សូមស្វាគមន៍មកកាន់ច្បាប់នេះ
គោរពដល់បុត្រាបុត្រីគ្រប់រូបរបស់ព្រះ
ប្រធាន រ័សុល អិម ណិលសុន បានជំរុញយើងឲ្យ « ពង្រីករង្វង់នៃសេចក្ដីស្រឡាញ់របស់យើងដើម្បីឱបក្រសោបមនុស្ស្លោកទាំងមូល » ( Teachings of Russell M. Nelson [ 2018 ] ទំព័រ ៨៣ ) ។ ដោយសារតែមានភាពចម្រុះគ្នាជាច្រើនក្នុងចំណោមបុត្រាបុត្រីរបស់ព្រះ តើយើងអាចបង្កើតសហគមន៍មួយដែលមនុស្សទាំងអស់រស់នៅដោយសុខដុមរមនាយ៉ាងដូចម្តេចទៅ ?
នៅក្នុងអត្ថបទរបស់លោក « នាំមកនូវក្រុងស៊ីយ៉ូន » ( ទំព័រ ១២ ) អែលឌើរ ហ្គែរីត ដបុលយូ ហ្គង នៃកូរ៉ុមនៃពួកសាវកដប់ពីរនាក់ អញ្ជើញយើងឲ្យមានចិត្ត និងគំនិតបង្រួបបង្រួម កាលដែលយើងអញ្ជើញមនុស្សទាំងអស់ឲ្យមករកព្រះគ្រីស្ទ ។ « ការយកឈ្នះលើការប្រកាន់ពូជសាសន៍ និងការរើសអើង ៖ យើងអាចស្ថាបនាទំនាក់ទំនងនានា » ( ទំព័រ ១៨ ) អាចជួយយើងនៅក្នុងការខិតខំប្រឹងប្រែងដើម្បីមានសាមគ្គីភាព ។ ពិតប្រាកដណាស់ ការមានសាមគ្គីភាពរួមមានទាំងការលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ជាព្រះវិហារមួយ ក៏ដូចជាបុគ្គលម្នាក់ៗផងដែរ ។ សូមរៀនបន្ថែមទៀតនៅក្នុង « ដ្បិតសាសនាចក្ររបស់យើងនឹងត្រូវបានហៅថាដូច្នោះ » ដោយប្រធាន ហិនរី ប៊ី អាវរិង ( ទំព័រ ៨ ) ។
មិនត្រឹមតែបង្កើតសាមគ្គីភាពនៅក្នុងភាពចម្រុះគ្នារបស់យើងដែលជាបទបញ្ញត្តិមួយនោះទេ ( សូមមើល យ៉ូហាន ១៧:២១; គោលលទ្ធិ និង សេចក្ដីសញ្ញា ៣៨:២៧ ) ប៉ុន្តែវាក៏ជាឱកាសមួយឲ្យយើងរៀនសូត្រពីភាពចម្រុះគ្នានេះ និងទទួលបានពរជ័យតាមរយៈបងប្អូនប្រុសស្រីរបស់យើងដែលមានវប្បធម៌ សញ្ជាតិ និងបទពិសោធន៍ខុសៗគ្នាដែរ ។ យើងសង្ឃឹមថាច្បាប់ចេញផ្សាយប្រចាំខែនេះជួយយើងទាំងអស់គ្នាឲ្យរស់នៅកាន់តែមានសាមគ្គីក្នុងព្រះគ្រីស្ទ ។
ដោយស្មោះស្ម័គ្រ
អែលឌើរ វ៉លធើរ អេហ្វ ហ្គុងស្សាឡែស្ស
នៃពួកចិតសិបនាក់
អ្នកប្រឹក្សាយោបល់ឲ្យ ទស្សនាវដ្តីលីអាហូណា