Ua Na’o Tusiga Faatekinolosi: Talavou Matutua
Na Iu Lava Ina Ou Tautino Atu Sa Ia Te A’u Le Atuatuvale. Sa Fesoasoani Keriso ia te A’u e Alu Ese Mai le Pogisa
Na ou teenaina mo se taimi umi e faapea sa ou manaomia le fesoasoani, ae o le Faaola na aumaia ia te a’u le faamoemoe ma le malamalama na ou manaomia.
Na faafuase’i ona oo mai le pogisa. Na amata ona ou lagonaina le popole ma le atuatuvale e uiga i mea uma e lei mae’a ona foiaina i lo’u olaga. Na ou le toe maua lo’u faatuatuaina o a’u lava ia, ua amata ona ou fesiligia lo’u faatuatua, ma le tele o isi mea. E foliga mai e oo lava i mea faalavefau itiiti ua faateteleina, ma o le tulaga lelei o lo’u olaga ua faafuaseia lava ona matua vevesi.
Sa ou lagona e peiseai o loo o’u tauina se taua ma ni temoni i totonu o lo’u mafaufau.
Sa foliga mai ua siomia a’u e le Pogisa. Ma a o faasolo faaopoopo pea le pagatia o nei lagona, na amata ona ou fesiligia a’u lava i mea e pei o le, “Ae a pe a faapea ua ou le toe i ai loa iinei? Pe e popole pea tagata?” Ma na tali mai temoni o loo i lo’u mafaufau, “O oe ua na’o se pefu i le lalolagi. E leai ma se tasi o le a ono iloa ua e alu.”
O nei mafaufauga na faagapeluina ai a’u i le fefe.
Ae i le taimi atoa o loo o’u feagai ai ma lenei mea i lo’u mafaufau, sa ou faia pea faatinoga masani. Sa ou talanoa i lo’u aiga faapei o loo lelei mea uma---i lo’u fefe ai, na ou lokaina ai o’u lagona mai isi. Sa ou lagona e pei sa ou le mafai ona faasoa atu faigata o loo i lo’u mafaufau.
Sa ou teena foi e faapea o loo i ai moni lava se mea sese. Sa ou fai ifo ia te au lava e le’o ia te a’u se atuatuvale. Ou te lei manao ou te ta’u atu e faapea ou te manaomia le fesoasoani. Sa ou matua fefe lava e faapea afai e iloa e tagata mea ia o loo o’u mafaufauina ma lagonaina, o le a latou teenaina a’u pe mafaufau o a’u o se tagata vaivai pe valea. Na ou matua lagona le ma i le le mafai ona ou alu ese ma le pogisa.
Na I’u Lava Ina Ou Tautino Atu Ou Te Manaomia Se Fesoasoani
Sa ou faaauau ai faapea seia o’o i le tasi aso, na ou maua ai le mafanafana mai upu a Elder Jeffrey R. Holland. Sa ia saunoa mai: “Afai e afaina lou pitogaau, o le a faamoemoeina oe e le Atua e te saili atu i se faamanuiaga faaleperisitua ma saili ia maua se togafitiga sili faafomai. E faapena foi i faaletonu faalelagona. Ua faamoemoeina i tatou e lo tatou Tama i le Lagi ia faaaoga ia meaalofa ofoofogia uma ua Ia saunia i lenei tisipenisione mamalu” (‘’Peiseai o se Ipu ua Nutililii,” Ensign po o le Liahona, Nov. 2013, 41).
O lenei savali ootia na fesoasoani ia te a’u e talia loa e faapea o loo o’u feagai moni ma le gasegase o le mafaufau ma e leai se ma i le moomia o le fesoasoani. O le mea sili na taua, na faamanatu mai ia te a’u e faapea ou te le vaivai ma e mafai ona faamaloloina a’u.
I lena po, na ou faia ai se tatalo faamaoni silisili ua sili ona ou tuuina atu i lo’u olaga atoa. I lo’u tagi lotulotu ai, na ou faalotomaualaloina ai a’u lava ia ma sasaa atu lo’u loto i le Tama Faalelagi. Sa ou talosaga atu ia te Ia mo se taitaiga ina ia ou iloa le mea e tatau ona ou faia.
I le mae’a ai o lena tatalo, na ou lagona le uuna’iga e talanoa i la’u epikopo. Sa agalelei ma malamalama o ia---e le tatau na ou faamoemoeina se mea i lalo mai nai lo lena. Ma sa ia fesoasoani mai i le taimi lava lea ia ou lagona le filemu ma le mafanafana sili mai lo’u Tama oi le Lagi. Sa Ia fesoasoani ia te a’u ia iloa e malamalama le Faaola i mea o loo feagai ma a’u, tusa lava pe ou te le malamalama i mea uma. Sa Ia fesoasoani foi ia te a’u e faaaoga meafaigaluega ou te manaomia.
Faaaoga Uma Meafaigaluega a le Atua
Sa ou aoao e faapea o mataupu o le soifua maloloina faalemafaufau e mafai ona faamamaina e ala i le faatuatua ma ala i le mana o Iesu Keriso, e moni lava, ae o lena faamalologa i nisi o taimi e manaomia le fesoasoaniga mai isi foi punaoa. Sa ou lagonaina le malosi ma le faamoemoe ma le malamalama na sau mai meafaigaluega uma e lua faaleagaga ma le faaletino. O nisi nei o nai tu masani lea na aumaia le malamalama i lo’u olaga i aso taitasi lea e mafai foi ona e faataitaia:
-
Amata ma faai’u lou aso i se tatalo faatauanau---fai atu ni fesili patino, saili taitaiga, ma faailoa atu le loto faafetai.
-
Iloa ma talia faapea e lelei le faanoanoa ma tagi i nisi o taimi, ae aua le faatagaina le faanoanoa e faalilofia ai oe! Talanoa atu i se uo faatuatuaina po o se e pele ia te oe ia fesoasoani e siitia oe i luga i aso faigata.
-
Pe a e alu i lou moega i le po, ia e fiafia mo oe lava ia mo le mafai ona e saofaga atu i lena aso! Ia faamanatu ia te oe lava ia faapea e te malosi.
-
Ia faitau tusitusiga paia ma lauga o le konafesi aoao pe piki ni tusi e fesoasoani ia te oe lava e faamaai ai lou mafaufau ma lou faatuatua ia Iesu Keriso.
-
Ia faasoa atu i au uo faatuatuaina, tagata o le aiga, po o lou epikopo mo le lagolago. E mafai ona ia fesoasoani ia te oe e saili se faufautua pe a manaomia.
-
Ia iloa e leai se mea e sese ai le saili atu mo le fesoasoani faapolofesa! O polofesa e mafai ona fesoasoani tele i le aoao mai ina ia faatoilaloina ma pulea tauiviga o le soifua maloloina faalemafaufau. O le faaaogaina o le polokalama faufautua e leai se totogi i la’u iunivesete sa fesoasoani tele ia te a’u.
-
Aua le ma e vaai se fomai pe inu ni fualaau mo le atuatuvale---o meafaigaluega ia ua saunia e le Tama Faalelagi mo i tatou mo lo tatou faamalologa.
-
Ia fai galuega talafaasolopito o aiga ma malumalu ina ia fesoasoani ia te oe e manatua ai isi o loo i le isi itu o le veli o loo tatalo foi mo lou faamalologa! O le lauga a Elder Dale G. Renlund o “Galuega o Talafaasolopito o Aiga ma Malumalu: Faamauga ma Faamalologa” o loo aumaia ai vaaiga loloto i faamanuiaga folafolaina i le faia o galuega faalemalumalusa.
Taofimau i le Malamalama o Keriso
Mo se taimi umi sa ou le manatu e mafai ona faalogoina le leo o le Agaga pe lagonaina le alofa o le Atua i taimi e atuatuvale ai. Sa ou lagona le pei o loo o’u faaopeopea pea i se lua o le pogisa. Ae o se i’u malamalama itiiti mai le Faaola na fesoasoani ia te a’u e taofimau i le faamoemoe. Ma i le faasoa atu e uiga i o’u tauiviga, ua ou aoao mai ai e faapea e toatele a’u uo na i ai foi aafiaga o tauiviga o le soifua maloloina faalemafaufau---ma na matou fesoasoani e faamautinoa e le tasi le isi e faapea e le o tuua na’o i matou.
O le na avea muamua ai a’u ae ou te lei liliu atu i le Tama Faalelagi mo le fesoasoani ma le ua avea ai nei a’u o ni tagata e toalua ua sili ona eseese. Ana le seanoa lena vaitaimi pogisa na ou asaina ou te le maua le faatuatua ma le molimau ia Iesu Keriso ua ia te a’u i le aso nei. Ua ou te’a atu ma le lotofaafetai mo le malamalama lea na Ia aumaia i lo’u olaga lea e fesoasoani ia te a’u e faatoilaloina temoni ma le atuatuvale i lo’u mafaufau. Ou te iloa e faapea na Ia mafatia mo o tatou puapuaga uma ma faapea e malamalama atoatoa o Ia i mea o loo feagai ma i tatou (tagai i le Alema 7:11--14) ma faatasi ai ma Ia, e tatou te mafai ai pea ona taofimau i le faamoemoe ma le malamalama.