Raoi, Bwaaka
E reireiniira te Tia Kamaiu bwa ti na namakina te rau ao te raoi riki ngkana te ang e karematoa ni katobibira ao baronnao aika bubura a kakamaku ni kabuaa ara kantaninga.
Ngke a kairake natira, ara utu a kabanea tabeua te bong n te karaanga ae tamaroa. Te bwakantaai teuana tabeman ataei a karini aia bwai ni uaua imwain ewenakoia man te teeke ao inanon te ran. Natira te aine ae te bina e mataku ma te ingainga, ni matakuakiniia raoi tarina. Ma ninikoriana ni kabane e ikotii, e kaina bairina ni baina are teuana ao e kibanako. E waekoa n otirake nako eta ma te nakonnano teutana ni bwanaana e takaarua, “Buokai! Buokai!”
Ngkai, e aki mena inanon te kaanganga ae mamate, ana bwai ni uaua e a bon karaoa ana mwakuri, e a mano ni beibeti. Ti kona ni kaman kawaria ni katikiarake nako aon te teeke ma tii teutana te mwakuri. E ngae ngke, man ana taratara, e kainnanoa buokana. Tao bon kamaririn te ran ke bon booun te taneiai. E karaoi akanne n aki ataa iteran te kaanganga, ikanne are ti a niroaia n te taara ao ni kamoamoa iaon ninikoriana.
Tao ti kara ke ti kairake, a mwaiti ibuakora, n tain te rawawata, n taetae ma taeka aika a tawe n aron “Buoka!” “Buokai!” ke “Taiaoka, kaeka au tataro!”
Ai aron te tai are riki ma ana reirei Iesu Kristo inanon ana mwakuri ngke E mena iaon te aba. Ni Mareko ti warekia are Iesu “ao E a manga reirei i rarikin te nama: ao a botaki nako Ina aomata aika uanao.”1 A moanna ni mwaiti te koraki ngaia are Iesu “e toka n te boti”2 ao e taetae mai iaon te teeke. E bane te bong E reireia aomata n taetae ni kaikonaki ngke a tekateka ietan te nama.
“Ao … ngke e a roko te [tairiki],” E taku nakoia Ana reirei, “Ti a nakon iterana are teuana. Ao ngke a tia ni kanakoia aomata,”3 a kitana mataniwin te aba ao iaon kawaia n rinukan naman Kariraia. E kunea te tabo ni wene ibukin te boti, Iesu e wene ao e waekoa ni matunako. Ni waekoa “e roko te ang ae baibati, ao a baroa te boti nao, ma ngaia are e a [kani] kebo”4 n te ran.
Angiia man ana reirei Iesu bon taan akawa aika a mwaatai ao ataa aron te boti inanon te buaka. Boni ngaiia ae E onimakiniia—ni koaua, Ana reirei aika—tangiraki. A tia ni kitana aia mwakuri, kukureia i bon irouia, ao aia utu n ririmwin Iesu. Aia onimaki Irouna bon te kakoaua man menaia inanon te boti. Ao ngkai aia boti e mena inukan te angbuaka ao te boti e a bon kan inako.
Ti aki ataia bwa maanra a keiaki n tautaua te boti ni beti inanon te buaka, ma a kauta Iesu ma te nakonnano teutana ni bwanaaia, n taku:
“Te tia Reirei, ko aki mutiakini matera?”5
Te Uea, kamaiura: ti mate.”6
A Weteia bwa te “Mataniwi,” Ngaia ni koaua ara Mataniwi. Boni Ngaia naba “Iesu Kristo, ae Natin te Atua, ae Taman karawa ma te aonaba, te Tia Karikibwai iaon bwaai ni kabane man moan rikin bwaai.”7
Man ana tabo inanon te boti, Iesu e teirake ao boa te ang ao n taku nakon buakan te nama, “Raoi, Bwaaka. Ao te ang [e raoi], ao e bati te aariki.”8 E aki toki te Mataniwi n tia Reirei, Iesu ngkanne n reireia Ana abotoro rinanon aron uoua titiraki n tatangira. E titiraki:
“Kam aera ngkai kam maku?”9
“A anga ami onimaki?”10
Bon iai naano aika a mamate, riki te kaririaki, ngkana ti mena inukan te kataaki, kaangaanga, ke marakinnano ni kan takarua, “Tia Reirei, ko aki mutiakina mateu? Kamaiuai.” Riki ngke e tang Iotebwa Timiti man te karabuti ae kakamaaku, “O te Atua, Ko Mena Iaa? Ao e ngaa te umwa ae rabuna te tabo ae ko karabako iai?”11
Ni koauana, te Tia Kamaiua te aonaaba e atai tianakira ae mamate, bukina E reireiniira bwa ti na namakina te rau ao te raoi riki ngkana te ang e karematoa ni katobibira ao baronnao aika bubura a kakamaku ni kabuaa ara kantaninga.
Nakoia naake a kinaaki aia onimaki, n ai aron ana onimaki te teei, ke ma bon aekan mwakoron te onimaki ae uarereke,12 e kakao Iesu: “Bane mai nako Iu.”13 “Kakoaua arau.”14 Reiakina taekau, ao ongo n au taeka.”15 E amarau n taku, “Rairananomi ao [man] bwabetitoaki n arau,”16 “Kam na itangitangiri, n ai arou ngke I tangiri ngkami,”17 ao “Kam aki toki n uringai.”18 Iesu e manga, kabwarabwara: “Bwaai aikai I a tia n taekin nakoimi, bwa irou kam na karekea te rau. Ami bwai i aon te aba te rawawata: ma kam na kabebetei nanomi; I a tia ni kataea ana kai te aba.”19
I kona ni katautaua bwa ana reirei Iesu n te angibuaka e ororeaki ao tewenakoaki aia booti ni katobibi, n arona, a tabe ni matakuakin nao ni bwaro iaon aia teeke ao ni kaikikanako te ran. I kona ni katautaui aroia n tabeakin aia ie ao ni kataia ni kateimatoai tabeua bwaai aika uarereke ni kanakoraoa aia booti ae uarereke. Aia taratara bon iaon te tai ni kamaiu, ao aia bubuti ibukin buokaia e bon katawe ni koaua.
Angiina mai iroura bon akea te kaokoro inanon ara bong. Taai aika tibwa nako ni katobibia te aonaaba ao inanon abara, komiuniti, ao taian utu a tia n okioki okinakoaia ma kataaki aika aki kantaningaaki. Inanon tain korakoran te nanououa n ara onimaki e kona n abwabwaki nakon tokin ara teimatoa ao ara atatai. Namakinan maaku ibukin nao n te angibuaka e kona ni katabetabeira, ni karikiira ni mwaninga raoiroin te Atua, n kitan ara taratara n ara atatai ni karekean te koaua tao n tiatianaki ke n aki mataata. Ma ae inanon aobuaka aikai ake a bon kananaua mwanangan ara onimaki a na kona ni kaai ni keiaki ao ni kakorakoraki.
N aki ongea aroarora, ti kona ni karaoia mai nanora ni mwakuri korakora ni katea ao karikirakea ara onimaki iroun Iesu Kristo. E kona ni kakorakoraaki ngkana ti uringnga bwa ngaira natin te Atua ao are E tangiriira. Ara onimaki e rikirake ngkana ti kakatai iaon ana taeka te Atua ma te kantaninga ao te taningamarau, ni kata ara kabanea n tamaroa ni ririmwin ana reirei Kristo. Ara onimaki e rikirake ngkana ti rineia ni kakoaua nakon are te nanououa, kabwarabure nakon are te motikitaeka, rairannano nakon are te kaitara. Ara onimaki e kaitiakaki ngkana ti kantaninga iaon mwakuri aika raraoi ao nanoanga ao ana akoi te Mesia ae Tabu.20
“Ngkai te onimaki bon tiaki te atatai ae nakoraoi,” Unimwaane Neal A. Maxwell e taku, “e uota te kakoaua ae nano iroun te Atua, are ana atatai e bon nakoraoi!”21 Riki inanon taai n angibuka, onimaki iroun te Uea Iesu Kristo bon kaotan te ninikoria ao manga kaetakin arora. E buokiira ni kanakoi katabetabeara aika aki kakawaki. E kaungaira n waakinako iaon kawain te berita. Te onimaki e butirake rinanon te bwarannano ao ni kariaia bwa ti na kaaitarai taai aika ana roko ma kaetakira ao nikoraoira ngkana ti kaota te ninikoria. E kataweira ni bubuti ibukin te kamaiu ao te buoka ngkana ti tataro nakon te Tama n aran Natina. Ao ngkana te tataro ni bubuti e taraa n aki kaekaaki, ara onimaki n nanomatoa iroun Iesu Kristo e anga te taotaonannano, nanorinano, ao te atatai n rau n taekina te taeka, “E na tauaki am taeka.”22
Beretitenti Russell M. Nelson e a tia n reirei:
“Ti aki kainnanoia ni kariaia maakura bwa a na kamaunai ara onimaki. Ti kona ni buakani maakura aikanne man kakorakorakin ara onimaki.
“Waaki ma am ataei. … Anganiia bwa a na namakina am onimaki, e ngae ngkana te kakatai ae kammaraki e roko iaom. Anga am onimaki ni katuruturua iaon Tamara are i Karawa ae tangiraki ao Natina ae Tangiraki, te Uea Iesu Kristo. … Reireniia n tatabeman ataeinimwaane ao ataeinnaine aika a kakawaki are teuanne ke neienne bon natin te Atua, ni karikaki n Katotongana, ma te kantaninga ao te konabwai ae tabu. Ataei n tatabemaniia a bon bungiaki ma kakaewenako ake a na tokanikai iai ao ni karikirakea te onimaki.”23
I ongora n te tai ae aki maan irouiia ataei aika aua-aia-ririki n tibwaua aia onimaki iroun Iesu Kristo ngke a kaeka nakon te titiraki “E kanga Iesu Kristo ni buokiko?” Te moan ataei e taku, “I ataia Iesu e tangirai ibukina bwa E mate ibukiu. E tangiriia naba aika-ikawai.” Te kauoman ataei e taku, “E buokai ngkana I nanokawaki ke e buakaka-nanou. E buokai naba ngkana I mena inanon te kaanganga inanoni maiu.”
Iesu e katanoata, “Mangaia are, ane e rairananona ao ma ni kawarai n aron te teei ae uarereke, ao N na butimwaia bwa ana bwai Uean te Atua.”24
“Ba E tangiria aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”26
N te tai ae aki maan, Beretitenti Nelson e berita “are kakerikaaka te maaku ao n rimwiaki n rikiraken te onimaki” ngkai ti “moana ae boou ni koauana n ongo, n ongora nakon, ao ni karaoa nanon ana taeka te Tia Kamaiu.”26
Tariu ao mwaneu, kakaewenakoara ngkai n aroarora bon tiaki tokin kawaira ae akea tokina. Ngkai tabera ngaira membwa n Ana Ekaretia Iesu Kristo ibukiia Aika Itiaki ni Boong aika Kaitira, ti a tia ni katoka iaora aran Iesu Kristo man te berita ae tabu. Ti karekea te onimaki inanon Mwaakana ni kaboan maiura ao te kantaninga ni korakoran ao Ana berita ae kakawaki. Ti karekea nanon te kukurei ni kabane, ibukin ara Uea ao ara Tia Kamaiu e a kaman atai ara kaanganga, tabeaiangara, ao nanokawakira. N aron te kawai ae ti te arona Iesu ngaia ma Ana reirei ake ngkoa, E bon mena naba irarikira! I kakoaua E a tia n anga Maiuna n te aro are ngkoe ao Ngai ti na aki mate. Te kantaninga bwa ti na karaoi aikai, ongotaeka nakon Ana tua, ao ma te onimaki n ongo Irouna e taku, “Raoi, Bwaaka.”27 N aran Iesu Kristo ae tabu ao man mimitong, amen.