“Handout 8: Mensahe ngadto sa mga Young Adult,” Materyal sa Magtutudlo alang sa Pagtubag sa Akong mga Pangutana sa Ebanghelyo (2022)
“Mensahe ngadto sa mga Young Adult,” Materyal sa Magtutudlo sa Pagtubag sa Akong mga Pangutana sa Ebanghelyo
Handout 8
Mensahe ngadto sa mga Young Adult
Handout 8: Mensahe ngadto sa mga Young Adult
Pagtubag sa Akong mga Pangutana sa Ebanghelyo—Mga Handout
Si Presidente M. Russell Ballard sa Korum sa Napulog Duha ka Apostoles mipaambit:
Imahe
Presidente M. Russell Ballard
Samtang kami mosugod sa paghunahuna sa pipila sa inyong mga pangutana, importante nga hinumdoman nga ako usa ka General Authority, apan kana wala makahimo nako nga usa ka awtoridad diha sa kinatibuk-an! …
Maguol ko usahay nga ang mga miyembro maglaom og dako kaayo gikan sa mga lider sa Simbahan ug sa mga magtutudlo—maglaom kanila nga mga eksperto sa mga hisgotanan nga lapas kaayo sa ilang mga katungdanan ug mga responsibilidad. Ang Ginoo mitawag og mga apostoles ug mga propeta sa pagdapit sa uban sa pagduol ngadto kang Kristo—dili sa pagkab-ot og nag-unang kinaadman kabahin sa karaan nga kasaysayan, biblikanhong mga pagtuon, ug uban pang natad nga mahimong mapuslanon diha sa pagtubag sa tanang pangutana nga lagmit anaa kanato mahitungod sa mga kasulatan, kasaysayan, ug sa Simbahan. Ang among nag-unang katungdanan mao ang pagpalig-on sa Simbahan, magtudlo sa doktrina ni Kristo, ug motabang niadtong anaa sa panginahanglan og tabang. …
Ako motapos gamit ang tulo ka sugyot kabahin sa pagpangita og mga tubag ngadto sa mga pangutana sa ebanghelyo.
Una, samtang mangita, magtuon, ug mag-ampo alang sa mga tubag, palihog hinumdomi nga kamo kinahanglan magpakabuhi nga matarong aron makuha ang mga tubag nga inyong gipangita. …
Ikaduha, akong mga minahal nga batan-ong mga higala, palihog paggahin og panahon nga “Hilom kamo ug ilha ninyo nga ako mao ang Dios” [Salmo 46:10]. Kadaghanan sa tanan natong mga kabalaka sa kinabuhi natubag diha sa mahilom nga mga panahon sa paghunahuna, pag-ampo, ug pagdangop ngadto sa Langitnong Amahan ug sa Ginoo nga si Jesukristo alang sa giya, kalinaw, ug kalipay samtang kita naningkamot sa pagsunod sa ebanghelyo.
Ug sa kataposan, palihog ipadayon ang pagtutok sa unsa gayod ang mahinungdanon. Ayaw og palabi sa gilauman. Pagsalig sa Langitnong Amahan. Siya mihatag sa Iyang mahangturon nga plano, busa “pabilin sa sakayan ug manggunit!” [M. Russell Ballard, “Pabilin sa Sakayan ug Manggunit!,” Liahona, Nob. 2014, 89–92]. Kami nagmahal kaninyo ug kami nagkinahanglan kaninyo karon ug sa mga tuig nga umaabot. (“Questions and Answers” [Brigham Young University devotional, Nob. 14, 2017], speeches.byu.edu)
Mga Pangutana nga Panaghisgotan
Unsa ang nag-unang katungdanan sa mga lider sa Simbahan? Unsa nga mga problema ang atong gimugna sa atong kaugalingon kon kita molaom sa atong mga lider sa Simbahan nga mga eksperto sa tanang hisgotanan?
Nganong importante man ang pagpaningkamot sa pagsunod sa ebanghelyo samtang kamo mangita sa mga tubag sa inyong mga pangutana?
Alang nimo unsa ang buot ipasabot sa “hilom kamo”? (Salmo 46:10). Sa unsang paagi nga pagkat-on sa “hilom kamo” nakatabang kaninyo nga maminaw sa tingog sa Ginoo ug makakaplag sa mga tubag?
Sa unsa kaha nga paagi ang usa ka young adult mopalabi og laom kon mangita og tubag sa mga pangutana sa ebanghelyo? Nganong peligro man sa espirituhanong paagi ang mopalabi sa paglaom?