Ang Paghimo og mga Akomodasyon para sa mga Estudyanting Dunay mga Kakulian sa Panglawas

Imahe

mga estudyante sa klase

Ang katuyoan sa Pagpalambo sa Kasinatian sa Pagkat-on (PKP) sa paghatag og akomodasyon mao ang paghimo sa mga estudyante nga may pihong panginahanglan, may kakulian sa panglawas, o sa may mga problema sa kahimsug nga makaapil sa PKP sa susamang paagi sa ubang mga estudyante. Ang mga magtutudlo kinahanglang mohimo og tukma nga mga akomodasyon aron matubag ang pihong mga panginahanglan sa ilang mga estudyante nga may kakulian sa panglawas, o may mga problema sa kahimsug. Ang mosunod mao ang mga giya nga ikonsiderar samtang himoon nimo ang mga akomodasyon sa imong mga estudyante:

Ilha ang mga estudyante nga may piho nga mga panginahanglan o kakulian sa panglawas. Pakigsultihi sa pribado ang matag estudyante aron mahibaloan ang piho niyang panginahanglan. Paminaw og maayo, ug magmapositibo.
Pakigtambayayong sa mga ginikanan ug mga lider sa Simbahan aron makahimo og plano sa tukma nga akomodasyon sa piho nga mga panginahanglan sa estudyante. Samtang ang pagpadala sa PKP ngadto sa balay sa estudyante usa ka opsyon, timan-i ang mamahimong problema sa mga ginikanan. Paningkamuti nga mahibaloan ang pinakaepektibong opsyon alang sa mga estudyante ug mga ginikanan.
Ipatuman ang mga akomodasyon. Ang indibidwal o tagsa-tagsa nga akomodasyon kinahanglang magpabilin nga kompidensyal. Imposible ang paglista sa tanang posible nga akomodasyon; hinoon, ang mosunod mao ang mga ehemplo sa posibling mga akomodasyon:
- Presentasyon: Hatagi ang estudyante og audio nga bersyon sa PKP, isulti lang ang mga instruksyon ug ang PKP, o hatagi ang estudyante og bersyon sa dagkong pagkaprint nga PKP.
- Pagtubag: Tuguti nga isulti lang sa estudyante ang mga tubag sa iyang mga PKP, o itugot nga ang mga tubag idiktar ngadto sa usa ka tigsulat o tigrekord.
Likayi ang mga akomodasyon nga makausab o makapaminos sa mga ekspektasyon sa estudyante.
Ipakita ang sama kang Kristo nga paghigugma sa matag estudyante, ug sunda ang mga pag-aghat sa Espiritu samtang himoon nimo ang mga akomodasyon aron matubag ang panginahanglan sa estudyante.
Adto sa lds.org/topics/disability sa pagpangita og impormasyon bahin sa pagtabang sa mga indibidwal nga dunay mga kakulian sa panglawas.