Fetaia‘i ma o Tatou Koliata

Ma le ala e mafai ona tatou fesoasoani ai i isi ia faia nei lava mea.

Ata

o uo tamaitai e toalua o loo fai ufi fofoga ma talanoa

Na aoao mai Peresitene Russell M. Nelson a o lumanai le KOVITI-19, “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.”¹

Sa nofo Barbara i se uarota fou mo na o ni nai masina ina ua amata le faama‘i pipisi. E pei o le toatele, sa ia iloaina o ana fuafuaga uma o le a le taunuu. Sa manatu o ia o le feiloai atu i uo fou o se aafiaga matagofie, ae nai lo lena, sa avea o se tauiviga. I se taimi o le faaesea, sa tatau ona suia mamanu o auaunaga. Sa lei tele se avanoa na ia maua e faamasani ai i tagata o lana uarota fou. Sa ia fesili ifo ia te ia lava, “E faapefea ona ou asiasi atu, auauna atu, fesoasoani, ma alofa i uso pe afai e le mafai ona asiasi atu i se tasi? E oo lava i le auina atu o se tesi e faigata pe a le iloaina e uso lo’u igoa po o le numera ona ou te fou.

Sa ia iloaina e sili atu ona taua le tatalo ma faalogo mo uunaiga i ia tulaga. O nisi taimi sa ia lagona le uunaiga e tau lava o le momoli iai o se tusi. O isi taimi sa ia auina atu se tesi e faafetai ai i se uso mo lana tatalo i le sauniga faamanatuga pe faailoa atu le agaga faafetai mo le molimau a le toalua o se isi uso. O se asiasiga masani i luma o le polotito a se tasi na fesoasoani e talia lona manaoga mo le vaai ma talanoa faatasi. O se tasi o uunaiga na taitai atu ai o ia e mafaufau i se supo maukeni faamafanafana, o lea sa ia momoli atu ai le fua o le kuka ma se maukeni.

E le o le auala lea na ia faamoemoe o le a oo i ai ina ua ia siitia mai iinei. O le faanofoesea na faia ai le faagasologa o le faamasani i ona uso. Ae a o ia mulimuli i le fautuaga a Peresitene Nelson ina ia faateleina lona gafatia faaleagaga e maua ai faaaliga, sa ia faatoilaloina luitau, avea ma se uso o auaunaga sili atu, ma faia ni faauoga vavalalata.

Feagai ma Sauai

E mafai ona fenumiai le lalolagi ma faatumulia i faamatalaga sese ma manatu feteenai. Ae ua tuuina mai e le Atua ia i tatou perofeta e taialaina i tatou. E mafai ona tatou fesoasoani i isi ia maua le faatuatua e mulimuli ai i le Alii ma Ana perofeta e ui i manatu lauiloa, aua e tusa lava po o a o tatou luitau, “o loo i le Alii le taua” (1 Samuelu 17:47).

Ina ua fetaiai ma Koliata, sa tuu ese e Tavita le pulou, ofutau, ma le pelu ma faaauupegaina o ia lava i ni maa lamolemole se lima ma se maata. Sa foliga mai sa le‘i puipuia lelei ma lamatia, ae sa mafai e Tavita ona faatoilaloina le sauai i le na o lana maata ma lona faatuatua i le Atua. (Tagai 1 Samuelu 17:38–50.)

Atonu tatou te lagona le le saunia e fetaiai ma o tatou luitau e aunoa ma tali uma tatou te mananao ia maua. Ae afai ua ia i tatou le faatuatua e agai ai i luma ma nai maa lamolemole o loo ia i tatou, o le a lava lena mo le Alii e faataunuu ai Lana galuega.

Mataupu Faavae e Mafaufau i Ai

Pe a fesoasoani atu i isi, e manaomia ona tatou iloa e tele auala e taulima ai se faafitauli. O la tatou sini o le fesoasoani lea ia i latou e fausia o latou lava ola tutoatasi faaleagaga e ala i le sailia o a latou lava tali faatasi ai ma le fesoasoani a le Alii.

Mafaufau i ni auala e mafai ona e fesoasoani ai e ala i le fausiaina o lo latou faatuatua ma faalagolago i le perofeta a le Alii ma i faaaliga faaletagata lava ia.

E mafai ona aofia ai le faasoa atu o ou lava aafiaga o le sailia o le taitaiga ma le faamafanafanaga e ala i le mulimuli i le perofeta ma le sailia o le taitaiga faalelagi.

E mafai foi ona e faasino atu i latou i le mea e mafai ona latou aoao ai i mea na saunoa i ai perofeta e uiga i tulaga faapena.

O Le a se Mea e Mafai ona Tatou Faia?

Ia maua le lototele e faasoa atu ai lau molimau o loo i ai le filemu ma le saogalemu i le mulimuli i le taitaiga a le Alii e tuuina mai e ala i perofeta ma faaaliga faaletagata lava ia.