Si Jesukristo ug ang Walay Katapusang Ebanghelyo (Religion 250)

Imahe

Jesukristo

Mga Pangutana

Unsay akong makat-unan gikan sa Manluluwas mahitungod sa pagsunod sa kabubut-on sa Langitnong Amahan?

Ang imong mga tubag kinahanglang maglakip:
- Sa mga pagtulun-an o mga ehemplo gikan sa mahangturong pangalagad sa Manluluwas nga naghulagway sa Iyang pagkamasulundon ngadto sa Langitnong Amahan.
- Kon sa unsang paagi ang pagkamasulundon ni Jesus ngadto sa Langitnong Amahan may kalabutan sa imong kaugalingong pagkadisipulo.
- Kon ngano nga ang ehemplo sa Manluluwas sa pagkamasulundon importante kanimo ug sa unsa nga paagi Siya makatabang nimo sa paghimo sa mga lakang nga imong gikinahanglan sa paglig-on sa imong pagkadisipulo.
- Kon sa unsang paagi ang ehemplo sa pagkamasulundon sa Manluluwas makatabang nimo sa pagsunod sa kabubut-on sa Langitnong Amahan.
Nganong gikinahanglan man nako ang Manluluwas?

Ang imong mga tubag kinahanglang maglakip:
- Sa unang mga babag nga kinahanglan natong buntugon tungod sa atong napukan nga kahimtang.
- Kon sa unsang paagi ang nagkalain-laing mga tahas sa Manluluwas sa Iyang tibuok mahangturong pangalagad makatabang sa mga anak sa Langitnong Amahan sa pagbuntog niini nga mga babag.
- Kon unsay angay natong buhaton sa pagdawat ug pagdapit sa tabang sa Manluluwas.
- Sa labing menus usa ka paagi nga imong nabati ang balaang tabang sa Manluluwas sa imong kinabuhi pinaagi sa pagbuntog sa mga hagit og mga babag.
Unsa may akong nakat-unan niini nga kurso mahitungod ni Jesukristo ug sa walay katapusan nga ebanghelyo nga nakapanalangin sa akong kinabuhi?

Mahimo nimong pormahon o ikonektar ang mga ideya gikan sa imong mga tubag kaniadto o magsulat og bag-ong hilisgutan.
- Sa usa o duha ka sentence, isulti ang doktrina nga imong nakat-unan.
- Ipasabut kini nga doktrina gamit ang mga ehemplo gikan sa mga kasulatan o mga pulong sa mga propeta.
- Ipakigbahin sa unsang paagi ang mga pagtulun-an, ehemplo, o Pag-ula sa Manluluwas nakapanalangin sa imong kinabuhi.
- Isulat ang imong pagpamatuod sa unsay imong nakat-unan mahitungod ni Jesukristo ug sa walay katapusang ebanghelyo.

Mahinungdanong mga Punto sa Doktrina

Ang mosunod nga impormasyon gitigum gamit ang mahinungdanong mga punto nga anaa sa mga leksyon niini nga kurso. Ang mga numero diha sa parenthesis nga nagsunod sa mga kinutlo nagpakita sa numero sa leksyon sa Teachings and Doctrine of the Book of Mormon Teacher Manual (2015) diin makita ang pamahayag. Itandi ang imong tubag sa impormasyon sa ubos. Kon dunay mahinungdanong punto sa doktrina gikan niini nga ribyu nga wala nimo maapil sa imong tubag, ikonsiderar ang pag-usab sa imong tubag sa dili pa kini isumiter. Dili kinahanglan nga imong kopyahon kini nga impormasyon nganha sa imong tubag; siguroha lang nga masabtan nimo kini nga mga doktrina ug masulti kana nga pagsabut. Tungod kay ang ika-3 nga pangutana nagkinahanglan og personal nga tubag, walay mahinungdanong mga punto kana nga pangutana.

Unsay akong makat-unan gikan sa Manluluwas mahitungod sa pagsunod sa kabubut-on sa Amahan?

Mga pagtulun-an o mga ehemplo gikan sa pagpangalagad sa Manluluwas nga naghulagway sa Iyang pagkamasulundon ngadto sa Langitnong Amahan:
- “Gipili si Jehova sukad pa sa sinugdanan. Usa sa rason nga gipili si Jehova mao nga Siya nagtinguha sa pagbuhat sa kabubut-on sa Amahan ug sa paghatag sa tanang himaya ngadto sa Amahan” (2).
- “Bisan og walay sala, si [Jesukristo] gibunyagan aron sa pagtuman sa tanang pagkamatarung” (8; “Ang Buhi nga Kristo: Ang Pagpamatuod sa mga Apostoles, Ang Simbahan ni Jesukristo sa mga Santos sa Ulahing mga Adlaw,” Ensign o Liahona, Abr. 2000, 2).
- “Ang plano sa kaluwasan nagkinahanglan sa hingpit nga pagkamasulundon ni Jesus aron makapahigayon sa Pag-ula” (9).
- “Wala akoy ginabuhat sa kinaugalingon kong pagbulot-an, hinonoa nga nagasulti ako sa ingon sumala sa gitudlo kanako sa Amahan … ; kay sa kanunay ginabuhat ko man ang makapahimuot kaniya” (Juan 8:28–29).
Sa unsang paagi ang pagkamasulundon ni Jesus ngadto sa Langitnong Amahan may kalabutan sa imong kaugalingong pagkadisipulo:
- “Sama sa Manluluwas, matuman nato ang pagkamatarung kon mosumiter kita ngadto sa mga ordinansa ug mga pakigsaad sa walay katapusang ebanghelyo” (8).
- “Ang pagkadisipulo ni Jesukristo nagkinahanglan og pagkamasulundon ug sakripisyo. … Ang pagkadisipulo nagkinahanglan sa atong malungtarong pagkaandam sa pagbiya sa tanan ug pagsunod ni Jesukristo” (10).
- “Makaangkon kita og kusog sa pagbuntog sa tintasyon ug magmasulundon samtang mosunod kita sa ehemplo ni Jesukristo sa pagtinguha sa pagbuhat sa kabubut-on sa Amahan imbis sa atong kaugalingong kabubut-on” (9).
Nganong gikinahanglan man nako ang Manluluwas?

Ang unang mga babag nga kinahanglan natong buntugon tungod sa atong napukan nga kahimtang:
- “Kitang tanan makasinati og espirituhanong kamatayon, kay nahibulag man sa presensya sa Dios, ug kitang tanan mag-agi gayud og temporal nga kamatayon, nga mao ang kamatayon sa pisikal nga lawas (tan-awa sa Alma 42:6–9; D&P 29:41–42)” (Matinud-anon sa Tinuhoan: Usa ka Pakisayran sa Ebanghelyo [2004], 179).
- “Sa atong nalaglag nga estado, kita mag-atubang og oposisyon ug tintasyon. Kon magpadala kita sa tintasyon, gipalayo nato ang atong kaugalingon sa Dios (tan-awa sa Romans 3:23)” (Matinud-anon sa Tinuohoan: Usa ka Pakisayran sa Ebanghelyo, 179).
Sa unsang paagi ang nagkalain-laing mga tahas sa Manluluwas sa Iyang tibuok mahangturong pangalagad makatabang sa mga anak sa Langitnong Amahan pagbuntog niini nga mga babag:
- “Gilalang ni Jehova ang yuta aron sa paghatag og dapit diin ang mga anak sa Dios makapuyo ug molambo ngadto sa kinabuhing dayon” (4).
- “Isip Bugtong Anak sa Dios sa unod, si Jesukristo nakahimo sa Maulaong sakripisyo, nga magkinahanglan Niya nga molahutay labaw pa sa malahutay sa usa ka mortal nga tawo, ug sa ingon makatuman sa Iyang tahas sa plano sa Amahan” (7).
- “Tungod sa Pag-ula ni Jesukristo, makadawat kita og kahupayan ug kalig-on pinaagi sa Espiritu Santo sa paglahutay sa ‘mga sakit ug mga kasakit ug mga pagtintal sa matag matang’ (Alma 7:11)” (16).
- “Tungod sa Pag-ula ug Pagkabanhaw ni Jesukristo, ang tanan nga matawo sa pagkamortal mabanhaw” ug madala pagbalik ngadto sa presensya sa Ginoo aron pagahukman. (19).
- “Samtang didto sa kalibutan sa mga espiritu, giorganisar ni Jesus ang buhat sa kaluwasan alang sa mga patay” (18).
- “Si Jesukristo ang atong Manlalaban ngadto sa Amahan” (24).
- “Ang Manluluwas mohukom nato sumala sa atong mga pulong, mga hunahuna, ug mga binuhatan, ug sa mga tinguha sa atong mga kasingkasing” (26).
Unsay kinahanglan natong buhaton aron makadawat ug makadapit og tabang sa Manluluwas:
- “Mabuntog nato si Satanas pinaagi sa pagsalig kang Jesukristo, kinsa maoy mihimo sa Pag-ula, ug pinaagi sa pagpamatuod ug pagmatinud-anon sa atong pagpamatuod” (3).
- “Pinaagi sa pagpili sa paghimo sa Manluluwas nga sentro sa atong kinabuhi samtang ania kita dinhi sa yuta, atong maangkon ang mas dako nga panalangin sa kahangturan.” (2).
- “Kon moambit kita sa sakrament sa mainampuong paagi ug sa mahinulsulon nga espiritu, makadawat kita og kapasayloan sa atong mga sala, sama sa dihang gibunyagan kita.” (15).
- “Kon dawaton nato si Jesukristo ug mohimo ug motuman sa mga pakigsaad sa pagsunod sa mga sugo sa Dios, kita mahimong mga anak nga lalaki ug babaye ni Kristo” (24).