Te Mwaaka ae Akea Tokina
Tii te onimaki ao onimakinan ana taeka te Atua ae e kona ni kaoni nanora n ae tau ni kamatoaira—ao n anganira te kona ni karekea mwaakana.
Inanon rinanoan ana reirei ara burabeti ae tangiraki, Beretitenti Russell M.Nelson, I kunea te taeka are e aki toki ni kamanena inanon ana marooro. Te Taeka aio bon te mwaaka.
Inanon te moan maungatabu imwiin tian kamatoakina bwa te Abotoro, Beretitenti Nelson e marooro iaon te mwaaka.1 E reitinako n reirei taekan te mwaaka inanon ririki aika bati. Ngkai ti a tia ni kamatoa Beretitenti Nelson bwa ara burabeti, e a tia n reirei taekan te mwaaka—riki, mwaakan te Atua—ao arora ni kona ni karekea. E a tia n reirei arora bwa ti na kanga ni karekea mwaakan te Atua ngkana ti buokiia tabeman,2 aron te rairanano ni karokoa mwaakan Iesu Kristo ao Ana Mwakuri ni Kamaiu inanon maiura,3 ao aron te nakoanibonga—te mwaaka ao ana kariaia te Atua—ni kakabwaiaia ni kabane ake a karaoi ao ni kawakin berita ma Ngaia.4 Beretitenti Nelson e a tia ni kakoauaa bwa mwaakan te Atua e raanga nakoia ake a kabaeia n te berita n te tembora bwa a na kawakin aia berita.5
I rootaki n ana kakaewenako Beretitenti Nelson ae anga n te Eberi 2020 nte maungatabu ni kabuta. E reireiniira bwa ti na “kamatebwai ao n tataro n reiakina riki aron te mwaaka ao te ataibwai are kam a tia ni kabaeaki iai—ke are kam na anganaki.”6
Ni kaeka nakon te kakaewenako aio, I a tia ni kamatebwai ao n tataro ao n tia n reiakin baika a kakaawaki n te mwaaka ao te ataibwai are I a tia ni kabaeaki iai—ke are N na kabaeaki iai.
Ataakin te bwai are ti riai ni karaoia ni karekea mwaakan te Atua inanon maiura e aki bebete, ma I a tia ni kunea bwa e kona ni karaoaki man kamatebwaiakina inanon ara iango ao n tataro ibukin te Tamnei are Raoiroi bwa e na kaotaira.7 Unimwane Richard G. Scott e anga te kabwarabwara ae mataata bwa tera mwaakan te Atua bon: te “mwaaka ni kona ni karaoa ae raka riki nakon are ti kona ni karaoia ibon iroura.”8
Kaonakin nanora ao tamneira n ana taeka te Atua ao aan te onimaki inanon Iesu Kristo e kakaawaki nakon karekean mwaakan te Atua ni buokira inanon taai ni kataaki. N akean ana taeka te Atua ao te onimaki inanon Iesu Kristo n nano inanora, ara koaua ao ara onimaki a kona ni bwaka, ao ti na kona ni kabuaa aron karekean te mwaaka are tangiria te Atua bwa ti na karekea. Te Onimaki ae aki nene e bon aki tau. Tii te onimaki ao ana taeka te Atua are kanoai nanora a tau ni kamatoaira—ao n anganira te kona ni karekea mwaakana.
Titita Johnson ao Ngai ti kaikawaiia natira, ti kaaungaaiia n tatabeman bwa a na reiakina teuana te bwai ni katangitang. Ma ti bon kariaia natira n anai reirei ibukin te katangitang tii ngkana a tia ni karaoa tabeia ao ni kataneiai n aia bwai ni katangitang ni katoa bong. N te Kaonobong teuana, ara kateniman n nati te aine e rangi ni ingarake ni kan nako n takakaro ma raraona, ma e tuai ni kataneiai ni katanga te biano. Ibukina bwa e a tia n motinnanoia bwa e na kataneiai inanon 30 te miniti, e iangoia bwa e na taua maanna, ibukina bwa e aki tangiria bwa e na raka teuana te miniti ae raka nakon are e kantaningaaki.
Ngke e rirakin te mitiin ni kabue amwarake inanon mwanangana nakon te biano, e tei ao e taoni bwatin tabeua. Man e aikoa taua maanna n te tai bwa, e a kamaeua te microwave i nanon 30 miniti. Imwin 20 te miniti ni kataneiai, e oki rikaki nakon te tabo ni kuka bwa e na tuoa bwa ai tii iraua riki nikiran te tai ao e kunea bwa e a urarake te bwai ni kuka.
E a biri nako akuun te auti are I mwakuri iai, e takaruaea ae iai te urarake inanon te auti. I waekoa ni biri nako nanon te auti, ao, eang I a kunea te microwave n urarake.
N te anga ni kamanoa mweengara bwa e na aki buee I nako akuun te microwave, I kanakoa uaeana, ao I kamanenaa kaona n tabeka te microwave are bue ni kanakoa man te taibora. Ma te kantaninga bwa N na riki bwa te tiambion ao n taobaraa te kangaanga nakon mweengara, I katioa te microwave ni kaona ni kararoa ma raabwatau, n naako akuun te auti, ao I a manga katioa kaua ni karenakoa te microwave nako aon te uteute. A kona ni kamatea te ura ae kakamaaku n te ooti.
Tera ae e a tia n nakobuaka? Te microwave e tangira te bwai teuana ae na temeka te korakora, te ainumwum aei e bon temeka te korakora, e kabuebue, ao e konaa n ura, ni bon uruaki irouna ni urarake ao ni mannang.9 Ara microwave e urarake ao ni bue ibukina bwa akea te bwai inanona.
N aron anne, naake iai te onimaki irouia ao ana taeka te Atua ae nano i nanoia a na konaa n butimwaea ao n tokanikai iaon te kai ni katebe ae bue, are e na kanakoa teuare e buakaka ni kamaunaira.10 Ngkana akea ara onimaki, kaantaninga, ao ara koaua e na aki reitinako, ao n aiaron te microwave are akea kanoana, ti kona n riki bwa konana.
I a tia n reiakinna bwa ngkana iai ana taeka te Atua inanon tamneiu, n raonaki ma te onimaki inanon te Uea ae Iesu Kristo ao Ana Mwakuri ni Kamaiu, e anganai te kona ni karekea mwaakan te Atua n tokanikai iaon te kangaanga ke te bwai riki teuana are e na kareai iai. Ngkana ti kaitarai kanganga, ti kona ni mwioko iaon ana berita te Uea are reiakinaki iroun Bauro: “Bwa e aki anganiira te Atua te nano ae mamaku; ma e anganira te mwaaka, te tangira, ao te wanawana.”11
Ti ataia bwa ngke te ataei te Tia Kamaiu “e riki ni korakora, ao E kaonaki n te rabakau: ao E memena irouna ana akoi te Atua.”12 Ti ataia bwa ngke E rikirake ni ikawai, ”Ao E rikirake Iesu n rabakau ma ni ikawai man akoaki iroun te Atua ma aomata.”13 Ao ti ataia bwa n te tai are E waaki ana mwakuri, ake a ongo Irouna ”a mimi n ana reirei bwa e mwaaka ana taeka.”14
Rinanon te katauraoi, Te Tia Kamaiu e rikirake ni korakora ao ni konaa n totokoi ni kabane ana kariri Tatan.15 Ngkana ti irira ana katoto te Tia Kamaiu ao ni katauraoi rinanon kamatebwaian ana taeka te Atua ao ni kananoa ara onimaki, ti kona naba ni karekea mwaakan te Atua n totokoi kariri.
Inanon te tai ae katabuaki te bobotaki are aki kona n reke kawarakin te tembora, I a tia ni katerea au iango are te waakinako ni kamatebwai ao n reiakina riki mwaakan te Atua are roko nakoira ngkai ti karaoa ao ni kawakin berita aika tabu man te tembora. Ngke e beritanaki inanon te tataro ni katabu ibukin te Kirtland Tembora, ti otinako man te tembora ma mwaakan te Atua.16 Akea te bong ae bane iai taina n irekereke ma mwaakan te Atua ni katokaaki iaoia naake a karaoi ao a kawakin berita aika tabu n te tembora, ke totokoan karekan te mwaaka anne inanon te butinaoraki. Mwakana e maunanako inanon maiura tii ngkana ti kabwaka ni kawakin ara berita aika tabu ao n aki maiuakinna ni kawai ake a kona ni karekea nakoia n reitinako n tau ibukin karekean Mwaakana.
Ngke kainnabau ae tangiraki ao ngai ti mwakuri bwa taan kairiri n te mition i Thailand, Laos ao Myanmar, ti kakoaua ni mwaakan te Atua are roko nakoia ake a karaoi ao ni kawakin berita aika tabu n te tembora. Te Mwane ibukin buokaia ake a na nakon te tembora e a karekea buokaia irouia Aomata aika Itiaki n aaba aika teniua aikai nakon te tembora i mwiin aia kona are a kona ni karaoia ao ni katauraoia. I karaoa te bowi ma te koraki ae mwaitia 20 Aomata aika Itiaki aika kakaonimaki n te marae i Bangkok, Thailand ni buokiia ni kamwaeia nakon te marae ni wanikiba riki teuana i Bangkok ni kaea kibaia nako Hong Kong. Taian membwa aikai a kaonaki n te namakin ni kukurei ngkai a bon mwananga nakon ana auti te Uea.
Ngke ti kaitibo ma kaain te aro aika Itiaki n okiia, aia atatai n te euangkerio ae raka ao n raonaki ma te mwaaka are reke man karekean aia entaumente n te tembora ao karaoan aia berita ma te Atua a kona n noraki. Aomata aika Itiaki aikai a otinako man te tembora n “irianaki ma Mwaaka[na].”17 Te mwaaka aio ni karaoa ae bati riki nakon are a kona ni karaoia ibon irouia e anganiia te korakora ni kaitarai kakaewenako n riki bwa membwa n te Ekaretia i abaia ao n nako n taekin ”baika a korakora ao baika mimitong, inanon te koaua,”18 ngkai a reitinako ni katea abanuean te Uea i Laos.
Inanon te tai are ti aki kona n roko n te tembora, ti a tia ni mwioko iaon taian berita aika ti tia ni karaoi inanon te tembora ni katea te kawai ae itiaki, n aki bibitaki inanon maiura? Berita aikai, ngkana a kawakinaki, a anganira te nooraba ao kantaningaa ibukin te tai ae na roko ao te moti n nano ae itiaki n tauraoi ni karekei bwaai ni kabane ake e a tia ni berita te Uea rinanon ara kakaonimaki.
I kaoi ngkami n ukora mwaakan te Atua are e tangiria n angani ngkami. I kakoaua bwa ngkai ti ukoukora te mwaaka aio, ti na kakabwaiaki n te ataibwai ae korakora riki n ana tangira Tamara are i Karawa i bukira.
I kakoaua bwa bukina bwa Tamara are i Karawa e tangiri ngkami ao ngai, E kanakoa Natina ae te Rikitemanna, Iesu Kristo, n riki bwa ara Tia Kamaiu ao te Tia Kaboira. I kakoaua Iesu Kristo, Ngaia are mwaakana ae bwanin,19 ao n taekinna n aran Iesu Kristo, amen.