Autalavou Matutua
Tauagafau: E faatatau i Mea e Tele Atu nai lo Laei
E tele naua le taulaiga i le tauagafau i fafo. Ae faapefea le tauagafau i totonu?
O le toatele o i tatou sa ola ae ma aoao e uiga i le tauagafau i le lotu. Ma e manino lava le pogai—o le tauagafau o se mataupu faavae taua o le talalelei lea e mafai ona fesoasoani ia i tatou e pulea o tatou lava mafaufauga ma amioga faapea foi ma le auala tatou te tuuina atu ai i tatou lava. I le aoaoina o auala e teuloto ma ola ai i lenei mataupu faavae o le talalelei e fesootai i ai, e mafai ona tatou avea atili e faapei o lo tatou Faaola.
A o tuputupu ae, atonu na aoaoina i tatou e faapea o le tauagafau e na o o tatou foliga vaaia i fafo. O aoaoga e uiga i le tauagafau atonu e taulai atoa atu i laei e valavala po o isi vaega o la tatou faatinoga faaletagata lava ia lea e ono ogaoga, e pei o le tatui, pe‘a, teuga o lauulu, po o teuga lautele. Ae o le tauagafau e le na o lavalava po o mea o i fafo—e aofia ai foi ma mea o loo i totonu.
O le tauagafau ua faamatalaina “o se uiga faaalia o le talafeagai ma le faaaloalo e ala i laei, teuga, gagana, ma amioga. Afai e te tauagafau, e te le tā’ina mai ni taulaiga e le talafeagai ia te oe lava. Nai lo lena, e te saili e ‘vivii atu i le Atua i o outou tino, ma o outou agaga’ (1 Korinito 6:20; tagai foi fuaiupu 19).”1
Afai tatou te malamalama ma ola i lenei faauigaga atoatoa, faatasi ai ma se uiga faaalia o le saili e vivii i le Atua, e avea le tauagafau ma se mea e mafai ona tatou faaaogaina e fua ai a tatou amioga uma e faasaga i ai—ae le na o mea tatou te filifili e faaaoga.
O La Tatou Tautinoga i Totonu
Na aoao mai Sister Elaine S. Dalton, o le sa avea muamua ma Peresitene Aoao o Tamaitai Talavou: “O le tauagafau e aofia ai mea e sili atu nai lo foliga vaaia. O se tulaga o le loto. O se faaaliga i fafo o se malamalama ma se tautinoga i totonu. O se faailoaga ua tatou malamalama i lo tatou faasinomaga o ni [fanau] a le Atua. O se faailoaga ua tatou iloa le mea ua Ia faamoemoeina i tatou e fai. O se tautinoga o lo tatou tausia o feagaiga.”2
O lea, afai o le laei tauagafau o se ata lea i fafo o la tatou tautinoga i totonu i le ola tauagafau, e faapefea la ona tatou atiina ae lena tautinoga i totonu?
Muamua, e mafai ona tatou faalolotoina lo tatou malamalama pe o ai i tatou, le uiga o a tatou feagaiga ia i tatou, ma le paia o o tatou tino. Ma e mafai ona tatou manatua mafuaaga moni mo le filifili e laei tauagafau. E faatatau i le ola ai i le ala e finagalo le Atua tatou te ola ai.
E mafai ona tatou amata i le fesili ifo ia i tatou lava, “Pe o le a ou lagona ea le toafimalie i o‘u foliga vaaia pe ana ou i ai i le afioaga o le Alii?” E faapena foi, e mafai ona tatou mafaufau i mea e pei o la tatou gagana ma amioga: “Atonu e te fesili ifo ia te oe lava … : ‘Pe ou te fai atu ea nei upu pe auai i nei gaoioiga pe ana i ai le Alii?’ O a outou tali faamaoni i nei fesili e ono taitai atu ai i tatou i le faia o suiga taua i o tatou olaga.”3
Na aoao mai Sister Carol F. McConkie, sa avea ma Fesoasoani Muamua i le Au Peresitene Aoao o Tamaitai Talavou:
“O le tauagafau i lavalava, foliga vaaia, manatu, ma amioga o se molimau patino i le Alii tatou te faamamaluina o Ia ma tatou te ‘fiafia’ i feagaiga ua tatou osia i sauniga paia o le perisitua. …
“O filifiliga o aso taitasi tatou te faia e uiga i laei tatou te ofuina, o upu tatou te tautatala ai, o mafaufauga tatou te mafaufau i ai, o ata tatou te vaai i ai, o musika tatou te faatagaina i totonu o o tatou aiga, ma ala o faasalalauga tatou te faatagaina e ulufale mai i o tatou mafaufau ma loto, ma a tatou amioga i nofoaga faitele ma i tulaga patino—o ia mea uma—e atagia mai ai lo tatou faamamaluina lelei o lena feagaiga.”4
E mafai ona tatou taulai atu i se tasi vaega o le tauagafau lea tatou te le mafaufau i ai pe afai tatou te le tauagafau i isi auala. E faaopoopo atu i le auala tatou te laei ai, o a mea o tatou matamata ai, faitau, faalogo, pe talanoa ma tausua ai ma a tatou uo? E mafai ona e tauagafau i fafo ae le tauagafau lava i totonu.
E tele amioga atonu tatou te le iloaina e le ogatusa ma le mataupu faavae o le tauagafau, e aofia ai le faitatala, faamasinoina po o le faaesea o isi, faamaualuga po o le mitamitavale, palauvale po o le faaaogaina o le gagana le migao, faatinoina ma le le migao po o le le talafeagai i nofoaga faitele, ma le lotoleaga. O nei uiga ma amioga e solia ai poloaiga e ese mai i le tauagafau, e pei o le poloaiga ia alofa atu i lē lua te tuaoi ma tuu le faamasino atu. Ae o loo faaalia ai foi le leai o se lotomaualalo, agamalu, ma se sootaga i le Atua—o ia mea uma e fesootai i le tauagafau.
O le tauagafau i totonu atonu o se manatu faavae fou ia i tatou, ae e mafai ona tatou galulue e suia o tatou mafaufau ma amata ona vaai i le faamoemoega i tua atu o le Tama Faalelagi o fetalai mai ia i tatou ina ia tauagafau i mea uma. E finagalo o Ia ia tatou taulai atu i mea e mafai ona tatou faia e tuputupu ae ai faaleagaga, auauna i isi, galulue ma le agalelei, ma maua ni mafaufauga mama. E finagalo o Ia ia tatou faaaogaina o tatou tino e le o ni meateuteu ae o ni meafaigaluega i Ona aao.5
Auala e Mafai Ona Tatou Aoao Atu Ai le Tauagafau
Faatasi ai ma lenei malamalamaaga atoatoa i mea e manaomia e le tauagafau, e mafai ai ona tatou aoao lelei atu lenei mataupu faavae i isi.
E mafai ona tatou aoao atu o le tauagafau e faatatau i se tautinoga i totonu ia Iesu Keriso ma fesoasoani i isi ia malamalama i auala e atiae ai lena ituaiga o tautinoga.
E mafai ona tatou faamatala atu o le tauagafau e le tatau ona tatou lagona ai le maasiasi e uiga i o tatou tino. O le tauagafau e le faatatau i le ufiufiina o tatou tino aua e matuai leaga lava—o le mea moni ua na o se faafeagai. Na aoao mai Elder Robert D. Hales (1932–2017) o le Korama a Aposetolo e Toasefululua, “A tatou iloa o tatou tino o ni meaalofa o i ai, ma a tatou malamalama i misiona latou te fesoasoani ia i tatou i le faataunuuina, tatou te puipuia ma faamamalu i ai i auala tatou te amio ai faapea ma o tatou lavalava.”6
E mafai ona tatou mautinoa e tutusa le aoaoina o le tauagafau i tama ma teineiti, alii ma tamaitai. Ma e mafai ona tatou faasoa atu le upumoni faapea o i tatou o sui “e galulue … ma ia lē faamalosia” (2 Nifae 2:26)—pe a siomia la i tatou e le le tauagafau o le lalolagi, ua ia i tatou le mana e faaaoga ai le loto pulea ae le faafiafia ai i mafaufauga le talafeagai. Ae e mafai foi ona tatou maua le agaalofa mo isi ma faia mea uma tatou te mafaia e fesoasoani ai i le tasi ma le isi e tausia o tatou mafaufauga ma amioga e ogatusa ma mea e finagalo ai le Atua mai ia i tatou.
Ma le mea mulimuli, e mafai ona tatou aoao atu o le tauagafau e le tatau ona faaaogaina o se meafaigaluega o le faamasinoga e faasaga i isi. E tatau ona tatou faamuamua le alofa, faafeiloai, ma le taliaina o isi i le faia o se tasi ia lagona le leaga i le auala o loo latou laei ai. A o tatou faia o se tulaga e fesoasoani muamua ai i isi ia malamalama i lo latou taua paia ma le faasinomaga, o le a masani lava ona latou amata faaaogaina mataupu faavae o le tauagafau i o latou olaga—i totonu ma fafo atu.
Vivii atu i le Atua
A tatou taulai atu i le tauagafau i totonu, o le a sili atu ona mafai ona tatou lagonaina le uunaiga a le Agaga Paia i o tatou olaga. Na aoao mai Elder Hales, “O le tauagafau o le lotomaualalo foi lea, ma o le lotomaualalo e valaaulia ai le Agaga e faatasi ma i tatou.”7 E mafai e le Agaga ona taiala i tatou ia iloa le mea e ofuina, mea e tautala atu ai, ma mea e fai e tumau ai le tauagafau i auala uma.
Ua aoao mai tusitusiga paia o i tatou “o le tupulaga ua filifilia [outou], o tupu ma ositaulaga, o le nuu paia, ma le nuu na faatauina mai; ina ia [outou] ta’uta’u atu ona lelei na ia valaau ia te outou nai le pouliuli e oo i lona lava malamalama e matua ofo ai” (1 Peteru 2:9). Tatou te viia le Atua i a tatou faatinoga ma foliga tauagafau. E le na o o tatou laei; e faatatau foi i le auala tatou te faauigaina ai le galuega ua valaauina i tatou e fai.
Ioe, o Iesu Keriso o lo tatou faataitaiga atoatoa o le agamalu ma le tauagafau i vaega uma o le olaga. E faasino atu pea o Ia i Lona Tama o le puna o Lona mana, ae le o Ia lava. Na te faamamaluina le Atua i mea uma Na te faia ma mea uma ia te Ia. Ma o le uiga moni lava lena o le tauagafau.