Te Atua E na Karaoa te Bwai Teuana ae Kangaanga Iangoana
E a tia te Atua ni katauraoiia Natina ao Ana Ekaretia ibukin te tai aei.
E aki maan imwiin rokoia i Salt Lake Valley, Aika Itiaki a moana katean aia tembora ae e tabu. A namakinna bwa a tia ni kunea te tabo are a na kona n neboa te Atua ma te rau ao man inaomata man te bwainikirinaki.
E ngae n anne, ao inanon kantiaan aan te tembora a roko ana tautia man ana taanga ni buaka Amerika ni katea te kowana ikekei ma te matoa.
Ibukina bwa mataniwiin te Ekaretia aki ataa aron aia bangaomata tautia, e tua Brigham Young bwa a na kitana te tabo ao man tauna aan te tembora.
I koaua bwa tabeman kaain te Ekaretia a bon miimi bwa e aera ngkai nanoia ni kekeiaki ni katea Uean te Atua e kaaitaraaki n taainako bwa e na aki koro bukina.
N tokin te tai, e toki te kangaanga ao e a kenaki aan te tembora ao man tuoaki. N te tai anne bwaeoniia ake taan moan kateitei a kunea bwa angin moan atiibu aika bwaa taano a uruaki, are a riki iai n aki tau bwa aan te kateitei.
N rimwian anne, Brigham e tuangiia bwa a na karaoa raoi aan te kateitei n te aro bwa e aonga n tau kateimatoaan bwaa taano ibukin1 oon te Salt Lake Tembora ae kamiimi.2 N tokin te tai, a kona Aika Itiaki n anenea te anene ”Ai Matoara Nanoia aika Raraoi”3 ao n ataia bwa aia tembora ae tabu e kateaki iaon aan te kateitei ae e matoatoa are e na tikunako ibukiia rooro nako.
E kona n reireiniira te karaki aei n aron te Atua ni kabongana te kaaitara ni kakoroa bukin Ana kantaninga.
Te Aoraki ae Buta i Aonaaba
Ngkana ko ongongo aei ni kaineti ma aron te bwai are ti mena iai ngkai, anne bon bukina raoi.
I aki kakoua bwa e na iai te aomata ae e ongo bwanaau ke man wareki au taeka ae e tuai n ewekaki n te buti n aoraki ae buta i aonaaba.
Nakoia naake a nanokawaki ibukin buaia aia utu ke raoraoia, ti uataboa nanokawakimi. Ti butia Tamara are i Karawa bwa e na kabebeteko ao man anganiko te rau n nano.
Mwiin te man aoraki ae rangi ni maan aio e riaon marurungin te rabwata. A tia au koraki ni bua aia karekemwane ao a rootaki n te baki, te nanououa, ao te aki rau. Ti karinea aia mwakuri n anganano aika a mwaiti ni kekeiaki n totokoa butinakon te aoraki aio. A rootaki nanora man anganano aika a uarereke ao aia kekeiaki aika a tamaroa nakoia ake anga maiuia ni buoka, kamaoa, ao ni boutokaia aomata ake a kainnano. A onrake nanora n te kakaitau ibukin raoiroimi ao ami akoi.
Ti kanenei nanora n tataro bwa te Atua e na kauki mataroan nako karawa ao man kaon maiumi n ana kakabwaia te Atua aika akea tokina.
Ngaira Taian Koraa
E rangi ni mwaiti ae aki ataa taekan te man aoraki aio. Ma iai te bwai teuana ae I bon ataia, bwa te man aoraki aei e aki kubanako iai Tamara are i Karawa. E aki riai bwa e na bootia taanga n anera, e na tewei boowi aika a katawe ke ni biti kawain kaubwain mwakoron ana karikibwai te aonnaba n tauraoi nakon kaaitaran kainnano aika aki kantaningaaki.
Au rongorongo ngkai bwa e nge ngke te buti n aoraki aio tiaki ngaia ae ti tangiria ke ni kantaningaia, e a tia te Atua ni katauraoia natina ao ana Ekaretia ibukin te tai aei.
Ti kona ni keiakina aio, eng. Ma ti na karaoa riki are iaona nakon kangkangtakin wiira, n teimatoa, ao man taningai okin waak nakon aroia. Ti na waaki nako, ao ti na rauaki imwiina.
N te anga teuana, ngaira taian koraa. Ao ibukiia koraa bwa a na roko n rietataia, a riai n taunaki imwain ae a bwebwe. Au kakoua bwa iango n tabetai ti na namakina te taunaki man kakatai n te maiu aei ke ti otabwaniniaki man namakinan te rootongtong, a na tangira te Atua ao taian kakabwaia man ana euangkerio Iesu Kristo ae e a tia ni kaokaki e na karokoi bwaai aika a kangaanga iangoaia bwa a na riki.
A Roko Kakabwaia man mwiin te Kangaanga
Ni kabane mwioko n tararua a tia n rinanon aia tai ni kataaki ao kangaanga.
E maiu Enoka ma ana aomata n tain te buakaka, buaka ao kawawaean te rara. “Ma e roko te Uea ni maeka ma ana aomata.” Iai irouna te bwai teuana n ana iango ae e kangaanga iangoana ibukiia. E buokiia ni katea Tion—te botanaomata “ti teuana nanoia ao teuana aia iango” ake “a maeka i nanon te raoiroi.”4
Te ataeinimwaane ae Iotebwa, natin Iakobwa, e tewenakoaki inanon te kinono, e kabonakoaki bwa te toro, e kamwaneaki, ao e kitanaki.5 E na riai n tia n taku Iotebwa bwa e a tia te Atua ni mwaninga taekana. Iai iroun te Atua te bwai teuana n ana iango ae e kangaanga iangoana ibukin Iotebwa. E kabongana te tai ni kakatai aio ni kakorakora anuan Iotebwa ao ni katukua n te tabo are e na kamaiua ana utu.6
Iangoa Iotebwa Timiti ngke e kabureaki n te Karabuti i Liberty, e kanga ni bubuti ibukin buokaia Aika Itiaki ake a karawawataaki. E na riai n tia ni miimi bwa e na kanga ni manga kateaki Tion n aron waakin aroaro n taai akanne. Ma te Uea e taekina te raoi nakoina, ao te kaotioti ae e kakanato are mwiina e uota te rau nakoia Aika Itiaki—ao e reitinako ni uota te rau nakoim ao nakoiu7
Ai iraua te tai n ririki ake ngkoa n ana Ekaretia Iesu Kristo ibukiia Aika Itiaki ni Boong aika Kaitira a tia ni bwarannano ao a warenako aia iango Aika Itiaki ngkana e a tia ni kitaniia te Atua? Ma rinanon te bwainikirinaki, kangaanga ao kakamaaku ni kamaunanakoakiia, te Uea ae Atuan Iteraera iai te bwai teuana rikin ana iango ibukiia Ana nanai aika a uarereke. Te bwai ae e kangaanga iangoana.
Tera ae ti reireiakinna man katooto aikai—ao bubua riki man koroboki aika tabu?
Te moan: ake a raoiroi aki anganaki te beeba ni inaomata are a na kona n totokoa mwaruan nuun te mate. Ti riai ni bane n nakonako n taai aika a kangaanga, bwa inanon taai n kaaitara are ti reiakin reirei ake a na kamanoi kateira ao ni karikiira bwa ti na kaan riki nakon te Atua.
Te kauoua: E ataia Tamara are i Karawa ae ti maraki ao bukina bwa Natina ngaira, E na aki kitanira.8
Iangoa teuare te tia akoi, te Tia Kamaiu, are e kabanea angiin ana tai inanon maiuna ni buokiia aoraki, ake a maroaa ao ake a nanouoa man bwarannano9 Ko iangoia bwa e memeere iangoakim Irouna n te bong aei?
Raou aika a tangiraki, tariu ma mwaaneu aika a tangiraki. E na tararuai ngkami te Atua ao ni kawakini ngkami n tain taai aika a kananououa ao ni kakamaaku. E kinai ngkami. E ongo am bubuti. E kakaonimaki ao n onimakinaki. E na kakoroi bukin Ana berita.
Iai ana iango te Atua ae e kangaanga iangoana ibukin arom n ti ngkoe ao te Ekaretia n ikoikotaki—te mwakuri ae e tamaroa ao e kamimi.
Ti karabwako, te Atua, Ibukin am Burabeti.
Ara bong aika a rianako a mena imwaaira, tiaki ibukira. Ao aio bukina ae te Atua e anganiira te kaotioti ae boou! N akeana, te maiu e na kiba rinanon ae kanga e tauaki, n taninga te maabubu bwa e na toki n te aro bwa ti na kona n tiku raoi. A na iango te Uea ibukira a kakawaki riki nakon anne. Ibukina bwa aio ana Ekaretia te Kristo ae maiu, ao ibukina ngkai E kairiia Ana burabeti, ti waaki ni mwananga ao ni kaetirarake nakon taabo ake ti tuai man roroko iai, te rieta ae ti aki kona n iangoia!
Ngkai, tiaki nanona bwa ti na aki aitara ma angibuaka inanon kibara n rinanon maiura ae mamate. E aki nanonaki bwa a na akea te uruaki ni bwaai ni mwakuri ae e kantaningaaki, uruakin mwakeneke, ke aitara n bukakan kanoan boong. N te koaua, bwaai a kona n roko ni buakakaia imwaain ae a manga tamaroa riki.
Ngkai te bwairati n te wanikiba ni buaka ao te kaaben n te kambwana ni wanikiba, I kunea bwa ngkai I aki kona n rinea te kangaanga ae N na aitara ma ngaia n tain te kiba, I kona n rineia bwa N na kanga n tauraoi ao N na kanga arou ni kaitaraa. Tera ae tangiraki inanon tain te kangaanga bon te tauraoi n nano ao te onimaki ae e itiaki.
Ti na kanga ni karaoa aei?
Ti aitara ma koaua ao ti okiri moan kakawakiia, nakon moan tuan te euangkerio, are a moamoa riki kakawakiia. Ko kamatoai oin aroaraom aika a kaineti ma te aro—n aron te tataromauri ao kamatebwaian koroboki aika tabu, ao kawakinan ana tua te Atua. Ko karaoi babaire iaon taneiai aika a tia ni kakoauaki.
Katuruturua am iango iaon bwaai aika ko kona ni karaoi ma tiaki iaon bwaai aika ko aki konai ni karaoi.
Ikota am onimaki. Ao ko ongora n ana taeka ni kairiri te Uea ao Ana burabeti bwa a na kairiko nakon te kamanoaki.
Uringnga, aio ana ekaretia Iesu Krist—ngaia Bweena.
Iangoi rikirake man ana kairi te tamnei n taai aika a tia n riki inanon bwi n ririki n nako. Ni manewei tii tabeua:
-
E katuruturuaki bwa te toa ngaia boton ara nebo n te Tabati.
-
Nakomai Iriirai e katauraoaki bwa boton te mweenga, ana bwai ni mwakuri te Ekaretia ni kakorakoraia aomata ao utu.
-
Ti moanna man te kawai ae rietaata ae tabu ibukin buokaia aomata nako.
-
Kabonganaan rabakau aika a boou n tibwan ana taeka te Atua ao ni karaoan ana mwakuri te Uea e a tia n rangi ni bwainaki inanon te Ekaretia.
E ngae ngke tetere ni maungatabu ni kabuta aikai a na aki kona ni karaoaki n akean bwai ni mwakuri aika moan te kamiimi ibukin rabakau aika a boou.
Tariu ao mwaaneu, Kristo ngaia are n te bwee, a na aki ti nakoraoi bwaai, a na bon kangaanga iangoakiia.
Te Mwakuri ni Bobotia Iteraera e Waaki Nako
N te moan e taraa n ae te buti n aoraki ae kabuta te aonaaba aei e na riki bwa kangaanga n tukan ana mmakuri te Uea. N aron te katooto, waaki ake a bon tataneiai ni katei n tibwauan te euangkerio e na aki kona ni karaoaki. E ngae n anne, te buti n aoraki aei e kaoti waaki aika a boou ao man kamiimi riki n roko irouia naake a koaua ma nanoia. Te mwakuri ni bootia Iteraera e rikirake ni korakora ao ni kakukurei. Bubua ma nga n karaki a kakoaua aio.
Raraou temanna ae tikauarerei ae maeka i Norway e koroboki nakon Harriet ao ngai ni kaota te rikirake ni mwaitin te bwabetito. “N taabo ike e uarereke iai te Ekaretia,” e koreia, tenaan bwebwe a na riki bwa mwaanga, ao mwaanga a na riki bwa uoote!!”
I Latvia, te aine ae e kunea te Ekaretia ngke e mamataku iaon te intanete ao e rangi ni kukurei n reiakina taekan ana euangkerio Iesu Kristo are e kaoti nakon ana boraraoi teuana te aoa imwaaina, ao imwaain banen aia moan reirei mitinare e titiraki bongin te namwakaina are e na bwabetitoaki iai.
I Eurobe mainiku, temanna te aine ae roko ana tareboon mairouia mitinare aine e taku,”Tititati, e aera kam aki kaman tareboon? I a kaman tataninga!”
Angiia ara mitinare a tabetabe riki . A mwaiti aika a reireiniia riki aomata aika a mwaiti. Iai te rikirake n te reitaki imarenaia membwa ao mitinare.
N taai ake ngkoa, ti a tia ni kabaeaki n oin ara kawai are e a karika te buti n aoraki aei bwa kaukan matara. E aki ngkoa ao ae ti bon bae ni kateitei ma bwaa taano ngke a bon tauraoi taian atiibu. N ae e bon riai, ti a reireiniira aron kabonganaan kawai aika a mwaiti, n reitaki ma rabakau aika a boou, ni kainnanoia aomata—ni kawai aika e bon taneiai te aba iai—bwa a na roko n noori, roko ni ibuobuoki ao n roko bwa kaaina.
Ana Mwakuri, Ana Kawai
Aio Ana mwakuri te Uea. E kaoira bwa ti na ukora Ana kawai ni karaoi, ao a na kona ni kaokoro ma ake ti atai ngkoa.
E riki aio nakon Timon Betero ao reirei ake tabeman ake a nako n akawa i Naman Tiberia.
“Ao a aki kona n te bong arei.
Ma ngke e bo mainiku … [e roko], Iesu ao e tei i aon te bike. …
“Ao e taku nakoia, Kabwaka te karaun [mai angatain] te boti, ao kam a kona iai.”
Ao a kabwaka n iterana are teuana ao “aki kona ni katikia iai bwa e uanao te ika.”10
E a tia te Atua ni kaotia ao e na reitanako kaotan baina ae e mwaaka. E na roko te bong are ti na tanrikaaki ao n ataia bwa inanon te tai ni kangaanga, e buokiia te Atua ni kunei kawai aika nakoraoi riki—Ana kawai—ni katea Ueana iaon aan te kateitei ae matoatoa.
I kaota au koaua bwa aio ana mwakuri te Uea ao e na reitia nako ni karaoi mwakuri aika a kangaanga iangoaia ibuakoia natina, Ana aomata. E tauira te Atua inanoni baina n akoi man nanaoanga.
Beretitenti Russell M. Nelson bon Ara burabeti te Atua n ara bong aei.
Ngkai ana Abotoro te Uea, I kaoingkami ao ni kakabwaiai ngkami bwa kam na “kukurei ni karaoi bwaai ni kabane aika a wene ni [mwaakam]; ao ngkanne [ko] aonga ni bon tei naba, ma te koaua ae korakora, n noora ana kamaiu te Atua, ao ibukin baina bwa e na kaotaki.”11 Ao I bertia bwa te uea e na karaoi bwaai aika a kangaanga iangoaia ake a na roko man am mwakuri aika a raraoi. N aran Iesu Kristo, amen.