E Na’o le Tusiga Faatekinolosi: Autalavou Matutua
Malamalama i Faamanuiaga e Oo Mai i le Taliaina o le Tauagafau
Ina ua ou iloaina lo‘u faasinomaga ma lo‘u taua o se afafine o le Atua, sa avea le tauagafau ma se mea masani ia te a’u.
I ni nai masina talu ona maua lo‘u faaeega paia, sa ma tietie ai ma se uo i totonu o se taavale na vevela lava totonu ma sa ia faapea mai, o le ofuvae pupuu sa ou ofuina ua uumi tele.
“E te le o vevela?” na ia fesili mai ai.
“Ioe o loo ou vevela,” sa ou tali fiafia atu ai.
Sa ma talie uma.
“Ae ua ou iloa oe, e te le ofuina ni ofuvae pupuu tele e tusa lava pe e te le o ofuina ni ofusa i le taimi nei. E te matuai tauagafau lava i taimi uma,” sa ia taufaalili mai ai.
Sa ou mafaufau i lena faamatalaga.
“E sa‘o oe,” sa ou fai atu ai, ma ata.
Ae o le mea moni, sa ou maua sina le mautonu i lana faamatalaga. O le a le uiga o lana tala “matuai” tauagafau? Pe sa ova ea lo‘u tauagafau? Pe sa manatu o ia sa ou ese lava?
Ma i lalo o lena fesili sa tele atu fesili sa ou mafaufau i ai mo sina taimi ae sa ou fefe tele e fesili atu: Aisea na ou matua tuuto ai e fai ou lavalava tauagafau? Pe na fesoasoani moni ea ou te avea ai ma se soo sili atu ona lelei o Keriso? Pe na taua ea?
Vaavaai mo Faamanuiaga o le Tauagafau
O nisi o i tatou atonu e i ai ni fesili e uiga i le tauagafau, aemaise lava i le mea e faatatau i lo tatou avea ai ma soo. Ae a o tatou sailia le taitaiga e ala i le Agaga, e mafai ona tatou amata malamalama i le mafuaaga o loo i tua atu o lenei poloaiga.
Ina ua i ai ni au fesili e uiga i le tauagafau ma lagona le uunaia malosi mai le lalolagi e tuu i lalo o’u tulaga faatonuina, sa ou tuuina atu au fesili i le Tama Faalelagi. I sina mea itiiti i lea taimi ma lea taimi, sa ou manatua ai le tele o taimi sa filifili ai ia tauagafau—i foliga ma amioga—sa matua faamanuiaina ai lo‘u olaga.
O nisi nei o faamanuiaga ua ou maua mai le taliaina o le mataupu faavae o le tauagafau.
1. E Mafai e le Tauagafau ona Fausia le Talitonuga
O o tatou tino o ni ipu paia mo i tatou lava faaleagaga ma e avea o ni faamanatu faaletino o le atoatoa o le alofagia o i tatou e lo tatou Tama Faalelagi. O se faamanuiaga moni le i ai o se tino, aua e mafai ai ona tatou avea faapei o Ia. Pe a tatou mafaufau i lena upumoni faavavega ma faigata ona malamalama i ai, aisea o le a tatou le talitonu ai po o ai i tatou?
Afai e te faaaluina sina taimi e tagatagai solo ai, o le a e matauina ai, ona o le fili, ua ese ai le faaalia e le lalolagi o tino nai lo le mea na faamoemoeina e le Tama Faalelagi. Latou te faitioina ma faatusatusaina, ma e tele lava ina viiaina le le tauagafau. E manao le lalolagi e faatalitonu i tatou e faapea, o amioga ma le faia o lavalava i se auala faapitoa o le a fesoasoani e talia ai i tatou [e tagata] ma lagona le mautinoa atili o le tagata ia te ia lava nai lo se isi lava taimi muamua. Ae o le talitonuga lea e aliae mai i lenei mea e mo nao se taimi puupuu lava.
O le talitonuga tumau e sau mai le malamalama i o tatou faasinomaga paia—o le iloaina o o tatou tino o ni meafaigaluega paia lea e ala ai ona tatou ola i le olaga, ae le o ni mea teuteu e teuteuina e le lalolagi.1
I le Mataupu Faavae ma Feagaiga 121:45, ua aoao mai ai le Alii, “Ia tuu le amiomama e teuteuina ai ou mafaufauga e le aunoa; ona solo malosi ai lea o lou lototele i luma o le Atua.”
Ma e moni! Pe a i ai ni o tatou mafaufauga tauagafau, ma mama, e atagia mai i a tatou amioga, gagana, ma foliga vaaia, ma e mafai ona tatou maua le faamautinoaga moni o le tagata lava ia.
E i ai taimi, o o‘u manaoga faaletino sa le talafeagai ma lē tauagafau, e pei o le manao e ofu ni ofu faapitoa ia lagona ai le lalelei po o le naunau ia talia [e tagata] e ala i le faia o ni amioga faapitoa. Ae ina ua ou malamalama moni i lo‘u faasinomaga paia, sa ou manao e fai ma sui o lena upumoni, ma o le amio ma le faia o laei tauagafau na iu lava ina avea ma natura lona lua ia te a’u. Ma sa tuputupu ae foi lo‘u talitonu ia te a’u lava—aua foi, o le talitonu moni e itiiti lava se mea a foliga vaaia e faia i ai ae matele lava i le ola i se ala e atagia ai o tatou faasinomaga paia.
2. O le Tauagafau e Mafai ona Faalolotoina lo Tatou Sootaga ma le Tama Faalelagi ma Iesu Keriso
Pe a vaai i ai o ni tulafono, o poloaiga o le talalelei e mafai ona foliga mai o ni faasāsāaga. Ae a tatou taulai atu i le vaaiga ma le alofa e faavavau a le Tama Faalelagi mo i tatou, e mafai ona tatou fausia a tatou molimau i le upumoni e faapea, o Ana poloaiga e tatau ona puipuia ma faamanuia ai i tatou. E pogai mai i Lona alofa atoatoa.2
I le mafaufau loloto ai i le ala na faamanuiaina ai lo‘u olaga e le tauagafau, sa ou mafaufau ai i se tasi taimi i le fesili na fesili ai Peresitene M. Russell Ballard, o le Sui Peresitene o le Korama a Aposetolo e Toasefululua, e faatatau i le va o lo tatou alolofa mo le Atua mea o le lalolagi. Na ia faapea mai, “Pe o le a faapefea ona tatou taliina le fesili ‘Pe sili mai lou alofa ia te a’u i o latou nei?’”3
Sa ou iloaina e mafai ona faatumulia le lalolagi i faaosoosoga, ae a ou mafaufau i mea na faia e le Tama Faalelagi ma le Faaola mo au ona o le alofa, o le filifili ia tauagafau o se tasi lea o mea e mafai ona ou faia e faaali atu ai ia i Laua le alofa. O le tauagafau o se ata lafoia lea o la‘u tautinoga ia i Laua, ma a o faaauau pea ona ou faaalia lo’u tuuto, ou te lagona lo‘u faalolotoina o la’u sootaga ma i La‘ua, ua faapea ona avea ma se faamanuiaga lava lea.
3. E Mafai e le Tauagafau ona Valaaulia le Olioli
Na aoao mai Elder D. Todd Christofferson o le Korama a Aposetolo e Toasefululua: “O Ana poloaiga e le mamafa—na o le faafeagai lava. Ua faailoga ai le ala o le faamalologa, fiafia, filemu, ma le olioli. … Ma i le usitaia o a La‘ua poloaiga, tatou te lagona ai lo Laua alofa atoatoa ma le loloto atili .”4
Ma ua tatou faitau i le 1 Nifae e faapea, o le alofa o le Atua e “silisili ona olioli i le agaga” (1 Nifae 11:23; tagai foi fuaiupu 22). Pe a tatou filifili e mulimuli i poloaiga, e aofia ai le tauagafau, e mafai ona tatou lagonaina Lona alofa ma aai i fua o le talalelei a Iesu Keriso, o le punavai lea o le olioli moni.
O le laeiina po o le amio e pei o le toatele o le lalolagi e ono mafai ai ona ou lagonaina le fiafia mo sina taimi, ma sa ou lagonaina lena faaosoosoga i nisi taimi. Ae e sili ona ou fiafia pe a ou taumafai e tausi poloaiga ma au feagaiga, aua o le faia o lena mea e mafai ai ona ou lagonaina le alofa atoatoa o le Tama Faalelagi.
Faatauaina o o Tatou Faasinomaga Moni
I le taimi o lena talanoaga ma la‘u uo, sa ou manatu sa ia mafaufau o au o se tagata fia agelu. Ae i ni nai tausaga mulimuli ane, sa avea lenei lava uo ma o‘u toalua, ma sa ia faamatala mai sa ia talisapaia i taimi uma le ala na atagia mai ai la’u tautinoga ia Keriso i o‘u foliga vaaia, gagana, ma faatinoga.
O le filifilia o le tauagafau o le a le faigofie i taimi uma, aua “o leo ma uunaiga a le lalolagi o loo punouai ma anoanoai.”5 Ae ou te iloa o faamanuiaga ma le olioli ou te maua pe a ou taliaina le tauagafau e sili atu ona taua nai lo se isi lava mea e mafai ona ofoina mai e le lalolagi ia te au.
Afai e i ai ni au fesili e uiga i le tauagafau, ou te valaaulia oe e saili faaaliga faaletagata lava ia ma mafaufau pe na faapefea ona faamanuiaina ai lou olaga. Ma ia manatua, aua nei o tatou faamasinoina le agavaa o isi e tusa ai ma a latou filifiliga e faatatau i le tauagafau. A o tatou filifili e talia le tauagafau, sei o tatou ofo atu le agaalofa i isi—le agaalofa lava lea e tasi ua ofoina mai e le Faaola ia i tatou.
O le tauagafau o se tasi lea o auala silisili e mafai ona tatou aoao ai e faapelepele i o tatou faasinomaga moni, faalatalata atili atu i le Tama Faalelagi ma Iesu Keriso, ma lagona le olioli i o tatou olaga. Sa mo a‘u lava, ma ou te iloa e mafai foi mo oe.