E ui o tulaga o le aiga o tagata uma e tulaga ese i nisi itu, “O Le Aiga: O Se Folafolaga i le Lalolagi” o loo i ai mataupu faavae e faavavau ia e maua ai se faamoemoega e tulimata’i i ai a o tatou taumafai ia ausia lo tatou gafatia faalelagi. O itulau nei o loo aofia ai ni malamalamaaga e mafai ona fesoasoani ia i tatou ia sili atu le malamalama i mataupu faavae musuia o le folafolaga i le aiga. Afai tatou te faaaogaina na mataupu faavae i o tatou tulaga i le mea sili tatou te mafaia, o le a faamanuiaina i tatou a o tatou fetaomi atu i luma i le ola e faavavau.
1. O i tatou taitoatasi o se vaega o se aiga e faavavau e i ai se faamoemoega paia
Po o a lava foliga o lo tatou aiga i le lalolagi, o i tatou taitoatasi o “se atalii po o se afafine agaga faapelepele a ni matua faalelagi” o e alolofa ia i tatou. I le avea ai ma se vaega o lenei aiga faavavau, o lo tatou faamoemoega paia o le “alualu i luma i le atoatoaga ma iu ai ina iloa [lo tatou] taunuuga paia o ni suli o le ola e faavavau.” (Sei vagana ua ta’ua, o upusii e aumai i le “O Le Aiga: O se Folafolaga i le Lalolagi.”)
Ua i ai so tatou natura ma se taunuuga paia
“O loo molimau mai le Agaga lava ia i o tatou agaga, o fanau i tatou a le Atua:
“Afai foi o fanau i tatou, o suli foi; o suli lava o le Atua, o suli faatasi ma Keriso” (Roma 8:16 – 17).
Ata
child with older man
2. E fesoasoani lo tatou aiga i le lalolagi ia i tatou ia ausia lo tatou taunuuga e faavavau
Na tuuina mai e le Atua ia i tatou ni aiga e fesoasoani ia i tatou e aoao ma tuputupu ae ai a o tatou saili e “agai i luma i le atoatoa” ma mautofi i le ola e faavavau. “O le aiga e totonugalemu i le fuafuaga a le Foafoa,” ma e ui e leai se aiga ua atoatoa, e mafai e le Atua ona fesoasoani ia i tatou ia alualu i luma ma le aiga ua ia i tatou.
Sa lava lou aiga mo Ona faamoemoega
Saunia e Miranda Gaubatz, Iuta, ISA
O lo’u aiga e le o le mea lea e te ta’ua o le aiga “atoatoa”. Na tetea ou matua faatoa 11 ou tausaga, o lea sa tausia ai au e se tina nofofua, galue malosi ma tuuto. Sa ou lagona le pei e tuese matilatila lava i maua i sauniga faamanatuga.
I le avea ai ma se talavou, ou te manatua lou saofai ai i se lesona e uiga i le “O Le Aiga: O se Folafolaga i le Lalolagi,” lo’u ootia a o ou faalogologo i se taitai o le autalavou o molimau mai i le aiga ma le oo ina ou maua la’u lava molimau na faamaonia faalelagi lo’u aiga laitiiti ma e mafai ona maua ai mea uma na ou manaomia i lenei lalolagi o i ai.
E ui lava i lena malamalama, sa ou faa’atu e ave le vasega na manaomia O Aiga e Faavavau i ni nai tausaga mulimuli ane i le Iunivesite o Polika Iaga. Ou te lei manao e nofo i lea vasega ma lea vasega ma faalogologo e uiga i lo’u aiga “e le o atoatoa lelei“. Ae sa amata e lau polofesa le matou vasega muamua i le faamatalaga lenei: “Tatou te talai atu le atoatoa lelei ae ola i le mea moni, ma faalagolago i le Togiola a le Faaola e faia le eseesega.”
Ou te iloa o le aiga e totonugalemu i le fuafuaga a le Tama Faalelagi. E oo lava i aiga e itiiti ifo nai lo le atoatoa, e pei ona sa ou iloa ao talavou, e mafai ona fesoasoani ia i tatou e aoao ma tuputupu ae ai. O le Faaola lava Ia na tausia e se tamāfai faalelalolagi. Ou te matua faafetai ona e mafai e Iesu Keriso ona ave o tatou aiga “e le atoatoa” ma faia ina ia lava e faataunuu ai Ona faamoemoega mo i tatou.
Ata
women walking
3. O le “Aiga” e mafai ona sili atu lona uiga nai lo na o matua ma fanau
E tele sootaga faaleaiga e mafai ona avea ma tausimea paia. O uso, tuafafine, fafine o aiga, tamaloloa o aiga, tausoga, tagata o aiga faale-tulafono, ma isi e mafai ona tulagaese le uunaiga. “E tatau i aiga lautele ona tuuina atu le lagolago pe a manaomia.” O le uunaia o nei sootaga faaleaiga e mafai ona maua ai le lagolago manaomia ma avea ai ma sootaga faatauaina.
E mafai ona e faamanuiaina lou aiga i le tele o matafaioi
Saunia e Sister Sharon Eubank, Fesoasoani Muamua i le Au Peresitene Aoao o le Aualofa
Ua tumu tusitusiga paia i faataitaiga o alii ma tamaitai amiotonu o e na faia se eseesega taua i olaga o lo latou aiga lautele. Na suia e Aperaamo le olaga o Lota i le avea ai ma se uso o lona tama. O Iosefa o Aikupito na laveaiina ona uso ma o latou aiga. I le avea ai ma tagata matutua, sa faamanuiaina e le auuso o Maria ma Mareta le tasi ma le isi ma lo la tuagane, o Lasalo. O Ruta, i le avea ai ma se afafine faaletulafono, na lagolagoina Naomi ona faamanuiaina lea o ia e faavavau i le toe foi mai e ala i le fautuaga a Naomi. Sa lagolagoina e Elisapeta ma Maria le tasi ma le isi o ni tausoga e ala i luitau na siomia ai o la maitaga. E oo lava ia Sorama, o le sa le soo toto, o se lagolago faamaoni ia Nifae ma na vaetamaina ai o ia ma lana fanau e pei o se aiga moni. O lenei vaaiga e lautele atu o le aiga e matuai taua tele i le toatele o e e tele naua mea e ofo atu ae e lagona le vavaeeseina aua e le o i ai so latou aiga autu o le tama, tina, ma le fanau latou te mananao ai.
Ata
people embracing
4. E mafai ona e faia se eseesega i le amataina po o le toefuataiga o se aiga e faavavau
‘Ua mafai e sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.” O le mea e faanoanoa ai, o nisi taimi e faamuta ai faaipoipoga, e malepelepe aiga, pe motusia foi sootaga i le filifili o se aiga e faavavau. E ala atu i nei “sauniga paia ma feagaiga,” e mafai ai “e tagata taitoatasi ona toe foi atu i le afioaga o le Atua“ e tusa lava po o a o latou tulaga faaleaiga. Faatasi ai ma le fesoasoani a le Atua, o le faia ma le tausia o na feagaiga paia i le mea sili e te mafaia e mafai ai ona fesoasoani e te fatuina ai, lipea, pe faamalosia ai lou aiga, i faamoemoega e i ai se aso e toe faatasia ai i latou e faavavau.
Ata
young married couple
5. O le faaipoipoga o se faigapaaga e manaomia ai le faatuatua ma le tatalo
O le folafolaga i le aiga e faamautuina faapea o tane ma ava “e ao ona fesoasoani le tasi i le isi o se paaga tutusa.” Ae o le avea ma paaga faamaoni i le faaipoipoga e mafai ona avea ma se luitau. O lo tatou tausiga, aganuu, aoaoga, tulaga tautupe, aafiaga, ma isi e mafai ona aafia ai le ala tatou te taulimaina ai sootaga ma le auala tatou te puleaina ai o tatou aiga. O loo aoao mai le folafolaga faapea “o faaipoipoga ma aiga manuia” ua faavaeina e ala i le faatuatua, tatalo, salamo, faamagaloga, faaaloalo, alofa, ma isi mataupu faavae a o tatou fefautuaai ma galulue faatasi e taulima o tatou lava tulaga taitoatasi.
Ata
father watching child
6. O le gafatia mo le tulaga faamatua o se vaega o le fuafuaga a le Atua mo le avea ai faapei o Ia
O se tasi o auala e mafai ona tatou avea atili ai e faapei o o tatou matua faalelagi o lo tatou oo atu lea o i tatou lava i le tulaga faamātua. ‘O le uluai poloaiga na tuuina e le Atua ia Atamu ma Eva, e faatatau i lo la agavaa mo le tulaga faamātua, o se tane ma se ava.” E ui o le faaipoipo ma le mauaina o se fanau e le o taimi uma e ogatusa ai ma la tatou fuafuaga, ae e le faapea ai e le o se vaega o le fuafuaga a le Atua. Mo le toatele o i tatou, o le saunia i le faatuatua ma faatalitali i le Alii o se vaega taua o le avea ai e faapei o Ia.
Lē Mauaina o ni Fanau ma le Matou Aiga Faaleuarota
Saunia e John McMullin, Alberta, Kanata
Sa ma mananao lava ma lou toalua o Gennie, i taimi uma ia toatele ni tamaiti. I taimi uma lava. Ae ina ua mavae se tausaga o taumafaiga, sa ma mauaina le faauigaga faafomai mo le lē fanau.
I le taimi muamua, sa tele ni tatalo. O po uma lava ma te uulima ai ma ole atu i le Tama Faalelagi e faamanuia i maua i le tamaitiiti na ma saunia i ai i o ma olaga atoa. Sa ma anapopogi i masina taitasi, ma sili atu i nisi taimi. O masina uma lava ma te lei maitaga ai sa sili atu foi ona faigata. E le gata ina leai se tamaitiiti mo i maua e alolofa i ai, ae na foliga mai sa leai se tali ia ma tatalo. Sa pei na faafofoga mai le Atua ia i maua o ole atu mo le mea sa ma mananao i ai i o ma olaga atoa, ma sa Ia tali mai leai.
Na amata ona ma fesiligia lo ma agavaa. Sa faigofie ona talitonu sa Ia tausia Ana fanau agaga ina ia fananau mai i totonu o aiga e sili atu le faamaoni.
Sa amata ona faigata le auai i le lotu. Sa faigata ona faalogo atu pe na faapefea ona tali mai tatalo a isi, ma le tele o le alofa o le Tama Faalelagi ia i latou.
E lua mea na faaauau ai lava ona ma tumau. Muamua, na ma osifeagaiga ma le Alii ma le tasi ma le isi ina ua faamauina i maua i le malumalu. Sa ma faatasi le tasi ma le isi, ma sa ma naunau ia faatasia i le taimi nei ma i le faavavau.
O le lona lua o le matou aiga faaleuarota. Sa faamanuiaina i maua i le i ai o ni taitai sa masani lelei lava ma le lē fanau. Sa i ai se tuafafine a auauna a Gennie sa oo foi i le lē fanau ma na talanoa sa’o lava e uiga i faigata o le leai o se fanau i le lotu. Sa ma tauivi, ae sa ma iloa isi tagata o le matou nuu o le Ekalesia na tauivi foi faapea.
E le o tele pea ni a ma tali. E lei i ai lava se ma fanau, e tusa lava pe ua uma ona galulue ma ni polofesa faafomai. Ma te le iloa mafuaaga a le Tama Faalelagi, ae ona o loo i ai a ma feagaiga, ma ona e i ai se ma aiga faaleuarota na taliaina ma lagolagoina i maua, sa ma maua le taimi e atiina ae ai le onosai ma le faatuatua faateleina (tagai Eperu 12:12– 13).
Ua ma sagisagi atu i le avea ai ma ni matua. Ma a o ma faatalitali mo lena aso fiafia, ua i ai so ma nofoaga e avea ai ma ni ō o le Ekalesia.
Ata
young children
7. O le mana e foafoa ai le ola e tuuina mai ma leoleoina e le Atua
I le folafolaga, o Aposetolo a le Alii ua “faamaonia le paia o le ola.” Ona e paia le ola, ua tuuina mai ai e le Atua ni poloaiga e uiga i le tuuina atu ma le aveesea o le ola. O le auala tatou te faaaloalo ai i lena mana e i ai ni aafiaga loloto mo le lelei po o le leaga ia i tatou lava ma tagata.
Ata
woman hugging child
8. O le tiutetauave o se matua na tuuina mai e le Atua
Ina ia fesoasoani ia i tatou ia avea faapei o Ia, ua tuuina mai ai e le Atua i le toatele o i tatou uma le avanoa ma le tiutetauave o le tulaga faamatua. Tatou te tali atu ia te Ia “mo le faataunuuina o nei matafaioi.” Ae e mafai foi ona tatou faalagolago i Lana fesoasoani i le sailia o le fiafia ma le manuia i le faaipoipoga ma le olaga faaleaiga a o tatou taumafai e tausia a tatou fanau i le alofa ma le amiotonu ma lagolagoina i latou i o latou luitau.
Ata
couple holding hands
9. E mafai ona tatou tutu atu mo le fuafuaga a le Atua mo Lona aiga
Mai lava i le amataga o le lalolagi, ua avea ma a tatou matafaioi le faalauiloaina o le fuafuaga a le Tama mo Lona aiga ma puipuia mai le faamalepeina mai totonu ma osofaiga mai fafo. ‘Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia ai le aiga.” Malamalama pe aisea ma pe faapefea ona taua.