Autalavou Matutua
Ese i se Auala Lelei: Malamalama i le Tauagafau i le avea ai o se Tagata Liliu Mai
Sa ou manatu o le mataupu faavae o le tauagafau o le a taofia ai au mai le fetaui i ai. Ao lea ua ou iloa ua ese ai a‘u—i le auala sili ona lelei.
Ata mai le Getty Images, faatinoina e tagata e faataitaia
I le avea ai ma se tagata liliu mai e 16 tausaga le matua i le Ekalesia sa nofo i le Aai o Niu Ioka, sa ou iloa ai o le avea ma se Au Paia o Aso e Gata Ai o lona uiga o le faia lea o le tele o suiga i le olaga.
Ae o le faia o nei suiga sa sili atu ona faigata nai lo le mea sa ou faamoemoeina.
Tasi, o le Aai o Niu Ioka o se nofoaga fiafia e tumu i aganuu eseese, gagana, ma talitonuga, ma e matua ese lava mai le tamai aai sa ou ola ae ai i Kolomupia. Sa siomia au e le tele o uunaiga e faatino ma ola i se auala faapitoa, e ui lava sa ou taumafaufau pea po o ai sa ou manao e avea ai ma le auala na ou manao e ola ai. Sa ou feagai ma le tele o filifiliga o le mea e mafai ona agai atu i ai lo‘u olaga, ae o le mea moni sa na ona ou manao lava ia ofi i totonu ma auai. Sa sili atu ona ou taulai atu i le manao e vaai, tautala, ma amio e pei o isi tagata uma.
Na faafuasei foi ona ou faatautaia suiga e pei o le auai i le lotu i Aso Sa uma, faitauina o tusitusiga paia, tatalo, ma le lafoai o le kofe. Ma e ui ina sa faigofie nisi o nei suiga, ae sa sili atu ona faigata isi—aemaise lava le mataupu faavae o le tauagafau. Sa faigata ia te a‘u ona faapaleni lo’u manao e mulimuli ia Iesu Keriso ma lo‘u manao e faailoa atu a’u lava i le ala o loo ou i ai i taimi uma i le faiga o o‘u laei.
Malamalama i le Tauagafau
Sa ou lagona sina lofituina a o ou taumafai i le mea sili ou te mafaia ina ia tauagafau. Sa ou popole o le a ou le toe maua ni uo ma o le a ou le toe lagona le taliaina. Ae sa ou faalagolago ia Keriso e tuuina mai ia te au le lototele ma le faatuatua e agai ai pea i luma.
Sa ou suesue loloto atili i mataupu faavae o le talalelei, tatalo mo se fesoasoani, ma saili se malamalama sili atu i tulafono a le Tama Faalelagi, lea na fesoasoani ia te au e malamalama atili ai i le pogai i tua atu o le tauagafau. Ma a‘o ou naunau e tuu atu lo’u loto ia liua, sa ou suia e le gata i totonu ae i le ala sa ou tauaveina ai foi a‘u lava ma i o’u foliga vaaia i fafo. A o ou taofimau atili le talalelei a Iesu Keriso, sa tuputupu ae lo‘u alofa mo Ia ma lo’u Tama o i le Lagi, ma o le faia o suiga na matua faigofie lava.
Ua ou iloaina e finagalo le Tama Faalelagi ia tatou tauagafau e le na o le ala tatou te laei ai ae faapea foi i o tatou mafaufauga, gagana, ma amioga patino. Ma o lenei ua ese la‘u vaai, talanoa, ma amioga—ou te tauaveina a’u lava e pei ona faia e se soo o Iesu Keriso, e pei lava ona faamanatu mai e Peresitene Russell M. Nelson ia i tatou e fai.1 Ma o a‘u uo ma e oo lava i tagata ese e matauina se mea tulaga ese e uiga ia te a’u. Ou te maua ni fesili pe aisea ua avea ai au ma tagata ua ou i ai. E iloa e tagata le olioli ua ou maua ma le Malamalama o Keriso ia te au.
O taimi uma lava ou te toe foi ai i Kolomupia (pe i soo se mea lava) e asiasi, e foliga mai ua ou le toe “fetaui” mo au, ma e maoae! E ofoofogia le vaaia o le tau lava o le tauagafau e tuuina mai ia te au le avanoa e tau atu ai i isi e uiga i le talalelei ma le mafuaaga ou te ola ai i le ala ua ou ola ai—le pogai ou te mulimuli ai ia Iesu Keriso.
Avea ma “Tagata Filifilia”
O le talalelei o le meaalofa aupito taua lea ua tuuina mai ia te au le avanoa e talia ai. A o ou iloaina atili lo‘u Faaola, ua faateleina lo’u manao ia avea moni e faapei o Ia. Ma o loo faaauau pea ona Ia tuuina mai ia te au le lototele i la‘u malaga ia maua ai le matagofie i le ese mai le lalolagi.
Ua 10 tausaga talu ona ou auai i le Ekalesia, ma ua ou iloa nei ou te le tau “faafetaui” i le lalolagi, aua o au o se atalii/afafine o le Atua. E mafai ona ou iloa le matagofie o le avea ma se vaega o “se nuu filifilia” (1 Peteru 2:9) ma faamanuiaga e oo mai i le avea ai ma se soo o Iesu Keriso. Ou te alofa ia te Ia, ma o le taumafai e mulimuli ia te Ia, aemaise lava e ala i le tauagafau, ua faamalosia ai la‘u sootaga ma Ia.
Ona o o‘u foliga vaaia ma amioga e atagia ai lo’u tuuto i totonu ia te Ia, o le talalelei ma ona aoaoga ua avea ma totonugalemu o mea uma ou te faia, lea e aumaia ia te a‘u le olioli tele. Ou te fiafia i le ese, mafai ona faasoa atu le Malamalama o Keriso i isi, ma taulai atu i mea e sili ona taua: o lo‘u faatuatua ia Keriso ma agai atu ia te Ia i luga o le ala o feagaiga.