Mubo nga Pagbansay 5

Unsaon nga Mahimong Aktibo nga Tigpaminaw

Pagpasabot

Ipakita ang mosunod nga pamahayag ni Elder Jeffrey R. Holland sa Korum sa Napulog Duha ka Apostoles:

Elder Jeffrey R. Holland

Tingali mas importante kaysa pagsulti mao ang pagpaminaw. … Si [Presidente] Russell Nelson kausa misulti kanako nga ang usa sa unang mga lagda sa medikal nga pagpangutana mao ang “Pangutan-a ang pasyente kon asa nagsakit. Ang pasyente,” miingon siya, “mao ang imong labing maayo nga giya sa husto nga paghiling ug sa pagtambal sa kataposan.” Kon maminaw kita uban sa gugma, dili na kita kinahanglang maghunahuna kon unsay isulti. Ihatag ra kini kanato—pinaagi sa Espiritu ug pinaagi sa atong mga higala. (Jeffrey R. Holland, “Witnesses unto Me,” Liahona, Mayo 2001, 15)

Ihatag ang mosunod nga handout ngadto sa mga estudyante:

Lima ka Paagi nga Mahimong Maayo nga Tigpaminaw

Pagtubag sa Akong Mga Pangutana sa Ebanghelyo—Mubo nga Pagbansay 5: Unsaon nga Mahimong Aktibo nga Tigpaminaw

Hatagi og panahon ang mga tawo. Pagmapailobon ug tugoti ang mga tawo og panahon nga maghunahuna ug mamulong sa dili pa ug human sila mosulti og usa ka butang. Ayaw og kahadlok sa kahilom.

Paminaw og maayo. Paminaw gayod og maayo aron makasabot, ug ayaw paghimo og sayo ra nga mga kongklusyon o maghunahuna daan mahitungod sa unsay inyong isulti.

Ipatin-aw. Pangutana og makapatin-aw nga mga pangutana aron sa pagpakita og interes sa unsay gisulti sa tawo ug seguroha nga dili sayop ang inyong pagsabot.

Pamalandong. Isulti sa yano nga mga pulong o sublia sa pagsulti kon unsay inyong gibati nga gisulti sa tawo. Maghatag kini og kahigayonan sa mamumulong nga mobati nga gihatagan og importansiya ug sa pagpatin-aw kon gikinahanglan.

Pangita og komon nga mga butang. Uyoni ang tawo kutob sa mahimo, nga dili sayop nga irepresentar ang imong kaugalingon nga mga pagbati, aron sa pagtabang sa pagpalambo og panaghiusa ug mamenosan ang bisan unsa nga kabalaka o pagdepensa [defensiveness]. (Gikuha gikan sa “Lima ka Butang nga Buhaton sa Maayong mga Tigpaminaw,” Liahona, Hunyo 2018, 6–9)

© 2022 by Intellectual Reserve, Inc. All rights reserved.

Lima ka Paagi nga Mahimong Maayo nga Tigpaminaw

handout sa magtutudlo

Rebyoha kining lima ka kahanas isip usa ka klase, ug dapita ang mga estudyante sa pagkonsiderar kon hain ang ilang labing gikinahanglan nga paningkamotan.

Modelo

Dapita ang usa ka estudyante sa paggahin og mga duha ka minuto sa pagpahayag nganha kanimo, o ngadto sa usa ka estudyante nga komportable sa pagdawat og feedback, sa iyang panglantaw mahitungod sa usa ka hilisgotan nga may kalabotan sa ebanghelyo nga gibati niya nga importante. Awhaga ang estudyante sa paglikay sa kontrobersiyal nga mga isyu.

• Hangyoa ang klase sa pagtan-aw ug pagtimaan kon ang tigpaminaw migamit ba sa bisan hain sa lima ka kahanas nga bag-ohay lang nga gihisgotan ug, kon mao, sa unsang paagi kini nakatabang.

• Mahimo usab nimong dapiton ang klase sa pag-ila og dugang nga kahanas sa pagpaminaw nga nakapalambo unta sa kasinatian.

Paggamit

Dapita ang mga estudyante sa pagporma og mga grupo nga adunay tulo ka sakop ug sa pagpili og hilisgotan nga gusto nilang hisgotan. Hatagi ang usa ka tawo og mga usa ka minuto sa pagpaambit sa ilang mga pagbati mahitungod sa gipili nga hilisgotan. Pabansaya sa pagpaminaw ang ikaduha nga tawo gamit ang usa o dugang pa nga mga kahanas sa maayo nga pagpaminaw nga bag-ohay lang nga gihisgotan. Ipaobserbar ang ikatulo nga tawo ug pahataga og feedback bahin sa mga kahanas sa pagpaminaw nga ilang naobserbahan. Dayon ipabaylo og mga tahas ang mga sakop sa grupo ug sublia ang kalihokan. Human nakabansay ang mga estudyante, dapita ang usa o duha ka estudyante sa pag-summarize sa unsay ilang nakat-onan.