Waaki Nako
Ana mwakuri te Uea e teimatoa ni waaki nako.
Tariu ao mwaneu aika tangiraki, ai kakukureira raonakimi ngkai ti waakina te ka190 ni Maungatabu ni Kabuta te Kauatai n te Ririki n ana Ekaretia Iesu Kristo ibukiia aika Itiaki ni Boong aika Kaitira. I tangiria n raoni ngkami ni mweengami ke n taabo nako ake kam ongora mai iai nakon aia rongorongo burabeti, taan mamata, ao taan kaotioti ao taan kairiiri n te Ekaretia tabeman.
Ai kukureira ngaira ibukin rabakau aika a boou are e karekea nakoira bwa tina reitaki bwa teuana te ikotaki ni kabuta te aonaaba irouia ana reirei Iesu Kristo. Te maungatabu ni kabuta ni banen Eberi e nooraki irouia aomata aika a raka nakon waaki ake mai imwaina, ao ti karekea te kantaninga are e na manga riki.
Inanon tabeua namwakaina aika a nako, te butinaoraki are e kabuta te aonaaba, urarake aika korakora, ao angibuaka aika a riki ake a kauruaki nano ao ni karika te aki rau. I nanokawaki ma ngkami n tatabemani ngkami ake a tia ni bua naake kam tangiriia inanon te tai aei. Ao I tataro ibukiia ni kababne ake a rootaki n te tai aei.
N te tai ae uarereke, ana mwakuri te Uea e teimatoa ni waaki nako. I nuukan te tau maranga, kabongana rabunan te ubu, ao boowi n Zoom, ti a tia n reiakinna ni karaoi bwaai aika a kaokoro ao tabeua ni kanakoraoi riki. Taai aika aki ririki e kona n uoti kaniwanga aika aki ririki.
Ara mitinare ao taan kairiiri n te mition a tia n rang ibuobuoki, korakora, ao n tamaroa ni koaua. E ngae ngke angiia mitinare a na karekei bwaai aika a boou, karekei aron aia mwakuri ni katia aia mwakuri, angiina mitinare a tia ni karaoi aia ribooti a raka angareirei nakon are mai imwaina.
Ti riai ni kaini tembora ibukin te tai, ao tabeua karikirake iaon kateitei a taonaki n te tai ae uarereke, ma ngkai ni kabane a bane ni waaki nako. N te karenta te ririki 2020, tina katabwena aontano ibukin 20 tembora aika a boou!
Mwakuri n rongorongon te Utu e a tia n rang rikirake karaoana. A mwaiti uoote aika a boou ao titeiki aika a tia ni kateaki. Ao ti rang ni kukurei ni ribootinna bwa te Ekaretia e a tia ni katauraoi bwaai n ibuobuoki ibukin te butinaoraki ao buoka ibukin 895 karikirake inanon aba aika 150.
Rakan kamatebwaian te euangkerio ni mweenga aika a bati e riki man kakoaua aika korakora ao reitaki inanon taian utu. Temanna te tina e koreia: “Ti namakina te kaan riki nakoia natira ao tibura ngkai ti ikotaki iaon Zoom ni katoa Tabati. N tatabemaniia a kareke aia tai n anga aia iango iaon Nakomai, Iriirai. Tataro ibukiia kain ara utu e a tia ni bitaki ibukina bwa tia matata riki n te bwai are ti kainnanoia.”
I tataro bwa ngaira aomata ngkai ti kabongana te tai ae onoti aei bwa tina rikirake n te maiu n tamnei. Ti roko iaon te aba bwa tina kataaki, n nooria ngkana ti na rineia n iriira Iesu Kristo, n rairannano n tainako, n reiakinaki, ao n rikirake. Tamneira e tangiria n rikirake. Ao ti kanakoraoa anne ngkana ti tiku ni matoatoa iaon kawain te berita.
Rinanon aikai ni kabane, Tamara arei Karawa ao Natina, Iesu Kristo, a tangiriira! A tabeakiniira! Ngaiia ao aia anera aika mimitong a tarataraira.1 I ataia e koaua aei.
Ngkai ti ikotaki n ongora ana taeka te Uea are e a tia n anganiia Ana toro bwa a na taekini, I kaoi ngkami bwa kam na iangoi ana berita te Uea ake e karaoi. E taekinna “bwa ane e taua ana taeka te Atua, are e bon tawe ma ni mwaaka, are e na bwenaua ni kabane ana mwakuri ni mwaamwanaa te aba ma ana bwai ni kamwane, … ma ana babaire ni kamwamwane te riaboro, ma ni kairiia [ana reirei] Kristo n te kawai ae eti ma ni wariki.”2
I tataro bwa kam na rineia n taua ana taeka te Atua ngkai a taekinaki inanon te maungatabu ni kabuta aei. Ao I tataro bwa kam na namakina ana tangira te Uea ae kororaoi,3 n aran Iesu Kristo ae tabu, amen.