“E Manaomia ona Tatou Tuuina Atu ia te Ia se Faamanuiaga” (na o le tusiga faatekinolosi), Liahona, Iuni 2022, ChurchofJesusChrist.org.
Na‘o Tusiga Faatekinolosi: Atatosi o le Faatuatua
E Manaomia ona Tatou Tuuina Atu ia te Ia se Faamanuiaga
“E i ai sou faatuatua e mafai e le Alii ona fesoasoani ia te oe ma faamalolo oe?” Sa ou fesili atu ai ia Aleni. “Ioe, Papa,” na ia fai mai ai ia te au, “E i ai lo‘u faatuatua.”
Ata na pueina e Leslie Nilsson
“Papa, ua lavea Alan!” Sa tagi Nikola a o la tietie vave atu ma lana uo o Natalia i la matou tolauapiga i le latou taavale lautele pa’u fa.
Sa matou tolauapi i Iuta tutotonu faatasi ma isi aiga e toalua. A o alu le tietiega a lo‘u atalii o Aleni ma lana uo o Kurt, sa fetoai ma se ‘autu ma taavili ai le la taavale lautele pa‘u fa. Sa pa‘u i luga o Aleni, ae peitai na mafai ona sii ese e Kurt.
Ina ua matou taunuu atu ma ni uo se toalua i le nofoaga na tupu ai i ni nai minute mulimuli ane, sa taoto mai Aleni i le ‘autu, na siomia e ni nai alii. Sa faigata ona manava o ia, ma sa foliga popole tele Kurt. Ina ua taumafai Aleni e tu i luga, sa fai atu i ai se alii sa i ai se ato o mea faafomai e nofo i lalo a o ia faatautaia le fesoasoani muamua ma siaki ana faailoga taua.
“O oe o le Tamā, e sa‘o?” sa ia fesili mai ai a o ia tilotilo mai ia te au.
“Ioe.”
“Nofo ma Aleni i se minute.”
I nai au uo o Hector ma Carlos, sa ia fai atu ai, “E tatau ona ou talanoa atu ia oulua.”
Sa latou o ese atu na o i latou lava, lea na matuai ou popole tele ai. O le igoa o le alii o Mike Staheli. O Mike, o se tausima‘i, sa tolauapi ma ana uo. Sa latou fuafua e toe foi atu i le fale i lena taeao ae sa musuia i latou e toe nonofo i se aso se tasi. Sa vaai lona atalii i le faalavelave ma sa vave ona valaau atu i lona tamā mo se fesoasoani.
Sa ou iloa mulimuli ane e faapea, na ta‘u atu e Mike ia Hector ma Carlos o Aleni sa i ai i se tulaga ogaoga. Sa fefe Mike nei oti Aleni i le ‘autu pe afai na te le mauaina se fesoasoani faafomai i se taimi vave. Na fula le vae agavale o Aleni ua faaluaina lona telē masani, ma sa popole Mike e faapea, ua afaina Aleni i le gau o lona suilapalapa po o le ogavae. Sa talitonu Mike ua gau le lima agavale a Aleni lea na foliga o se Z ma atonu na faapena foi ma ni ivi asoaso. Sa popole foi Mike i le faamanualia e Aleni o nisi o ona totoga i totonu.
Ina ia vave ave Aleni i le falemai, na fai mai Mike e tatau ona matou valaau mo se helikopa faafomai, lea sa matou faia.
“E I Ai Lo‘u Faatuatua”
“Luis,” na fai atu ai Hector mo le taimi lona lua, “e tatau ona tatou tuuina atu ia Aleni se faamanuiaga.”
Ou te lei lagona lelei le leo o Hector i le taimi muamua ona sa ou taulai tele atu ia Aleni. Na sa’o lHector.
“O le a matou tuuina atu ia te oe se faamanuiaga,” sa ou fai atu ai ia Aleni, o le sa lei leva ona faauuina o se tiakono. “Ua e malamalama i le uiga o lena mea?”
“Ioe,” o lana tali lea.
“Ae e i ai se mea e tatau ona e faia,” sa ou fai atu ai. “E tatau ona e faatuatua ia Iesu Keriso ma le mana o le perisitua. E i ai sou faatuatua e mafai e le Alii ona fesoasoani ia te oe ma faamalolo oe?”
“Ioe, Papa,” na ia fai mai ai ia te au, “E i ai lo‘u faatuatua.”
Sa ou faauuina Aleni, ona matou tuuina atu lea ma Hector, ma Carlos ia te ia se faamanuiaga, ma faamauina e Hector o le faauuga. Sa faigofie upu a Hector, ae sa matou lagonaina uma le i ai o le agaga mamana o le Agaga Paia.
Sa telegese le manava o Aleni, ma o ana faailoga taua na toetoe lava a vave ona faamautuina. Sa to‘a le matagi, sa i o matou luga se toafilemu, ma sa amata ona fetagisi nisi o alii. O se aso malulu o le tautoulu, ae mulimuli ane, sa fai mai Aleni sa ia lagonaina le mafanafana a o fofogaina e Hector le faamanuiaga.
E lei leva ae taunuu mai le helikopa, ma sa ma o faatasi Aleni i le i le falemai. Ina ua matou tulaueleele, sa faanatinati atu o ia i totonu,ma sa faia ai ni suesuega ma ni suega, e aofia ai se MRI. A o ou faatalitali, sa ou faamoemoeina le mea sili ona leaga. Ae o le mea sili ona leaga sa lei oo mai lava. Sa lei maua e fomai ni manuaga i totonu ma sa lei gau le ogavae, suilapalapa, ogalima, po o ni ivi asoaso—leai se mea.
“Aleni,” sa fai atu ai se tasi o fomai ia te ia, “e foliga mai o le a mafai ona e alu i le fale i le po nei.”
Sa faigata ia Aleni ona savali, o lea sa nofo ai o ia i le falemai e mata‘itū ai. Ina ua ma aumaia o ia i le fale i le taeao na sosoo ai, sa na o se fusi sa faia i lona tapulima tauagavale. I le ono vaiaso mulimuli ane, sa ia sauniuni ai mo le vaitau o le soka.
I se vaiaso talu ona mavae le faalavelave, sa ma o atu ai i le fale o Mike e faafetai atu ia te ia mo lana fesoasoani. Sa tau le talitonu o ia ina ua savali atu Aleni i totonu ma saofai i luga o lona nofoa.
“Sa ou tausia le toatele o tagata, ma ua ou vaai i le toatele o tagata ua maliliu,” na ia fai mai ai ia i ma‘ua. “I le vaaiga faafomai, sa le tatau ona ola Aleni. O le mea na ou vaai i ai i lena aso sa ofoofogia moni lava. O se faalavefau faalelagi.”
Ou te iloa o le perisitua o le mana o le Atua i le lalolagi. E tuusao mai i le Alii o Iesu Keriso, o lē na toefuataiina mai Lana Ekalesia e ala mai i le Perofeta o Iosefa Samita. Ou te iloa foi o le suafa o Iesu Keriso, ma e ala i le pule o le perisitua ma le faatuatua, e mafai ai ona tatou faia vavega.