« សន្និសីទទូទៅ ៖ ការប្រជុំនៅទូទាំងពិភពលោករបស់សាសនាចក្រ » លីអាហូណា ខែ កញ្ញា/ខែ តុលា ឆ្នាំ ២០២១
មូលដ្ឋានគ្រឹះនៃដំណឹងល្អ
សន្និសីទទូទៅ ៖ ការប្រជុំនៅទូទាំងពិភពលោករបស់សាសនាចក្រ
យើងស្ដាប់ព្យាការី និងថ្នាក់ដឹកនាំផ្សេងទៀតក្នុងសាសនាចក្រអំឡុងសន្និសីទទូទៅ ។ ពួកលោកបង្រៀនយើងអំពីអ្វីដែលព្រះសព្វព្រះទ័យចង់ឲ្យយើងស្ដាប់ឮ ។
រៀងរាល់ខែមេសា និង ខែតុលា សាសនាចក្រមានការប្រជុំជាបន្តបន្ទាប់ដែលហៅថា សន្និសីទទូទៅ ។ ថ្នាក់ដឹកនាំបង្រៀន ហើយថ្លែងទីបន្ទាល់អំពីព្រះយេស៊ូវគ្រីស្ទ និង ដំណឹងល្អរបស់ទ្រង់ ។ សន្និសីទទូទៅត្រូវបានធ្វើឡើងនៅ ទីក្រុង សលត៍ លេក រដ្ឋយូថាហ៍ ស.រ.អា ហើយ សន្និសីទទូទៅនេះបានចាក់ផ្សាយនៅទូទាំងពិភពលោកដែលមានជាង ៩០ ភាសា ។ សមាជិកគ្រប់រូប និង មនុស្សដែលមានចំណាប់អារម្មណ៍ផ្សេងទៀតត្រូវបានអញ្ជើញឲ្យស្ដាប់សុន្ទរកថាទាំងនោះ ។
សន្និសីទដំបូងរបស់សាសនាចក្រ
សាសនាចក្រនេះត្រូវបានរៀបចំឡើងជាផ្លូវការនៅអំឡុងការប្រជុំមួយនៅថ្ងៃទី ៦ ខែមេសា ឆ្នាំ១៨៣០ ( សូមមើល គោលលទ្ធិ និងសេចក្ដីសញ្ញា ២០ ) ។ សន្និសីទទូទៅដំបូងគេត្រូវបានធ្វើឡើងនៅថ្ងៃទី៩ ខែមិថុនា ឆ្នាំ១៨៣០ ។ តាំងពីពេលនោះមក សន្និសីទទូទៅត្រូវបានធ្វើឡើងនៅក្រោមការដឹកនាំរបស់ប្រធានសាសនាចក្រនៅទីកន្លែងណាដែលសមាជិកអាចប្រមូលផ្ដុំគ្នាបាន ។ នៅទសវត្សរ៍ឆ្នាំ ១៨៤០ ថ្នាក់ដឹកនាំបានចាប់ផ្ដើមធ្វើសន្និសីទពីរដងក្នុងមួយឆ្នាំ ។
របៀបដែលសន្និសីទត្រូវបានរៀបចំនៅសព្វថ្ងៃនេះ
គណៈប្រធានទីមួយ កូរ៉ុមនៃពួកសាវកដប់ពីរនាក់ និងថ្នាក់ដឹកនាំដទៃទៀតក្នុងសាសនាចក្រឡើងនិយាយនៅអំឡុងសន្និសីទទូទៅ ។ ក្រុមចម្រៀងរោងឧបោសថនៅវិសាលដ្ឋានព្រះវិហារបរិសុទ្ធ និងក្រុមចម្រៀងផ្សេងទៀតក្នុងសាសនាចក្រប្រគំតន្ត្រី ។ សន្និសីទនីមួយៗមានសម័យប្រជុំចំនួនប្រាំ ៖ សម័យប្រជុំចំនួនបីនៅថ្ងៃសៅរ៍ និង សម័យប្រជុំចំនួនពីរនៅថ្ងៃអាទិត្យ ។
ការបង្រៀនរបស់ថ្នាក់ដឹកនាំ
ជាច្រើនខែពីមុនសន្និសីទ ថ្នាក់ដឹកនាំទាំងឡាយរបស់សាសនាចក្រអធិស្ឋានអំពីអ្វីដែលត្រូវបង្រៀន ។ ព្រះអម្ចាស់បំផុសគំនិតពួកលោកឲ្យដឹងពីអ្វីដែលពួកលោកគួរតែនិយាយ ។ ពួកលោកបង្រៀនអំពីសេចក្ដីពិតនៃដំណឹងល្អ ហើយអញ្ជើញយើងឲ្យរក្សាបទបញ្ញត្តិរបស់ព្រះ ។ ពួកលោកក៏ថ្លែងទីបន្ទាល់អំពីព្រះយេស៊ូវគ្រីស្ទ ហើយលើកទឹកចិត្តយើងឲ្យធ្វើតាមទ្រង់ ។
ការរៀនសូត្រមកពីសន្និសីទ
ពីមុនសន្និសីទទូទៅ យើងអាចអធិស្ឋានដើម្បីស្ដាប់ឮនូវអ្វីដែលព្រះអម្ចាស់សព្វព្រះទ័យឲ្យយើងរៀនសូត្រ ។ នៅពលយើងស្ដាប់សុន្ទរកថាទាំងនោះ ព្រះវិញ្ញាណនឹងបង្រៀនយើងនូវអ្វីដែលយើងត្រូវដឹង ។ បន្ទាប់ពីសន្និសីទ សុន្ទរកថាទាំងនោះមានដាក់នៅលើគេហទំព័រ ChurchofJesusChrist.org នៅក្នុងកម្មវិធីបណ្ណាល័យដំណឹងល្អ និងនៅក្នុង លីអាហូណា ។ យើងអាចសិក្សាសុន្ទរកថាទាំងនោះប្រកបដោយការអធិស្ឋានដើម្បីរៀនសូត្របន្ថែមទៀតអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។
ដកស្រង់ចេញពីព្រះគម្ពីរ
ព្រះយេស៊ូវគ្រីស្ទបានបង្រៀនថា យើងគួរតែជួបប្រជុំគ្នាជាញឹកញាប់ ( សូមមើល នីហ្វៃទី៣ ១៨:២២ ) ។
នៅពេលសមាជិកសាសនាចក្រថ្វាយបង្គំរួមគ្នា នោះព្រះអម្ចាស់នឹងគង់នៅជាមួយនឹងពួកគេ ( សូមមើល ម៉ាថាយ ១៨:២០ ) ។
ព្រះអម្ចាស់បានបង្គាប់សមាជិកសាសនាចក្រឲ្យ « ណែនាំ និងស្អាងគ្នាទៅវិញទៅមក » ( គោលលទ្ធិ និងសេចក្ដីសញ្ញា ៤៣:៨ ) ។
នៅពេលសមាជិកសាសនាចក្រមានចិត្តស្មោះត្រង់ ហើយអនុវត្តសេចក្ដីជំនឿលើព្រះគ្រីស្ទ នោះព្រះវិញ្ញាណទ្រង់នឹងគង់នៅជាមួយនឹងពួកគេ នៅពេលពួកគេជួបជុំគ្នា ( សូមមើល គោលលទ្ធិ និង សេចក្ដីសញ្ញា ៤៤:២ ) ។