dili kompleto nga pamahayag diha sa pisara: Mobati kita nga luwas nga mangutana og lisod nga mga pangutana ug maghisgot og sensitibo nga mga hilisgotan kon …

Dapita ang mga bata sa pagporma og gagmay nga mga grupo ug pangitaon ang mosunod nga mga tudling sa kasulatan, nga mangita sa lainlaing paagi nga sila makakompleto sa gipakita nga pamahayag: Mga Panultihon 15:1; Mga Taga-Efeso 4:15; Mosiah 18:21; 3 Nephi 11:29; Moroni 7:3–4; Moroni 7:45.

Human sa igong panahon alang sa panaghisgot, hangyoa ang pipila ka estudyante sa pagpaambit kon sa unsang paagi nakompleto sa ilang grupo ang pamahayag diha sa pisara. Samtang magpaambit ang mga estudyante, mahimo nimong isulat ang ilang mga baroganan diha sa pisara. (Mahimo nimong irekord kini nga mga kamatuoran ug dayon ipakita ug rebyohon kini sa kinatibuk-an sa kurso.)

Aron sa pag-awhag og matarong nga aksiyon, mahimo kang mangutana sa pipila sa mosunod nga mga pangutana:

• Sa unsang paagi mapanalanginan ang atong klase kon atong hangopon ug buhaton kini nga mga baroganan?

• Giunsa ni Jesukristo sa pagpakita og ehemplo niini nga mga baroganan? (Kon itugot sa panahon, mahimo nimong basahon ug hisgotan ang Juan 8:1–11.)

• Kanus-a nimo nakita kini nga mga baroganan nga nagamit diha sa usa ka panaghisgot bahin sa usa ka lisod nga pangutana o sensitibo nga hilisgotan?

• Hain niini nga mga kamatuoran ang kinahanglan ninyong mas masabtan ug mas hingpit nga gamiton sa inyong kinabuhi? (Hatagi ang mga estudyante og igong panahon sa pagpamalandong ug pagrekord sa ilang mga hunahuna.)

Ikonsiderar ang pagtapos gamit ang mosunod nga pamahayag ni Presidente Oaks:

Presidente Dallin H. Oaks

Ang mga sumusunod ni Kristo kinahanglan nga maoy ehemplo sa kabuotan. Kinahanglang higugmaon nato ang tanan, maminaw og maayo, ug magpakabana sa sinsero nilang mga gituohan. Bisan og supak kita, kinahanglan dili kita makapasakit. Ang atong baroganan ug pagpamulong bahin sa kontrobersiyal nga mga hilisgotan kinahanglang dili makagubot. (Dallin H. Oaks, “Paghigugma sa Uban ug Pagpakabuhi nga may mga Panaglahi,” Liahona, Nob. 2014, 27.)

Alang sa Sunod nga Higayon

Pahinumdomi ang mga estudyante nga sa mga leksiyon 7–14 atong tukion ang mga hilisgotan nga pilion sa klase. Dapita ang mga estudyante sa pagsulat og usa ka pangutana nga aduna sila mahitungod sa doktrina, mga pagtulon-an, mga palisiya, o kasaysayan sa Simbahan ug sa pagdala niini sa inyong sunod nga klase. Mahimo nimong gamiton ang pipila niini nga pangutana aron sa pagtabang kanimo sa pagpili og mga hilisgotan nga tukion alang niadtong umaabot nga mga leksiyon.