“Sa Ou Manatu Sa Le o A‘u na Finagalo i ai le Atua,” Liahona, Iuni 2022.
O Leo o le Au Paia o Aso e Gata Ai
Sa Ou Manatu Sa Le o Au na Finagalo i ai le Atua
A o ou tatalo ma faitau tusitusiga paia, sa faia e le Tama Faalelagi se vavega ia te au.
Ina ua faatoa asiasi mai faifeautalai ia te a‘u, sa la faamalamalama mai upumoni autu o le talalelei. Sa la tau mai foi ia te au le ala na toefuatai mai ai le Ekalesia a Iesu Keriso.
I le faaiuga o le la asiasiga, sa la fai mai ia te a‘u e faitau le 3 Nifae 11. A o ou faitau, sa ou tatalo faatauanau. O le taimi lava lena, na pai mai ai le Agaga Paia i lo‘u loto. Sa musumusu mai le Agaga, “E moni lenei tusi.”
I le vaiaso mulimuli ane, sa ou auai ai i la‘u sauniga faamanatuga muamua. O le a le galo lava ia te au le faafeiloaiga na ou mauaina ma molimau na faasoa mai e tagata o le ekalesia.
Ina ua maea le sauniga, sa tau mai e faifeautalai ia te au e tatau ona ou osia feagaiga ma le Atua ma talia Iesu Keriso o lo‘u Faaola ina ia maua ai se faamoemoe o le faaolataga ma le faaeaga. Sa ofoofogia lo‘u aafiaga i le lotu, ae sa ou fai atu ia i laua, “E le mafai ona ou faia. E le o au o se ituaiga o tagata e finagalo i ai le Atua i Lana Ekalesia.”
I se vaiaso mulimuli ane, na valaaulia ai au e faifeautalai e asiasi atu i lotoa o le Malumalu o le Aai o Kuatemala. Sa ou maofa i le vaaia o se fale matagofie ma se agelu i le pito i luga.
Sa fai mai ni tamaitai faifeautalai se toalua sa faia ni malaga maimoa i lotoa o le malumalu, “Ua e sau e maua se tali mai le Atua. Sei o tatou ulu atu i le vaega e mafai ona e tatalo ai ia maua le tali e te manao ai.”
Sa matou ulu atu ma saofafai i lalo. A o ou tatalo, sa ou lagonaina se mu malosi i lo‘u loto ma amata ona tagi. Sa ou lagonaina foi le filemu tele ma le fiafia. Sa ou iloa ua faamagaloina a‘u e le Atua i a’u agasala. Sa ou mana’o e auauna atu ia te Ia. Sa ou iloa e tatau ona ou papatiso.
Ina ua fesili mai faifeautalai sa aoaoina au pe ua ou sauni nei e papatiso, sa ou tali atu, “Taeao, faaiuga o lenei vaiaso, soo se taimi lava e mafai ona lua faia ai!”
O le aso na ou papatiso ai o le aso sili lea o lo‘u olaga. Sa ou lagonaina ua ou toe fanaufouina.
Ua ou lagona sa galue le Tama Faalelagi i se vavega ia te au. O le ki o le tatalo ma le faitauina o tusitusiga paia. O tusitusiga paia ma tatalo o auala ia e fesootai mai ai le Alii ia i tatou ma faaali mai ia i tatou Lona alofa.
Aua le faatuai ona osi feagaiga ma Ia. O feagaiga o se mea matagofie tele.