Mubo nga Pagbansay 8: Unsaon sa Pagdapit sa Uban aron Mobuhat diha sa Hugot nga Pagtuo Kon Sila Nanglimbasog sa Lisod nga mga Pangutana o mga Pagduhaduha
“Mubo nga Pagbansay 8: Unsaon sa Pagdapit sa Uban aron Mobuhat diha sa Hugot nga Pagtuo Kon Sila Nanglimbasog sa Lisod nga mga Pangutana o mga Pagduhaduha,” Materyal sa Magtutudlo alang sa Pagtubag sa Akong mga Pangutana sa Ebanghelyo (2022)
“Unsaon sa Pagdapit sa Uban aron Mobuhat diha sa Hugot nga Pagtuo Kon Sila Nanglimbasog sa Lisod nga mga Pangutana o mga Pagduhaduha,” Materyal sa Magtutudlo sa Pagtubag sa Akong mga Pangutana sa Ebanghelyo
Mubo nga Pagbansay 8
Unsaon sa Pagdapit sa Uban aron Mobuhat diha sa Hugot nga Pagtuo Kon Sila Nanglimbasog sa Lisod nga mga Pangutana o mga Pagduhaduha
Pagpasabot
Tabangi ang mga estudyante nga makita kon unsaon nila sa pag-tabang ang uban aron makadawat og mga tubag sa ilang mga pangutana sa ebanghelyo. Ipakita ug basaha ang mosunod nga pamahayag gikan ni Presidente Dieter F. Uchtdorf samtang nagsebisyo pa sa Unang Kapangulohan:
Imahe
Presidente Dieter F. Uchtdorf
Natural lang nga dunay mga pangutana—ang gamayng liso sa matinuorong pangutana sagad mogitib ug mohingkod sa pagkadakong kahoy sa panabot. Dunay pipila ka miyembro sa Simbahan kinsa, sa usa ka higayon, wala makasulay og seryoso o sensitibong mga pangutana. Usa sa mga katuyoan sa Simbahan mao ang pag-alima ug pag-ugmad sa liso sa pagtuo—bisan sa balason nga yuta sa pagduhaduha ug kawalay kasiguroan. (Dieter F. Uchtdorf, “Dali, Pakig-uban Kanamo,” Liahona, Nob. 2013, 23)
Ihatag ang mosunod nga handout ngadto sa mga estudyante.
Unsaon sa Pagtabang sa Uban sa Ilang mga Pangutana sa Ebanghelyo
Pagtubag sa Akong mga Pangutana sa Ebanghelyo—Mubo nga Pagbansay 8: Unsaon sa Pagdapit sa Uban aron Mobuhat diha sa Hugot nga Pagtuo Kon Sila Nanglimbasog sa Lisod nga mga Pangutana o mga Pagduhaduha
Paminaw gamit ang salabotan, masinabtanon nga kasingkasing.
Dapita ang uban sa pagbuhat diha sa hugot nga pagtuo pinaagi sa pagtinguha og tabang gikan sa Langitnong Amahan pinaagi sa pag-ampo ug pagkamasulundon ngadto sa kasugoan.
Ipaambit ang mga kamatuoran, espirituhanong mga pagbati, o ang imong pagpamatuod sa uban (tan-awa sa “Helping Others Acquire Spiritual Knowledge,” ChurchofJesusChrist.org).
Dapita ang uban sa pagtuon sa mga kasulatan, sa propetikanhong tambag, ug uban pang makapabayaw nga mga tinubdan, lakip ang Mga Hilisgotan nga mga artikulo diha sa ChurchofJesusChrist.org.
Awhaga ang uban sa paghinumdom og mga kasinatian nga ilang naangkon sa dihang mibati sila sa Espiritu Santo ug sa paggunit og hugot sa kamatuoran nga ilang nabati ug nakat-onan hangtod sa pag-abot sa dugang kahibalo.
Dapita ang mga estudyante nga magtinabangay sa pagbuhat uban sa usa ka partner alang niining kalihokan. Hangyoa sila sa paggamit sa mga baroganan diha sa handout “Unsaon sa Pagtabang sa Uban sa Ilang mga Pangutana sa Ebanghelyo” sa pagdrama-drama kon unsaon kaha nila sa pagtabang si Jean diha sa sitwasyon nga mosunod. (Pahinumdomi ang mga estudyante nga tutokan ang pagpraktis kon unsaon sa pagtabang sa uban aron sila makakita og mga tubag sa ilang kaugalingong mga pangutana imbis mohatag og kompletong mga tubag alang kanila.)
Si Jean mipasakop sa Simbahan usa ka tuig nang milabay. Siya midesisyon sa pagpabunyag tungod kay mibati siya og kusog nga pagsaksi nga ang Basahon ni Mormon tinuod. Dili pa lang dugay, ang iyang pagtuo nagduhaduha tungod sa iyang mga pangutana mahitungod kon nganong ang mga babaye dili i-orden ngadto sa katungdanan sa pagkapari diha sa Simbahan. Gibati niya nga ang Simbahan mapihigon batok sa kababayen-an.
Human niini nga kalihokan, hatagi ang mga estudyante og usa ka oportunidad sa pagpaambit unsa ang ilang nakat-onan samtang sila nagpraktis.
