2022թ. զեկույց. Հոգ տանել կարիքավորների մասին

Եկեղեցու՝ 2022թ. կարիքավորների մասին հոգ տանելու տարեկան զեկույցը ցույց է տալիս, որ այս աշխատանքը ներառում է ավելի քան 1 միլիարդ դոլարի ծախսեր, 6,3 միլիոն ժամ կամավորական աշխատանք և 3692 մարդասիրական ծրագրեր 190 երկրներում և տարածքներում:

Գումարն ուղղվել է ծոմի նվիրատվության աջակցությանը, հումանիտար օգնությանը, եպիսկոպոսների պահեստներից և Deseret Industries խանութներից բաշխված ապրանքներին, ինչպես նաև այնպիսի գործառնություններին, ինչպիսիք են՝ ֆերմաները, սննդի վերամշակման օբյեկտները, Ընտանեկան ծառայությունների խորհրդատվությունը և զբաղվածության կենտրոնները:

Ամենամեծ դրամական նվիրատվությունները, որոնք Եկեղեցին տվել է 2022թ.-ին, ներառում է՝ 32 միլիոն դոլար Պարենի համաշխարհային ծրագրին (ՊՀԾ) և 5 միլիոն դոլար՝ ՅՈՒՆԻՍԵՖ-ի սննդի համաշխարհային ծրագրին, որն օգնում է թերսնված երեխաներին:

«Հիսուսը քնքուշ սիրտ ունի երեխաների համար», - ասաց Սփոփող միության գերագույն նախագահ Քամիլ Ն. Ջոնսոնը, երբ հայտարարվեց ՊՀԾ-ին նվիրատվության մասին: «Նա արտասվում է՝ տեսնելով, որ նրանք սովամահ են լինում։ Եվ Նա ուրախանում է նրանց օգնելու նույնիսկ ամենափոքր ջանքերից»:

Այլ նշանակալից նվիրատվությունները ներառում էին՝ 5,1 միլիոն ԱՄՆ դոլար՝ Ամերիկյան Կարմիր Խաչին (ի լրումն Վերջին Օրերի Սրբերի կողմից նվիրաբերված ավելի քան 1 միլիոն միավոր արյան) և ևս 5 միլիոն դոլար՝ Ռոտարի Ինթերնեյշնլին՝ պոլիոմիելիտի և մայրական ու նորածնային տետանուսի դեմ պատվաստումների համար:

Եկեղեցին նաև զգալի ֆինանսական ներդրումներ է կատարել՝ օգնելով բնական աղետներից և զինված հակամարտություններից տուժած մարդկանց աճող թվին: Սա ներառում էր՝ օգնություն ուկրաինացի փախստականներին, Տոնգայում ցունամիից վերապրածներին, Կենտուկիում, Ֆլորիդայում և Հարավային Աֆրիկայում տեղի ունեցած փոթորկի զոհերին, նաև Կոնգոյի Դեմոկրատական Հանրապետությունում քաղաքացիական բախումների զոհերին:

«Ապշեցուցիչ է տեսնել, թե որքան մեծ է օգնելու սերն ու ցանկությունը», - ասում է Ջուլիան՝ Ավստրիայի Եկեղեցու անդամը, որն օգնել է փախստականներին Արևելյան Եվրոպայի մի շարք երկրներում: «Մարդկանց սրտերը ավելի են մոտենում միմյանց»:

Եկեղեցին նաև օգնեց էլեկտրաէներգիա մատակարարել Յուտայում գտնվող Նավաջո համայնքին, ինչպես նաև Եկեղեցու անդամները աշխատել են սկիհների հետ՝ Արաբական Միացյալ Էմիրություններում անցկացվող ծառայության նախագծում: Վերջին Օրերի Սրբերը համագործակցել են NAACP-ի («Ազգային ասոցիացիա հանուն գունավոր մարդկանց առաջխաղացման») հետ՝ համայնքային ծառայության նախագծերում. մայրերի համար Մեմֆիսում (Թենեսի, ԱՄՆ) և նրանց համար, ովքեր առողջ սննդի կարիք ունեն Սան Ֆրանցիսկոյում (Կալիֆորնիա): Իսկ Լուսավորիր աշխարհը կազմակերպության վենդինգ մեքենաները (Giving Machines) միջոցներ են հավաքել աշխարհի 28 վայրերում՝ կարիքավորների համար սնունդ և այլ իրեր գնելու համար:

2022թ.-ին նվիրաբերված 6,3 միլիոն կամավորական աշխատանքի ժամերը ներառում էին ծառայություններ ֆերմաներում, այգիներում, պահածոների գործարաններում և Deseret Industries-ի խանութներում. առաքելություն՝ կարիքավորների մասին հոգալու համար և մաքրման աշխատանքներ՝ բնական աղետներից հետո:

Ի հավելումն 3692 մարդասիրական ծրագրերի՝ 16285 նոր ծառայողական ծրագրերին օժանդակել է JustServe.org-ը՝ Եկեղեցու անվճար առցանց կամավորական պորտալը, որը հասանելի է 14 երկրներում: Այս գործիքը մարդկանց կապում է սպասարկման հնարավորությունների հետ, որոնք համապատասխանում են նրանց հետաքրքրություններին և գտնվելու վայրին:

Նախագահող եպիսկոպոս Ջերալդ Կոսեն JustServe-ը անվանել է «շարժում և միջոց, որով մենք կարող ենք ապրել մեր ուխտերով» և «օրհնել ու ամրապնդել [մեր] համայնքը» (“The Blessings Will Follow: Benefits of Implementing JustServe” [video], ChurchofJesusChrist.org):

Եկեղեցին շարունակեց նաև շրջակա միջավայրի պահպանության իր նախաձեռնությունները: 2018 թվականից ի վեր Եկեղեցու կենտրոնական գրասենյակը կրճատել է ջրի տարեկան սպառումը 38 միլիոն գալոնով: Աշխարհում ավելի քան 500 ժողովատներ այժմ ունեն արևային մարտկոցներ: Deseret Industries-ը մշակել է 73 միլիոն վերամշակված ապրանք: Իսկ Եկեղեցու տպագրության և բաշխման կենտրոնը վերամշակել է մոտ 4000 տոննա թուղթ, մետաղ, ստվարաթուղթ և պլաստիկ: